Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 22

Uukwaniilwa tawu gwanitha po ehalo lyaKalunga kombanda yevi

Uukwaniilwa tawu gwanitha po ehalo lyaKalunga kombanda yevi

EHUKU LYONTOPOLWA

Uukwaniilwa tawu gwanitha po omauvaneko gaKalunga agehe ge na ko nasha naantu nosho wo nevi

1, 2. (a) Omolwashike omathimbo gamwe hashi kala oshidhigu okwiitaala kutya Oparadisa onayi ke ye ngaa shili? (b) Oshike tashi ke tu kwathela okukoleka eitaalo lyetu momauvaneko ngoka Kalunga e tu uvanekela?

DHILADHILA ando wu wete Omukriste omudhiginini a lolodhwa kiilonga yesiku ta thiki pokugongala. Kiilonga okwa li ta ningwa nayi komuhona ngoka e na onyanya, ye okwa lulilwa komutenge gwokusila yaandjawo oshimpwiyu nokomukithi gwomukadhi ngoka a lumbu a ala. Sho omusika yeimbilo lyotango ya tameke, okwa fudha mokule a nyanyukwa sho e li pOshinyanga shUukwaniilwa naamwatate naamwameme. Oohapu dheimbilo ndyoka tali imbwa otadhi popi kombinga yOparadisa notadhi mu pula a kale a fa i iwete e li mOparadisa ndjoka. Eimbilo ndika okwa za e li hole. Ngashingeyi sho te li imbi pamwe noyaandjawo, etegameno ndyoka lyomonakuyiwa otali mu koleke.

2 Mbela owa ningilwa nale oshinima sha tya ngeyi? Oyendji yomutse otwe shi ningilwa. Ihe onkalamwenyo muuyuni mbuka ohayi shi ningitha oshidhigu okwiitaala kutya Oparadisa onayi ke ye ngaa shili. Omathimbo ngaka tu li mugo “omathimbo omadhigu” noitaga yelekwa nOparadisa. (2 Tim. 3:1) Oshike tashi ke tu kwathela tu itaale kutya Oparadisa otayi ke ya shili? Wo Uukwaniilwa waKalunga otu shi shi ngiini kutya masiku otawu ya okupangela aantu ayehe? Natu kundathaneni omahunganeko gamwe ngoka Jehova a gwanithilile po aapiya ye yonale. Tse tatu ka tala wo nkene omahunganeko ngoka nosho wo galwe taga gwanithwa nena. Shika otashi ka koleka eitaalo lyetu. Hugunina, otatu ka tala kutya omahunganeko ngoka otaga ka gwanithwa ngiini monakuyiwa.

Nkene Jehova a gwanithile po omauvaneko ge nalenale

3. Euvaneko lini lya hekelekele Aajuda mboka ya li muupika muBabilonia?

3 Dhiladhila owala kutya onkalamwenyo oya li ngiini muBabilonia, sho Aajuda ya li muupika methelemumvo etihamano K.E.N. Oyendji oya putukilile muupongekwa ngaashi aavali yawo, nonkalo oya li ondhigu. Oya li taya shekwa kAababilonia, sho yi itaala muJehova. (Eps. 137:1-3) Omimvo adhihe ndhoka, Aajuda mboka aadhiginini oya kala ye na etegameno lya kola kutya Jehova ote ke ya galulila koshilongo shawo. Jehova okwa ti kutya onkalo otayi ka kala ombwanawa koshilongo hoka. Okwa yelekanitha nokuli oshilongo shaJuda  noshikunino shaEden, ano noparadisa. (Lesha Jesaja 51:3.) Omauvaneko ngoka oga ningilwe nelalakano lyokushilipaleka oshigwana shaKalunga, opo e shi kuthe mo momalimbililo. Okwe shi ningi ngiini? Natu taleni komahunganeko gamwe gokondandalunde.

