Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 67

Ixiri sa Yerusalemu

Ixiri sa Yerusalemu

Hanko nikookele iyaakha sa muculi. Nehemiya aari Muisarayeli yoowo aakhala o epooma ya Susa o Persiya nave aari mulapeli a Mwene Artaxerxe. Nehemiya munnawe aarwa o Yuteya ni michaka yoothananiha: ‘Achu o Yuteya annatepa ohaawa. Ixiri sa Yerusalemu sookhuculiwa ni masele a milako aasya.’ Nehemiya aatepa othanana. Owo aanaachuna oya o Yerusalemu wi akhaviherye, mwawiihiiha aavekela wi mwene amweemererye oyawo.

Nihiku nimoha, mwene aahoona wi Nehemiya aari oothanana. Owo aamukoha: ‘Tiheeni enoothananiha?’ Nehemiya aamwaakhula: ‘Kini kiwerye hai ohithanana eniiha epooma evithiwevo makholo aka emwaryiwe?’ Nto mwene aamukoha: ‘Yookhala onachunaawe okiveka?’ Moohilekela Nehemiya aavekela ni masu oohiiweya. Voocharela aahi: ‘Mukirume o Yuteya wi kuuluule oteka epooma.’ Mwene aamweemererya Nehemiya oyawo, nave mwene aapaka marehereryo wi eece phaama mu mphiro. Aamweera tho Nehemiya okhala mutokweene o Yuteya nave aamvaha miri wi atekeno mikhora sa epooma.

Vaavaa aaphiyaleiye o Yerusalemu, owo aavarerya ixiri sa epooma. Aahaathukumanya anamukucho ni asitokweene nave aahaaleela: ‘Epooma ahu eri milepe. Hankooni nteke wiiliwiili ixiri.’ Achu yaaheemererya nave yaapacerya oteka ixiri.

Nyenya amwiicani a Isarayeli yaanaaphuca eriki: ‘Naamwi etenke ixiri, awelavoru vasulu nanthala enamvakareya yoothene.’ Anamateka hiyaapwacha ophuca iwo nave yaatitela oteka. Exiri yaanawela yoolipeene.

Amwiicani yaalakelela orwa mmakupa oohiyanahiyana wi emunyaanye Yerusalemu. Vaavaa Ayuta yiiwalaaya, yaakhalano woova. Nyenya Nehemiya aahi: ‘Muhituthuwe va nthowa na amwiicani. Haavo onawerya okhoma ni Muluku.’ Aahaathanla alipeleli wi ewaakiheke anamateka, nave amwiicani hiyawenrye opahula.

 Ixiri ni masele saakwaaxiwa otekiwa mmahiku 52 pahiru. Yaamalinhaaya, Nehemiya aawiichana Alevi oothene o Yerusalemu. Owo aahaakawanya makhuuru meeli. Awo yaawela va exiri oweha Mulako Wosalani nave yaaheeceeca eyaaka mithoko soohiyana orukurerya epooma. Awo yaanoopa mapeca, achakare nave yaanamwiipela Yehova. Estra aakhalano nikhuuru nawe, nave tho Nehemiya aakhalano nikhuuru nawe ophiyerya ekumana va empa ya mithukumano. Achu oothene—alopwana, athiyana ni anamwane—yaavaha mikucho wa Yehova nave yaanachapa. Ovuwa wa ochapa waya waaniiweya ocai.

“Hinavo nivaka nni nophoreihe.”​—Isaiya 54:17