Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

‘Mwikhapelele Mu Osivela wa Muluku’

 MWAHA 1

“Ntakhara Wuwu ti Osivela wa Muluku”

“Ntakhara Wuwu ti Osivela wa Muluku”

“Ntakhara wuwu ti osivela wa Muluku, wi nikhapelele malamulo awe: nave malamulo awe hari óveliha.”1 YOHANE 5:3.

1, 2. Tiheeni enaweerihaani omusivela Yehova Muluku?

NYUWAANO munnamusivela Muluku? Wakhala wi mohiiveleela wa Yehova Muluku, naakhulo nanyu nnahaala okhala neeparipari—aai! Chiryene ti yaphaama wa hiyo omusivela Yehova. Osivela wahu wa Muluku ori waakhulela osivela wawe wa hiyo. Piipiliya onnaloca eyo mmukhalelo ola: “Ninnamusivela, ntakhara Yowo [Yehova] tápachenrye onsivela.”1 Yohane 4:19.

2 Yehova tonapacerya wooniherya osivela wawe wa hiyaano. Owo oonivaha nipuro naphaama veelaponi. Onnathokororya soothowa sahu soomwiilini. (Mateyu 5:45) Opwaha yeeyo onnathokororya soothowa sahu soomunepani. Owo oonivaha Masu awe Piipiliya. Mwawaacererya, onnaniwopa wi nivekeleke wa yoowo ni nroromelo nawi onahaala oniwiriyana ni onivaha munepa awe waweela wi onikhaviherye. (Salmo 65:2; Luka 11:13) Opwaha yeeyo, oonivaha Mwanawe ookhweleyaxa akhala Yawoopola wi niwerye okhurumuweliwa soocheka ni okhwa. Osivela wa mukhalelo taani Yehova onooniheryeiye wa hiyo!Mwaalakhanye Yohane 3:16; Aroma 5:8.

3. (a) Wi niikhapelele mu osivela wa Muluku, tiheeni enachuneya? (b) Nikoho taani nookhweleya nnaphwanelaahu othokororya, nave naakhulo nnaphwanyeya woowi?

3 Yehova onachuna wi niphure osivela wawe okhala wookhala.  Wakhala wi nnahaala ophura naari hooye, enahaala orweela wa yoothanlaahu. Masu a Muluku annanceenyerya: “Mwikhapelele mkhatinyu musivela wa Muluku . . . ni oweherya okumi wohimala.” (Yuda 21) Nsu “mwikhapelele mkhatinyu” ninnooniherya wi naariki niikhalele mu osivela wa Muluku, nnaphwanela weeravo echu. Hiyaano nnaphwanela waakhulela osivela wawe mu saweera. Mwawiihiiha, nookhalavo nikoho nookhwela wi nthokororye. ‘Kini kooniherye hai osivela waka wa Muluku?’ Naakhulo nnaphwanyeya mmasu ooveereliwa a murummwa Yohane: “Ntakhara wuwu ti osivela wa Muluku, wi nikhapelele malamulo awe: nave malamulo awe hari óveliha.” (1 Yohane 5:3) Nnahaala weera phaama waalikhela yootaphulela ya masu  yaala, woona wi nnachuna wooniherya ophiyerya mweryo taani nnamusivelaahu Muluku ahu.

“OSIVELA WA MULUKU” ONATAPHULELA EHEENI

4, 5. (a) Nsu “osivela wa Muluku” tiheeni nnathoonyeryaaya? (b) Mutharihe ti mwawiihai osivela wa Yehova waapacenryaaya wunnuwa mmurimani mwanyu.

4 “Osivela wa Muluku”—tiheeni murummwa Yohane aareiyeno mmuupuweloni vaavaa aarempeiye masu yaala? Masu ala anataphulela, ohiya osivela wa Muluku wa hiyaano, nyenya osivela wahu wa Muluku. Munnawerya wuupuwela vaavaa osivela wanyu wa Yehova waapacenryaaya wunnuwa mmurimani mwanyu?

