Ocuphela mwaha

Ocuphela sampuwa

Anamoona a Yehova

Othanla elocelo Elomwe

 MWAHA 5

Munii Mwiivalaanye Hai ni Elapo

Munii Mwiivalaanye Hai ni Elapo

“Hamuri a elapo ya vathi.”YOHANE 15:19.

1. Tiheeni Yesu aaceenyenreiye ohiyu awe wookuchula veelaponi yavathi?

VARIYARI va ohiyu awe wookuchula veelaponi yavathi, Yesu aahooniherya wuukhuwa wawe ni omwaahiyu wa oomuchara awe. Avekelaka vooloca sa mwaha yoowo, aaloca wa Tiithi awe: “Nkinakoha wi mwavíhe’vo yawo mwilaponi ya vathi, nyenya wi mwakhapelele yawo wa ónanara owo. Hari a elapo ya vathi ntoko Miyo nkiri a elapo ya vathi.” (Yohane 17:15, 16) Ni oveka wuuwu weeparipari, Yesu aahooniherya waasivela oomuchara awe ni okhweleya wa masu yaawo aalonceiye ohiyu yoole ni akina a yaawo: “Hamuri a elapo ya vathi.” (Yohane 15:19) Mweeparipari, yaari yookhweleya wa Yesu wi oomuchara awe ehipake makupa a elapo yavathi!

2. “Elapo” Yesu aalonceiye tiheeni?

2 “Elapo” Yesu aalonceiye aathoonya achu oothene ari ocai wa Muluku, analamuleliwa ni Satana, ari akapuro a nrima, ni munepa wawiirumiha onarweela mwa yoowo. (Yohane 14:30; Aefeso 2:2; 1 Yohane 5:19) Mwa yeeyo, “onthamwene wa elapo ya vathi ori wawichiwa ti Muluku.” (Yakobo 4:4) Vano, ti mwawiihai, oothene anachuna wiikhapelela mu osivela wa Muluku, anahaalaaya okhala mweelaponi, nlelo ehipake makupa a elapo? Nnahaala othokororya makhalelo mathanu: Moorweela wa otitela okhala oororomeleya mu Omwene wa Muluku vathi wa Kiristu ni oruna miyaha sa elapo, osepa munepa wa elapo, okhalano mawarelo aphaama, okhalano niitho na omoha, ni owara mavaka oomunepani.

 WIIKHALELARU OOROROMELEYA NI ORUNA ELAPO

3. (a) Yesu oona hai miyaha sa elapo sa mahiku we? (b) Ntakhara heeni enanwerya olociwa wi oothanliwa a Kiristu anarumeela ntoko arummwa? (Mphitaanyerye masu a vathi.)

3 Ohiya opaka makupa mmiyaha sa elapo sa mahiku awe, Yesu aateteiwa olaleerya Omwene wa Muluku, olamulelo wa omwaahiyu wa wirimu yoowo aahaaleiye okhala Mwene. (Taniyeli 7:13, 14; Luka 4:43; 17:20, 21) Vaavaa aareiye variyari va Mutokweene a Ooroma Pontio Pilato,Yesu aahiloca: “Omwene aka hori wa elapo ela ya vathi.” (Yohane 18:36) Oohuserya awe annachariha yootakiherya awe moorweela wa wooniherya ororomeleya waya wa Kiristu ni Omwene awe ni olokoha Omwene yoowo veelaponi. (Mateyu 24:14) Murummwa Paulo aarepa “Nri arummwa mu nipuroni mwa Kristu, . . . ninnawakelelani mu nipuroni mwa Kristu, atanihiwani ni Muluku.” *2 Akorinto 5:20.

4. Akiristu oothene anooniherya hai ororomeleya wa Omwene wa Muluku? (Moone ekaaxa “ Oruna Elapo Wa Akiristu Oopacerya.”)

