Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mwaahusihe Anamwane Anyu

 Yoohuserya 9

Yeremiya Haamaanle Oloca sa Yehova

Yeremiya Haamaanle Oloca sa Yehova

Ntakhara heeni achu aananariwa ni Yeremiya

Yehova aamoopola Yeremiya

Ikwaha ikina achu annantheya nari onanariwa ni hiyaano vaavaa nnaaleelaahu vooloca sa Yehova. Ela poti oneeriha ohiya oloca sa Muluku. We wontoko woona hiihaa?— Piipiliya onnanleela sa mmiravo yoowo aamusivela Yehova nnya aahanle vakhaani ohiya oloca sa Yehova. Nsina nawe naari Yeremiya. Haya nihuserye sincipale vooloca sa yoowo.

Vaavaa Yeremiya aareiye mmiravo, Yehova aamuleela wi owo aaphwanela waalopola achu ocharuwa weera ichu soonanara. Ela yaari yoovila wa Yeremiya, nave owo aari awoova. Yeremiya aamuleela Yehova: ‘Kootepa okhala mmiravo wi kiloce’. Nto Yehova aahi: ‘Ohithanane kiri ni weyaano wi kiwaakihe.’

Hiihaa Yeremiya aapacerya waalopola achu wi yaahicharuwa yaahaala olakiwa.  We onuupuwela wi achu yaaheera yeeyo Yeremiya aalonceiye?— Hooye. Awo yaanamutheya nari onanariwa vancipale ni yoowo. Akina yaachuna omwiipha! We onuupuwela wi Yeremiya oona hai?— Yeremiya aanoova nave aahiloca: “Nkirwatho kilotxa mwa nsina na Apwiya.” Mano Yeremiya aahimaala chiryene?— Hooye, owo haamaanle. Yeremiya aanamusivela Yehova vancipale ophiyerya ohiwerya ohiya oloca sa yoowo. Nave woona wi Yeremiya haahin’ye, Yehova aamukhapelela yoowo.

Ntoko yawooniherya, ekwaha emoha alopwana akina oonanara yaamurihela Yeremiya mu nlici nawiixa noosareya matope. Yeremiya haarino yoolya nari maahi. Alopwana yaale yaachuna omuhiya Yeremiya mu nlici nenlo wi akhwe. Nnya ni nikhaviheryo na Yehova, Yeremiya aahoopowa!

Tiheeni onaweryaawe ohuserya orweela wa yootakiherya ya Yeremiya?— Naamwi Yeremiya ikwaha ikina aanoova, owo haamaanle oloca sa Yehova. Vaavaa we onalocaawe sa Yehova, achu poti wootheya nari onanariwa. We poti wuuliwa muru nari woova. Nnya ohihiye oloca sa Yehova. Yehova onahaala wookhaviherya elukuluku yoothene, hiihaa ntoko aamukhavihenryeiye Yeremiya.

MWAALAKHANYE MPIIPILIYANI MWANYU