Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

‘Mwikhapelele Mu Osivela wa Muluku’

 MWAHA 7

Munnacicimiha Okumi Hiiha Ntoko Muluku?

Munnacicimiha Okumi Hiiha Ntoko Muluku?

“Ntakhara ehime yokumi eri ni Nyuwo.”SALMO 36:9.

1, 2. Yamahala taani ya Muluku eri yookhweleyaxa olelo, nave ntakhara heeni?

TIITHI ahu awirimu oonivaha yamahala yasisapo—yamahala ya okumi ntoko achu oosuwela anawerya otakiherya mikhalelo sawe. (Mapacereryo 1:27) Moorweela wa yamahala yeeyo yasisapo, ninnawerya wiiwexexa malakiheryo a Piipiliya. Vaavaa nnapharihelaahu, ninnawerya wunnuwa omunepani ntoko achu anamusivela Yehova ‘yawo vaweranosha anakhoveleliha masuwelelo aya ohiyaniha yaphama ni yonanara.’Ahebri 5:14.

2 Owerya wiiwexexa malakiheryo a Piipiliya ori wookhweleya olelo, woona wi elapo enamvira enanaraka ophiyerya okhala woovila okhalano malamulo yaawo yaahaala ohoolela mikhalelo soothene sa okumi. Masuwelelo eelapo a oloola annooniherya phaama yeeyo vooloca sa murece ni meerelo anavolowela nikhami. Ola mwaha wookhweleya wa oothene yaale anachuna omwiiwelela Yehova. Nyenya, wakhala wi ninniiwexexa malakiheryo a vasulu a Piipiliya, nnanwerya opaka soothanla sa miruku seiyo inahaala okhaviherya yawuupuxerya-ya-murima ahu ni onikhaviherya wiikhapelela mu osivela wa Muluku. (Masiposipo 2:6-11) Muthokororye malakiheryo yaawo.

OKUMI NNIKHAMI TI SAWEELA

3, 4. Ti liini wooniheryiwaaya weela wa nikhami mu Soorempwa, nave enathipeleya mu nlakiheryo taani?

3 Amanle Kayine omwiipha Haavele Yehova aahooniherya ekwaha yoopacerya wi okumi nnikhami ti saweela nave wi sinniiwanana.  Muluku aaloca ni Kayine: “Wenreni? Ovinyerya vathi ephome ya munna à ennakiveka nthorihelo.” (Maphatxuwelo 4:10 BNM) Va miithoni va Yehova, nikhami na Haavele naataphulela okumi awe yoowo waamalihiwe nthowa na nlala. Mwawiihiiha, yanwerya olociwa wi nikhami na Haavele ninnamveka Muluku nthorihelo.Ahepri 12:24.

4 Evinre Maahi Mancipale mmahiku a Noowa, Muluku aahaalamulela achu okhuura enama ohiya nikhami. Muluku aaloca: “Nto muhikhùre enama nnikhami nene, ntakhara munikhamini wokhalamo ekumi. Yole oni ayehe nikhami na mutxhu, nari ekumi awe miyano kinamunvaha ekoi.” (Maphatxuwelo 9:4, 5, BNM) Nlamulo nla ninnaphariheleya wa anamwane oothene a Noowa ophiyerya mahiku ahu. Ennooniherya yootaphulela ya masu a Muluku wa Kayine—wi okumi wa soopatuxiwa soothene ori mu nikhami. Ti yawooneya wi achu oothene ahinacicimiha okumi nnikhami anahaala othorihiwa ni Yehova ori Ehime ya okumi.Salmo 36:9.

5, 6. Nlamulo na Moose nooniherya hai wi nikhami ti naweela ni neesisapo? (Moone tho ekaaxa “ Mucicimihe Okumi Wa Axinama.”)

