Ocuphela mwaha

Ocuphela sampuwa

Anamoona a Yehova

Othanla elocelo Elomwe

 YOOHUSERYA 14

Ntakhara Heeni Muluku Ookhalano Marehereryo?

Ntakhara Heeni Muluku Ookhalano Marehereryo?

1. Ntakhara heeni Muluku aarehenreiye aIsarayeli akhalai?

Muluku aahaareherya anamwane a Aaparahamu okhala nloko nave aahaavaha malamulo. Owo aahiichana nloko nlo “Israyeli” nave aahaavaha malapelo awe eeparipari ni masu awe. (Salmo 147:19, 20) Mwawiihiiha achu a maloko oothene yaahaala ophura moorweela wa Isarayeli.Mwaalakhanye Mapacereryo 22:18.

Muluku aahaathanla aIsarayeli okhala anamoona awe. Mwahaaya wa khalai onnooniherya ti mwawiihai achu anakhaviheryeyaaya moorweela wa wiiwelela malamulo a Muluku. (Malamulo 4:6) Hiihaa, moorweela wa aIsarayeli, akina yaahaala omusuwela Muluku eeparipari.Mwaalakhanye Yesaya 43:10, 12.

2. Ntakhara heeni aKiristu eeparipari akhanlaaya ooreheryeya?

Voovira wa elukuluku, Isarayeli aahiyeleela mahala a Muluku, nave Yehova aahiraceeliha nloko nlo ni muloko weeKiristu. (Mateyu 21:43; 23:37, 38) Olelo, mu nipuro na aIsarayeli, aKiristu eeparipari anarumeela ntoko anamoona a Yehova.Mwaalakhanye Saweriwa Tarummwa 15:14, 17.

Yesu aahaarehererya oomuchara awe wi elaleerye ni yaapake oohuserya mmaloko oothene. (Mateyu 10:7, 11; 24:14; 28:19, 20) Olelo, muteko ola wa olaleerya woolucuwa nryaahu omakuchuwelo a mukhalelo wa ichu sa mutano. Echu ehitonko weereya mu miyaha sa achu, Yehova onnaathukumanya macikhwi oorweela mmaloko oothene wi yeere malapelo eeparipari. (Yawupulula 7:9, 10) AKiristu eeparipari ari ooreheryeya wi elipihane ni ekhaviheryane mukina ni mukhwaawe. Veelaponi yoothene, awo annapuha eprograma yoophwanaphwana ya mahusiheryo a Piipiliya mmithukumanoni mwaya.Mwaalakhanye aHebri 10:24, 25.

 3. Marehereryo a mutano a Anamoona a Yehova apacenrye hai?

Mpuwa mwa 1870 nikhuuru nikhaani na oohuserya a Piipiliya yaapacerya ophwanya iparipari sa Piipiliya saarimenle khalai. Awo yaasuwela wi Yesu aahirehererya muloko weeKiristu wi olaleerye, mwawihiihaa awo yaapacerya muteko wa olaleerya veelaponi yoothene. Mu eyaakha ya 1931 awo yaakuxa nsina Anamoona a Yehova.Mwaalakhanye Saweriwa Tarummwa 1:8; 2:1, 4; 5:42.

4. Anamoona a Yehova areheryen’ye hai?

Mu nsana noopacerya, miloko seeKiristu mu ilapo sincipale yaanaphura moorweela wa nikhuuru noolamulela naamweemererya Yesu sintoko Muru wa muloko. (Saweriwa Tarummwa 16:4, 5) Moophwanaphwana olelo, Anamoona a Yehova veelaponi yoothene annakhaviheryeya moorweela wa Nikhuuru Noolamulela na atokweene amiruku. Nikhuuru nla ninnahoolela ifiliyale sa Anamoona a Yehova seiyo sinataphulela, sinapaka, nave sinaakawa aliivuru a omuhuseryano Piipiliya mu ilocelo 600. Mwawihiihaa Nikhuuru Noolamulela ninnawerya ovaha malakiheryo a Piipiliya analipiha ni ohoolela miloko soopwaha 100,000 veelaponi yoothene. Khata muloko, alopwana ooreheryeya annarumeela ntoko atokweene, nari mansiau. Alopwana yaawo moosivela annathokororya muloko wa Muluku.Mwaalakhanye 1 Petro 5:2, 3.

Anamoona a Yehova ari ooreheryeya wi elaleerye michaka yaphaama ni waapaka oohuserya. Ntoko arummwa hiyaano ninnalaleerya empa ni empa. (Saweriwa Tarummwa 20:20) Hiyaano tho ninniivaha wi nimuhuserye Piipiliya ni achu ooreera murima anasivela eparipari. Nyenya Anamoona a Yehova tahi marehereryo ammoori pahiru. Hiyaano na emusi erino Tiithi oosivela. Hiyaano na anna ni arokora anacicimihana mukina ni mukhwaawe. (2 aTesalonika 1:3) Vawoona wi achu a Yehova ari ooreheryeya wi emuhakalalihe Muluku ni waakhaviherya akina, awo ari emusi yoohakalalaxa veelaponi ya vathi.Mwaalakhanye Salmo 33:12; Saweriwa Tarummwa 20:35.