4 Woona wi arummwa aneemelela olamulelo wa elapo naari epooma yookhopela, awo hanavolowela miyaha sa elapo yeeyo anarumeelaayawo; awo annatitelela oruna elapo. Arummwa, anakhaviherya olamulelo wa elapo yeeyo aneemelelaaya. Emohamoha wa oohuserya oothanliwa a Kiristu, yaawo ‘onethi aya [owannyaya] ori wirimu.’ (Afilipi 3:20) Chiryene, nthowa na mvai aya olaleerya Omwene, awo annakhaviherya macikhwi a “ipuchepuche sikina” sa Kiristu wi ‘satanihiwe ni Muluku.’ (Yohane 10:16; Mateyu 25:31-40) Yaawo ookuchula anarumeela tho ntoko arummwa a Kiristu, yaakhaviheryaka anna oothanliwa a Yesu. Ntoko nikhuuru nawiiwanana nnakhaviherya Omwene wa  Mesiya, makhuuru oomeeli anniikhalelaru oruna miyaha sa elapo.Mwaalakhanye Yesaya 2:2-4.

5. Muloko Weekiristu ohiyanne hai ni Isarayeli akhalai, nave ohiyana yoowo onooneya hai?

5 Omuroromela Kiristu tahi nthowa pahiru nnaweeriha  Akiristu eeparipari oruna elapo. Moohiyana ni Isarayeli akhalai, yaavahiwe nipuro nikhaani ni Muluku, hiyaano nnapaka makupa a onna wa elapo yoothene. (Mateyu 28:19; 1 Petro 2:9) Mwawiihiiha, waakhanle wi ninnapaka makupa a miyaha sa elapo, otaphuwa wahu oloca michaka sa omwene ni waataana wahu Weekiristu waahaala opahuwa. (1 Akorinto 1:10) Opwaha yeeyo, variyari va elukuluku ya ekhoco, nahaala owanaka ni annihu yaawo tho nnalamuleliwaahu wi naasiveleke. (Yohane 13:34, 35; 1 Yohane 3:10-12) Ni mathowa oophwanelela, Yesu aahaaleela oohuserya awe wi ehiye nlema. Nave tho aahaaleela wi yaasiveleke amwiicani aya.Mateyu 5:44; 26:52; moone ekaaxa “ Kinniikhalelaru a Wiivalaanya ni Elapo?

6. Wiiwelela wanyu wa Muluku onavolowela hai omwiiwelela wanyu Kaisara?

6 Ntoko Akiristu eeparipari, ninnaveleela okumi ahu wa Muluku, ohiya wa muchu, wa marehereryo aachu, naari nloko. 1 Akorinto 6:19, 20 onnaloca: “Nave hamunakhala a nyuwo mekhinyu. Vawi mwáthummwa ni esisapo aya yowalamela.” Mwawiihiiha, vaavaa anavelelaaya wa “Kaisara” yeeyo onaphwaneleiye mmukhalelo wa ncicimiho, yoolivela, ni wiiwelela woophimelala, oomuchara a Yesu annavaha “sa Muluku wa Muluku.” (Marko 12:17; Aroma 13:1-7) Eyo enaphitaanyerya malapelo aya, osivela waya wa murima woothene, ni wiiwelela waya woororomeleya. Wakhala woochuneya, annavaha okumi aya wa Muluku.Luka 4:8; 10:27; mwaalakhanye Saweriwa Tarummwa 5:29; Aroma 14:8.

OSEPA “MUNEPA WELAPO”

7, 8. “Munepa welapo” tiheeni, nave “onerano” naari onalamulela hai mwa muchu?

7 Mukhalelo mukina wa Akiristu wiivalaanya ni elapo ori osepa munepa woonanara. Paulo aarepa: “Nyenya hanákhenle hiyo munepa welapo ya vathi, nyenya munepa wa  Muluku.” (1 Akorinto 2:12) Wa Aefeso, aaloca: “Hiho mwéchanyu’mo khalai ntoko mwa . . . elapo ya vathi vano, ntoko mwa mutokwene ólamulelo wa musulu [nwiya], wa munepa yowo onerano [onalamulela] hihano mwa anamwane óhiwelela.”Aefeso 2:2, 3.