4. Jehova okwa shilipaleke ngiini Aajuda kutya ote ke ya gamena moshilongo shawo?

4 Egameno. Aapongekwa mboka kaya li taya ka galukila moparadisa yo yeneyene, ihe omoshilongo shoka sha kala eputu uule woomvula 70, shoka oyendji yomuyo inaaya mona nando onale. Miilongo yopethimbo lyOmbiimbeli oonime odha li dha ha nomwa li wo omambungu, oongwe niilikama yilwe. Otashi vulika aasamane ya li tayi ipula kutya, ‘Mbela ongiini tandi ka gamena omukulukadhi gwandje naamwandje? Ongiini tandi ka gamena iimuna yandje?’ Inashi puka okwiipula ngaaka. Dhiladhila keuvaneko lyaKalunga ndyoka li li muJesaja 11:6-9 nonkene lya li lye ya hekeleke. (Lesha.) Jehova okwa li a shilipaleke aapongekwa noohapu ndhoka dhopakatewo kutya yo niimuna yawo otaya ka kala megameno. Onime otayi ka lya omwiidhi meityo ndyoka kutya itayi ka hutagula po oongombe dhAajuda. Aayuuki kaya li taya ka kala ya tila iilikama mbyoka. Jehova oku uvaneke kutya uuna oshigwana she sha shuna kuJuda otashi ka kala sha gamenwa, kutya nduno oshi li momalundu nenge omomigulu. —  Hes. 34:25.

5.Omahunganeko geni ga kwathele oonakugaluka muupongekwa ya kale ye na einekelo kutya Jehova ote ke ya pa kehe shoka ya pumbwa?

5 Eloolo. Omuntu otashi vulika i ipule ishewe ngeyi: ‘Mbela otandi ka vula ngaa okupalutha aanegumbo lyandje ngele nda shuna koshilongo shetu? Otatu ka kala peni? Mbela otandi ka mona ngaa iilonga? Mbela onkalamwenyo otayi ka kala ngaa yi li hwepo yi vule sho twa li tatu pangelwa kaahepeki yetu?’ Molwaashoka Jehova okwa li e na ko nasha nomaiyuvo gawo, okwa yamukula omapulo ngoka okupitila momahunganeko. Oku uvaneke kutya oshigwana she oshidhiginini otashi ka mona omvula ya gwana notaku ka kala “eloolo.” (Jes. 30:23) Shi na ko nasha nomagumbo nosho wo iilonga tayi ti sha, Jehova okwa uvanekele oshigwana she a ti: “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taa ka kala mo, nenge ya tsike sha, nayalwe taa ka lya iiyimati.” (Jes. 65:21, 22) Onkalamwenyo oya li tayi ka kala ombwanawa yi vulithe sho ya li muupika muBabiloni. Ihe ongiini kombinga yomaupyakadhi ga kwata miiti, ngoka ge ya falithile muupika?

6. Oshigwana shaKalunga osha li shi na uuvu washike? Oonakugaluka muupongekwa oya shilipalekelwa shike kuJehova?

6 Otaya ka kala ye na eitaalo lya kola. Nale manga oshigwana shaKalunga inaashi ya muupika, osha li kaashi na ekwatathano ewanawa naye. Jehova okwa popi kombinga yoshigwana she okupitila momupolofeti Jesaja a ti: “Israeli, omutse gwoye ogu udha oombole, nomutima gwoye ogwa ala.” (Jesaja 1:5) Osha li oshiposi noshimbolo pambepo, molwaashoka inashi pulakena komayele gaJehova nokasha li shi wete uuyelele mboka  te shi pe. (Jes. 6:10; Jer. 5:21; Hes. 12:2) Ngele osha ka kala ishewe inaashi vulika ngele sha shuna kegumbo, mbela Jehova ote ke shi gamena ngaa? Mbela Jehova okwa li ngaa ta ka kala e shi hokwa natango? Jehova okwe shi tsu omukumo, sho e shi u uvanekele a ti: “Uuna esiku ndyoka tali ya, ombolo otayi ka uva embo tali leshwa mokule, nomuposi, ngoka a kala momilema, omeho ge otaga tonata nota mono ko.” (Jes. 29:18) Jehova ota ti ota ka aludha oshigwana she pambepo, oshoka oshi iyela ombedhi. Shampa sha kala tashi vulika kuye, ote ke shi wilika shi ende mondjila tayi fala komwenyo.

