Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

‘Mwikhapelele Mu Osivela wa Muluku’

 MWAHA 13

Isatakha Sinamunyemula Muluku

Isatakha Sinamunyemula Muluku

“Mwasyeke yeyo eri yowasivela Apwiya.”ÉFESO 5:10, BNM.

1. Yehova onnaapurula achu a mukhalelo taani, nave ntakhara heeni ti yoochuneya wi awo etitelele okhala a wiiwehererya makupa oomunepani?

Yesu ooloca ariki “alipa-othamala eparipari enarwa ethamala Atithi m’munepani ni mwiparipari: vawi atithi anakhwela awihiha ekhale alipa-othamala’we.” (Yohane 4:23) Vaavaa Yehova onaaphwanyeiye achu yaawo—ntoko oophwanyeiyeni nyuwo—owo onnaapurula wa yoowo vamoha ni mwanawe. (Yohane 6:44) Nna ncicimiho ntokotoko! Ale anasivela iparipari sa Mpiipiliyani, anaphwanela ‘wasyaka yeyo eri yowasivela Apwiya,’ woona wi Satana mulipa awoota.Éfeso 5:10, BNM; Yawupulula 12:9.

2. Mutharihe ti mwawiihai Yehova onawooneiye yaale aneererya ophitaanyerya malapelo eeparipari ni atheru.

2 Muthokororye yeeyo yeeren’ye waacamela Omwaako Sinai vaavaa Aisarayeli yaavenkaaya wa Aaroni wi ampake muluku ntakhara yaawo. Aaroni aaheemererya okhinyereryiwa nave aapaka eruku ya mwaasana a mope nyenya aahooniherya wi eruku yeele yaamweemelela Yehova. Owo aaloca, “omèlo ti nihiku n’efesta ya watxitximihano Apwiya [Yehova].” Apwanne Yehova haathokoronrye yeeyo yeenraaya, ophitaanyerya malapelo atheru ni eeparipari? Hooye. Owo aahilamulela wiiphiwa wa achu macikhwi mararu. (Mukwaha 32:1-6, 10, 28, BNM) Tiheeni nnahuseryaahu? Wakhala wi nnachuna wiikhapelela mu osivela wa Muluku, nnaphwanela ‘ohiphara etxhu ya mwikho’ nave nsepe mukhalelo ori woothene onananariha eparipari.Isaiya 52:11, BNM; Esekiyeli 44:23; Akalatiya 5:9.

3, 4. Ntakhara heeni nnaphwanelaahu ovarerya malakiheryo a Piipiliya vaavaa nnathokororyaahu sookhovelela ni isatakha?

 3 Moothananiha, emanle okhwa arummwa yaawo yaakiha mukhalelo wa achu oovaanya, achu yiisera okhala Akiristu yaahisivela eparipari yaapacerya okhalano sookhovelela sa amalapo isatakha ni ochapela mahiku “aweela,” yooniwa ntoko Eekiristu. (2 Atesalonika 2:7, 10) Vaavaa munathokororyaanyu makhalelo makina a isatakha, moone ti mwawiihai inooniherya aya munepa wa elapo, ohiya wa Muluku. Sinnalociwa wi sookhovelela iho sookhalano ichu soolikana: Ohakalaliha minkhela sa mwiili, ovuwiha malapelo atheru ni onamulosiwe—makhalelo yaawo enaphwanyeya mu “Babulo mtokotoko.” * (Yawupulula 18:2-4, 23) Muupuwele wi Yehova tho, aahoona saweereya sa malapelo a amalapo wa yaawo epaceryinhe sookhovelela sincipale. Moohikhwa minikwa, olelo Yehova onoona isatakha okhala sooriipiheya ntoko mahiku a khalai. Apwanne moonelo wa Yehova ti woochuneya wa hiyo?2 Yohane 6, 7.

4 Ntoko Akiristu eeparipari, noosuwela wi isatakha ikina hasinamuhakalaliha Yehova. Nyenya nnaphwanela okhala oolakelela mmurimani mwahu wi nihivolowele iho. Othokororya ntakhara heeni Yehova hanasiveliwano ni isatakha, ennalipiha yoolakelela ahu ya osepa echu vyakala yaahaala onihiiha wiikhapelela mu osivela wa Muluku.

