Iilonga yetu muuyuni awuhe ohayi ambidhidhwa unene pashimaliwa nehalo ewanawa koohandimwe mboka ye li Oombangi dhaJehova. a Uuketha moka hamu tulwa iimaliwa ohawu kala momahala moka hatu gongalele, dho omikalo dhilwe dhokugandja omayambidhidho otadhi adhika kepandja lyetu lyokointaneta. Kehe gumwe ota vulu okuhogolola ngele omayambidhidho ngoka ta gandja okwa hala ga longithwe miilonga yomuuyuni awuhe, megongalo lyomoshitopolwa nenge momikalo adhihe mbali.

 Oombangi dhaJehova ihadhi gandja oshitimulongo nenge dhi ambidhidhe iimaliwa yomwaalu gwontumba kondandalunde nenge dhi gandje oopelesenda dhontumba okuza miiyemo yadho. (2 Aakorinto 9:7) Ihatu umbu ongalo, ye omuntu iha futu sha uuna ta gongala pamwe natse. Shimwe ishewe, mboka haya kwatele komeho ihaya pula ofuto yasha ngele taya gandja oshipopiwa sheninginitho, shefumviko, shohango nenge uuna taya gandja omayakulo galwe gopalongelokalunga. Ihatu gongele nando oshimaliwa okupitila mobraai nenge mobazaala, mootumbutumbu, mokuzalekwa ekalanyanya nenge ondhelela, muulalelo wi ikalekelwa, mokukondjela epandela nenge oshinima shontumba, mokuninga omathigathanopo ga kwatela mo iimaliwa nosho wo mokuhehela tatu longitha ehanga lya pya. Ngele gumwe a gandja omayambidhidho oshinima shoka ihashi tseyithilwa nando omuntu gwontumba nenge aakwashigwana. (Mateus 6:2-4) Kepandja lyetu lyokointaneta nosho wo miileshomwa yetu ihamu kala omatseyitho gasha gopaipindi.

 Egongalo lyOombangi dhaJehova ohali gandja olopota nkene oshimaliwa sha longithwa omwedhi kehe, nuuyelele mboka ohawu tsilikwa kekatha lyegongalo. Opo ku talike kutya iimaliwa yegongalo otayi longithwa nawa, omayalulo giimaliwa ohaga talululwa konima yoomwedhi ndatu kehe (audit). — 2 Aakorinto 8:20, 21.

Omikalo moka to vulu okugandja omayambidhidho

•  ● Uuketha womaambidhidho: Oto vulu okutula omayambidhidho goye mokaketha hoka ke li pOshinyanga shUukwaniilwa, mOshinyanga shoshigongi nenge hoka ke li mehala moka hamu gongalele.

•  ● Okugandja omayambidhidho okupitila mointaneta: Miilongo oyindji, oto vulu okugandja omayambidhidho to longitha epandja lyokointaneta: “Gandja omayambidhidho kOombangi dhaJehova,” nenge to longitha okakalata kehe kombaanga, nenge ngaa omukalo kehe gwokutuma oshimaliwa okuza kombaanga yoye, nenge to longitha omikalo dhilwe okupitila mointaneta. b Oombangi dhaJehova dhimwe odhi itulila po elalakano “dhi ikalekele” oshimaliwa shontumba omwedhi kehe, opo dhi vule okugandja omayambidhidho taga tsikile mokulongitha omikalo ndhoka twa tumbula metetekelo. — 1 Aakorinto 16:2.

•  ● Omayambidhidho ga kwashilipalekwa: Omikalo dhimwe dhokugandja omayambidhidho otadhi pula wu ninge omakwashilipaleko nenge wu shaine oondokumende dhopaveta komeho yethimbo. Oku shi ninga ohashi ku kwathele wu mone uuwanawa mboka hawu pewa omuntu ngoka ha gandja iifendela (tax) moshilongo sheni. Opu na oohandimwe oyendji mboka yi ilonga nkene taya vulu okugandja iikwatha pethimbo ye li momwenyo nenge konima ngele ya si. Oto indilwa nesimaneko enene wu kwatathane noshitayimbelewa shOombangi dhaJehova shoka tashi wilike iilonga moshilongo sheni, wu pewe uuyelele wa gwedhwa po, ngele owa hala okugandja omayambidhidho momikalo tadhi landula:

  •  ● okupitila mo-account yombaanga

  •  ● omakwashilipaleko nopenzela

  •  ● etungo nenge evi

  •  ● iipambuliko nomikuli

  •  ●omatestamendi noondokumende dhopaveta dhetopolo lyomaliko

 Opo wu mone uuyelele owundji kombinga yomayambidhidho ngoka to vulu okuninga moshitopolwa sheni, inda kepandja lyetu, “Gandja omayambidhidho kOombangi dhaJehova.”