7. Kalunga okwa gwanitha po ngiini shoka a li u uvanekele oshigwana she shoka sha li muupongekwa? Nomolwashike shoka tashi koleke eitaalo lyetu?

7 Mbela Jehova okwa gwanitha po shoka u uvanekele? Opu na uumbangi tawu holola kutya okwe shi ninga. Aajuda mboka ya shuna kevi lyawo, oya li ya gamenwa, ye na eloolo noye na ekwatathano ewanawa naKalunga. Pashiholelwa, Jehova okwe ya gamene kiigwana iinankondo yi ya vule niinene. Iimuna yawo inayi lika po kiilikama. Omahunganeko gaJesaja, Jeremia naHesekiel kombinga yOparadisa, inaga gwanithwa po thiluthilu pethimbo lyAajuda. Ashike oshigwana shaKalunga osha li sha nyanyukwa sho sha mono taga gwanithwa noga li ga gwanithwa pethimbo lyo opala. Eitaalo lyetu otali ka kola, sho tatu dhiladhila kwaashoka Jehova a ningilile oshigwana she. Ngele oshigwana osha li sha nyanyukwa sho sha mono taga gwanithwa po lwotango, itashi ke tu nyanyudha tuu oku ga mona taga gwanithwa po thiluthilu monakuyiwa? Natu ka taleni kwaashoka Jehova e tu ningila nena.

Nkene Jehova a tameke okugwanitha po omauvaneko ge nena

8. Oshigwana shaKalunga otashi nyanyukilwa “oshilongo” shi li ngiini?

8 Nena, oshigwana shaJehova kashi shi owala omuhoko gumwe, noihashi kala moshilongo shimwe ashike. Pehala lyaashono, Aakriste aagwayekwa oya tunga po oshigwana shopambepo, ano Israeli shopambepo nenge ‘aantu yaKalunga.’ (Gal. 6:16) ‘Oonzi dhilwe’ otadhi longele Jehova Kalunga pamwe nayo mehangano ndyoka tali vulu okufaathanithwa noshilongo. Onkalamwenyo yawo ayihe oyi lile po okulongela Jehova. (Joh. 10:16; Jes. 66:8) “Oshilongo” shoka Jehova e tu pa osha tya ngiini? Oparadisa yopambepo. Shoka Kalunga u uvaneka kombinga yoonkalo ndhoka dha fa dhomoparadisa osha gwanithwa ngashingeyi meityo lyopambepo. Natu taleni dhimwe dhomudho.

9, 10. (a) Ehunganeko ndyoka li li muJesaja 11:6-9 otali gwanithwa ngiini nena? (b) Otu shi shi ngiini kutya oshigwana shaKalunga oshi na ombili?

9 Egameno. Ehunganeko ndyoka lya nyolwa muJesaja 11:6-9, otali hokolola kutya pokati kiilikama, iinamwenyo yomegumbo nonaantu otapu ka kala ombili nuukumwe. Mbela shoka otashi gwanithwa nena? Eeno! Ovelise 9 otayi popi kutya omolwashike iinamwenyo itaayi ka ningilathana uuwinayi, tayi ti: “Oshoka evi otali ka udha okutseya OMUWA kwa fa omeya ga siikila efuta.” Mbela “okutseya OMUWA” ohaku lundulula  iikala yiinamwenyo? Aawe, aantu oyo ya tseya Omukombandambanda nokwiilonga okukala ye na ombili ngaashi ye, e taya lundulula iikala yawo. Nomolwaashono nena mOparadisa yetu yopambepo tu wete sho ehunganeko ndyoka ewanawa tali gwanithwa. Aalanduli yaKristus otaya longwa kUukwaniilwa ye ethe po omaukwatya omawinayi nokukala pamwe naamwatate naamwameme mombili nomuukumwe.