NATAALE—NSINA NIVYAANI NA MALAPELO A NSUWA

5. Ntakhara heeni nnalocaahu wi Yesu haayariwe mu 25 a Tesempuru?

5 Piipiliya hanaloca nihiku na oyariwa wa Yesu. Chiryene, nihiku aayariweiye hinisuweliwe. Nave nnaphwanela osuwela wi owo haayariwe mu nihiku na 25 a Tesempuru elukuluku ya  mulukuchulo mu epooma yeele. * Mathowa ananeeriha oloca yeeyo tawi: mu elukuluku yeele Yesu aayariweiye “yàkhalawo amukukhuli yakona [otakhwani] weiwo” eweheryaka muhuwo aya. (Luka 2:8-11, BNM) Waakhanle wi awo “yakona [otakhwani] weiwo” elukuluku yoothene ya vayaakhani, nla hinni nikhale nthowa noophwanelela. Nyenya, woona wi elukuluku ya mulukuchulo o Petelehemu, elukuluku ya nakhutu, akukhula hiyaahaala ‘okonaka [otakhwani] weiwo’. Ohiya yeeyo, Yoosefe ni Mariya yaaya o Petelehemu nthowa nawi Kaisara Akusto aaloca wi achu erepeliwe. (Luka 2:1-7) Mwa yeeyo waahaala okhala woovila wi Kaisara aarumihe achu yaahihakalanle ni olamulelo wa o Roma ophiya mu elapo ayariwaayawo mu elukuluku ya mulukuchula.

6, 7. (a) Sookhovelela sincipale sa Nataale sinarweela woowi? (b) Ohiyana taani orivovo variyari va yookhovelela ya ovaha samahala mu Nataale ni mukhalelo wa ovaha wa Akiristu?

6 Nataale hanarweela Mpiipiliyani. Onarweela mu isatakha sa amalapo, siniichaniwa isaturno sa achu a Roma, muluku oolima. Moolikana, alapeli a muluku Mitra, mwawiiwanana ni waalakhanyeryiwa wa mahiku, yaanachapela nihiku na 25 a Tesempuru ntoko “nihiku na okhuma nsuwa noohooneya,” ooloca New Catholic Encyclopedia (Ensiklopetia Evyaani ya Katolika). Liivuru mmohamoha onnaloca “Nataale opacenrye elukuluku malapelo a Nsuwa yaaraaya awunlaana xaxaxa o Roma,” evinre masana mararu amanle okhwa Kiristu.

Akiristu Eeparipari aneerano soovaha saya moosivela

7 Variyari va ochapela waya, amalapo yaanavahana samahala nave yaanarehererya yoolya ni soowurya—sookhovelela sa Nataale seiyo iniikhalelaru ophiyerya olelo. Hiiha ntoko olelo, ancipale yaavaha samahala saya mu elukuluku yeele ya Nataale, hiyeerano eyo ntoko erempwaaya mu 2 Akorinto 9:7, onii: “Muchu érano ntoko átitelenliye m’murimani, tahi mothanana naari mwawakeleliha, vawi Muluku annamusivela yowo  onaveléla mohakalala.” Akiristu eeparipari aneerano soovaha saya moosivela nave hanaweherya nihiku naari hanaweherya waakhela echu. (Luka 14:12-14; mwaalakhanye Saweriwa Tarummwa 20:35.) Opwaha yeeyo, awo annahakalala moorweela wa okhala ootaphuwa wa soochunachuna ni wuukhuwa ntakhara Nataale, ni okhala oosiyaara ikhorowa oneeriwano mu elukuluku yeeyo ya eyaakha.Mateyu 11:28-30; Yohane 8:32.

8. Alipa miruku yaamvaha samahala Yesu mu ochapela nihiku na oyariwa wawe? Mutharihe.

8 Akhweya akina annakoha: ‘Alipa miruku hiyaamvanhe Yesu samahala echapelaka nihiku na oyariwa wawe?’ Hooye. Echu yeenraaya yaari pahiru mukhalelo wa wooniherya ncicimiho wa muchu oochuneya, sookhovelela sa wunlaana mmahiku akhalai. (1 Mamwene 10:1, 2, 10, 13; Mateyu 2:2, 11) Nave alipa-miruku hiyaakele omuxekurya Yesu nihiku aayariweiye. Ehaakumve ophiya saavira miyeeri sincipale Yesu amanle oyariwa,  nave owo aaphwanyeya mu empa, ohiya moolyela imope ntoko nikwiya.

