DHILADHILA ando to toonona eyapula enene lya pya nawa komuti. Sho to li tula momakwawo mokambamba owu uvite sho tali nika nawa. Owu uhala to longo, ihe owu uvite wu na oonkondo noto vulu okutsikila natango. Meme gwoye naye owu mu wete e li pomuti omukwawo ta longo a nyanyukwa, ye ta hapula naanegumbo yalwe nosho wo nookuume mboka ye ya oku mu kwathela neteyo. Ota monika a nyashuka ngaashi a li nalenale sho wa li okanona. Owa nyengwa okwiitaala kutya oye ngwiyaka wa monene te ende ta kulupa muuyuni uukulu. Ongoye wa li to mu hungu sho a li te ehama, naasho a fudha mo omufudho gwe gwahugunina owa li ponto ye. Nowa li to lili sho wa thikama pombila ye. Ihe ngashingeyi naye oku na ishewe omwenyo nuukolele.

Otu shi shi kutya ethimbo ndyoka oli li popepi. Shoka otu shi shi, molwaashoka omauvaneko gaKalunga aluhe ohaga gwanithwa. Moshitopolwa shika otatu ka kundathaneni kombinga yankene omauvaneko gamwe gUukwaniilwa taga ka gwanithwa, manga iita yaArmagedon mbyoka yi li popepi inaayi tameka. Otatu ka kundathaneni wo kombinga yomauvaneko galwe omawanawa ngoka taga ka gwanithwa konima yiita mbyoka. Enyanyu otali ka kala li thike peni okumona Uukwaniilwa waKalunga tawu pangele evi alihe nokuninga ayihe iipe!