10 Pashiholelwa, membo ndika otwa kundathana shoka Ombiimbeli tayi ti kombinga yokwaakutha ombinga mopolotika nosho wo omahepeko ngoka ga ningilwa oshigwana shaKalunga omolwokwaakutha ombinga mopolotika. Itashi nyanyudha tuu sho muuyuni mbuka wa kolokosha mu na natango ongundu onene yaantu mboka inaaya hala okulonga omiyonena dhasha nando oya tilithwe neso! Shika otashi gandja lela uumbangi kutya aalelwa yOmukwaniilwa gwopaMesiasa oye na ombili ngaashi ndjoka tayi popiwa muJesaja. Jesus okwa tile kutya aalanduli ye otaya ka tseyikila ohole ndjoka ye ninathane. (Joh. 13:34, 35) Kristus ota longo Aakriste yashili momagongalo okupitila ‘momumati omwiinekelwa nomunandunge’ nenge momupiya omudhiginini nomunandunge ya kale ye na ombili nohole. —  Mat. 24:45-47.

11, 12. Uuyuni nena owu niwe kondjala yashike, ihe Jehova okwa pa aantu ye eloolo lyashike?

11 Eloolo. Muuyuni omu na ondjala yopambepo. Ombiimbeli oya hunganeke ngeyi: “Esiku otali ya, uuna tandi ka tumina  oshilongo ondjala. Aantu otaa ka sa ondjala, ihe hayoshikwiila; otaa ka sa enota, ihe halyomeya. Otaa ka sa ondjala nenota lyohapu yOMUWA. Ongame, OMUWA Omupangeliawike, nda popi.” (Amos 8:11) Mbela aalelwa yUukwaniilwa waKalunga nayo otaya si ondjala? Jehova okwa hunganeke kombinga yeyooloko ndyoka tali ka kala pokati kaantu ye naatondi ye, ta ti: “Onkee otandi mú lombwele kutya mboka haa longele ndje nohaa vulika kungame, otaa ka kala ye na iikulya niikunuwa ya ha, ihe ne otamu ka sa po kondjala nokenota. Otaa ka kala ye na elago, ihe ne otamu ka kala momupya.” (Jes. 65:13) Mbela owa mona egwanithopo lyoohapu ndhoka?

12 Iipalutha yopambepo ohayi kungulukile kutse ya fa omulonga ngoka tagu ende tagu tamunuka mo gwo otagu ningi omule. Iinyanyangidhomwa yetu yopaMbiimbeli ayihe kumwe, mwa kwatelwa iikwamawi, uuvidio, okugongala, iigongi nosho wo ehala lyetu lyokointaneta mbyoka tayi kunguluka ya fa omeya gefundja, ohayi tu kaleke nomwenyo muuyuni mbuka wu niwe kondjala yopambepo. (Hes. 47:1-12; Joel 3:18) Mbela ino nyanyukwa okumona nkene Jehova te ku pe eloolo ngaashi a hunganeka? Oho li ngaa aluhe koshililo shaJehova?

Ohatu paluthwa nawa okupitila momagongalo, ohatu kala twa gamenwa notu na uukolele wopambepo

13. Owa mona ngiini euvaneko lyaJehova ndyoka tali ti aaposi otaya ka mona ko noombolo otadhi ku uva ko tali gwanithwa po?

13 Otaya ka kala ye na eitaalo lya kola. Aantu oyendji nena oya posipala noya thita omakutsi pambepo. (2 Kor. 4:4) Ihe Kristus ota aludha aantu muuyuni awuhe. Mbela owa mona aaposi taya mono ko nenge aathitamatsi taya uvu ko? Ngele owa mona aantu taya ilongo oshili yOohapu dhaKalunga nokweetha po omalongo giifundja ngoka ga li ge ya posipaleka noge ya ninga oombolo, nena owa mona ehunganeko tali landula tali gwanithwa po: “Uuna esiku ndyoka tali ya, ombolo otayi ka uva embo tali leshwa mokule, nomuposi, ngoka a kala momilema, omeho ge otaga tonata nota mono ko.” (Jes. 29:18) Omumvo kehe aantu omayovi nomayovi muuyuni awuhe ohaya aludhwa pambepo. Aantu ayehe mboka haya zi mo muBabiloni oshinene nokuya ya longele Jehova pamwe natse moparadisa yetu yopambepo, otaya ulike kutya omauvaneko gaJehova oga gwanithwa.