TIHEENI PIIPILIYA ONAHUSIHEIYE VOOLOCA SA OCHAPELA NIHIKU NA OYARIWA

9. Tiheeni eri yawooneya mu ochapela nihiku na oyariwa olociwe Mpiipiliyani?

9 Naamwi oyariwa wa mwaana wiiliwiili ekhalaka echu yoohakalaliha, Piipiliya hanaloca sa ochapela nihiku na oyariwa wa akapuro a Muluku. (Salmo 127:3) Apwanne sirimuviihiwamo? Hooye, ntakhara Piipiliya onnaloca ochapela nihiku na oyariwa mu ikwaha piili—Farawo a Yiikuputu ni wa Herote. (Mwaalakhanye Mapacereryo 40:20-22; Marko 6:21-29.) Saweereya soopiili, saaheereya ichu soonanara—xaxaxa yaweerya ya Herote, Yohane Mpatisi aakwatiwa muru.

10, 11. Akiristu oopacerya yoona hai ochapela nihiku na oyariwa, nave ntakhara heeni?

 10 “Akiristu oopacerya, yoona okhala ntoko yookhovelela ya amalapo ochapela nihiku na oyariwa wa muchu ori oothene,” aaloca The World Book Encyclopedia. Ntoko yootakiherya, Akriki eelukuluku yakhalai, yaaneemererya wi muchu ori oothene ookhalano munepa waamukhaviherya mu oyariwa wawe ophiyerya okumi awe woothene. Munepa yoowo wookhalano “yoolikanela ya wiiphini ya muluku oyariwe nihiku nimohamoha ni muchu,” onnaloca liivuru The Lore of Birthdays (Yookhovelela ya Ochapela Nihiku na Oyariwa.) Ovinyerya khalai, nihiku na oyariwa naanaphitaanyeryiwa tho ni alipa a miruku onakhuma nsuwa.

11 Ohiya pahiru osepa sookhovelela siniiwanana ni isatakha sa ochapela nihiku na oyariwa nthowa na orweela wa amalapo ni onamulosiwe, akapuro a Muluku akhalai yaanasepa nthowa na malakiheryo yaacharihaaya. Mwawiihai? Awo yaari achu awiiyeviha ni oophimelela, vanthowa na yeela, yoona wi nihiku na oyariwa tahi noophwanelela wi nchapeliweke. * (Mikeya 6:8; Luka 9:48) Ohiya yeeyo, awo yaanamucicimiha ni omuthamala Yehova ntakhara yamahala ya okumi. *Salmo 8:3, 4; 36:9; Yawupulula 4:11.

12. Mmukhalelo taani nihiku na okhwa ti naphaama opwaha nihiku na oyariwa?

12 Akapuro oothene a Muluku anakhwa eri oororomeleya, ari mmuupuweloni mwa Muluku nave aakhalano ewehereryo ya okumi wa omwaahiyu. (Yupu 14:14, 15) Eklesiyaste 7:1, BNM, onii: “Nsina notxitximiheya ti norèra ophwaha yawunkhela, yowalamela. Ti norèra nihiku n’okhwa ophwaha nihuku n’oyariwa.” “Nsina” nahu ari meecelo aphaama nryaahuno  vamiithoni va Muluku variyari va omurumeela yoowo moororomeleya. Ti yawooneya wi, Yesu aalamulenle Akiristu wuupuwelela nihiku na okhwa, ohiya na oyariwa—wa Yesu, yoowo “nsina” nawe nri noochuneya, yoohulela ya ovuluxiwa.Luka 22:17-20; Ahepri 1:3, 4.

PASKHA—MALAPELO ATHERU

13, 14. Meerelo a wunlaana a Paskha anarweela woowi?

13 Paskha osuweliwe ntoko ochapela nihiku na ovinya wa Yesu Kiristu, (sintoko achu a ikerexa anachapelaaya olelo) mweeparipari orwenle mmalapelo atheru. Nooce ni namarokolo aniiwanana hai ni Paskha? Nooce “yoosiphela yoochuneya ya ekumi evyaani ni ovinya” onnaloca Encyclopædia Britannica, ovinyerya khalai namarokolo aanaphariheliwa ntoko yoosiphela ya oyara. Chiryene, Paskha meerelo a opaka isatakha sa oyara, ohiya ovinya wa Kiristu. *

14 Apwanne Yehova ahaala weemererya weerano isatakha sa oyara wi nchapele ovinya wa mwanawe? Hooye! (2 Akorinto 6:17, 18) Chiryene, Soorepa hinalamulela naari weemererya ochapela ovinya wa Yesu. Weerano yeeyo ori ophitaanyerya ni yoosiphela ya oyara, nave meerelo oohiroromeleya.