5 Iparipari seiya piili saahooniheryiwa mu Nlamulo na Moose. Mu Onamukutxho 17:10, 11, BNM, ninnaalakhanya: “Mutxhu . . . akhùra enama ni ephome ene, Apwiya hen’wehá ni orèra murima nto anammuwìhamo munlokoni mwawe. Ekumi ya enama enakhala munikhamini. Apwiya ahorumani oyeherya v’altarini ephome ntoko mukutxho woleveleliwano sotxheka sanyu: chiri ephome ennavaha wakhela nlevelelo ntakhara yokhalano ekumi.” *—Moone ekaaxa “ Ikuru Soolevelela sa Nikhami.”

6 Wakhala wi nikhami na mwaaxinama a mukucho hiniphariheliwe va eyuupo, naaphwanela oyeeheryiwa vachaya. Mwawiihiiha, moosiphela, okumi waanakookiheryiwa wa Mpatuxa aya. (Malamulo 12:16; Esekiyeli 18:4)  Moone wi, Aisarayeli hiyaaphwanela ovirelela moorweela wa weererya oviihamo nikhami noothene. Pahiru wakhala wi mwaaxinama iiphiwe noovihiwamo nikhami mmukhalelo woophwanelela, Muisarayeli anwerya okhuura enama aya ni yawuupuxerya-ya-murima yaphaama, woona wi naahooniheryiwa ncicimiho wa Namavaha a Okumi.

7. Tavite oonihenrye hai ncicimiho ntakhara weela wa nikhami?

 7 Tavite, “mutchu a va murimani va [Muluku],” aahiiwexexa nlakiheryo na nlamulo na Muluku vooloca sa nikhami. (Saweriwa Tarummwa 13:22) Ekwaha emoha vaavaa aareiyeno nchanana, alopwana awe araru yaahaavolowela amwiicani, erika maahi veehimeni, nave yaamuruuhela Tavite. Tiheeni enreiye? Owo aaloca: “Miyano nkinaphwanela owurya mahi ala. Ki kikhale wi kinawurya nikhami na atxhu ala yilenve ekelela mahi.” Wa Tavite, maahi ale, chiryene yaari ntoko okumi wa alopwana awe. Naamwi aarino nchanana, owo “àyeherya vathi wi atxitximihe Apwiya.”2 Samuwele 23:15-17, BNM.

8, 9. Apwanne moonelo wa Yehova vooloca sa okumi nnikhami waatorokeya vaavaa waatikitheren’yaaya muloko Weekiristu? Mutharihe.

8 Iyaakha 2.400 Yehova amanle omvaha Noowa nlamulo na ohilya nikhami, waalakhanyerya iyaakha 1.500 nimanle opakiwa nlakano na Nlamulo, Yehova aaveerela nikhuuru noolamulela na Muloko woopacerya Weekiristu orepa: “Munepa Wawela ni hiyo, wi nihoreyeni nyuwo yohokola etokotoko ekina yopwaha iha sophwanelela iha; wi muthanye iphepa sa sophwaniherya, n’nikhami, ni sonyopotchola, ni ochapaheya.”Saweriwa Tarummwa 15:28, 29.

9 Chiryene, nikhuuru noolamulela noopacerya naahiiwexexa wi nikhami ti naweela nave opharihela moonanara waari ntoko olapela soophwaniherya naari ocapaheya. Akiristu eeparipari olelo anneemererya yeeyo. Opwaha yeeyo, woona wi anahooleliwa ni malakiheryo a Piipiliya, awo annamuhakalaliha Yehova vaavaa anapakaaya soolakelela vooloca sa opharihela nikhami.

OPHARIHELIWA WA NIKHAMI NTOKO MURECE

Kini kitharihe hai yoolakelela aka vooloca sa meerelo a nikhami?

10, 11. (a) Anamoona a Yehova anoona hai waakhela nikhami nawaakhwanela ni makupa maxexe oopacerya a nikhami? (b) Mmwaha taani vooloca sa nikhami Akiristu anahaalaaya okhalano moonelo woohiyana?

10 Anamoona a Yehova annasuwela wi ‘othanya . . . nikhami’ onataphulela oheemererya ovaha ni waakhela naari okhapelela nikhami naya wi niphariheliwe muteko. Ecicimihaka nlamulo na Muluku, awo haneemererya makupa maxexe  oopacerya a nikhami: ikolopulo soophilivila, ikolopulo saweela, ipalaketa, ni epalasma.

