Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

‘Mwikhapelele Mu Osivela wa Muluku’

 MASU AWAACEERERYA

Ntakhara Heeni Nave Elukuluku Taani—Muthiyana Onaphwaneleiye Owariha Muru?

Ntakhara Heeni Nave Elukuluku Taani—Muthiyana Onaphwaneleiye Owariha Muru?

Ntakhara heeni nave elukuluku taani muthiyana onaphwaneleiye Owariha Muru mwawiiwanana ni malapelo awe? Hankooni nthokororye masu ooveereliwa a murummwa Paulo vooloca sa mwaha yoola. Owo oovaha malakiheryo ookhweleya wi nipake soolakelela saphaama, seiyo sinamucicimiha Muluku. (1 Akorinto 11:3-16) Paulo ooloca sa makhalelo mararu nnaphwanelaahu ochara: (1) miteko sinamweeriha muthiyana owariha muru, (2) elukuluku yoophwanelela ya weerano, ni (3) mathowa anamweeriha wi apharihele malakiheryo yaala.

Miteko. Paulo onaloca sa miteko miili: ovekela ni oloca. (Iciciri 4, 5) Ovekela, chiryene ori oloca ni Yehova; mukhalelo wa omulapela Muluku. Olelo, oloca onaahiwa vaavaa Mukiristu ori mulaleeryi onaloceiye iparipari sa Mpiipiliyani. Apwanne Paulo aaloca wi muthiyana onaphwanela okhuneela muru elukuluku yoothene onavekeleiye naari onahusiheiye iparipari sa Mpiipiliyani? Hooye. Elukuluku owo onaphwanyeyeiye tenii yooniherye wakhala wi ti wookhweleya vaavaa onavekeleiye naari onahusiheiye.

 Elukuluku. Masu a Paulo analoca sa ilukuluku piili, naari mukhalelo wa muteko—veechoko ni mmulokoni. Owo ooloca: “Muru wa muthiyana ti Mulopwana . . . Nyenya muthiana yowo onavekela, nari olochela, akhununle muru awe, onanyemula muru awe.” (Iciciri 3, 5) Mu marehereryo a veechoko, Yehova oomuthanla mulopwana wi akhale muru wa muthiyana. Onnakhala wooweryeya tho muthiyana waakhwaniherya murici yoowo Yehova onaavaheiye alopwana. Ntoko yootakiherya, wakhala wi ti woochuneya wi muthiyana eecihe yoohuserya ya Piipiliya vamiithoni va iyawe, owo onaphwanela ocicimiha olamulelo awe moorweela wa owariha muru. Owo onaphwanela weerano moohipwacha wakhala wi oopatisiwa naari hooye, woona wi owo muru wa echoko. * Wakhala wi onamvekela naari onamuhusiha vamiithoni va mwanawe mukhaani opatisiwe, owo tho onaphwanela owariha muru, ohiya nthowa na wi owo muru wa echoko, nyenya nthowa na olamulelo ovahiwe anna oopatisiwa a muloko Weekiristu.

Paulo onaloca sa mikhalelo sa muloko ariki: “Nyenya óneya mukina ntoko óvanya, hinanono makhalelo awihiha, nari hiyo, nari muloko wa Muluku.” (Eciciri 16) Mmuloko Weekiristu, olamulelo onavahiwa anna oopatisiwa. (1 Timoteo 2:11-14; Ahepri 13:17) Pahiru anna taneemereryiwa okhala ntoko atokweene ni arummwa oorumeela wi yaakhwaniherye murici ovahiwe ti Yehova wa okhapelela muhuwo wa Muluku. (Saweriwa Tarummwa 20:28) Ikwaha ikina akhweya makhalelo annatorokeya ochuneyaka wi muthiyana Ekiristu aakhwaniherye murici waahaala ovahiwa munna oopatisiwa. Ntoko yootakiherya, owo akhweya onachuna weeciha muthukumano wa muteko woolaleerya nthowa na wi hanaphwanyeya munna oopatisiwa oophwanela weeciha naari haphin’ye. Naari owo akhweya oneeciha yoohuserya ya Piipiliya aavanenliiye voopacerya vene ni munna oopatisiwa. * Woona wi miteko iho inapaka makupa sa muloko Weekiristu, owo onaphwanela owariha muru aroromelaka wi  oneerano muteko wa munna aweemereryiwa.

