Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 1

“Uukwaniilwa woye nawu ye”

“Uukwaniilwa woye nawu ye”

EHUKU LYONTOPOLWA

Shoka Jesus a longo aantu kombinga yUukwaniilwa waKalunga

1, 2. Jehova okwa lombwele aayapostoli yaJesus yatatu shike, noya li yi inyenge ngiini?

NGELE Jehova Kalunga okwe ku pula wu ninge sha, mbela oto ki inyenga ngiini? Osha yela kutya oto ka ninga kehe shimwe te ku pula wu ninge.

2 Ethimbo efupi konima yOpaasa yomo 32 E.N., aayapostoli yaJesus yatatu, Petrus, Jakob naJohannes, oya pulwa ya ninge sha kuJehova. (Lesha Mateus 17:1-5.) Sho ya li “kondundu ondeendeka” pamwe naJesus, oya mono memoniko Jesus a ninga Omukwaniilwa megulu. Emoniko olya li lya fa oshinima tashi ningwa shili, nomolwashono Petrus a li a hala okukutha ombinga mulyo. Ihe manga Petrus a li ta popi, oshikogo oshe ya siikile. Opo nduno Petrus nooyakwawo oya pewa uuthembahenda wokuuva ewi lyaJehova mwene, uuthembahenda mboka inaawu pewa aantu oyendji. Konima sho Jehova a popi kutya Jesus Omwana, okwa gwedha ko a ti: “Mu uveni!” nenge pulakeneni kuye. Aayapostoli oya vulika kelombwelo ndyoka. Oya li ya pulakene kuJesus noya ladhipike yalwe ya ninge sha faathana. —  Iil. 3:19-23; 4:18-20.

Jesus okwa li a popi oshindji kombinga yUukwaniilwa waKalunga shi vulithe iinima yilwe

3. Omolwashike Jehova a hala tu pulakene kOmwana, noshike twa pumbwa okukonakona?

3 Oohapu ndhoka Jehova a popi, kutya “mu uveni!,” odha nyolwa mOmbiimbeli opo dhi tu kwathele. (Rom. 15:4) Omolwashike tu na okupulakena kuJesus? Omolwashoka oye omupopikalelipo gwaJehova, noshikando kehe Jesus a popi okwa li a popi shoka He a hala tu uve. (Joh. 1:1, 14) Molwashoka okwa li ha popi olundji kombinga yUukwaniilwa waKalunga, epangelo lyopaMesiasa lyomegulu ndyoka ta pangele pamwe naapangeli 144 000, onawa ngele tatu konakona kombinga yawo. (Eh. 5:9, 10; 14:1-3; 20:6) Tango natu tale kutya omolwashike Jesus a li a popi oshindji kombinga yUukwaniilwa waKalunga.

“Shoka shu udhilila momutima . . .”

4. Oshike sha li shu ulike kutya Jesus oku na ko nasha lela nUukwaniilwa?

4 Jesus oku na ko nasha lela nUukwaniilwa. Omolwashike tatu tile ngawo? Omolwashoka oohapu ohadhi ulike shoka shi li momitima dhetu, ano shoka sha simana shili kutse. Jesus okwa ti: “Shoka shu udhilila momutima, osho shoka okana  take shi popi.” (Mat. 12:34) Ompito kehe Jesus a mono, okwa li a popi kombinga yUukwaniilwa. MOmavaangeli agehe gane omwa popiwa kombinga yUukwaniilwa lwiikando yi vulithe pe 100, nolundji oJesus e wu popi. Okwa li hu uvitha aluhe kombinga yUukwaniilwa ta ti: “Elaka etoye lyoshilongo shaKalunga [nenge “lyUukwaniilwa waKalunga,” NW] ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” (Luk. 4:43) Nokuli nokonima sho Jesus a yumuka okwa tsikile nokulonga aalongwa ye kombinga yUukwaniilwa. (Iil. 1:3) Ano Jesus okwa li shili a lenga Uukwaniilwa naashoka oshe mu ningitha a popye kombinga yawo.

5-7. (a) Otu shi shi ngiini kutya Jehova oku na ko nasha lela nUukwaniilwa? Gandja oshiholelwa. (b) Ongiini tatu vulu okuulika kutya otwa lenga Uukwaniilwa?

