Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Michaka Yaphaama Yoorweela wa Muluku!

 YOOHUSERYA 7

Omwene wa Muluku Tiheeni?

Omwene wa Muluku Tiheeni?

1. Omwene wa Muluku tiheeni?

Tiheeni enamweeriha Yesu okhala Mwene aphaama?MARKO 1:40-42.

Omwene wa Muluku ti olamulelo wa wirimu. Owo onarwa oraceela olamulelo woothene nave onamweeriha wi okhwela wa Muluku weereye wirimu ni veelaponi ya vathi. Michaka vooloca sa Omwene wa Muluku ti yaphaama. Moohilekela Omwene wa Muluku onahaala okhwaaniherya yoochuna ya achu ya olamulelo waphaama. Owo onahaala owiiwananiha achu oothene anakhala veelaponi ya vathi.Mwaalakhanye Daniyeli 2:44; Mateyu 6:9, 10; 24:14.

Omwene onaphwanela okhalano mwene. Yehova oomuthanla Mwanawe, Yesu Kiristu, wi akhale Mwene a Omwene awe.Mwaalakhanye Yawupulula 11:15.

2. Ntakhara heeni Yesu ti Mulamuleli oophwanelela?

Mwaana a Muluku ti Mwene oophwanelela nthowa nawi owo ti ooreera murima nave onnuumelela yeeyo eri yaphaama. (Yohane 1:14) Navetho, owo ookhalano ikuru wi aakhaviherye achu ntakhara owo onahaala olamulela elapo ya vathi moorweela wirimu. Vaculi va oviihiwa muukhwani, owo aaweela wirimu nave aakilaati ontatani noolopwana na Yehova awehereryaka. (aHebri 10:12, 13) Vookuchula, Muluku aamvaha Yesu ikuru wi apacerye olamulela.Mwaalakhanye Daniyeli 7:13, 14.

3. Taani anahaala olamulela ni Yesu?

Nikhuuru nniichaniwa “athxu a Muluku” enahaala olamulela ni Yesu wirimu. (Daniyeli 7:27, BNM) Achu a Muluku oopacerya  othanliwa yaari arummwa oororomeleya a Yesu. Yehova onnapwahiherya waathanla alopwana ni athiyana oororomeleya ntoko aweela ophiyerya olelo. Ntoko Yesu, awo anaviihiwa muukhwani ni mwiili woomunepani.Mwaalakhanye Yohane 14:1-3; 1 aKorinto 15:42-44.

Achu ahai anaya wirimu? Yesu aawiichana awo “mwamuloko.” (Luka 12:32) Vookuchula awo anahaala waakhwana 144,000. Awo anahaala olamulela elapo ya vathi ni Yesu.Mwaalakhanye Yawupulula 14:1.

4. Tiheeni yeeren’ye vaava Yesu aapacenryeiye olamulela?

Omwene wa Muluku opacenrye olamulela muyakha wa 1914. * Echu yoopacerya Yesu eenreiye yaari omvonyerya Satana ni masololo awe veelaponi ya vathi. Satana aananariwa nave aahipacerya waaceererya makacamiho veelaponi yoothene ya vathi. (Yawupulula 12:7-10, 12) Opacerya vaavale, makacamiho a achu ananvira eriki mwaaceereryeya. Ikhoco, etala, ireca, ni ocikinyeya wa elapo, soothesene iha sinapaka makupa a “eneneryo” yawi moohilekela Omwene onahaala othokororya ichu veelaponi ya vathi.Mwaalakhanye Luka 21:7, 10, 11, 31.

5. Omwene wa Muluku onakhwaaniherya eheeni?

Moorweela wa muteko wa olaleerya veelaponi yoothene, Omwene wa Muluku onnathukumanya muloko mutokotoko wa achu oorweela mmaloko oothene. Macikhwi a achu awiichacala annakhala mikelampa sa Yesu. Omwene wa Muluku onarwa waakhapelela yaawo vaava oneeraaya otoloxe mukhalelo woonanara wamutano veelaponi ya vathi. Oothene yaawo anachuna ophura moorweela wa Omwene wa Muluku anaphwanela ohuserya okhala awiiwelela ntoko mikelampa sa Yesu.Mwaalakhanye Yawupulula 7:9, 14, 16, 17.

Mpuwa mwa miyaakha 1,000, Omwene wa Muluku onahaala okhwaaniherya yookhwela yoopacerya ya Muluku wa achu. Elapo yoothene ya vathi enahaala okhala paradaiso. Vookuchula, Yesu onahaala waakookiherya Omwene Atiithi awe. (1 aKorinto 15:24-26) Nyuwo munnamusuwela muchu munahaalaanyu omuleela sa Omwene wa Muluku?Mwaalakhanye Salmo 37:10, 11, 29.

 

^ par. 6 Wi musuwele ti mwawiihayi Piipiliya aalohenryeiye eyaakha ya 1914, vareryani ipaaxina 215-218 sa liivuru Piipiliya Onahusiha Eheeni Chiryene?