Wiiveleela ni opatiso onnapaka mapacereryo a okumi wa omwiiwelela Yehova onaceenyeryiwa ni osivela

5 Muupuwele mu elukuluku vakhaani, vaavaa mwaapacenryaanyu ohuserya eparipari vooloca sa Yehova ni yookhwela awe, ni vaavaa mwaapacenryaanyu wooniherya nroromelo. Nyuwaano mwaapacerya wiiwexexa wi naamwi muyariwe mu yoocheka oorakamelana ni Muluku, Yehova moorweela wa Kiristu oohula ephiro wi mphwanye ophaameya yoowo Aatamu oyeleenleiye nave wi mphwanye okumi woohimala. (Mateyu 20:28; Aroma 5:12, 18) Nyuwaano mwaapacerya wiiwexexa esisapo ya ephepa yeeyo Yehova opankeiye ya omveleela mwanawe ookhweleyaxa wi akhwe ntakhara nyuwo. Murima anyu waatannyeya, nave mwaapacerya omusivela Muluku yoowo oonihenrye osivela otokotoko wa nyuwo.Mwaalakhanye 1 Yohane 4:9, 10.

6. Osivela weeparipari onooniheryiwa hai, nave tiheeni osivela wa Muluku oweerinhaayani opaka?

6 Nyenya osivela iwo, waari mapacereryo a osivela weeparipari wa Yehova. Osivela tahi pahiru moonelo; naari wiimoona oloca. Osivela wa Muluku onnapwahererya ohiya oloca, “miyaano kinnamusivela Yehova.” Ntoko nroromelo, osivela weeparipari onooniheryiwa moorweela wa saweera. (Yakopo 2:26) Xaxaxa, osivela onooniheryiwa ni miteko wa yoowo nnamusivelaahu. Vaavaa osivela wa Yehova waapacenryaaya wunnuwa mmurimani mwanyu, nyuwaano  mwakhalano nchuno na okhala mmukhalelo onamuhakalaliha Tiithi anyu a wirimu. Nyuwaano mwa namoona oopatisiwa? Wakhala wi ti hiiha, osivela otokotoko ni nroromelo wa Yehova, saaweerihaani opaka yoothanla yookhweleyaxa ya okumi anyu. Mwaahiiveleela wa Yehova wi mweere yookhwela awe, nave mwaahooniherya wiiveleela wanyu moorweela wa opatiso. (Mwaalakhanye Aroma 14:7, 8.) Waakhwaniherya nlakano nenla wa Yehova enaphitaanyerya yeeyo murummwa Yohane olonceiye voocharela.

“WI NIKHAPELELE MALAMULO AWE”

7. Malamulo makina a Muluku taavi, nave okhapelela yaawo onaphitaanyerya eheeni?

7 Yohane ooloca yeeyo osivela wa Muluku onataphulelaaya: “wi nikhapelele malamulo awe.” Taavi ari malamulo a Muluku? Yehova oonivaha malamulo mancipale orweela Mmasu awe, Piipiliya. Ntoko yootakiherya, owo onnawatiiha saweera ntoko, ohapaliwa, ocapaheya, othamala soophwaniherya, wiiya, ni wootha. (1 Akorinto 5:11; 6:18; 10:14; Aefeso 4:28; Akolose 3:9) Okhapelela malamulo a Muluku onaphitaanyerya okhala mwawiiwanana ni malakiheryo awooneya a meecelo a Piipiliya.

8, 9. Nnii nsuwele hai yeeyo enamuhakalaliha Yehova naamwi mmikhalelo seiho ihirino nlamulo nawooneya? Mvahe yootakiherya emoha.