11 Olelo, nthowa na meerelo awaacererya, makupa yaala maxexe wiiliwiili annakawanyiwa mmikhalelo seiyo inaphariheliwa moohiyana hiyana. Apwanne Mukiristu onnaphwanela weemererya mikhalelo seiyo? Onaphwanela woona ntoko “nikhami?” Muchu ti muchu onaphwanela opaka yoolakelela awe mmwaha yoola. Emohamoha ennaphariheleya mmeerelo a oloola, ntoko a hemodiálise, hemodiluição, ni recuperação intra-operatória de células, yeeyo eri oroleliwa wa nikhami na muchu mukhateiye nihikhapeleliwe.—Moone Masu Awaaceererya “Makupa a Nikhami ni Meerelo a Othaliwa.”

12. Nnaphwanela woona hai ni othokororya miyaha sa yawuupuxerya-ya-murima?

12 Apwanne soolakelela sa muchu mukhateiye iri sa esisapo vakhaani wa Yehova? Hooye, owo onnapwacha vancipale  muupuwelo ni mathowa ahu. (Mwaalakhanye Masiposipo 17:3; 24:12.) Nimanle opaka nivekelo ni otholathola murece naari meerelo ooloola, nnaphwanela ochariha yawuupuxerya-ya-murima ahu evyakihiwe ni Piipiliya. (Aroma 14:2, 22, 23) Nyenya, akina hanaphwanela weeriha wi yawuupuxerya-ya-murima aya enihooleleke, naari hinnaphwanela waakoha, “Tiheeni mwaahaalaanyu weera mwaari mmukhalelo aka?” Mmiyaha seiya, Mukiristu onaphwanela ‘wireya murichi awe.’ *Akalatiya 6:5; Aroma 14:12; moone ekaaxa “ Kinnoona Nikhami Okhala Naweela?

MALAMULO A YEHOVA ANOONIHERYA OSIVELA WAWE NTOKO TIITHI

13. Malakiheryo ni malamulo a Yehova anooniherya eheeni wa yoowo? Mooniherye.

13 Malamulo ni malakiheryo anaphwanyeya Mpiipiliyani annooniherya wi Yehova ti Namavaha Malamulo a miruku nave tho Tiithi oosivela onathokororya okhala phaama wa anaawe. (Salmo 19:7-11) Naamwi nlamulo na ‘othanya . . . nikhami’ hinaavahiwe ntoko mukhalelo wa waakiha ekumi, vaavaa nniiwelelaahu ninnasepa sookhumelela soonanara sa waakhela nikhami. (Saweriwa Tarummwa 15:20) Mweeparipari, ancipale analapa mu nikhuuru na oloola annoona wi othaliwa nihiphariheliwe nikhami “meerelo aphaama” a oloola. Wa Mukiristu eeparipari, oya vahoolo wuuwu chiryene onnooniherya miruku soohaalakhanyeya sa Yehova, tiithi oosivela.Mwaalakhanye Yesaya 55:9; Yohane 14:21, 23.

14, 15. (a) Malamulo taani yooniherya osivela wa Muluku ntakhara achu awe? (b) Munii mpharihele hai malakiheryo yaawo ari mathipelo a malamulo a wiikosopa?

14 Wuukhuwa wa Muluku ni okhala phaama wa achu awe mu Isarayeli akhalai waari wawooneya mmalamulo awe oothene. Ntoko yootakiherya, woona wi nipithela na osulu wa empa ya Aisarayeli naanatepa ophariheliwa muteko,  yaalamuleliwa osiryawo wi esepe epahu. (Malamulo 22:8; 1 Samuwele 9:25, 26; Nehemiya 8:16; Saweriwa Tarummwa 10:9) Muluku tho aalamulela wi imope soowali saaphwanela omakiwa. (Mukwaha 21:28, 29) Ohiiwelela malamulo yaala yooniherya oyeleela ncicimiho wa okhala phaama wa akina nave waahaala okhumelela okhalano nthowa na nikhami.