14. Oshike tashi ka koleka einekelo lyetu ngele otwa tedhatedha kusho?

14 Ontopolwa kehe yembo ndika otayi gandja uumbangi wa yela kutya momasiku ngaka gahugunina Kristus okwe eta aalanduli ye moparadisa yopambepo. Natu kaleni hatu tedhatedha komayambeko ngoka hatu mono ngashingeyi moparadisa ndjoka. Sho tatu shi ningi, einekelo lyetu momauvaneko ngoka Jehova e tu uvanekela otali ka kola.

“Uukwaniilwa woye nawu ye”

15. Otu shi shi ngiini kutya evi otali ka ninga oparadisa shili?

15 Jehova okwa kala a hala nale okuninga evi alihe oparadisa. Okwa tulile Adam naEva moparadisa e te ya lombwele ya tonatele iinamwenyo ayihe noyu udhithe evi noluvalo lwawo. (Gen. 1:28) Ihe Adam naEva oya landula Satana mokwaavulika  kwe noye etele oluvalo lwawo okwaagwanenena, uulunde neso. Ihe elalakano lyaKalunga inali lunduluka. Oohapu dhe aluhe ohadhi gwanithwa. (Lesha Jesaja 55:10, 11.) Onkee ano, otatu vulu okukala nuushili kutya oluvalo lwaAdam naEva otalu ka udha evi alihe noku li pangela, notalu ka tonatela eshito lyaJehova, sho evi alihe lya ninga oparadisa. Pethimbo ndyoka omahunganeko agehe ge na ko nasha noparadisa ngoka ga pelwe Aajuda sho ye li muupongekwa otaga ka gwanithwa po thiluthilu. Natu taleni nkene taga ka gwanithwa po.

16. Ombiimbeli otayi hokolola ngiini egameno ndyoka tali ka kala mOparadisa?

16 Egameno. Hugunina oohapu ndhoka dhi li muJesaja 11:6-9 otadhi ka gwanithwa po thiluthilu. Aalumentu, aakiintu nuunona otaya ka kala megameno kehe mpoka ye li kombanda yevi. Kapu na nando oshishitwa tashi ke eta uupyakadhi. Dhiladhila ando to vulu okweenda kehe pamwe kongonga yevi alihe, to yogo momilonga, momatale nomomafuta; to taakana oondundu nomalundu kuu na nando uumbanda washa. Nongele kwa luudha, ku na mpa wu uvite. Oohapu dhaHesekiel 34:25 ndhoka tadhi ti kutya aantu yaKalunga otaya ka ‘kala yaa na ombudhi momalundu notaya ka lala nokukothela momigulu’ otadhi ka gwanithwa.

17. Otu shi shi ngiini kutya sho Uukwaniilwa tawu ka pangela evi alihe Jehova ote ke tu pa kehe shoka twa pumbwa?

17 Eloolo. Dhiladhila owala ando kaaku na we oluhepo, aantu ye niwe komanyutu, kondjala nenge taya hawala oshikukuta. Eloolo lyopambepo ndyoka oshigwana shaKalunga shi na nena otali tu shilipaleke kutya Omukwaniilwa gwetu gwopaMesiasa ota ka pa aalelwa ye ashihe shoka ya pumbwa. Jesus sho a li kombanda yevi oku ulikile kutya ota vulu okugwanitha po omauvaneko ngoka, molwaashoka okwa paluthile aantu omayovi niikwiila noohi owala oonshona. (Mat. 14:17, 18; 15:34-36; Mark. 8:19, 20) Sho Uukwaniilwa waKalunga tawu ka pangela evi alihe, omahunganeko ngaashi ndika tali landula otaga ka gwanithwa po thiluthilu: “Nongele mwa kunu oombuto dheni, OMUWA ota ka lokitha omvula e dhi menithe dhi koke, notamu ka mona eloolo lyeteyo, niimuna yeni tayi ka kala nomaunapelo ga andjuka.” —  Jes. 30:23.

18, 19. (a) Ehunganeko ndyoka li li muJesaja 65:20-22 olye ku guma ngiini? (b) Okokutya ngiini, omasiku getu otaga ka kala omale “ga fa omasiku gomuti”?