MAPHACUWELO A HALLOWEEN

15. Meerelo a Halloween anarweela woowi, nave tiheeni enooneya wa nihiku nthanliwe wa ochapela iwo?

15 Oosuweliwa nthowa na onamulosiwe, ni wiitatuxa ichu sootheiha naari meerelo makina a Halloween—ninniichaniwa tho ntoko nihiku na onamulosiwe—eeriwano nihiku na 31 a Otupuru ni achu akhalai yaakhala o celta a Kra-Pretanya ni a Irlanta. Elukuluku masuwa a waarya waacamela nihiku noopacerya na Novempro, awo yaanapaka esatakha ya Samhain, enataphulela “okuchuwa wa elimwi.” Yaanaroromela wi variyari  va opaka esatakha, waanahuleya mulako wa elapo ya achu ni elapo ya minepa, nave wi minepa soonanara ni saphaama saaneeceeca veelaponi; vanthowa na yeela, imusi saanavalaanya soolya ni soowurya ni echunaka okurumuxa iho. Vaavaa anamwane olelo anawaraaya ntoko anaaminepa naari onamulosiwe, ni oya empa ni empa ewoopopihaka achu weera sa malavi wakhala wi hevahiwe phatamari, moohisuwela awo anuupulula meerelo akhalai a Samhain.

NIHIKU NA OTHELA WANYU NIKHALE NAWEELA

16, 17. (a) Ntakhara heeni Akiristu aniirehererya wa othela anaphwanela ovarerya sookhovelela sa vanipuroni inavolowela othela mwawiiwanana ni malakiheryo a Piipiliya? (b) Vooloca sa sookhovelela ikina, ntoko oyeeha mvuka naari echu ekina wa atheli, tiheeni Akiristu anaphwanelaaya othokororya?

16 Moohilekela, “horwa-omwaleyatho [mu Paapulo Mutokotoko] masu a mulipa-othela ni mulipa-otheliwa”. (Yawupulula 18:23) Ntakhara heeni? Mu nikupa nimoha ti nthowa na meerelo aya a onamulosiwe, anariipiha othela mu nihiku muchu onatheleiye naari onatheliweiye.Marko 10:6-9.

17 Sookhovelela sinnahiyana elapo ni elapo. Nave ikina sa seiho sinooniwa ntoko wi tahi soonanara wi akhweya sinnaruuha “ekari” wa mutheli naari alipa oowompwa, sookhovelela seiho sinarweela mu meerelo a Paapulu. (Isaiya 65:11, BNM) Meerelo makina a yaawo ti yookhovelela ya waayeeherya mvuka achu anaya othelana, ikaarata ni ichu soolikana. Awo akhweya anarweela wa sookhovelela sawii ti wooweryeya okurumuxa minepa soonanara moorweela wa ovaha yoolya, yeerihaka wi iho sihaananarihe alipa oothela. Ohiya yeeyo, mvuka wookhalano yoosiphela epacenrye khalai ya ohakalala okhalano anamwane ni olekela wa othela. Chiryene oothene yaale anachuna wiikhapelela mu osivela wa Muluku anaphwanela osepa sookhovelela iha sinavarihana ni malapelo atheru.Mwaalakhanye 2 Akorinto 6:14-18.

18. Malakiheryo taani a Piipiliya anii yaakhaviherye ale aniirehererya wa othela ni alipa oowompwa?

18 Arummwa a Yehova tho annasepa saweera sa elapo  sinahaala oviihavo ncicimiho Neekiristu na othela ni makhalelo a waathokororya atheli, naari sinahaala ophoreiha yawuupuxerya-ya-murima ya akina. Ntoko yootakiherya, annasepa oloca wa atheli masu oonanara variyari va alipa oowompwa epharihelaka masu anavolowela mwiikho, ni mathatelo oohiphwanelela naari masu anahaala waanyemula atheli avyaani ni akina. (Masiposipo 26:18, 19; Luka 6:31; 10:27) Awo tho annasepa owiriyana masu ni miyaha sinooniherya ohiya makhalelo aphaama, nyenya “woselela okumi”. (1 Yohane 2:16) Wakhala wi nyuwaano munniirehererya wa othela, muhicuwale wi Yehova onachuna wi nihiku nlo nivahe yawuupuxerya ya ichu saphaama, ohiya soonanara. *

WAAMANIHA AKOOPHO—YOOKHALANO YOOTAPHULELA YA MALAPELO?