8 “Nwiya” wa elapo naari munepa, woohooneya, ikuru seiyo inatannya ohimwiiwelela Muluku ni “minkhela ya mwíli ni minkhela ya mítho.” (1 Yohane 2:16; 1 Timoteo 6:9, 10) Munepa yoowo wookhalano ‘olamulelo’ mmukhalelo wawi onnahakalaliha nave onnalekecha mwiili ahu woocheka, nave onnannuwa mwawaakuveya, ntoko nwiya nnamumulaahu, ori makupa oothene. Opwaha yeeyo, owo “onerano” naari onalamulela mwa achu moorweela wa oweeriha vakhaani-vakhaani wunnuwiha meerelo ahiniiwanana ni malakiheryo oomuluku, ntoko nrima, wiirumiha, ni ochuna ochariha meecelo a muchu mukhateiye ni omwaryeela olamulelo. * Mmasu ookhweya, munepa wa elapo onneeriha wi vakhaani-vakhaani murima wunnuwihe meerelo a Musaserya mmurimani mwa achu.Yohane 8:44; Saweriwa Tarummwa 13:10; 1 Yohane 3:8, 10.

9. Mmukhalelo taani munepa wa elapo onahaalaaya ovolowela muupuwelo ni murima ahu?

9 Munepa wa elapo onahaala ovolowela muupuwelo ni murima anyu? Aai, wakhala wi mooheemererya, moorweela wa ohiiwehererya. (Mwaalakhanye Masiposipo 4:23.) Ovolowela waya onapacerya vakhaani-vakhaani, akhweya moorweela wa asinthamwene anakhala ntoko achu aphaama, mweeparipari ehirino osivela wa Yehova. (Masiposipo 13:20; 1 Akorinto 15:33) Munanwerya ovoloweliwa ni munepa yoowo woonanara moorweela wa aliivuru anooniherya epwitikiri, Isite sa achu oomwaryeya, mathatelo oonanara, mapokha matokotoko apasakhwe—naari, moorweela  wa muchu naari echu vyakala enooniherya muupuwelo wa Satana ni elapo awe.

10. Nnii niwerye hai osepa munepa wa elapo?

10 Nnii nsepe hai munepa woonanara wa elapo nave niikhapelele mu osivela wa Muluku? Pahiru moorweela wa okumiha mphurelo mu soovaha soomunepani ni oveka munepa waweela moohihiyererya. Yehova tooweryaxa ompwaha Musaserya naari elapo yoonanara enalamuleliwa  ni Satana. (1 Yohane 4:4) Ti yookhweleya vano, okhala vakhiviru va Yehova mu nivekelo!

OKHALANO MAWARELO APHAAMA

11. Munepa wa elapo onavolowela hai mawarelo?

11 Mawarelo ni eruso ya muchu sinnooniherya munepa taani onamulamulela. Mu ilapo sincipale, mawarelo toohiphwanelela ophiyerya mulipa a miyaha a televisau oloca wi moohilekela honi okhale wookhweya waasuwela acapaheya moorweela wa mawarelo. Eyornali yooloca wi, naamwi anahano nlelo ahiri asimwali annavoloweliwa ni mukhalelo yoowo—“mawarelo a mutano ori wooneiha mwiili, nave owara phaama tahi yookhovelela.” Makhalelo makina ari mawarelo oohithokororyiwa, anooniherya munepa woomwaryeya ni ohikhalano osivela ni ncicimiho wa muchu mukhateiye.

12, 13. Malakiheryo taani anaphwanela olamulela mawarelo ahu?