18 Aantu oyendji nena kaye na siku ya ka kale ye na omagumbo gawo yene nenge iilonga hayi futu nawa nenge tayi ti sha. Muuyuni mbuka wa yonana, aantu oyendji oya mona kutya nonando oya longe noonkondo ihaya mono mo sha, pehala lyaashono aayamba naanalwiho oyo owala taya yambapala. Dhiladhila owala kutya kombanda yevi otaku ka kala ngiini uuna ehunganeko ndika lya gwanithwa: “Otaa ka tunga omagumbo, opo ya kale mo yo yene. Otaa ka tsika omiviinu, opo ya lye iiyimati yadho yo yene. Itaa ka tunga omagumbo, nayalwe taa ka kala mo, nenge ya tsike sha, nayalwe ta ka lya iiyimati. Omasiku gaantu yandje otaga ka kala omale ga fa omasiku gomuti. Aahogololwa yandje otaa ka kala ko olule nokunyanyukilwa iilonga yiikaha yawo yene.” —  Jes. 65:20-22.

 19 Okokutya ngiini, omasiku getu otaga ka kala omale “ga fa omasiku gomuti”? Natu tye nduno owa thikama pomuti omunenenene. Mbela oho kala wu uvite ngiini? Mbela oho kala wa kumwa sho to dhiladhila nokutya ogwa kala ko ethimbo li thike peni, nokuli pamwe gwa kala ko nale manga oonyokokulululwa inaaya valwa? Otashi vulika nokuli wu mone kutya ngele owa kala monkalo ndjika yokwaagwanenena, omuti nguka otagu ke ku vula notagu ka kala ko sigololo osigo, nokuli nokonima sho wa ka likola oombeke nowa dhimbiwa. Jehova ine tu ulukila tuu olukeno sho e tu tseyithile kutya mOparadisa otatu ka kala tu na onkalamwenyo onde noyu udha ombili! (Eps. 37:11, 29) Esiku otali ke ya uuna nomiti ndhoka dha kala ko olule tadhi ka kala dha fa omwiidhi ngoka hagu ende po owala, omanga tse tatu tsikile tu na omwenyo sigo aluhe.

20. Otashi ke enda ngiini aalelwa yUukwaniilwa aadhiginini ya aluke thiluthilu?

20 Uukolele. Kehe omuntu muuyuni mbuka ohe ehama noha si. Otatu vulu okutya atuhe otwa kwatwa komukithi ihaagu aluka, hagu ithanwa uulunde. Omukithi ngoka ohagu pangwa owala kekuliloyambo lyaKristus. (Rom. 3:23; 6:23) Jesus pamwe naapangeli ooyakwawo ota ka kwathela aayuuki ya mone uuwanawa mekuliloyambo ndyoka pethimbo lyElelo lye lyOomvula Eyuvi sho ta ka kutha po iinima ayihe mbyoka hayi etithwa kuulunde. Ehunganeko lyaJesaja tali landula otali ka gwanithwa thiluthilu: “Kape na nando ogumwe muSioni ta ka tya: ‘Otandi ehama.’ Omayonagulo gawo agehe otaga ka dhimwa po.” (Jes. 33:24) Dhiladhila owala ando kaaku na nando aaposi, oombolo nenge iilema. (Lesha Jesaja 35:5, 6.) Jesus ota ka aludha omikithi dhomaludhi agehe kutya nduno odhopalutu nenge odhopamadhiladhilo. Aalelwa yUukwaniilwa aadhiginini otaya ka kala ye na uukolele thiluthilu.

21. Oshike tashi ka ningilwa eso, nomolwashike euvaneko ndyoka tali ku hekeleke?

21 Ihe oshike tashi ka ningilwa eso ndyoka hali etithwa komikithi ndhoka dhe etithwa kuulunde? Eso olyo “omutondi gwahugunina” ngoka te tu tyakaleke atuhe, oshoka inatu gwanenena. (1 Kor. 15:26) Ihe mbela eso otali sindi ngaa Jehova? Tala kwaashoka Jesaja a hunganekele: “OMUWA Omupangeliawike ota ka hanagula po eso sigo aluhe. Ota ka theta po omahodhi momeho gaayehe.” (Jes. 25:8) Dhiladhila owala nkene tashi ka kala. Itaku ka ningwa we omafumviko, itaku ka kala we omayendo noitaku ka kala we oluhodhi. Pehala lyaashono, otaku ka kala enyanyu enene sho Jehova ta ka yumudha aasi. (Lesha Jesaja 26:19.) Pehulilo, uuwehame awuhe mboka hawu etithwa keso otawu ka hula po.

