Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Ohuserye Miyaha sa Piipiliya

 MWAHA 2

Muluku Aampaka Mulopwana ni Muthiyana Oopacerya

Muluku Aampaka Mulopwana ni Muthiyana Oopacerya

Yehova aareherya nipuro nawiichaniwa Eteni. Nipuro nlo saakhalamo ithutu, miri ni axinama. Voocharela Muluku aampaka mulopwana oopacerya, Atamu. Muluku uupale echaya nave aveerela mphulani. Woosuwela echu yeeren’ye? Mulopwana owo aapacerya omumula! Yehova aamuleela Atamu wi akhapeleleke nipuro nenle, nave tho aamuruma waavaha masina axinama oothene.

Yehova amvaha Atamu nlamulo noochuneya. Muluku aaloca ni Atamu: ‘Oni onalya sawiima sa miri sa mmacani, nto ohilye sawiima sa mwiri mmoha. Walya sa yoowo, onamukhwa.’

Ohoolo waya, Yehova aaloca: ‘Kinammupakela Atamu mukhaviheryi awe.’ Aamuruuhela Atamu ikhove itokweene, nave Muluku aakuxa eparari emoha ya Atamu aampakano muthiyana. Nsina nawe naari Eva. Atamu ni Eva yaakhala achu oopacerya. Apwanne Atamu  aasiveliwa okhalano mwaariye? Aai, owo aatepa ohakalala nave aaloca: ‘Ola toolikana ni miyo, ntakhara Yehova ompanke ni eparari aka.’

Yehova aamuleela Atamu ni Eva wi yaayareke anamwane wi esareye veelaponi. Owo achuna wi elapeke vamoha ereheryaka elapo yoothene wi ekhale parataiso. Nyenya eyo hiyeeren’ye. Nthowa heeni? Nnahaala osuwela mu mwaha onacharela.

“Mpatusa, wopatxeryani, apatunse yawo mulopwana ni muthiyana.”​—Mateu 19:4