ELA TI YOOCHUNEYA

Piipiliya oni: “Sorempwa sothene supuwelihiwe ti Muluku.” (2 Timóteo 3:16) Ela yaari eparipari, Piipiliya onnawerya owooniha ephiro yoophwanela ochara.

WAAHAALA WEERA EHEENI?

Wuupuwele yaweereya ela: Vaavaa Tavite oneeciheiye ekaaro, onnapacerya ovira mu ephiro ohisuwenleiye. Soothoonyerya inooniherya wi owo ootepa orakamela ni wiiwo achuneiye oyawo. Vano onnoona wi orimeela akhweya ovolowe mphiro ohiri yoowo.

Waari Tavite waahaala wi hayi?

WUUPUWELE ELA!

Sookhalavo soothanla onaphwanelaawe ochariha:

  1. Okoherya ephiro.

  2. Woona maapa.

  3. Otitelela oya ohoolo wi woone mphiro waphaama.

Soothanla sooraaru yookuchula tahi yoophwanelela.

Yoothanla yanaawiili ti yoophwanelela ohiyana ni yoopacerya. Nthowa na wi ti yaphaama okhalano maapa va mukwahani, yaawo anahala woohoolelaka ephiro yoochara.

Piipiliya onawerya okhala ntoko maapa mweekumi aa!

Liivuru yoowo onakaiwa vancipale elapo yoothene onnawerya:

  • wookhaviherya mmakacamiho

  • wookhaviherya osuwela omuchu aa ni okhala muchu oophwanelela

  • wooniherya mukhalelo wa okhalano ekumi yoophwanelela

 MAAKHULO A MAKOHO MATOKOTOKO A OKUMI

Vaavaa nnapaceryaahu oloca ninnapaka makoho ntoko ala:

  • Ntakhara heeni erimu ti yooripelela?

  • Itheneeri ipakiwe ni eheeni?

Nannuwa, ninnapaka makoho vooloca sa ichu inanirukurerya.

Hanka wakhala wi maakhulo ari Mpiipiliyani?

Achu ancipale analoca wi Piipiliya ori oosareya mihapo ni ithale, wi takhalai naari wi toovila omwiiwexexa. Mano chiryene Piipiliya toovila, naari enavila ti yeeyo achu loca sa Piipiliya? Achu awo hasuwenle eparipari!

Achu anuupuwela wi Piipiliya onaloca wi Muluku tonalamulela elapo. Nyenya eyo yaahaala oweryeya hai? Elapo ela yootepa onanara, yoosareya soohooxa ni makacamiho, ireca ni okhwa, ohaawa ni ipahu. Waahaala oweryeya hai Muluku oosivela eeriheke ichu soothene iha?

Munnachuna osuwela naakhulo nene? Yeeyo Piipiliya onaloceiye enahaala wootikhinihaani!

Ntoko monnaanyu ikano inaphwanyeya mu eproxura ela inarweela Mpiipiliyani. Anamoona a Yehova aalekecheya wi Piipiliya onnavaha ohoolela woororomeleya. Ti nthowa nawi owo ‘upuwelihiwe ti Muluku, nave muteko awe ori ohusiha, ovanya sawotha, otxharusa ni ohusiha n’wokololani.’ (2 Timóteo 3:16, 17) Munamphwanya mphurelo moorweela wa omwaalikhela liivuru yoola a khalai nave onaphara muteko olelo!