8 Wi nimuhakalalihe Yehova, hinnaphwanela wiiwelela malamulo awooneya pahiru, nyenya nnaphwanela osuwela moonelo wa Yehova vooloca sa mwaha. Yehova hanalamulela otaphuwa wahu ni malamulo anahoolela mukhalelo ori woothene wa okumi ahu. Mwawiihiiha, nihiku nri noothene, nnahaala okumanaka ni mikhalelo seiho ihirino nlamulo nawooneya. Mmikhalelo seiho, nnii nsuwele hai yeeyo enahaala omuhakalaliha Yehova? Piipiliya ookhalano ikano sawooneya sa mukhalelo wa muupuwelo wa Muluku. Vaavaa nnamuhuseryaahu Piipiliya, ninnahuserya yeeyo Yehova onasiveleiye ni yeeyo oniiceiye. (Mwaalakhanye Salmo 97:10; Masiposipo 6:16-19) Ninnaphiyerya okhalano  moonelo ni saweera seiho sinamuhakalaliha. Voopwahaxa ninnahuserya vooloca sa omuchu ni iphiro sa Yehova, opwaha yeeyo, nnahaala weemererya wi muupuwelo awe ohoolele soolakelela sahu ni ovolowela saweera sahu. Mwawiihiiha, naamwi mmikhalelo ihirino nlamulo nawooneya na Piipiliya, hiyaano nnanwerya osuwela “okhwela wa Apwiya ti sheni.”Aefeso 5:17.

9 Ntoko yootakiherya, Piipiliya haanono nlamulo nawooneya nnakhwatiiha woona ifilme naari woona miyaha sa TV seiho inooniherya nlala ni ocapaheya. Apwanne hiyaano nnachuna nlamulo nawooneya nnahiiha woona ichu seiho? Hiyaano noosuwela moonelo wa Yehova vooloca wa miyaha seiho. Masu Awe, mwawooneya annanleela: “Nyenya okumi awe [Yehova] onnamwicha yowo onasiveliwa nlala.” (Salmo 11:5) Piipiliya tho onnaloca: “Muluku anarwa–áthoriha achapaheya ni alipa-oraruwa.” (Ahebri 13:4) Wuupuwelela masu yaala ooveereliwa, ananwerya onikhaviherya osuwela phaama tiivi eri yookhwela ya Yehova. Mwawiihiiha ninnakhooca woona miyaha inooniherya meerelo oothene yaawo Muluku oniiceiye. Ninnasuwela wi eyo ennamuhakalaliha Yehova vaavaa nnasepaahu meecelo oonanara yaawo elapo yeela eneereryaaya onivaha ntoko mathatelo ahinapahula. *

10, 11. Ntakhara heeni ninnathanla meecelo oomwiiwelela Yehova, nave mukhalelo taani wa wiiwelela nnamvahaahu?

10 Tinivi nri nthowa noopacerya nnaneeriha okhapelela malamulo a Muluku? Ntakhara heeni ninnachuna okhala nihiku nnihiku mwawiiwanana ni yeeyo nnasuwelaahu wi muupuwelo wa Muluku? Hiyaano hinnathanla meecelo ookhweya wi nsepe olakiwa naari osepa sookhumelela soowaawa seiho inaakhumelela yaale anakhooca wiiwelela yookhwela ya Muluku. (Akalatiya 6:7) Opwaha yeeyo, nnoona wiiwelela wahu wa Yehova ntoko ekari wi nooniherya osivela  wahu wa yoowo. Hiiha ntoko mwaana onachuna weemereryiwa ni atiithi awe hiyaano tho ninnachuna weemereryiwa ni Yehova. (Salmo 5:12) Owo Tiithi ahu, nave hiyaano ninnamusivela. Hiyaavovo echu enaruuha ohakalala otokotoko opwaha osuwela wi nnakhala mmukhalelo onaruuha ‘orèlihiwa ti Apwiya.’Masiposipo 12:2, Bibiliya Nsu na Muluku, BNM.

11 Mwawiihiiha, wiiwelela wahu tahi wookhinyereryiwa; naari woothanla naari waakhala wi muchu onnachuna. * Hiyaano hinnathanla wiiwelela wakhala wi ti wookhweya, naari wiiwelela pahiru wakhala wi hinaavovo nikacamiho. Moohiyana, hiyaano ‘nniwelela ni murima.’ (Aroma 6:17) Nnoona ntoko mulipa oomurepa Salmo yoowo orempe: “Nave kinarwa–kíhakalalihano malamulo anyu, Yawo kinasivelaka” (Salmo 119:47) Aai, hiyaano ninnasiveliwa omwiiwelela Yehova. Ninnasuwela wi owo onnaphwanela—nave onnachuna—wiiwelela wahu weeparipari ni wawaakhwanela. (Malamulo 12:32) Nnachuna wi Yehova anileele hiiha ntoko aaloceiye wa Noowa. Vooloca sa tiithi anroromelo, yoowo oonihenrye osivela moorweela wa okhala awiiwelela mu iyaakha sincipale, Piipiliya onnaloca: “Nowe àhera sothene Muluku àmurummeiye.”Maphatxuwelo 6:22, BNM.