19, 20. Tiheeni liivuru eelapo onaloceiye sa mapacereryo a waamaniha akoopho nave ntakhara heeni yookhovelela ela heneemereryiwa wa Akiristu?

19 Waamaniha akoopho yookhovelela yawunlaana variyari va othela ni makhalelo makina a othata. International Handbook on Alcohol and Culture (Liivuru a Elapo Yoothene a Soowurya ni Sookhovelela), a 1995 onnaloca: “Waamaniha akoopho . . . yookhovelela ehinarweela mmalapelo nyenya enarweela mmikucho sakhalai mummo miluku yaavahiwaaya eviinyu . . . eweheryaka waakhela sooveka saya—ovekela onathipeleya mu masu ‘okumi woolekela!’ naari ‘ekumi!’”

20 Eparipari wi, achu ancipale akhweya haano muupuwelo wi waamaniha akoopho eri ntoko yookhovelela ya malapelo naari ya malavi. Naamwi hiiha, yookhovelela ya omviiha koopho enanwerya wooniwa ntoko yooveka ya “wirimu”—wa ikuru sihiri soomuchu—evekaka mareeliho mmukhalelo ohiniiwanana ni Piipiliya.Yohane 14:6; 16:23. *

 “NYUWO MUNAMUSIVELA YEHOVA, MWICHANEKENO YONANARA”

21. Isatakha taani sa elapo Akiristu anasepaaya naamwi ehivolowelaka saweereya sa malapelo, nave ntakhara heeni?

21 Olelo, Paapulu Mutokotoko, onnavuwiha meecelo oonanara—mwawooneya naari moohooneya—ilapo ikina sinnaalivela akarnavaale eyaaka eri yoothene naari ifesta sinavuwiha wiina woohiphwanelela naari ocicimiherya okonihana wa achu a mwiikho mmohamoha. Apwanne waahaala okhala waweemereryiwa wa yaale ‘anamusivela Yehova’ opaka makupa a mathatelo a mukhalelo yoola naari woona yaawo? Waakhanle wi munneerano eyo, apwanne mwahaala wooniherya wiica wa yeeyo eri yoonanara? (Salmo 1:1, 2; 97:10) Ti yaphaama otakiherya moonelo wa namarepa Salmo aavekenle: “Mukuphyihe mitho aka kihoneru itheru”!Salmo 119:37.

22. Mmakhalelo taani mukiristu onalakeleleiye wakhala wi onahaala opaka makupa naari hooye mu isatakha mwawiiwanana ni yawuupuxerya-ya-murima awe?

22 Sakhalavo isatakha seelapo, Mukiristu onaphwanela wiikasopa wi meecelo awe ehooniherye wa akina wi onnapaka makupa. Paulo oorepa: “Ntakhara awe nari mulyaka, nari muwuryaka, nari mweraka echu ekina, erani sothene o nchichimiho na Muluku.” (1 Akorinto 10:31; moone ekaaxa “ Mpake Soolakelela Mwa Miruku.”) Mmukhalelo mukina, wakhala wi sookhovelela ikina naari isatakha hisaano sootaphulela sa malapelo naari opaka makupa a epoliitika, nave hasinavolowela malakiheryo a Piipiliya, Mukiristu ori oothene onaphwanela opaka yoolakelela awe wakhala wi onahaala opaka makupa naari hooye. Mu elukuluku emohamoha, muchu onaphwanela othokororya moonelo wa akina wi ahaakwaculihe.

MMUCICIMIHE MULUKU MMASU NI SAWEERA

23, 24. Nnii niwerye hai ovaha onamoona waphaama vooloca sa malakiheryo eekhaikhai a Yehova?

23 Wa achu ancipale, mahiku a isatakha sa elapo ekari ya okhala vamoha ni amusi ni asinthamwene. Vanthowa na yeela, wakhala wi muchu iwexenxe moonanara wi meecelo Eekiristu  haano osivela, nnaphwanela omutharihela moosivela wi Anamoona a Yehova annasiveliwa opaka mithukumano saphaama ni amusi vamoha ni asinthamwene. (Masiposipo 11:25; Eklesiyaste 3:12, 13; 2 Akorinto 9:7) Hiyaano ninnasiveliwa okhala vamoha ni achu nnaasivelaahu variyari va eyaakha yoothene, nyenya, woona wi ninnamusivela Muluku vamoha ni malakiheryo awe eekhaikhai, hinnachuna waakanyerya ilukuluku iho soohakalaliha ni sookhovelela sihinamuhakalaliha.—Moone ekaaxa “ Malapelo Eeparipari Annaruuha Ohakalala Otokweene.”