15 Munii mpharihele hai malakiheryo ari mathipelo a malamulo yaala? Muupuwele vooloca sa yoowela anyu, mukhalelo anyu wa weeciha, axinama anyu, empa anyu, nipuro nanyu na muteko, ni othanla wanyu mathatelo. Mu ilapo ikina, nthowa ntokotoko wiiliwiili nnatannya okhwa variyari va amiravo, meerelo oohithokororya. Nyenya, amiravo yaawo anachuna wiikhapelela mu osivela wa Muluku, annacicimiha okumi nave hanapaka miteko sawoopiha wi yiihakalalihe. Awo haniiwoka yuupuwelaka wi nthowa na okhala amiravo hiyaavo yawoopiha enahaala waakhumelela. Opwaha yeeyo, annapuha omiravo aya esepaka ichu soopahula.Eklesiyaste 11:9, 10.

16. Nlakiheryo taani nnaphariheleya mu oyeeha erukulu? (Moone tho masu a vathi.)

16 Okumi wa murolo ti wasisapo tho vamiithoni va Muluku. Mu Isarayeli akhalai, wakhala wi muchu ommana muthiyana oorupala nave ntoko yookhumelela murolo naari muthiyana akhwa, Muluku aamoona muchu yoowo ntoko mulipa awiipha, nave aaphwanela olivela “ekumi ni ekumi.” * (Mwaalakhanye Mukwaha 21:22, 23, BNM) Nkaanyiheryani, mukhalelo Yehova onooneiye vaavaa macikhwi a irukulu inayeehiwaaya mwaayiini iyaakha soothene, nthowa na ocapaheya.

17. Munii mmuhakararye hai muchu oyeenhe erukulu ahaakumve ohuserya malakiheryo a Muluku?

17 Hanka vooloca sa muthiyana oyeenhe erukulu ahaakumve  okhalano nsuweliho na Piipiliya? Apwanne Muluku onahaala ommorela ikharari? Chiryene! Muchu ocharunwe onaphwanela ororomela okhurumuweliwa soocheka moorweela wa nikhami na Yesu. (Salmo 103:8-14; Aefeso 1:7) Kiristu  aaloca: “Nkárwela Miyo witchana ékhaikhai, nyenya ótcheka wi erukunuwe murima.”Luka 5:32.

MUSEPE WIICA!

18. Piipiliya onooniherya hai nthowa ntokotoko nnatannya oyeeha nikhami nincipale?

18 Yehova onachuna wi nsepe waahooxa akina, wi nikumihemo mmurimani mwahu moonelo onatannya oyeeha nikhami nincipale—wiica. Murummwa Yohane aarepa: “Mutchu yowo oníchana ni munneni ori awipha mutchu.” (1 Yohane 3:15) Tahi wi muchu onamoona pahiru omwiica munneeni, nyenya tho onachuna omoona owo akhwile. Mukhalelo yoowo onnooniheryeya mu onyemula, wootha yoowo waakhanle weeparipari waahaala omweeriha muchu owo othorihiwa ti Muluku. (Namukucho 19:16; Malamulo 19:18-21; Mateyu 5:22) Mwa yeeyo, ti yookhweleya wiilipixerya ophola vamurimani vahu nlala noothene!Yakopo 1:14, 15; 4:1-3.

19. Muchu onahooleliwa ni malakiheryo a Piipiliya onoona hai soorepa ntoko Salmo 11:5 ni Afilipi 4:8, 9?

19 Yaale anacicimiha okumi hiiha ntoko Yehova nave tho anachuna wiikhapelela mu osivela wa Muluku annasepa nlala mmikhalelo soothene. Salmo 11:5 onnaloca: “Nyenya okumi awe onnamwicha mulipa-onanara ni yowo onasiveliwa nlala.” Masu ala annaloca opwaha omuchu wa Muluku; nla nlakiheryo nnahoolela okumi. Nla ninnaweeriha yaale anamusivela Muluku osepa makhalelo vyakala a mathatelo anatannya nlala. Moophwanaphwana, masu awi Yehova ti “Muluku a murechele” annaweeriha akapuro awe osareiha muupuwelo ni murima aya ni ichu saphaama, seeparipari, ni soocicimiheya, seiyo inakhaviherya murecele.Mwaalakhanye Afilipi 4:8, 9.

