Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Michaka Yaphaama Yoorweela wa Muluku!

 YOOHUSERYA 4

Yesu Kiristu Taani?

Yesu Kiristu Taani?

1. Okumi wa Yesu opacenrye mwawiihai?

Mikhalelo taani saamweeriha Yesu okhala awaacameleya?MATEYU 11:29; MARKO 10:13-16.

Ohiyana ni muchu ori oothene, Yesu aakhala wirimu ntoko munkeelo ahaakumve oyariwa veelaponi ya vathi. (Yohane 8:23) Owo aari yoopatuxiwa yoopacerya ya Muluku, nave owo aahikhaviherya mu opatuxiwa wa ichu ikina soothesene. Yesu ti yooworu opatuxiwe ti Muluku mukhateiye nave ti nthowa nenla oniichaniweiye Mwaana a Muluku “óyariwa mekhiye.” (Yohane 1:14) Yesu aahirumeela ntoko Namuchaka a Muluku, ti nthowa nenla oniichaniweiye “Masu.”Mwaalakhanye Masiposipo 8:22, 23, 30; aKolose 1:15, 16.

2. Ntakhara heeni Yesu aarwa veelaponi ya vathi?

Muluku aamurumiha mwanawe veelaponi ya vathi moorweela wa othaamiha okumi awe wirimu ahela mmirimani wa mwali Muyuuta iichaniwa Mariya. Mwawihiihaa Yesu haarino tiithi oomuchu. (Luka 1:30-35) Yesu aahirwa veelaponi ya vathi (1) wi ahusihe eparipari vooloca sa Muluku, (2) wi anivahe yootakiherya moota wa weerano yookhwela ya Muluku naamwi noonaka makacamiho, ni (3) wi avahe okumi awe woophaameya ntoko “oliva,” nari “woopola.”Mwaalakhanye Mateyu 20:28.

3. Ntakhara heeni hiyaano nnachunaahu woopola?

Woopola ti esisapo enaliveliwa wi oopoliwe muchu mu yawoopiha ya okhwa. (Mukwaha 21:29, 30) Okhwa ni wuuluvala hiyaapaka makupa a yookhwela yoopacerya ya Muluku wa achu. Mano, nnasuwela mwawiihai ela? Muluku aahimuleela mulopwana oopacerya, Aatamu, wi eerano yeeyo Piipiliya oniichaneiye “otcheka,” owo ahaala okhwa. Mwawiihiiha, Aatamu aahichenke, owo hakaakhwile. (Mapacereryo 2:16, 17; 5:5)  Moovarihana ni Piipiliya, okhwa ‘wávolowile’ mwiilaponi yaachu moorweela wa Aatamu. Mwawiihiiha, Aatamu aahaaraviha anamwanaawe oothene yoocheka ni okhwa. Hiyaano ninnachuna woopola wi onivuluxe mu ookhwa nramvaahu wa Aatamu.Mwaalakhanye aRoma 5:12; 6:23.

Taani aahaala owerya olivela woopola wi anivuluxe mu okhwa? Vaava hiyaano nnakhwaahu, hiyo nnalivela soocheka sahu pahiru. Haavovo muchu oohiphaameya onawerya olivela soocheka sa akina.Mwaalakhanye Salmo 49:7-9.

4. Ntakhara heeni Yesu okhwa?

Moohiyana ni hiyaano, Yesu aari oophaameya. Owo haaphwanela okhwa va nthowa na soocheka sawe—ntakhara wi owo hantonko ocheka. Moohiyana ni yeeyo, Yesu okhwenle soocheka sa akina. Muluku aahooniherya osivela woopwaha wa achu moorweela wa omuruma Mwanawe wi akhwe ntakhara hiyo. Yesu tho aahooniherya onisivela wawe moorweela wa owiiwelela Atiithi awe ni ovaha okumi awe ntakhara soocheka sahu.Mwaalakhanye Yohane 3:16; aRoma 5:18, 19.

5. Tiheeni Yesu oneereiye hiihaano?

Ari veelaponi ya vathi, Yesu aahaapenuxa areca, aahaaviiha ookhwa, nave aahiwoopola achu mu sawoopiha sincipale. Mwawiihiiha owo ohooniherya yeeyo onahaaleiye weera muhoolo wa achu oothene awiiwelela. (Mateyu 15:30, 31; Yohane 5:28) Amanle Yesu okhwa, Muluku aahimukookiherya okumi ntoko muchu oomunepani. (1 Petro 3:18) Wirimu, Yesu aawehererya ontatani noolopwana na Muluku ophiyerya Yehova omvaha owo ikuru wi alamulele ntoko Mwene veelaponi yoothene ya vathi. (aHebri 10:12, 13) Hiihaano Yesu onnalamulela wirimu ntoko Mwene, nave oomuchara awe annalaleerya michaka yeeyo yaphaama veelaponi yoothene.Mwaalakhanye Daniyeli 7:13, 14; Mateyu 24:14.

Moohilekela, Yesu onahaala opharihela muteko ikuru sawe ntoko Mwene wi amalihe makacamiho ni yaale aneeriha. Oothene yaale anamuroromela Yesu mu omwiiwelela owo anahaala opuha okumi mparadaiso veelaponi ya vathi.Mwaalakhanye Salmo 37:9-11.