12. Mukhalelo wa wiiwelela taani onahakalaliha murima wa Yehova?

12 Yehova onoona hai vooloca sa omwiiwelela wahu ni nchuno naphaama? Masu Awe annaloca wi ‘ninneliha murima awe.’ (Masiposipo 27:11, BNM) Mano, wiiwelela wahu chiryene onnahakalaliha murima wa Mulamuleli a elapo? Moohikhwa minikwa aai—nave ni mathowa aphaama! Yehova onipatunxe ni othanla wootaphuwa. Eyo enataphulela wi nookhalano othanla wootaphuwa; nnanwerya othanla omwiiwelela Muluku, naari ohimwiiwelela. (Malamulo  30:15, 16, 19, 20) Vaavaa nnathanlaahu omwiiwelela Yehova ni nchuno naphaama nave wakhala wi enaneeriha weerano eyo ori murima woosareya osivela wa Muluku, hiyaano ninnamuhakalaliha Tiithi ahu a wirimu. (Masiposipo 11:20) Hiyaano tho ninnathanla mukhalelo waphaama wa okumi.

“NAVE MALAMULO AWE HARI ÓVELIHA”

13, 14. Ntakhara heeni enalociwaaya wi “malamulo [a Muluku] hari óveliha” nave eyo enaphwanaphwanihiwa hai?

13 Murummwa Yohane oonileela echu yookhweleyaxa vooloca sa malamulo a Yehova: “Nave malamulo Awe hari óveliha.” Nsu na Ekriki ntaphuleliwe “óveliha” mu 1 Yohane 5:3, BNM, nnataphulela “yolimela.” * Piipiliya mukina onii: “Nave malamulo awe hanalimela.” Malamulo a Yehova hari oovila naari ohooxa. Malamulo awe hari ocai wi achu oohiphaameya ehiwerye wiiwelela.

14 Hiyaano nnanwerya ophwanaphwaniha eyo mmukhalelo ola. Nthamwene onnoovekaani wi mmukhaviherye othaamela nipuro nikina. Nave aakhalavo maphuta mancipale wi ethaamihiwe. Makina a yaawo tooveya anaweryeya oteexiwa mookhweya, nyenya makina toolimela nave onachuneya oteexiwa ni achu eeli. Nthamwene anyu onnathanla maphuta onachuneiye wi muteexe. Aahaala woovekaani wi muteexe maphuta yaawo osuwenleiye wi toolimela? Hooye. Owo hani achune wi mwiiphite moorweela wa weererya oteexa maphuta yaawo meekhinyu. Moophwanaphwana, Muluku ahu oosivela ni eepewe hananiveka okhapelela malamulo yaawo onasuweleiye wi toovila wiiwelela. (Malamulo 30:11-14) Owo harwa aniveka wi niteexe mirici soolimela. Yehova onniiwexexa okotakota wahu, “ntakhara  tanasuweleiye maphwachuwelo ahu; Annupuwela wi hiyo na ntchupi.”Salmo 103:14.

15. Ntakhara heeni nnaroromelaahu wi malamulo a Yehova annanikhaviherya vancipale?

15 Malamulo a Yehova chiryene hari ooveliha; malamulo awo annanikhaviherya vancipale. (Mwaalakhanye Yesaya 48:17.) Moose aahaaleela Aisarayeli akhalai: “Apwiya ànruma otxhariha malamulo othene ala, natxitximiheke Apwiya, Muluku ahu; hiha nnamukhala mahiku othene awitxhàla nave nnamutitelela okhala ni mureretxele ntoko nikhanlahu olelo.” (Malamulo 6:24, BNM) Hiyaano tho nnanwerya ororomela wi nthowa na onivaha malamulo awe, Yehova okhalano nchuno mmurimani—okhala wahu phaama, okhala wookhala. Chiryene, tahi yeeyo nahaalaahu oweherya wa yoowo? Yehova, Muluku a miruku soohaalakhanyeya. (Aroma 11:33) Mwawiihiiha Owo osuwela yeeyo eri yaphaama wa hiyo. Yehova tho ehime ya osivela. (1 Yohane 4:8) Osivela, mathipelo a omuchu awe, nave onnavolowela echu eri yoothene onaloceiye ni onapakeiye. Osivela mathipelo a malamulo oothene onaavekeiye akapuro awe okhapelela.