OHIPAKA MAKUPA A MAREHERERYO ARINO NTHOWA NA NIKHAMI

20-22. Tuuvi ori moonelo wa Akiristu vooloca sa elapo, nave ntakhara heeni?

20 Vamiithoni va Muluku, elapo yoothene ya Satana yookhalano nthowa na nikhami. Mukhalelo wa olamulela, yoowo  onooniheryiwa mu Soorempwa ntoko inama sawoopiha, onnawiipha macikhwi aachu ophitaanyerya akapuro ancipale a Yehova. (Taniyeli 8:3, 4, 20-22; Yawupulula 13:1, 2, 7, 8) Maroca matokotoko ni siyensiya anniiwanana ni olamulelo yoowo onalikanyihiwa ni inama sawoopiha, wi yaapake akapwichi oopahulaxa yaawo anaweeriha ophwanya ikhorowa sincipale. Chiryene, “elapo yothene ya vathi enakona mwa mulipa-onanara owo”!1 Yohane 5:19.

21 Woona wi oohuserya a Yesu ‘hari a elapo ya vathi’ nyenya annatitelela oruna miyaha sa elapo ni ekhoco, awo annasepa okhalano nthowa na nikhami mwaayiini naari moohilakelela. * (Yohane 15:19; 17:16) Nave emutakiheryaka Yesu, vaavaa anahooxiwaaya hanaakhulela moonanara. Opwaha yeeyo, annaasivela amwiicani aya, ophiyerya waavekelela.Mateyu 5:44; Aroma 12:17-21.

22 Opwaha soothene, Akiristu eeparipari annasepa ovoloweliwa ni “Babulo Mtokotoko,” olamulelo wa malapelo  atheru yoowo onayeeha nikhami nincipale. Masu a Muluku annaloca: “Mummo, timwáphwanyiwe’mo nikhami na alipa-miririmo ni awéla murima ni othene yawo yíphiwe velaponi.” Mwawiihiiha, ninnalopoliwa: “Khuma’mmoni mummo atchu aka.”Yawupulula 17:6; 18:2, 4, 24.

23. Okhuma mu Paapulu Mutokotoko onataphulela eheeni?

23 Okhuma mu Paapulu Mutokotoko onnavirelela oxipiha nsina mu marehereryo a malapelo oowoka. Onavolowela tho wiica mikhalelo soothene malapelo awootha aneemereryaaya naari anavuwihaaya—ntoko ocapaheya, wiivoliiherya mmiyaha sa elapo, ni nrima na muhakhu. (Mwaalakhanye Salmo 97:10; Yawupulula 18:7, 9, 11-17) Ikwaha sincipale saweera seiyo sinnatannya oyeeha nikhami!

24, 25. Mmathipelo taani Muluku onooniheiye ikharari wa muchu ocharunwe yoowo aarino nthowa na nikhami, nave eyo yaasipheliwe hai mu ilukuluku sa Piipiliya?

24 Nihaakumve weemererya malapelo eeparipari, mmoha ti mmoha a hiyo, aanakhaviherya mukhalelo wa Satana nave mwawiihiiha naakhalano nthowa na nikhami. Nyenya, vaavaa ntoronkaahu makhalelo ahu, nooniherya nroromelo mu yawoopola ya Kiristu nave niveleela okumi ahu wa Muluku, nohaakhela ikharari ni okhapelela woomunepani. (Saweriwa Tarummwa 3:19) Okhapelela yoowo waasipheliwa mu ilukuluku sa Piipiliya ni ipooma sa nchawelo.Namarepela 35:11-15; Malamulo 21:1-9.

