Ocuphela mwaha

Ocuphela menu anaawiili

Ocuphela sampuwa

Anamoona a Yehova

Elomwe

Echoko Anyu Enanwerya Okhala Yoohakalala

 NIKUPA 7

Munii Mmuhusihe Hai Mwaninyu

Munii Mmuhusihe Hai Mwaninyu

“Masu a nlamulo nla, olelo kinovahaka, ekhaleke mmurimani mwà. Owupuseryeke ana-à.”—Wupuserya Malamulo 6:6, 7, BNM.

Vaavaa Yehova aatikithenryeiye marehereryo a echoko, owo aahaavaha asitiithi murici wa anamwane aya. (Akolose 3:20) Murici anyu ntoko tiithi ori omuhusiha mwaninyu omusivela Yehova wi akhale mutokweene a miruku. (2 Timoteo 1:5; 3:15) Nyuwaano tho munaphwanela osuwela tiheeni eri mmurimani wa mwaninyu amwaamulopwana naari amwaamuthiyana. Chiryene, yootakiherya anyu ti yookhweleya. Nyuwaano munanwerya ohusiha phaama Masu a Yehova wa mwaninyu wakhala wi voopaceryani mookuha yaawo mmurimani mwanyu.Salmo 40:8.

 1 MUTAPHUWE WI OKHWEYE ANAMWANE ANYU OLOCA NI NYUWAANO

TIHEENI PIIPILIYA ONALOCEIYE: ‘Mukhaleke ówirianasha, awitchálela olocha.’ (Yakobo 1:19) Nyuwaano munachuna wi anamwane anyu eloceke ni nyuwaano mootaphuwa. Awo anaphwanela osuwela wi nyuwaano muri a wiivaha waawiriyana awo yaachunaka oloca. Mpake mukhalelo wa murecele mwawiihiiha awo anahaala woona okhweya oloca. (Yakobo 3:18) Wakhala wi awo anuupuwela wi munahaala waasamela naari waathoriha, awo heni ekhale ootaphuwa chiryene ni nyuwaano. Mukhale oopixa murima ni anamwane anyu, nave elukuluku yoothene nwooniherye osivela wanyu.Mateyu 3:17; 1 Akorinto 8:1.

TIHEENI MUNAPHWANELAANYU WEERA:

  • Mukhale oophwanyeya vaavaa anamwane anyu anachunaaya oloca.

  • Mvaaneleke ni anamwane anyu elukuluku yoothene, ohiya pahiru yakhalavo makacamiho.

2 MWEERERYE WIIWEXEXA YEEYO AWO ANALOCAAYA

TIHEENI PIIPILIYA ONALOCEIYE: “Yoowo onooniherya miruku mu mwaha, onamphwanya yaphaama.” (Masiposipo 16:20, NM.) Ilukuluku ikina, onahaala ochuneya woona opwaha masu a anamwane anyu wi mwiiwexexe moonelo aya weeparipari. Ti yawunlaana amiravo waaceererya naari oloca ichu sihiri seiho. “Wakhula ohipatxenrye toko owiriyana, ololo.” (Masiposipo 18:13, BNM.) Muhaakuvele onyeenyeya.Masiposipo 19:11.

TIHEENI MUNAPHWANELAANYU WEERA:

  • Mulakelele wi muhaakwatelele naari waasamela, moohipwacha yeeyo anamwane anyu analocaaya.

  • Mweererye wuupuwela moonelo yoowo mwaaraanyuno murino iyaakha saya ni yeeyo yaari yookhweleya wa nyuwaano.

 3 MUKHALE AWIIWANANA

TIHEENI PIIPILIYA ONALOCEIYE: “Mwan’aka, owiriyane ikano s’atithi à, ohinyemule mahusiho a amai à.” (Masiposipo 1:8, BNM.) Yehova omvaha tiithi ni mai olamulelo wa anamwane. Nyuwaano munaphwanela waahusiha anamwane anyu owiiwelelaani ni woocicimihaani. (Aefeso 6:1-3) Anamwane annawerya woona wakhala wi asitiithi aya hari a wiiwanana “ni mupuwelo mmoha.” (1 Korinto 1:10, BNM.) Wakhala wi yookhala echu muhineemereryaanyu, mweererye oheerano va miitho wa anamwane anyu nthowa nawi eyo yaahaala ovukula ncicimiho naya wa nyuwo ntoko asitiithi.

TIHEENI MUNAPHWANELAANYU WEERA:

  • Mvaanele nave mwiiwanane mukhalelo munahaalaanyu waalaka anamwane anyu.

  • Wakhala wi nyuwaano ni oothelana anyu mookhalano muupuwelo woohiyana mmukhalelo wa waahusiha anamwane anyu, mweererye wiiwa moonelo wa oothelana anyu.

 4 MUKHALENO YOOLAKELELA

TIHEENI PIIPILIYA ONALOCEIYE: “Omuhusihe mmiravo metxelo aphama.” (Masiposipo 22:6, BNM.) Ohuserya waphaama wa anamwane anyu honi weere moona ophacuwa. Ti woochuneya opaka yoolakelela ya waahusiha, enaphitaanyerya owookolola anamwane anyu. (Salmo 127:4; Masiposipo 29:17) Wookolola honataphulela pahiru olaka, nyenya onavolowela waakhaviherya anamwane anyu wiiwexexa mathoweene ari oculi wa malamulo. (Masiposipo 28:7) Navetho, mwaahusihe awo osivela Masu a Yehova ni wiiwexexa malakiheryo aya. (Salmo 1:2) Ela enahaala waakhaviherya wunnuwiha yawuupuxerya-ya-murima yaphaama.Ahebri 5:14.

TIHEENI MUNAPHWANELAANYU WEERA:

  • Mukhaleno eparipari wi anamwane anyu annamoona Muluku ntoko Muchu eeparipari yoowo anaphwanelaaya omuroromela.

  • Mwaakhaviherye awo osuwela ni osepa makhalelo oonanara, ntoko anaphwanyeya mu interneti naari onthamwene mu Interneti. Mwaahusihe awo mukhalelo wa waasepa acapaheya.

“Omuhusihe mmiravo metxelo aphama”