12 Ntoko akapuro a Yehova, ninnakhwela mukhalelo waphaama wa mawarelo, onataphulela owara mmukhalelo waphaama, ni woophwanelela. Mu elukuluku yoothene, ophwaneliwa wahu onaphwanela wooneiha “yowara yophwanela, ni wuliwa muru,” ntoko mu “miteko yaphama” yoophwanela wa muchu ori oothene—mulopwana naari muthiyana—yaawo “enemyeryerya omuthamala Muluku.” Mweeparipari, yoochuna ahu hori wiivuwiha moohiphwanelela, nyenya wi ‘nikhapelele mukhatihu musivela wa Muluku.’ (1 Timoteo 2:9, 10; Yuda 21) Nnachuna wi ophwaneliwa wahu okhale muchu “ókhuweya a murima . . . , turi wesisapo aya yowalamela va mithoni va Muluku.”1 Petro 3:3, 4.

13 Mukhalano mmuupuwelo tho wi, mukhalelo wa ikuwo ni mawarelo ahu onnavolowela moonelo wa akina vooloca wa malapelo eeparipari. Nsu na Ekiriki ntaphuleliwe ‘ophwanelela,’ naaphariheliwaka mmeecelo, nnooniherya ocicimiheya, ephoole, ni ocicimiha moonelo  naari muupuwelo wa akina. Yoochuna ahu ori ohela yawuupuxerya-ya-murima ya akina ohoolo wa soochuna sahu. Opwaha soothene, nnachuna ovaha ncicimiho wa Yehova ni achu awe wi niphwanelele okhala arummwa a Muluku, neeraka “sothene o nchichimiho na Muluku.”1 Akorinto 4:9; 10:31; 2 Akorinto 6:3, 4; 7:1.

Mawarelo aka annamucicimiha Yehova?

14. Vooloca sa ophwaneliwa ni esipanti ahu, makoho taani nnaphwanelaahu wiipakela?

14 Mawarelo, ni esipanti ahu ti soochuneyaxa vaavaa nnayaahu mmuteko wa olaleerya naari mmithukumano Seekiristu. Mwiikohe: ‘Mawarelo ni esipanti, sinnakivuwiha moohiphwanelela? Sinnawuukhula akina? Apwanne kinnateteiwa vancipale ni soochuna saka opwaha ophwanelela ikari sa muteko mmulokoni?’Salmo 68:6; Afilipi 4:5; 1 Petro 5:6.

15. Ntakhara heeni Masu a Muluku haanatikitherya yoochariha vooloca wa mawarelo ni esipanti?

15 Piipiliya haanatikitherya yoochariha vooloca sa mawarelo, ni esipanti. Yehova hanachuna oniwateeliha othanla wootaphuwa naari opharihela muupuwelo ahu. Moohiyana, onachuna wi nikhale achu awiichwelavo yaawo anuupuwela malakiheryo a Piipiliya, ni “vaweranosha yákhoveleliha masuwelelo aya ohiyaniha yaphama ni yonanara.” (Ahebri 5:14) Opwaha soothene, Yehova onachuna wi nikhale oolamuleliwa ni osivela—osivela wa Muluku ni  amwacamani. (Mwaalakhanye Marko 12:30, 31.) Naamwi ncicimihaka malakiheryo yaawo, wookhalawo ohiyana otokotoko mu soowara soophwanelela wa Mukiristu. Eyo ennooneya ohiyana wa ikuwo mu achu oohakalala a Yehova, moohipwacha elapo anakhalaayawo.

OKHALANO NIITHO NA “OMOHA”

16. Munepa wa elapo onahiyana hai ni nihusiheryo na Yesu, nave makoho taani nnaphwanelaahu wiipakela?

16 Munepa wa elapo ti woowoka nave onnaweeriha macikhwi aachu ochara ikhorowa naari ichu soomwiilini wi ehakalale. Nyenya Yesu aaloca: “Ntakhara okumi awe wa mutchu honalikana ni wacha wa itchu sawe oriyeno.” (Luka 12:15) Nave Yesu haaceenyerya omankoonya naari wiihooxa, owo aahusiha wi okumi ni ohakalala weeparipari ori wa yaale ari “Óhawa m’munepani” ni yaale arino okumi  wookhweya, yoowo onateteiwa ni ichu soomunepani. (Mateyu 5:3; 6:22, 23) Mwiikohe: ‘Kinneemererya chiryene yeeyo Yesu aahusiheiye, naari kiri oovoloweliwa ni “atithinnya a wotha”? (Yohane 8:44) Masu aka, soolakelela saka, miteko saka, ni mukhalelo wa okumi aka tiheeni sinooniheryaaya?’Luka 6:45; 21:34-36; 2 Yohane 6.