5 Jehova naye oku na ko nasha nUukwaniilwa. Otu shi shi ngiini? Dhimbulukwa kutya Jehova oye a tumine Omwana awike kombanda yevi. Nakehe shimwe shoka Omwana a popi nokulonga aantu osha zi kuJehova. (Joh. 7:16; 12:49, 50) Ashihe shoka sha nyolwa mOmavaangeli gane kombinga yonkalamwenyo noyuukalele waJesus osha za wo kuJehova. Mbela shoka osha hala okutya shike?

Kehe gumwe oku na okwiipula kutya, ‘Mbela onda lenga ngaa Uukwaniilwa waKalunga?’

6 Natu tye nduno owa hala okutula omathano moalbuma. Owu na ondumba yomathano, ihe moalbuma otamu vulu owala okugwana omathano gontumba. Oto ka ninga ngiini? Osha yela kutya oto ka hogolola po owala gamwe ngoka to ka tula mo. Sha faathana, Omavaangeli oga fa oalbuma ndjoka tayi tu ulukile onkalamwenyo yaJesus. Jehova ka li a nwetha mo aanyoli yOmavaangeli ya nyole ashihe shoka Jesus a popi nenge a ningi sho a li kombanda yevi. (Joh. 20:30; 21:25) Pehala lyaashono, ombepo yaJehova oya li ye ya wilike ya nyole shoka tashi tu kwathele tu uve ko elalakano lyuukalele waJesus notu mone shoka sha simanenena kuJehova. (2 Tim. 3:16, 17; 2 Pet. 1:21) Molwashoka Omavaangeli oga popya unene kombinga yUukwaniilwa waKalunga, otatu vulu okutya Uukwaniilwa owa simana noonkondo kuJehova. Ano Jehova okwa hala tu kale tu shi oshindji kombinga yUukwaniilwa we.

7 Kehe gumwe oku na okwiipula kutya, ‘Mbela onda lenga ngaa Uukwaniilwa waKalunga?’ Ngele osho, oto ka pulakena nohokwe kwaashoka Jesus a popile nenge a longele aantu kombinga yUukwaniilwa, ano kutya owa simana nonokutya otawu ke ya momukalo guni, nuunake.

‘Uukwaniilwa waKalunga otawu ke ya’ momukalo guni?

8. Jesus okwa li a popi shike shoka tashi ulike kutya Uukwaniilwa owa simana?

8 Natu taleni kegalikano lyOmuwa. Megalikano ndyoka, Jesus okwa popi kutya omolwashike Uukwaniilwa wa simana naashoka tawu ka ninga. Egalikano ndyoka olya kwatela mo omaindilo gaheyali. Gatatu gopetameko oge na ko nasha nelalakano lyaJehova lyokuyapulitha edhina lye, lyokuya kwUukwaniilwa we nolyokugwanithwa kwehalo lye kombanda yevi ngaashi  megulu. (Lesha Mateus 6:9, 10.) Omaindilo ngoka oga pambathana. Uukwaniilwa wopaMesiasa owo Jehova ta ka longitha okuyapulitha edhina lye nokugwanitha po ehalo lye.

9, 10. (a) Uukwaniilwa waKalunga otawu ka ninga po shike sho tawu ke ya? (b) Egwanithopo lyeuvaneko lini wa halelela oku ka mona?

9 Uukwaniilwa waKalunga otawu ke ya momukalo guni? Uuna tatu galikana kutya “Oshilongo shoye nashi ye” nenge “Uukwaniilwa woye nawu ye,” (NW) otatu pula Uukwaniilwa wu katuke onkatu. Shampa we ya, otawu ka tula ayihe kombanda yevi kohi yewiliko lyawo. Otawu ka hulitha po uuyuni mbuka wa kolokosha, mwa kwatelwa omapangelo agehe gopantu, nokweeta uuyuni uupe moka tamu ka kala uuyuuki. (Dan. 2:44; 2 Pet. 3:13) Opo nduno, kohi yewiliko lyUukwaniilwa, evi alihe otali ka ninga Oparadisa. (Luk. 23:43) Kalunga ota ka yumudha aasi noku ya hanganitha ishewe naaholike yawo. (Joh. 5:28, 29) Aayuuki otaya ka kala ya gwanenena notaya ka nyanyukilwa omwenyo gwaaluhe. (Eh. 21:3-5) Okuza mpoka, ayihe kombanda yevi nomegulu otayi ka kala ngaashi Jehova Kalunga a hala yi kale. Mbela ino halelela okumona omahunganeko ngoka gopaMbiimbeli taga gwanithwa? Dhimbulukwa kutya oshikando kehe to galikana Uukwaniilwa waKalunga wu ye, oto galikana opo omauvaneko ngoka ga gwanithwe po.