16. Ntakhara heeni nnaphwanelaahu okhala awiiwelela naamwi nikhalaka mu elapo yeela yoonanara nave ni ohiphaameya wahu?

16 Tahi wi nnaloca wi omwiiwelela Muluku echu yookhweya. Nnaphwanela owaniha wi nikhooce ovoloweliwa ni munepa woonanara wa elapo yeela, “enakona mwa mulipa-onanara owo.” (1 Yohane 5:19) Nnaphwanela tho owana ni ohiphaameya wahu, onaneeriha ohiiwelela malamulo a Muluku. (Aroma 7:21-25) Nyenya osivela wahu wa Muluku onanwerya ovootha. Yehova onnaareeliha yaale anachuna wooniherya osivela waya wa yoowo moorweela wa wiiwelela. Owo onnavaha munepa awe waweela ‘wa yawo anamwiwelela yowo ntoko mwene.’ (Saweriwa Tarummwa 5:32) Munepa yoowo onniimiha sawiima saphaama  mwa hiyo—mikhalelo seiho saphaama inanwerya onikhaviherya okhalano meecelo a wiiwelela.Akalatiya 5:22, 23.

17, 18. (a) Tiheeni nnahaalaahu waalikhela mu liivuru yoola, nave vaavaa nneeraahu yeeyo, tiheeni nnaphwanelaahu wuupuwelaka? (b) Tiheeni enahaala othokororyiwa mmwaha onacharela?

17 Mu liivuru yoola, nnahaala waalikhela malakiheryo a Yehova meecelo ni saweera sincipale sa yookhwela awe. Vaavaa nnaalikhelaahu malakiheryo a Yehova, nnaphwanela wuupuwelaka ichu sookhweleya. Hankooni nuupuwelele wi Yehova hananikhinyererya wiiwelela malamulo ni malakiheryo awe; owo onachuna wi nimwiiweleleke orweela mmurimani. Hinnaphwanela tho ocuwala wi Yehova onaniveka okhala mmukhalelo onahaala oruuha mareeliho mancipale hiihaano ni onihoolela okumi woohimala omwaahiyu. Nave nnaphwanela othokororya wiiwelela wahu ni murima woothene ntoko ekari yaphaama ya omooniherya Yehova ophiyerya mweero taani nnamusivelaahu.

18 Wi anikhaviherye osuwela yeeyo eri yaphaama ni yoonanara, Yehova moosivela oonivaha yawuupuxerya-ya-murima. Nyenya wi ekhale yoohoolela yoororomeleya, yawuupuxerya-ya-murima ahu enachuneya ovyakihiwa, hiiha ntoko mwaha onacharela onahaalaaya othokororya.

^ par. 9 Moone mwaha 6 wa liivuru yoola vooloca sa mukhalelo wa othanla mathatelo aphaama.

^ par. 11 Minepa tho soonanara sinniiwelela moohichuna. Vaavaa Yesu aalamulenleiye masololo wi ekhume mwa achu, masololo yaaphiyerya osuwela owerya wawe nave yaahiiwelela, naamwi yahaachuna weerano eyo.Marko 1:27; 5:7-13.

^ par. 13 Mu Mateyu 23:4 nsu nenla nnaphariheliwa muteko wi ntharihe “mirichi yolimela,” malamulo oohiyanahiyana ni sookhovelela soopakiwa seiho alipa-orepa ni Afarisi yaateesihaaya achu pure. Nsu nimohamoha ntaphuleliwe “yóhósa” mu Saweriwa Tarummwa 20:29, 30, nave nnaaloca alipa oomwaryeya yaawo yaahaala olocaka “sohithoriheya” ni yoolakelela ya waahuweliha akina.