Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Mwaahusihe Anamwane Anyu

 Yoohuserya 2

Repeka Aanachuna Omuhakalaliha Yehova

Repeka Aanachuna Omuhakalaliha Yehova

Repeka aari muthiyana aamusivela Yehova. Nsina na iyawe naari Isaaki. Isaaki tho aanamusivela Yehova. Repeka aamusuwenle hai Isaaki? Repeka oonihenrye hai wi aanachuna omuhakalaliha Yehova? Haya nihuserye sincipale vooloca sa Repeka.

Asitiithi a Isaaki yaari Aaparahamu ni Saara. Awo yaakhala mu elapo ya o Kaanani; weiwo achu hiyaamulapela Yehova. Nnya Aaparahamu aachuna wi mwanawe amuthele muthiyana aamulapela Yehova. Nto owo aamuruma mulapeli awe, akhweya Eliyeseri, wi amwaavyerye Isaaki muthiyana o elapo ya Nahori, weiwo yaakhalawo amusi akina a Aaparahamu.

Repeka aaya o Kaanani ni Eliyeseri nave aatheliwa ni Isaaki

Eliyeseri aacimula ni amulapeli akina a Aaparahamu. Owo waari mukwaha woorekama vancipale. Awo yaakuxa ikameelo khumi wi eteexe yoolya ni samahala. Eliyeseri aaya omusuwela hai muthiyana aahaaleiye omuthanlela Isaaki? Vaavaa Eliyeseri ni amulapeli akina yaaphin’yaaya o Haraani, awo yaaheemela veehimeni ntakhara Eliyeseri aanasuwela wi voohilekela achu yaahaala orwa orika maahi. Owo aavekela wa Yehova nave aaloca: ‘Wakhala wi komveka namwali maahi nave owo akivaha miyo ni ikameelo  aka, kinahaala osuwela wi ti muthiyana yoowo mmuthanliyaanyu.’

Vano namwali Repeka aarwa veehimeni. Piipiliya onaloca wi owo aatepa oreera. Eliyeseri aamveka maahi, nave Repeka aahi: ‘Wurya. Kinamurika tho maahi makina wi kiwuryihe ikameelo saa.’ Nkuupuwela! Ikameelo soovoliwa nchanana sinnawurya maahi mancipale, hiihaa waanachuneya wi Repeka achimakele weehimeni wiiliwiili. We onnoona va eruku moota Repeka onalapeiye mwakuru?— Eliyeseri aatikhiniheya ni moota Yehova aakhunleiye nivekelo nawe.

Eliyeseri aamvaha Repeka samahala sincipale. Repeka aanwopa Eliyeseri ni akapuro akina wi eye vaate va emusi awe. Eliyeseri aaloca ntakhara heeni Aaparahamu aamuruminheiye nave moota Yehova aakhunleiye nivekelo nawe. Emusi ya Repeka yaahakalala weemererya wi Repeka atheliwe ni Isaaki.

Repeka aasiveliwa olapa mwakuru wi avahe maahi ikameelo

Nnya we onuupuwela wi Repeka aanachuna otheliwa ni Isaaki?— Repeka aanasuwela wi Yehova taamuruminhe Eliyeseri. Mwawiihiiha vaavaa emusi ya Repeka yaamukonhaaya wakhala wi owo aanachuna oya o Kaanani wi atheliwe ni Isaaki, Repeka aahaakhula: ‘Aayi, kinnachuna.’ Moohilekela, Repeka aacimula ni Eliyeseri. Vaavaa awo yaaphin’yaaya o Kaanani, Repeka aatheliwa ni Isaaki.

Nthowa nawi Repeka aaheerano yeeyo Yehova aachuneiye wi eere, Yehova aamureeliha Repeka. Iyaakha sincipale ohoolo, Yesu aayariwa mu emusi ya Repeka! Wakhala wi we ori ntoko Repeka nave onamuhakalaliha Yehova, owo onahaala wooreeliha tho.

MWAALAKHANYE MPIIPILIYANI MWANYU