Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mwaahusihe Anamwane Anyu

 Yoohuserya 6

Tavite Haari Awoova

Tavite Haari Awoova

Tiheeni oneeraawe wakhala awoova?— Akhweya we onnaya wa amamaa ni apaapaa wi yookhaviherye tho. Nnya ookhalavo muchu mukina onawerya wookhaviherya. Owo tooweryaxa ompwaha muchu ori oothene. Woomusuwela taani yoowo?— Aayi, ti Yehova Muluku. Haya nloce sa mmiravo onalociwa Mpiipiliyani nsina nawe Tavite. Tavite aasuwela wi Yehova aahaala omukhaviherya elukuluku yoothene, nto Tavite hoova.

Tavite ovinyerya ari mwaana, asitiithi awe yaamuhusiha omusivela Yehova. Eyo yaamukhaviherya Tavite ohikhala awoova naamwi seereya ichu sawoopiha wa yoowo. Tavite aasuwela wi Yehova aari Nthamwene awe nave Owo aahaala omukhaviherya. Elukuluku emoha, Tavite akhapelelaka ipucepuche, aarwa mwaco mutokotoko nave aphara epucepuche ni eyano awe! We woosuwela tiheeni Tavite enreiye? Tavite aamwiikara mwaco nave mwawooneya amunyoka ni mpilima awe wa mmatani! Vakina vaya vaavaa koloma aaphanreiye epucepuche, Tavite aamunyoka tho! We onuupuwela wi taani aamukhavihenrye Tavite?— Aayi, aari Yehova.

Yaakhalavo elukuluku ekina vaavaa Tavite xaxaxa aareiye oolipa murima. Aisarayeli yaawana ni achu yiichaniwa Avyilisteu. Mukhoco mmoha a Avyilisteu aari mulopwana oorakamaxa, nakuru! Nsina nawe Koliya. Nakuru yoola aanaanyemula anakhoco a Aisarayeli ni Yehova. Koliya aahaawopa anakhoco a Aisarayeli wi erwe wi ewane ni yoowo. Nnya Aisarayeli oothene yaanoova owana ni yoowo. Vaavaa Tavite iiwaleiye vooloca sa yeeyo, Owo ahiloca ni Koliya: ‘Mi kinahaala owana ni we! Yehova onahaala okikhaviherya, nave Mi kinahaala owiipha!’ We onuupuwela wi Tavite aari oolipa murima?— Aayi, aari oolipaxa murima. We onnachuna osuwela yeeyo yeren’ye voocharela?

Tavite aakuxa mpilima awe ni maluku mathanu oovilikeya, nave aya wi awane ni nakuru. Vaavaa Koliya aamonneiye Tavite wi aari mmiravo, owo aahimunyemula. Nnya Tavite aahiloca ni yoowo: “Weyano onarwa wa miyano ni nsipàtxa, nto miyano kinaya wa weyaano mwa nsina na Apwiya Muluku!” Vano Tavite aahela nluku va mpilima awe, aachimaka ayaaka aariwo Koliya, nave amvonyerya  owo. Nluku naammana Koliya variyari va miitho! Nakuru owo aamorela vathi, akhwa! Avyilisteu yaahoova ophiyerya oothene echawa. Yaweren’ye hai wi mmiravo mukhaani ntoko Tavite awerye omwiipha nakuru?— Yehova aamukhaviherya owo, nave Yehova aari ooweryaxa ompwaha nakuru yoole!

Tavite haari awoova ntakhara wi owo aasuwela wi Yehova aahaala omukhaviherya

Tiheeni onaweryaawe ohuserya orweela wa yaweereya ya Tavite?— Yehova tooweryaxa ompwaha muchu mukina. Nave owo Nthamwene aa. Vano elukuluku ekina onahaalaawe woova, wuupuwele, Yehova poti wookhaviherya wi olipe murima!

MWAALAKHANYE MPIIPILIYANI MWANYU

  • Salmo 56:3, 4

  • 1 Samuwele 17:20-54