10 Osha yela kutya Uukwaniilwa waKalunga inawu ‘ya’ natango wu gwanithe po omaindilo ngoka. Ngaashi tu shi shi, omapangelo gopantu ogo natango taga pangele, nuuyuni uupe inawu ya natango. Ihe onkundana ombwanawa oyo ndjika kutya Uukwaniilwa waKalunga owa dhikwa po nale. Shika otatu ke shi kundathana montopolwa tayi landula. Ngashingeyi natu ka tale kutya Jesus okwa ti Uukwaniilwa owa li tawu ka dhikwa po uunake nowa li tawu ke ya uunake.

Uukwaniilwa waKalunga otawu ka dhikwa po uunake?

11. Jesus okwa li a popi shike kombinga yokudhikwa po kUukwaniilwa waKalunga?

11 Jesus okwa li a popi kutya Uukwaniilwa itawu dhikwa po pethimbo e li kombanda yevi ngaashi yamwe yomaalongwa ye ya li ya tegelela. (Iil. 1:6) Tala kwaashoka a popi momayele ge gaali.

12. Eyele lyiilya nomau olya holola ngiini kutya Uukwaniilwa inawu dhikwa po sho Jesus a li kombanda yevi?

12 Eyele lyiilya nomau. (Lesha Mateus 13:24-30.) Eyele ndika Jesus okwe li popi momumvo 31 E.N. lwaampono nokonima okwe li fatululile aalongwa ye. (Mat. 13:36-43) Otali holola kutya konima yeso lyaayapostoli, Ondiapoli oya li tayi ka kuna omau (Aakriste yiifundja) mokati kiilya (“aana yOshilongo” nenge yUukwaniilwa, ano Aakriste aagwayekwa). Iilya nomau oya li tayi ke ethwa yi kokele mumwe sigo opeteyo, ano sigo ‘opehulilo lyuuyuni.’ Konima ngele eteyo lya tameke, omau otaga ka gongelwa. Opo nduno iilya nayo otayi gongelwa. Onkee ano, eyele ndika otali holola kutya Uukwaniilwa owa li tawu ka dhikwa po owala konima ngele ethimbo lyokukoka lya hulu, ihe hapethimbo Jesus a li kombanda yevi. Ethimbo lyokukoka olya li lya hulu neteyo olya tameke mo 1914.

13. Jesus okwa li u ulike ngiini kutya ita ka thikila ta ningwa Omukwaniilwa gwopaMesiasa ngele a shuna megulu?

 13 Eyele lyiimaliwa. (Lesha Lukas 19:11-13.) Jesus okwa popi eyele ndyoka mo 33 E.N., sho a li mondjila u uka kuJerusalem oshikando she shahugunina. Mboka ya li ya pulakena kuye oya li taya dhiladhila kutya ota ka dhika po Uukwaniilwa mbala ngele ya thiki muJerusalem. Opo Jesus e ya pukulule nokuulika kutya Uukwaniilwa otawu ka dhikwa po owala monakuyiwa, okwa li i ifaathanitha ‘nomulumentu omuvalekele’ ngoka a yi “koshilongo shokokule, a ka ninge omukwaniilwa.” * ‘Oshilongo shoka shokokule’ otashi thaneke egulu, moka Jesus a li ta ka ningwa Omukwaniilwa kuHe. Ashike Jesus okwa li e shi shi kutya ngele a shuna megulu, ita ka thikila ta ningwa Omukwaniilwa gwopaMesiasa. Pehala lyaashono, okwa li ta ka kala omutumba kolulyo lwaKalunga sigo ethimbo ndyoka lyu uthwa. Jesus okwa li e na okutegelela omathelemimvo ogendji. —  Eps. 110:1, 2; Mat. 22:43, 44; Heb. 10:12, 13.

