Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mwaahusihe Anamwane Anyu

 Yoohuserya 8

Yosiya Aakhalano Asinthamwene Aphaama

Yosiya Aakhalano Asinthamwene Aphaama

We onuupuwela wi ti woovila weera yeeyo eri yaphaama?— Achu ancipale anuupuwela wi ti yoovila. Piipiliya onnanleela wi waari woovila wa mmiravo iichaniwa Yosiya weera yeeyo yaari yaphaama. Nnya Yosiya aakhalano asinthamwene aphaama yaawo yaamukhavihenrye. Haya nihuserye sincipale vooloca sa Yosiya ni asinthamwene awe.

Tiithi a Yosiya aari Amooni, mwene o Yuuta. Amooni aari oonanara murima nave aalapela soophwaniherya. Vaavaa tiithi a Yosiya aakhwileiye, Yosiya aakhala mwene o Yuuta. Nnya Yosiya aarino iyaakha sa oyariwa thanu nararu pahiru! We onuupuwela wi owo aari oonanara murima ntoko tiithi awe?— Hooye!

Sofoniya aahaalopola achu wi ehilapeleke soophwaniherya

Naamwi aari mmiravo, Yosiya aanachuna omwiiwelela Yehova. Nnya Yosiya aathanla pahiru okhalano asinthamwene mwa achu yaale yaamusivela Yehova. Nave awo yaamukhaviherya Yosiya weera yeeyo yaari yaphaama. Taani yaari asinthamwene a Yosiya?

 Nthamwene mmoha aari Sofoniya. Sofoniya aari mulipa miririmo aalopola achu o Yuuta wi ichu soonanara saahaala weereya nthowa na olapela soophwaniherya. Yosiya aahinwiriyana Sofoniya nave aamulapela Yehova, ohiya soophwaniherya.

Nthamwene mukina a Yosiya aari Yeremiya. Owo aarino iyaakha soolikana ni Yosiya, nave awo yaakhala mapuro awaacamana vaavaa yinnuwaaya. Awo yaari asinthamwene aphaamaxa ophiyerya Yeremiya orepa ncipo navameekhaaya vooloca sa munkhela awe vaavaa Yosiya aakhwileiye. Yeremiya ni Yosiya yaakhaviheryana mukina ni mukhwaawe weera yeeyo yaari yaphaama ni omwiiwelela Yehova.

Yosiya ni Yeremiya yaakhaviheryana mukina ni mukhwaawe weera yeeyo yaari yaphaama

Tiheeni onaweryaawe ohuserya orweela wa yootakiherya ya Yosiya?— Naamwi Yosiya aari mmiravo mukhaani, owo aanachuna weera yeeyo yaari yaphaama. Yosiya aasuwela wi aaphwanela okhalano asinthamwene anamusivela Yehova. Wiikasope, waathanle asinthamwene yaawo anamusivela Yehova nave anahaala wookhaviherya weera yeeyo eri yaphaama!

MWAALAKHANYE MPIIPILIYANI MWANYU

  • 2 Matharihelo 33:21-25; 34:1, 2; 35:25