Kaya Ngbangɔ mɛndɛ̃ agbinyangbi tɛnɛ mɛ ti Ebre Sheol nga na tɛnɛ ti Grɛkɛ mɛ Hades na “Lifelo.” Tɛnɛ niko zu sɛ ndo fa sɛndɛ mɛ azi zu ndo gwe da. (Nzembo 16:10; Awa Pangɔ Kwa 2:27 a) Azi gba ndo ye ya lifelo ti wá da, ngama se mɛ limɔ olo ndo fa na ni. Wa tɛnɛ mɛ Ngbangɔ ndo tɛnɛ nɛ?

Na ya tɛnɛ mɛ e na luangɔ gbinya ti ahũnda mɛ:

•  Lifelo du ndo mɛ azi ndo hũ pɛnɔ da bwai?

•  Pandɛ mɛndó Yezo kpɔ na lo tɛ kɔli kɔi mɛ wa ye na Lazalo nɛ?

•  Lifelo ndo fa kangbi popo tɛ zo na Nzapa?

•  Zo kɔi dɛ londó ka lifelo ga wɛ?

•  Avɛrse ti ya Ngbangɔ mɛ tɛnɛ tɛnɛ ti lifelo, bere sɛndɛ

•  Yanga ti kɔzoni mɛndó asu na Ngbangɔ

•  Pandɛ ti wá ti lifelo

 Ipɔ. Kaya Ngbangɔ mɛndɛ̃ agbinyangbi tɛnɛ mɛ ti Ebre Sheol nga na tɛnɛ mɛ ti Grɛkɛ Hades na “lifelo.” Tɛnɛ niko zu sɛ ndo fa sɛndɛ mɛ azi zu ndo gwe da. Ngbangɔ pa ya ta azi mɛ kaya “sɛndɛ” ndo hĩnga ndo ma.

•   Ta azi mɛ kaya wá ti lifelo ndo hĩnga ndo ma, wa ta ala lengbi nga ti hũngɔ pɛnɔ ma. “Ta kwa, mɔkanɔ, hĩngangɔ ndo nga na ndara kaya sɛndɛ ndo mɛ mɔ na gwengɔ da ma.” (Mosakoli 9:10). Ta lifelo du ndo mɛ ando hɛ̃ asiɔ azi pɛnɔ ma. Ngbangɔ tɛnɛ ya: “Asiɔ azi ma kamɛnɛ wa ala du kaya sɛndɛ so kpɔ.”—Nzembo 31:17; Nzembo 115:17.

•   Nzapa tɛnɛ ya tumbu ti siɔ kpale la du kwá, kanda ta du hũngɔ pɛnɔ kaya wá ti lifelo ma. Nzapa tɛnɛndó hɛ̃ kɔli ti uzu Adama ya na lo mɛ ya lo kɛ̃ tɔndɔngɔ andia tɛ ni ko, lo na kpingɔ. (Ebandeli 2:17) Ta lo tɛnɛndó ya ye kɔi lengbi ti hũngɔ pɛnɔ kaya wá ti lifelo ma. Na pɛ siɔ kpale tɛ Adama Nzapa tɛnɛndó hɛ̃ lo ya, mbi na hɛ̃ngɔ mɔ tumbu: “Na lo mɛ ya mɔ du sese, mɔ nga na diringɔ kaya sese.” (Ebandeli 3:19) Lo na gwengɔ ka ndo ti siriri. Nzapa lengbindó ti dungɔ wa nvɛ̃nɛ se du ya lo hɛ̃ndó Adama tumbu kaya wá ti lifelo. Ta Nzapa gbinyangbindó tumbu na ndia mɛndó lo hɛ̃ lo ma. Ngoi yɔngɔlɔni na pɛ lingɔ siɔ kpale tɛ Adama ko, Nzapa sundó ni kaya Ngbangɔ, lo tɛnɛ ya: “Mbana gɛrɛ mɛ zo ndolua na lingɔ siɔ ye la kwá.” (Roma 6:23) “Se zo kpi ko, lo futa nyongo ti siɔ kpale tɛ lo.”—Roma 6:7.

•   Ta Nzapa ndó na dangɔ bɛ ti hɛ̃ngɔ zo pɛnɔ kaya wá ti lifelo ma. (Yirimia 32:35) Tɛnɛngɔ ya Nzapa ndo hɛ̃ azi pɛnɔ kaya wá ti lifelo, ta ni mangbi na tɛnɛ mɛ Ngbangɔ ndo tɛnɛ ya “Nzapa du songo” ma. (1 Yoanɛ 4:8) Lo na gwɛ̃ ya azi zu ye ni wa avɔrɔ nga ni, kanda ta gwɛ̃ tɛ lo du ya azi hũ pɛnɔ kaya wá ti lifelo ma.—Matie 22:36-38.

•   Anzɔ̃ azi ndo gwe lifelo. Yakobo na Yobo mɛndó azi ti mbilimbili ndo kũndó bi mɛ ala na gwengɔ kai. (Ebandeli 37:35; Yobo 14:13) Yezo tɛnɛndó ya azi mɛ ka lifelo na azi mɛ kpili na songɔ na bi mɛ na gangɔ. (Awa Pangɔ Kwa 2:31, 32) Na ngoi mɛ Ngbangɔ ndo tɛnɛ tɛnɛ ti “lifelo” ko, ni ye tɛnɛngɔ tɛnɛ ti sɛndɛ. b

 Pandɛ tɛ kɔli kɔi mɛndó wa ye na Lazalo mɛ Yezo kpɔ asu ni kaya mbɛti ti Luka 16:19-31. Ni dundó pandɛ gɛgɛrɛ ti hangɔ na bɛta tɛnɛ. Ta pandɛ tɛ kɔli kɔi mɛ wa ye na Lazalo dundó ye mɛ ali tɛrɛ lo biani ma. (Matie 13:34) Ti nɛngɔ ya mɔ hĩnga pandɛ niko nzɔ̃ni ko, ba bɛli tɛnɛ mɛ “Kɔli kɔi mɛndó wa ye na Lazalo dundó ana?”

 Ipɔ. Hangɔ lo mɛ ndo tɛnɛ ya kwá ndo kangbi popo tɛ zo na Nzapa ta mangbi na tɛnɛ mɛ Ngbangɔ ndo ha ma, kanda ni tɛnɛ yangondo ya ta azi mɛ kpili ndo hĩnga ndo bɛ kɔi ma.​—Nzembo 146:3, 4; Mosakoli 9:5.

 Ĩĩ.Ngbangɔ tɛnɛ tɛnɛ tɛ azi gumbaya mɛndó ahɔ la kaya sɛndɛ. (tɛnɛ mɛ sɛndɛ agbinyangbi ni kaya Ngbangɔ mɛndɛ̃ ya “lifelo”) wa ala dirindó so na pɛ kwá tɛ la. c Se du ya ala ndo hĩngandó ndo na ngoi mɛndó ala kai ko, ale ala lengbindó ti kambisangɔ akpale mɛndó ala tengbi na ni. Kanda lo ti ngbondoni du ya ta zo kɔi ka popo tɛ azi niko tɛnɛndó ya ni hũndó pɛnɔ bere ni tengbindó na alo mɛndɛ̃ ma. Na lo nɛ? Na lo mɛ ya ngama se mɛ Ngbangɔ ndo ha na ni ko, ta azi niko ndo hingandó ndo ma, ala dundó ngama azi mɛ “ala langɔ.” ti kpengbani—Yoanɛ 11:11-14; 1 Kɔrinto 15:3-6.