Uukwaniilwa waKalunga otawu ya uunake?

14. (a) Jesus okwa li a yamukula ngiini epulo ndyoka lya pulwa kaayapostoli ye? (b) Egwanitho lyehunganeko lyaJesus otali tu longo shike kombinga yokukala po kwe nokombinga yUukwaniilwa?

14 Omasiku omashona manga Jesus inaa dhipagwa, aayapostoli ye yane oye mu pula ya ti: “Uunake ano tashi ka ningwa, nendhindhiliko olini tali holola, [“okukala po kwoye,” NW] nehulilo lyuuyuni?” (Mat. 24:3; Mark. 13:4) Mokuyamukula epulo ndyoka, Jesus okwe ya lombwele omahunganeko ngoka ga nyolwa montopolwa 24 no 25 yaMateus. Jesus okwa popi oshindji kombinga yiiningwanima mbyoka ya li tayi ka ningwa muuyuni awuhe, mbyoka tayi ku ulika kutya ethimbo ndyoka  hali ithanwa “okukala po” kwe olya tameka. Ethimbo ndika olya li tali ka tameka sho Uukwaniilwa tawu dhikwa po nolya li tali ka hula sho Uukwaniilwa tawu ya. Ope na uunzapo owundji kutya shoka Jesus a hunganeke osha kala nokugwanithwa okuza mo 1914. * Onkee ano, okukala po kwaJesus nokudhikwa po kwUukwaniilwa oya li ya ningwa momumvo moka.

15, 16. Uutumbulilo “epipi ndyoka,” otawu popi oolye?

15 Uukwaniilwa waKalunga otawu ke ya nduno uunake? Jesus ina popya kutya otawu ke ya uunake. (Mat. 24:36) Ashike okwa popi oshinima shontumba shoka tashi tu shilipaleke kutya ethimbo ndyoka oli li popepyeelela. Okwa ti kutya otawu ke ya konima ngele “aantu mboka ye na omwenyo ngashingeyi” nenge “epipi ndyoka,” (OB-2008) lya mono endhindhiliko lyehulilo lyuuyuni. (Lesha Mateus 24:32-34.) Sho taku popiwa “epipi ndyoka,” oolye taya popiwa? Natu nongononeni oohapu ndhoka.

16 “Aantu mboka ye na omwenyo ngashingeyi” nenge “epipi ndyoka.” Mbela Jesus okwa li ta popi kombinga yaamboka kaaye shi ooitaali? Aawe. Tala kutya okwa li ta popi noolye. Jesus okwa li a lombwele aayapostoli yontumba ehunganeko ndyoka “manga ya li yi ikalela.” (Mat. 24:3) Masiku aayapostoli oya li taya ka tililwa ombepo ondjapuki. Tala wo kwaashoka oovelise dhilwe tadhi ti. Manga Jesus inaa popya kombinga ‘yepipi ndyoka,’ okwa ti: “Ilongeni omayele komukwiyu. Iitayi yagwo ngele tayi hapuka nomafo taga mbunyuka, nena omu shi shi kutya othinge oyi li popepi. Osho nane wo ngele tamu mono ayihe mbika, kaleni mu shi shi, ethimbo olya thikana, Omuna gwOmuntu oku li popepi posheelo.” Aalanduli yaJesus aagwayekwa oyo owala ya li taya ka mona iinima mbyoka ya hunganekwa noya li taye ku uva ko shoka tayi ti, ano kutya Jesus “oku li popepi posheelo,” ihe mboka kaaye shi ooitaali kaya li taye ke yi uva ko. Onkee ano, sho Jesus a popi kombinga ‘yepipi ndyoka,’ okwa li ta popi kombinga yaalanduli ye aagwayekwa.