17. Muloce mphurelo onapuhiwa ni yaale arino okumi wookhweya.

17 Yesu aaloca: “Miruku eneriwa yekhaikhai ni miteko aya.” (Mateyu 11:19) Muthokororye mphurelo onapuhiwa ni yaale arino okumi wookhweya. Annaphwanya olipiha weeparipari mmuteko wa Omwene. (Mateyu 11:29, 30) Awo annasepa wuukhuwa mmurimani ni ohooxeya mmuupuweloni. (Mwaalakhanye 1 Timoteo 6: 9, 10.) Ehakalalaka ni yeeyo aryaayano, annakhalano elukuluku yincipale ni echoko aya ni asinthamwene Eekiristu. Ntoko yookhumelela annakona phaama. (Eklesiyaste 5:12) Awo annapuha ohakalala onarweela wa ovaha yeerakano mmukhalelo anaweryeya. (Saweriwa Tarummwa 20:35) Nave awo annaaceererya “eweheryeryo” nave annakhalano murecele wa mpuwa ni ohakalala. (Aroma 15:13; Mateyu 6:31, 32) Mweeparipari mareeliho yaawo ta esisapo etokweene!

OWARA “MAVAKA OTHENE”

18. Piipiliya onamuthariha hai mwiicani ahu, marehereryo awe, ni mukhalelo wa “owana” wahu?

18 Yaale aniikhapelela mu osivela wa Muluku annakhapeleliwa makupa oomunepani, ntakhara Satana onachuna waayeleeliha akiristu okhalano ohakalala ni okumi woohimala. (1 Petro 5:8) Paulo aaloca wi “owana wahu hannawanano nikhami ni mwíli, nyenya ni otokwene, ni olamulelo, ni yawo analamulela molipiha a elapo ya vathi a epiphi yela, ni aminepa a yonanara mu sawirimu.” (Aefeso 6:12) Nsu “owana” nnataphulela wi owana wahu hori woorakamelana—ntoko nri ookhapeleliwa mu nikhuku—nyenya owana wa vakhiviru khiviru. Opwaha yeeyo, masu “otokwene,”  “olamulelo,” ni “analamulela molipiha a elapo” anooniherya ohiphela woomunepani ori woorehereryiwa phaama.

19. Mavaka oomunepani a Mukiristu tiheeni?

19 Naamwi nri ooceecheya, nnanwerya ovootha. Mwawiihai? Moorweela wa owara “mavaka othene a Muluku.” (Aefeso 6:13) Atharihaka mavaka yaawo, Aefeso 6:14-18 ninnaalakhanya: “Ntakhara awe mwithipeleni, mwitchukelenle mu’yununi mwanyu ni eparipari, muwanretho ya va nakhopeni ya ekhaikhai; nave muwarihele manani anyu ni mareheryelo a Mitchaka Yaphama ya murechele; vopwaha sothe sene mwikushenryetho nrapala na nroromelo, nenlo munirianyu muwerye osipihano michupa yothene yovarela moro ya mulipa-onanara owo. Mukushetho echipwatcha ya ovulusha, ni nlema na Munepa, ti masu a Muluku; mwa nivekelo nothene ni mathamalelo muvekele mahiku othene mwa munepa.”

