Omauvoko ga puka ngoka ge li apuhe

Euvoko lya puka: Oombangi dhaJehova inadhi itaala mepango lyopaunamiti.

 Oshili: Tse ohatu kambadhala okukonga epango lyopaunamiti, ndyoka tali tu opalele nosho wo aantu yaandjetu. Ngele tatu ehama, ohatu yi koondohotola ndhoka dhi na ontseyo yopaunamiti nohadhi tanda itaadhi longitha ombinzi. Otwa pandula ehumokomeho ndyoka lya ningwa po ngele tashi ya miinima yopaunamiti. Odhoshili kutya epango nopwaa na okutulwa ombinzi ndyoka hali longithwa okupanga aavu yOombangi dhaJehova, kunena ohali etele aantu ayehe uuwanawa muuyuni mboka taye li longitha. Miilongo oyindji, omuvu kehe ngashingeyi ota vulu okuhogolola epango nopwaa na okutulwa ombinzi, opo a yande okutula omwenyo gwe moshiponga komikithi ndhoka hadhi taandele okuza mombinzi, hadhi nkundipaleke aakwiita yolutu nosho wo okuyanda omapuko ngoka haga etithwa kaantu.

 Euvoko lya puka: Oombangi dhaJehova odhi itaala kutya eitaalo otali vulu okwaaludha omuntu kuuvu we.

 Oshili: Ihatu longitha omikalo dhokwaaludha aantu melongelokalunga lyetu.

 Euvoko lya puka: Okupangwa nopwaa na okutulwa ombinzi oku na ondilo noonkondo.

 Oshili: Epango ndyoka inaali kwatela mo okutulwa ombinzi kali na nando ondilo. a

 Euvoko lya puka: Oombangi dhaJehova odhindji, mwa kwatelwa uunona, ohadhi si omumvo kehe sho hadhi tindi okutulwa ombinzi.

 Oshili: Kapu na nando uumbangi washa tawu koleke oshinima shoka. Mboka ya dheulilwa okutanda, olundji ohaya ningi omatando ga kwata miiti ngaashi gomutima, gomasipa nosho wo gokutula omuntu oshitopolwa sholutu nopwaa na oku mu tula ombinzi. b Aavu, mboka ya pangwa nopwaa na okutulwa ombinzi, mwa kwatelwa uunona nokuli, olundji ohaya aluka nawa, nenge ya aluke nziya okuyelekanitha naamboka ya tulwa ombinzi. c Nonando ongawo, kapu na omuntu ta vulu oku shi koleka kutya ngele omuvu okwa tindi okutulwa ombinzi ota si, nenge ngele okwa tulwa ombinzi ita si.

Omolwashike Oombangi dhaJehova ihaadhi zimine okutulwa ombinzi?

 Oshinima shika oshi na ko nasha nelongelokalunga lyadho, kashi na ko nasha nuunamiti. Omatestamendi agehe, ekulu nosho wo epe, otage tu lombwele sha yela tu yande ombinzi. (Genesis 9:4; Levitikus 17:10; Deuteronomium 12:23; Iilonga 15:28, 29) Shimwe ishewe, Kalunga okwa tala ko ombinzi yi lile po omwenyo. (Levitikus 17:14) Onkee ano ihatu tindi okutulwa ombinzi molwaashoka owala twa hala okuvulika kuKalunga, ihe omolwaashoka wo twe mu simaneka e li Omugandji gwomwenyo.

Omataloko gaantu taga lunduluka

 Nale, aatseyinawa yuunamiti oya li ya tala ko omukalo gwokwaatulwa ombinzi gwa nika oshiponga noonkondo, nenge tu tye nokuli gu li okwiikutha omwenyo, ihe etaloko lya tya ngawo olya lunduluk;a momimvo opo dha zi ko. Pashiholelwa, mo 2004, oshifo shimwe shopaunamiti osha ti kutya “iikwaniipangitho oyindji mbyoka hayi longithwa okupanga aavu yOombangi dhaJehova oyo unene tayi ka longithwa momimvo dhi li komeho.” d Mo 2010, oshifo shedhina Heart, Lung and Circulation osha ti kutya “‘etando ndyoka hali ningwa nopwaa na okutulwa ombinzi’ kali na owala okungambekelwa kOombangi dhaJehova, ihe oli na okukala oshinima tashi dhana onkandangala metando lyakehe siku.”

 Oondohotola omayovi muuyuni awuhe ngashingeyi ohadhi longitha iikwaniipangitho mbyoka hayi kwathele omuvu kaa kanithe ombinzi oyindji pethimbo lyomatando ga kitakana, nopwaa na okutula omuvu ombinzi. Iikwaniipangitho mbyoka ya pingena po okutulwa ombinzi ohayi longithwa nomiilongo mbyoka opo tayi putuka, nokuli kaavu mboka kaaye shi Oombangi dhaJehova.