17. Popya kutya uutumbulilo “epipi” nosho wo “ayihe mbika” otayi ti shike.

17 “Itaa si, manga ayihe mbika inaayi gwanithwa.” Oohapu ndhika otadhi ka gwanithwa po ngiini? Opo tu yamukule epulo ndyoka, otwa pumbwa okuuva ko iinima iyali: eityo lyoshitya “epipi” nolyuutumbulilo “ayihe mbika.” Oshitya “epipi” olundji ohashi ulike kaantu yoomvula dha yooloka mboka ye li ko pethimbo limwe. Ethimbo ndyoka kali shi ele unene nohali hulu. (Eks. 1:6) Uutumbulilo “ayihe mbika,” owa kwatela mo omandhindhiliko agehe nenge iiningwanima ayihe mbyoka tayi ka ningwa pokukala po kwaJesus, okuza mo 1914 sigo opehulilo lyokukala po hoka ‘puudhigu uunene.’ —  Mat. 24:21.

18, 19. Otu uvite ko ngiini oohapu dhaJesus kombinga ‘yepipi ndyoka,’ notatu vulu okuthika pehulithodhiladhilo lini?

18 Otu na nduno okuuva ko ngiini oohapu dhaJesus kombinga ‘yepipi ndyoka’? Epipi olya kwatela mo oongundu mbali dhaagwayekwa. Yotango, oyaagwayekwa mboka ya li ye na omwenyo sho omandhindhiliko ga tameke okuholoka mo 1914. Ontiyali, oyaagwayekwa mboka ya adhele ongundu  yotango yi na natango omwenyo uule wokathimbo. Yamwe yomongundu ontiyali otaya ka mona etameko lyuudhigu uunene. Oongundu ndhika mbali otaku vulu okutiwa kutya epipi limwe, oshoka odha li ko oshita, uule wokathimbo, dhi li Aakriste aagwayekwa. *

19 Shika otashi tu eta pehulithodhiladhilo lini? Otu shi kutya endhindhiliko lyokukala po kwaJesus e li Omukwaniilwa oli iwetikile muuyuni awuhe. Otu wete wo kutya “epipi ndyoka,” ano aagwayekwa mboka ye na natango omwenyo, oya kulupa ngashingeyi, ihe itaya si ko ayehe manga uudhigu uunene inaawu tameka. Onkee ano, otatu vulu okuthika pehulithodhiladhilo kutya masiku Uukwaniilwa waKalunga otawu ya wu pangele ombanda yevi, ngaashi Jesus e tu longo tu galikane kutya “Uukwaniilwa woye nawu ye.” Enyanyu otali ka kala li thike peni okumona egalikano ndyoka tali gwanithwa!

20. Oshileshomwa shika otashi ka kundathana oshinima shini sha simana, noshike tashi ka konakonwa montopolwa tayi landula?

20 Inatu dhimbwa nando oohapu ndhoka Jehova a li a popi kombinga yOmwana okuza megulu, a ti: “Mu uveni!” Tu li Aakriste yashili, otwa halelela okuvulika kelombwelo ndyoka. Otu na ko nasha noonkondo naashihe shoka Jesus a li a popi nenge a longo aantu kombinga yUukwaniilwa waKalunga. Oshileshomwa shika otashi ka kundathana kombinga yaashoka Uukwaniilwa wa ninga nale naashoka tawu ka ninga monakuyiwa. Ontopolwa tayi landula otayi ka konakona iiningwanima mbyoka ya li tayi ningwa pethimbo lyokudhikwa po kwUukwaniilwa waKalunga megulu.

^ okat. 13 Eyele lyaJesus otashi vulika lya li lya dhimbulukitha aapulakeni ye kombinga yaArkelaus, omwanamati gwaHerodes Omunene. Herodes manga inaa sa okwa langeke po Arkelaus a ninge omuleli gwaJudea niitopolwa yilwe. Ihe manga Arkelaus inaa tameka okupangela okwa li e na okweenda oshinano oshile okuya kuRoma a ka pewe epitikilo kOmukesari Augustus.

^ okat. 18 Ayehe mboka ya gwayekwa konima yeso lyomugwayekwa gwahugunina gwomongundu yotango ndjoka ya monene ‘etameko lyoshitheta’ mo 1914 inaya kwatelwa mo ‘mepipi ndyoka.’ —  Mat. 24:8.