20. Mukhalelo ahu onahiyana hai ni wa musurutatu?

20 Woona wi mavaka oomunepani yoovaha ya Muluku, awo herwa ehesa, wakhala wi ninnawara elukuluku yoothene. Moohiyana ni asurutatu anakhalano elukuluku yamurecele, Akiristu ari mu ekhoco ya okumi ni okhwa yeeyo ehinahaala omala ophiyerya vaava Muluku onahaaleiye opahula elapo ya Satana ni masololo oothene. (Yawupulula 12:17; 20:1-3) Mwa yeeyo muhikhulumuwe wakhala wi munawanawana ni sooceecheya sanyu naari soochuna soonanara, oothene hiyo nnaphwanela ‘othakamela vathi’ mukhatiihu wi nikhale oororomeleya wa Yehova. (1 Akorinto 9:27) Chiryene, wakhala wi hinnawanawana ti elukuluku ya okhala awuukhuwa!

21. Nnii niwerye hai ovootha ekhoco ahu yoomunepani?

21 Nyenya, haniwerya ovootha ekhoco yeeyo mukhatiihu. Paulo onnanuupuxerya okhweleya waya ovekela wa Yehova “mahiku othene mwa munepa.” Mu elukuluku  emohamoha, nnaphwanela omuwiriyana Yehova moorweela wa ohuserya Masu awe ni othukumana ni ‘asurutato’ akhwiihu elukuluku yoothene, ntakhara wi hanri mukhatiihu! (Filemoni 2; Ahepri 10:24, 25) Yaale ari oororomeleya mmakhalelo oothene hanahaala ovootha pahiru nyenya anahaala owerya tho waakiha nroromelo naya vaavaa nnaakaahiwaaya.

MUKHALE OOREHERYEYA WI MWAAKIHE NROROMELO NANYU

22, 23. (a) Ntakhara heeni nnaphwanelaahu okhala ooreheryeya ikwaha soothene wi naakihe nroromelo nahu, nave makoho taani nnaphwanelaahu wiipakela? (b) Tiheeni enahaala othokororyiwa mu mwaha onacharela?

22 Yesu aaloca: “Hamuri a elapo ya vathi . . . ntakhara a ela ennawichani nyuwo.” (Yohane 15:19) Mwa yeeyo, Akiristu anaphwanela okhala ooreheryeya wi yaakihe nroromelo naya nave weerano eyo mu ncicimiho, mmukhalelo waphaama. (Mwaalakhanye 1 Petro 3:15.) Mwiikohe: ‘Kinniiwexexa ntakhara heeni ikwaha ikina Anamoona a Yehova anneerano moohiyana ni moonelo wa ancipale? Vaavaa kinakumanaaka ni yaweeha, kinnaroromela wi yeeyo Piipiliya ni kapuro oororomeleya onahusiheiye ti yeeparipari? (Mateyu 24:45; Yohane 17:17) Nave ohiya pahiru okhala ooreheryeya weerano yeeyo eri yawookololowa vamiithoni va Yehova, kinnahakalala okhala oohiyana?’Salmo 34:2; Mateyu 10:32, 33.

23 Wiiliwiili, yookhwela ahu ya wiivalaanya ni elapo onneehiwa mmikhalelo soovitheya. Ntoko yootakiherya, ntoko elociwaaya woopaceryani, Musaserya onnaweeha akapuro a Yehova moorweela wa mathatelo eelapo. Nnii niwerye hai othanla mathatelo anahaala onilipiha ni onivaha yawuupuxerya-ya-murima yaphaama? Eyo enahaala othokororyiwa mu mwaha onacharela.

^ par. 3 Ovinyerya Pentekoste a 33 E.K., Kiristu onarumeela ntoko Mwene a muloko wa oohuserya awe oothanliwa veelaponi yavathi. (Akolose 1:13) Mu 1914, Kiristu aahaakhela olamulela ntoko mwene a “Omwene welapo ya vathi.” Mwawiihiiha, Akiristu oothanliwa anarumeela ntoko arummwa a Omwene wa Mesiya.Yawupulula 11:15.

^ par. 8 Mmoone Raciocínios à Base das Escrituras, epaaxina 147-150, olaleeryiwe ni Anamoona a Yehova.