Inda koshikalimo

Inda koshikongitho oshitiyali

Oonzapo dhaJehova

Oshindonga

Omolwashike Oonzapo dhaJehova ihaadhi dhana Okrismesa?

Omolwashike Oonzapo dhaJehova ihaadhi dhana Okrismesa?

Omauvoko ga puka ngoka ge li apehe

Euvoko lya puka: Oonzapo dhaJehova ihadhi dhana Okrismesa, molwaashoka inadhi itaala muJesus.

Euvoko lyomondjila: Tse Aakriste. Otwi itaala kutya omuntu ota vulu owala okuhupithwa okupitila muJesus Kristus. — Iilonga 4:12.

Euvoko lya puka: Ohamu dhenge aantu omitse kumwe momagumbo sho hamu ya longo kutya kaye na okudhana Okrismesa.

Euvoko lyomondjila: Otu na ko nasha naantu noonkondo notwa hala okulongitha Ombiimbeli tu ya kwathele ya kale ye na ekwatathano ewanawa momagumbo gawo.

Euvoko lya puka: POkrismesa ihamu kala mu na ombepo yokugandja noyombili.

Euvoko lyomondjila: Ohatu kambadhala okugandja esiku kehe nokukala tu na ombili esiku kehe. (Omayeletumbulo 11:25; Aaroma 12:18) Pashiholelwa, okugongala kwetu nokuuvitha kwetu ohatu ku ningi metsokumwe nelombwelo lyaJesus ndyoka tali ti: “One mwa pewa oshindji omagano, gandjeni wo omagano.” (Mateus 10:8) Oshikwawo, ohatu gandja eitulomo kUukwaniilwa waKalunga mboka owo owala tawu ka eta ombili kombanda yevi. — Mateus 10:7.

Omolwashike Oonzapo dhaJehova ihaadhi dhana Okrismesa?

  • Jesus ina lombwele aalongwa ye ya dhane evalo lye, ihe oya dhimbulukwe eso lye. — Lukas 22:19, 20.

  • Aayapostoli yaJesus nosho wo aalongwa ye kaya li haya dhana Okrismesa. O-New Catholic Encyclopedia otayi ti kutya “oshituthi shevalo lyaJesus osha li sha tameke okudhanwa momumvo 243 [E.N.],” oomvula ethele konima yeso lyomuyapostoli gwahugunina.

  • Kapu na uumbangi tawu ulike kutya Jesus okwa valwa mo 25 Desemba; esiku lyevalo lye inali nyolwa mo mOmbiimbeli.

  • Otwi itaala kutya Okrismesa inayi hokiwa kuKalunga, molwaashoka oya za momalongo goshipagani. — 2 Aakorinto 6:17.

Omolwashike itaamu dhana owala Okrismesa pehala lyokweetha mu tondike?

Oyendji ohaya dhana Okrismesa nonando oye shi kutya oya za momalongo goshipagani noitayi popilwa kOmbiimbeli. Aantu mboka otashi vulika ya pule taya ti: Omolwashike Aakriste ye na okuninga etokolo kaali holike koyendji lyokwaadhana Okrismesa? Omolwashike itaaya dhana owala Okrismesa pehala lyokweetha ya tondike?

Ombiimbeli otayi tu ladhipike tu kale hatu dhiladhila kutse yene, nenge tu longele Kalunga ‘pandunge.’ (Aaroma 12:1, 2, OB-1954) Otayi tu longo tu kale tu hole oshili. (Johannes 4:23, 24) Onkee ano, nonando otwa hala aantu ya kale ye tu tala ko nawa, ohatu iyutha komithikampango dhOmbiimbeli, nonando otashi tu tonditha kaantu.

Nonando tse ihatu dhana Okrismesa, otwa simaneka uuthemba wayalwe mboka haye yi dhana. Ihatu ya keelele ya dhane Okrismesa.