Mmakupa makina, aakhalawo makhalelo mancipale a malapelo ohiri woochuneya wi murokora awarihe muru. Ntoko yootakiherya, owo hanaphwanela owariha muru vaavaa onavaheiye sooloca sawe mmithukumano Seekiristu, aalaleeryaka empa ni empa mu orummwa ni iyawe naari ni munna mukina oopatisiwa, naari ahusihaka naari avekelaka ni mwaana oohipatisiwa. Akhweya annakhumelela makoho vooloca sa mwaha yoola, nyenya wakhala wi murokora hanasuwela phaameene onaphwanela otholathola. * Nlelo wakhala wi hanasuwela nave yawuupuxerya ya murima awe ennamweemererya, owariha muru tahi yoonanara, ntoko eruku enooniheryaaya.

Mathowa. Va eciciri 10, annaphwanyeya mathowa meeli aneeriha muthiyana ori mukiristu awarihe muru: “Muthiyana anaphwanela okhalano olamulelo va muruni vawe, ntakhara angelo.” Voopacerya moone masu analoca, “okhalano olamulelo.” Owariha muru ori mukhalelo wa muthiyana wooniherya wi owo onneemererya olamulelo wa Yehova ovahiwe anna oopatisiwa mmulokoni. Mwawiihiiha, owo onnooniherya ororomeleya ni osivela wawe wa Yehova Muluku. Nthowa nanaawiili nnaphwanyeya mmasu ala “ntakhara angelo.” Ti mwawiihai muthiyana onavoloweleiye soopatuxiwa soomunepani moorweela wa owariha muru?

Ankeelo ari oochuna woona wi olamulelo wa Muluku onnacicimihiwa mmareheryo oothene a Yehova, wirimu ni veelaponi yavathi. Awo tho annaphura orweela wa yootakiherya ya achu oohiphaameya vooloca sa mwaha yoola. Opwaha soothene, awo tho anaphwanela wiiwelela malakiheryo a ohoolela atikitheryiwe ni Yehova—yaweeha yeeyo ankeelo ancipale yahensaaya  muculi. (Yuta 6) Vano, ankeelo annawerya woona vaavaa muthiyana Eekiristu onakhaleiyeno mavyakelo mancipale, masuwelelo, ni miruku ompwaha munna oopatisiwa a mmulokoni; naamwi hiiha owo onniiwelela olamulelo awe. Mmikhalelo mikina, owo akhweya muthiyana Ekiristu awoocihiwa omwaahiyu onahaala olamulela vamoha ni Kiristu. Nihiku nimoha muthiyana owo onahaala orumeela va nipuro navasuluxa wapwaha ankeelo nave olamulela ni Kiristu wirimu. Yootakiherya taani yaphaama ankeelo anoonaaya olelo! Chiri, moorweela wa wiiwelela ni ororomeleya, arokora aakhalano ekari etokweene ya wooniherya wiiyeviha vamiithoni va macikhwi a ankeelo oororomeleya!

^ par. 3 Muthiyana oororomela hanaphwanela ovekela moovuwa vamiithoni va iyawe ori Mukiristu voohikhala wi owo ari mmakhalelo oovila, wakhala wi owo hanawerya oloca nthowa na makacamiho a okumi.

^ par. 1 Hori woochuneya murokora owariha muru vaavaa oneeciheiye yoohuserya ya Piipiliya aavanenliiye woosiilo ni mulaleeryi oohipatisiwa ohiri iyawe.

^ par. 2 Wi musuwele sincipale, khwoo mmoone Mulipeleli (em Português), 15 a Yulyu a 2002, ipaaxina 26-27, ni a 15 a Fevereru a 1977, ipaaxina 125-128.