22. Konima ngele Uukwaniilwa wopaMesiasa wa gwanitha po ehalo lyaKalunga kombanda yevi, oshike tashi ka ningwa po?

22 Pehulilo lyElelo lyOomvula Eyuvi, Kristus ota ka shunitha epangelo kuHe, oshoka Uukwaniilwa otawu ka adhika wa gwanitha po ehalo lyaKalunga kombanda yevi. (1 Kor. 15:25-28) Nopo nduno Satana ota ka piithwa mo mondholongo a makele lwahugunina aantu mboka taya ka adhika ya gwanenena. Konima yaashoka, Kristus ota ka nyanyagula po  eyoka ndyoka pamwe naayambidhidhi yalyo. (Gen. 3:15; Eh. 20:3, 7-10) Ihe mboka ye hole Jehova otaya ka kala nonakuyiwa ombwanawa. Oohapu ndhoka tadhi adhika mOmbiimbeli otadhi shi popi nawa. Odhu uvaneke kutya aayuuki otaya ka ya “memanguluko nomeadhimo lyaana yaKalunga.” —  Rom. 8:21.

Uukwaniilwa otawu ka gwanitha po omauvaneko gaJehova agehe ge na ko nasha naantu nosho wo nevi

23, 24. (a) Otu shi shi ngiini kutya omauvaneko gaKalunga otaga ka gwanithwa po shili? (b) Ngoye owa tokola toko okuninga shike?

23 Omauvaneko ngoka kage shi owala ondjodhi nenge oongano. Omauvaneko gaJehova otaga ka gwanithwa po shili. Omolwashike? Dhiladhila owala koohapu dhaJesus ndhoka twa kundathaneni montopolwa yotango yembo ndika. Okwa longo aalanduli ye ya galikane ngeyi kuJehova: ‘Uukwaniilwa woye nawu ye, ehalo lyoye nali gwanithwe kombanda yevi wo ngaashi megulu.’ (Mat. 6:9, 10, yelekanitha NW.) Uukwaniilwa waKalunga kawu shi owala oshinima sha totwa komuntu. Aawe, owolela notawu pangele ngashingeyi megulu. Uule woomvula ethele owa kala tawu gwanitha po omauvaneko gaJehova megongalo lyopaKriste, ngaashi shi iwetikile. Onkee ano, otatu vulu okukala nuushili kutya omauvaneko gaJehova agehe otaga ka gwanithwa po, sho Uukwaniilwa waKalunga tawu ke ya okupangela evi alihe.

24 Otu shi shi kutya Uukwaniilwa waKalunga otawu ya. Otu shi shi wo kutya ashihe shoka Jehova u uvaneka otashi ka gwanithwa po. Omolwashike? Omolwaashoka ngashingeyi UUKWANIILWA WAKALUNGA OTAWU PANGELE! Kehe gumwe gwomutse oku na okwiipula, ‘Mbela otandi pangelwa ngaa kUukwaniilwa?’ Natu kaleni tatu vulika kUukwaniilwa ngashingeyi nokuninga ngaashi tatu vulu, opo tu mone mo uuwanawa mepangelo ndika eyuuki sigo aluhe!

Tseya oshindji

HEDHA POPEPI NAJEHOVA

Jehova oku na oonkondo ‘okuninga iinima ayihe iipe’

Jehova okwa totulula nale elongelokalunga lya yogoka. Ota ka ningulula shike shi ninge oshipe monakuyiwa?

OSHUNGOLANGELO (YOKUKONAKONWA)

Kala wu na eitaalo lya kola mUukwaniilwa waKalunga

Jehova okwa li a longitha omauvathano gaheyali a kwashilipaleke kutya uukwaniilwa otawu ka gwanitha po elalakano lye. Omahangano ngaka otage ke tu kwathela ngiini tu koleke eitaalo lyetu?