24 Anamoona a Yehova akina annakhalano sookhumelela saphaama mu owaakhula achu anachuna osuwela, ewooniheryaka mwaha 16 wa liivuru Piipiliya Onahusiha Eheeni Chiryene? * Muupuwele wi, yoolakelela ahu ori waapurulela achu mu eparipari, ohiya wooniherya wi awo aahesa. Vanthowa na yeela, khalani oocicimiha, eepewe, nave mweerihe wi “Masu anyu akhale mu ikharari, ósiva mwapa.”Akolose 4:6.

25, 26. Asitiithi nyu, munii mwaakhaviherye hai anamwane anyu wunnuwiha nroromelo naya ni omusivela Yehova?

25 Ntoko akapuro a Yehova, ninnavyakihiwa vancipale. Ninnasuwela mathipelo a soororomela sahu nave tho ninnasuwela ntakhara heeni ninneera ichu ni osepa ikina. (Ahepri 5:14) Mwawiihiiha, asitiithi nyu, mwaahusihe anamwane anyu woopelela mwaha orweela mu Soorempwa. Moorweela wa weerano yeeyo, munahaala olipiha nroromelo awo aryaayano, waakhaviherya ovaha maakhulo anarweela Mpiipiliyani wa yaawo anaakaaha nroromelo naya, nave tho enahaala weeriha wi eroromele osivela wa Yehova.Yesaya 48:17, 18; 1 Petro 3:15.

26 Oothene anamurumeela Muluku “m’munepani ni mwiparipari” tahi wi pahiru annasepa isatakha sihiniiwanana ni Soorempwa, nyenya tho anniilipixerya wi ekhale oororomeleya mmikhalelo soothene sa okumi aya. (Yohane 4:23) Ancipale olelo, anoona wi tahi ya mphurelo okhala oororomeleya. Nyenya ntoko nnahaalaahu woona mmwaha onacharela, malakiheryo a Muluku taphaama.

^ par. 3 Moone ekaaxa “ Apwanne Kinaphwanela Opaka Makupa a Ochapela Ola?” Masu awi mahiku “aweela” ni isatakha sinnaromoliwa mu Índice das Publicações da Torre de Vigia olaleeryiwe ni Anamoona a Yehova.

^ par. 5 Mwawiiwanana ni waalakhanyerya wa Mpiipiliyani ni miyaha sa elapo, akhweya Yesu aayariwe mu 2 E.E.K. mweeri wa Ayuuta wa Etanim, onaakhwanela ni mweeri wa Setempuru/Otupuru mwawiiwanana ni kalentaariyu ahu.—Mmoone Estudo Perspicaz das Escrituras 2, epaaxina 538-539, olaleeryiwe ni Anamoona a Yehova.

^ par. 11 Nlamulo na Moose naanalamulela wi muthiyana amanle oyara, aveleele wa Muluku yoovaha ya oxipihano yoocheka. (Onamukucho 12:1-8) Yoochuneya ela ya nlamulo yaari yawuupuxerya ya wi achu annaaraviha yoocheka anamwane aya, nave yaanaakhaviherya Aisarayeli okhalano moonelo waphaama vooloca sa oyariwa wa mwaana. Akhweya tho yaanaakhaviherya ohichara sookhovelela sa amalapo sa ochapela nihiku na oyariwa.Salmo 51:5.

^ par. 13 Ti yootikhiniha osuwela wi nsina Paskha ni Enklesi (Eastre) nnaphitaanyeryiwa ni Eostre naari Ostara wa muluku amwaamuthiyana anglo-saxônica a elimwi ni oxa. Nave tho onnaphitaanyeriwa ni malapelo a muluku amwaamuthiyana fenícia ooyariha, Astarte, yoowo onooniheryiwa ni nooce vamoha ni namarokolo. Sooniheryiwa iruku itokotoko sa makupa a mwiikho naari nooce mmatani waacamana namarokolo.

^ par. 18 Moone miyaha miraru sa othela ni mathatelo mu Mulipeleli (em português) 15 a Otupro a 2006, ipaaxina 18-31.

^ par. 20 Mmoone Mulipeleli (em português), a 15 a Fevereru a 2007, ipaaxina 30-31.

^ par. 24 Olaleeryiwe ti Anamoona a Yehova.