25 Nrehereryo nenna naalapa hai? Wakhala wi Muisarayeli oomwiipha mukina moohichuna, aaphwanela ochawela ipooma sa nchawelo. Muthoriha amanle othokororya mwaha owo, yoowo omwiiphale mukina ahichunne aaphwanela okhala weiwo ophiyerya okhwa wa namukucho. Ohoolo waya owo aari ootaphuwa wi akhale nipuro onachuneiye. Yootakiherya taani yaphaamaxa ya ikharari sa Muluku ni ncicimiho ntokotoko onavaheiye okumi wa muchu! Yoovaha ya Muluku ya epooma ya nchawelo mmahiku ahu, enaphwanyeya mmukucho wa woopola wa Kiristu, wi enikhapelele mu okhwa nthowa na ochekela nlamulo na Muluku nihichunne, vooloca  sa weela wa okumi nnikhami. Munnacicimiha yoovaha yeela? Munii mooniherye hai? Mukhalelo mmoha ori waawopa akina wi evolowe mu epooma yoosiphela ya nchawelo, xaxaxa vaavaa enaacamelaaya “ekoi etokotoko.”Mateyu 24:21, BNM; 2 Akorinto 6:1, 2.

OCICIMIHA OKUMI MOORWEELA WA OLALEERYA MICHAKA SA OMWENE

26-28. Mukhalelo ahu olelo onaphwanaphwana hai ni wa mulipa a miririmu Esekiyeli, nave nnii niikhapelele hai mu osivela wa Muluku?

26 Mukhalelo wa nloko na Muluku mmahiku ahu onnanuupuxerya mahiku a mulipa a miririmu Esekiyeli, yoowo Yehova aamurummeiye wi arumeele ntoko ooweherya oomunepani a nloko na Isarayeli. Muluku aaloca: “Wiwa masu aka, walèle atxhu a Isarayele.” Waakhanle wi Esekiyeli aari ooporora mu orummwa wawe, ahaala okhalano nthowa na nikhami na yaale yaahaala otoloxiwa vaavaa Isarayeli aahaaleiye othorihiwa ni Muluku. (Esekiyeli 33:7-9) Nyenya Esekiyeli ahiiwelela nave haarino nthowa na nikhami.

27 Olelo nri waacamela omakuchuwelo wa mukhalelo yoola wa Satana. Mwawiihiiha, wa Anamoona a Yehova murici ni ekari olaleerya nihiku ‘nawinla ikuhu’ na Muluku ntoko makupa a michaka sa Omwene. (Isaiya 61:2, BNM; Mateyu 24:14) Munnakhaviherya ni mvai muteko yoowo woochuneya? Murummwa Paulo aahiilipixerya waakhwaniherya murici awe wa olaleerya. Ntoko yookhumelela, owo anwerya oloca: “Nkinono etxchu n’nikhami na atchu othene. Ntakhara nkókhuwenleni volaleyerya othoriha wothene wa Muluku.” (Saweriwa Tarummwa 20:26, 27) Ela yootakiherya yaphaama wi ncharihe!

28 Mwa yeeyo, wi niikhapelele mu osivela wa Yehova ni opuha okhapelela wawe ntoko tiithi, ti woochuneya ichu sincipale ohiya pahiru okhalano moonelo mmohamoha onooneiye okumi nnikhami. Nnaphwanela wiikhalelaru aweela, vamiithoni vawe, hiiha ntoko nnahaalaahu woona mu Mwaha onacharela.

^ par. 5 Vooloca sa masu a Muluku, awi “ekumi ya enama enakhala munikhamini,” erevista Scientific American yooloca: “Opwaha yootaphulela yoosiphela masu awo chiryene teeparipari: eseelula eri yoothene ya nikhami ti yookhweleya wa okumi.”

^ par. 12 Mmoone Despertai! a Akosto a 2006, ipaaxina 3-12, olaleeryiwe ni Anamoona a Yehova.

^ par. 16 Alipa oomwaalikhela Piipiliya annaloca wi marepeliwo a masu a Eheepri “anakhala ntoko hiyaaloca pahiru epahu etannyeryiwe muthiyana.” Moone wi Piipiliya hanaloca wi wunnuwa wa murolo ti waalakelela mukhalelo Yehova aahaaleiye omuthoriha muchu.

^ par. 70 Wi musuwele sincipale, moone Masu Awaaceererya “Makupa a Nikhami ni Meerelo a Othaliwa”.