Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Kookelani wa Yehova

Ekaarata ya Nikhuuru Noolamulela

Ekaarata ya Nikhuuru Noolamulela

Anna Oosiveliwa:

Ntoko musuwenlaanyu, Piipiliya liivuru onaloca saweereya sa achu. Ancipale a yaawo yaari alopwana ni athiyana a nroromelo yaahoolenle makacamiho oolikana ni awihu. Awo yoona “ntoko hiha n’nonahu.” (Yakobo 5:17) Akina a yaawo yaanahoolela makacamiho ni soochunachuna. Nave akina yaanaakanyeriwa mmuupuwelo ni amusi aya naari Akiristu akhwaaya. Nave akina tho yaaniisoona okhalano nthowa ntakhara soocheka saya.

Apwanne oothene ala yaamuhiya Yehova moomalela? Hooye. Ancipale yaari ntoko namarepa a Salmo yoowo aavekenle ariki: “Káhuwela ntoko epucheputche yoriméla; mwavyeni murummwa anyu; ntakhara nkinachiwala malamulo anyu.” (Salmo 119:176) Munnawerya wiilikanyiha ni moonelo yoola?

Yehova harwa aacuwala alapeli awe yaawo akhumme mu nikhola nawe. Ohiya yeeyo, owo onnawaavya—akapuro awe moohihiyererya. Ntoko yootakiherya, muthokororye mukhalelo Yehova aamukhavihenryeiye mulapeli awe Yupu, yoowo aahooxen’ye ipahu sincipale—ophitaanyerya ohaawa, waayeleela oosiveliwa awe, ni makacamiho a okumi. Yupu tho aaheehiwa ni masu oonanara a yaale yaakele omuhakararya. Nyenya hantonko omurerya eculi Yehova, naamwi aahuwelihiwa ni masu oonanara mu ilukuluku ikina. (Yupu 1:22; 2:10) Yehova aamukhavihenrye hai Yupu wookolola muupuwelo awe?

Mukhalelo mmoha Yehova aapharihenleiye waari omurumiha nthamwene awe awiichaniwa Elihu. Vaavaa Yupu aaloceiye moonelo awe, Elihu aanawiriyana phaama nave eyo yaamweeriha oloca. Tiheeni owo aalonceiye? Apwanne aamuthoriha, moorweela wa omvaha nthowa naari omuuliha muru? Apwanne Elihu ahiisinnuwiha variyari va Yupu? Hooye, owo aari ocai wa muupuwelo yoowo! Moorweela wa munepa wa Muluku, Elihu aaloca: “Weyano ni miyano nnamulikana vamithoni va Muluku; yomi tho kipakiwe ni oloko.” Voocharela aamulipiha Yupu ariki: “Wa nthowa na yeyo weyano ohikòve, nkinnupuwelaru wonyànya.” (Yobi 33:6, 7, Bibiliya Nsu na Muluku, BNM.) Ohiya waaceererya othanana wa Yupu, Elihu moosivela aamvaha miruku ni nlipiho nenlo Yupu aachuneiye.

Suwelani wi eproxura ela erehereryiwe mmukhalelo mmohamoha. Woopaceryani, nohiiwexexa phaama nave noothokororya waaca wa achu arimeenle. (Masiposipo 18:13) Nave nivolowa mu soorempwa, ni mavekelo noothokororya makhalelo yaawo Yehova eereiye wi aakhaviherye akapuro awe mmahiku akhalai vaavaa yaakumanaaya ni makacamiho oolikana. Vookuchula, niiwananiha soorepa seiha ni saweereya sa mutano wi nrehererye eproxura ela. Ninnoowopani wi muthokororye miyaha sa eproxura ela. Mwaakhele mooni ahu woosivela ni weeparipari.

Nikhuuru Noolamulela na Anamoona a Yehova