Olutuwiliki olwo okangundu okashona kAakriste ya pyokoka pambepo, mboka haya gandja omalombwelo kOombangi dhaJehova muuyuni awuhe. Iilonga yOlutuwiliki oya kwatela mo iinima iyali:

•   Ohalu tonatele nokulongekidha elongo ndyoka lya kankamena kOmbiimbeli okupitila miileshomwa, mokugongala kehe nosho wo moosikola dhOombangi dhaJehova. — Lukas 12:42.

•   Ohalu tonatele iilonga yOombangi dhaJehova muuyuni awuhe, mokuwilika iilonga yokuuvitha nosho wo mokutala nkene iinima mbyoka ya gandjwa omayambidhidho yi na okulongithwa.

 Olutuwiliki ohalu landula omukalo ngoka gwa tulwa po “kaayapostoli nokaakuluntu yoshigwana muJerusalem” yomethelemumvo lyotango, mboka ya li ya ningi omatokolo ga simana pehala lyegongalo lyopaKriste alihe. (Iilonga 15:2) Ngaashi owala aalumentu mboka aadhiginini yomuJerusalem, iilyo yOlutuwiliki kayi shi nando aawiliki yehangano lyetu. Olutuwiliki ohalu kongo omayele mOmbiimbeli, molwaashoka olwa tseya kutya Jehova okwa langeka po Jesus Kristus e li Omutse gwegongalo. — 1 Aakorinto 11:3; Aaefeso 5:23.

Oolye ye li iilyo yOlutuwiliki?

 Iilyo yOlutuwiliki oyo: Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane nosho wo Jeffrey Winder. Ayehe ohaya longele koombelewa dhetu oonene moWarwick, shaNew York, moAmerika.

Olutuwiliki olu unganekwa ngiini?

 Olutuwiliki olwa tota po ookomitiye hamano dhokutonatela iilonga yetu yi ili noyi ili, noshilyo kehe ohashi longo mokomitiye yimwe nenge dhi vulithe po.

•   Okomitiye yAaunganeki: Ohayi tonatele iinima yopaveta, ohayi ungaunga niiponga yopaunshitwe, niiningwanima yi na ko nasha nokuhepekwa kwOombangi dhaJehova, omolwelongelokalunga lyadho nosho wo iinima yilwe yopaulumompumbwe mbyoka ya guma Oombangi dhaJehova.

•   Okomitiye yOnkalonawa yaantu: Ohayi tonatele omalongekidho agehe ngoka ga kwatela mo iilyo ayihe yaBetele.

•   Okomitiye yOkunyanyangidha: Ohayi tonatele iilonga yokunyanyangidha nokutuma iileshomwa yopaMbiimbeli, nohayi tungu Iinyanga yokugongalela, oombelewa dhokutoloka nosho wo iitayimbelewa.

•   Okomitiye yIilonga: Ohayi tonatele iilonga yetu yokuuvitha “onkundana ndjika ombwanawa yUukwaniilwa.” — Mateus 24:14.

•   Okomitiye yOkulonga aantu: Ohayi longekidha iikulya yopambepo mbyoka hayi gandjwa okupitila mokugongala kehe, moosikola nosho wo miikwamawi nomuuvidio.

•   Okomitiye yOkunyola: Ohayi longekidha iikulya yopambepo mbyoka hayi gandjwa okupitila miileshomwa ya pilintwa, yi li kepandja lyetu lyokointaneta nohayi tonatele wo iilonga yokutoloka.

 Kakele kiilonga mbyoka hayi longwa okupitila mookomitiye ndhoka, Olutuwiliki ohalu gongala oshiwike kehe lu kundathane oompumbwe dhehangano. Mokugongala hono, iilyo yOlutuwiliki ohayi kundathana shoka Omanyolo taga ti nokweetha ombepo ondjapuki yaKalunga yi lu wilike, sho talu ninga omatokolo. — Iilonga 15:25.

Oolye aakwatheli yOlutuwiliki?

 Aakwatheli yOlutuwiliki oyo Aakriste aainekelwa mboka haya kwathele mookomitiye dhOlutuwiliki. (1 Aakorinto 4:2) Oye na uunongo nowino miilonga mbyoka hayi tonatelwa kokomitiye moka ye li nohaya kala pokugongala oshiwike kehe, hoka haku ningwa kokomitiye yawo. Nonando ihaya kutha ombinga mokuninga omatokolo, aakwatheli mbaka ohaya gandja omayele omawanawa nosho wo uuyelele wa gwedhwa po, ohaya tula miilonga omatokolo gokomitiye nohaya tala aluhe iizemo nosho wo kutya omatokolo ngoka ge na okuningwa oga hulila peni. Ohashi vulika wo ya tumwe kOlutuwiliki ya ka talele po aamwatate kiilonga yi ili noyi ili muuyuni, nenge ya gandje iipopiwa piiningwanima ngaashi, pokugongala kwokomumvo nenge pegandjo lyOonzapo dhosikola yaGilead.