Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 14

Taya ambidhidha epangelo lyaKalunga nuudhiginini

Taya ambidhidha epangelo lyaKalunga nuudhiginini

EHUKU LYONTOPOLWA

Nkene oshigwana shaKalunga sha kala sha topoka ko kuuyuni mbuka, opo shi ulike kutya osha dhama kUukwaniilwa

1, 2. (a) Ekotampango lini lya kala tali wilike aalanduli yaJesus sigo onena? (b) Aatondi yetu oya kambadhala oku tu sinda ngiini, noshizemo oshini?

SHO Jesus a li komeho gaPilatus, omupanguli gwAajuda omunankondo, okwa popi kombinga yekotampango ndyoka lya kala tali wilike aalanduli Ye yashili sigo onena. Okwa ti: “Uukwaniilwa wandje kau shi womuuyuni mbuka. Ando uukwaniilwa wandje owa li womuuyuni mbuka, ando aantu yandje ya kondjele ndje ndaa gandjwe miikaha yAajuda. Ihe ngashingeyi, uukwaniilwa wandje kau shi waampaka.” (Joh. 18:36) Pilatus okwa ka dhipagitha Jesus, ihe esindano lye olya li owala lyopokathimbo, oshoka Jesus okwa ka yumuka. Aakriste oya taandelitha etumwalaka lyUukwaniilwa pethimbo ndiyaka, nonando Aakeesali yepangelo lyaRoma enankondo oya kambadhala okuhanagula po aalanduli yaKristus. —  Kol. 1:23.

2 Konima sho Uukwaniilwa wa dhikwa po mo 1914, omapangelo gamwe omanankondo oga kambadhala okuhanagula po oshigwana shaKalunga. Ihe kapu na nando olimwe lya pondola. Omapangelo ogendji noongundu dhopapolotika odha kambadhala oku tu thiminika tu igameke kugo miita. Ihe oga nyengwa oku tu topola. Aalelwa yUukwaniilwa nena oye li konyala moshilongo kehe. Ihe nando ongaaka, otwa hangana, tu li aamwayinathana noihatu kutha nando ombinga miinima yopapolotika. Uukumwe wetu otawu gandja uumbangi kutya Uukwaniilwa waKalunga otawu pangele nonokutya omukwaniilwa Jesus Kristus onkee ngaa ta wilike, ta yogola nokugamena aalelwa ye. Natu ka taleni nkene e shi ningi nosho wo kiipotha yimwe mbyoka tayi koleke eitaalo lyetu mbyoka e tu kwathele tu sindane, sho tatu kambadhala okukala ‘kaatu shi yomuuyuni.’ —  Joh. 17:14.

Oshinima shoka sha kala sha simana

3, 4. (a) Oshike sha ningwa po, sho Uukwaniilwa wa dhikwa po? (b) Mbela oshigwana shaKalunga osha kala ngaa shu uvite ko nawa edhiladhilo lyokwaaidhopa miinima yopapolotika? Shi yelitha.

3 Sho Uukwaniilwa wa dhikwa po megulu, megulu omwa tukuluka olugodhi naSatana oku umbilwa kombanda yevi. (Lesha Ehololo 12:7-10, 12.) Kombanda yevi okwa holoka wo iita mbyoka ya yeleke uudhiginini woshigwana shaKalunga. Oshigwana shaKalunga osha li sha tokola okuholela Jesus nokukala  kaashi shi shomuuyuni. Ihe petameko kasha li naanaa shi shi kutya okwaakutha ombinga mopolotika otashi ka pula shike.

4 Pashiholelwa, embo 6 lyedhina Millennial Dawn, * lya nyanyangidhilwe mo 1904, olya ladhipike Aakriste kaaya ye kiita. Ihe olya ti wo kutya ngele Omukriste okwa kutwa muukwiita, na kambadhale okulonga iilonga mbyoka inaayi kwatela mo okulwa. Ngele ine shi eta, e ta tuminwa kolugodhi, nena na shilipaleke kutya ita dhipaga nando omuntu. Herbert Senior ngoka a kala moBritania nokwa ninginithilwe mo 1905, okwa hokolola kombinga yomasiku ngeyaka a ti: “Aamwatate oya li ya ngwangwana nayi, oshoka kaya li ya yelelwa ngele omuntu ota vulu okuninga omukwiita, ihe ita kala hayi kolugodhi.”

5. Oshungolangelo ye 1 Septemba 1915 oya nyanyangidha uuyelele wuni uupe?

5 Ihe Oshungolangelo ye 1 Septemba 1915 oya nyanyangidha uuyelele uupe kombinga yoshinima shika. Shi na ko nasha nuuyelele mboka wa holokele membo Studies in the Scriptures, oya ti: “Otatu ipula ngele oshi li ompinge nomithikampango dhopaKriste okuninga aakwiita nedhiladhilo lyoku ka longa iilonga mbyoka inaayi kwatela mo okuya kiita.” Ongiini nduno ngele Omukriste okwa lombwelwa kutya ota yahwa ngele ina hala okuzala iikutu yuukwiita nenge okuninga omukwiita? Oshileshwa osha ti: “Mbela oshinipo shi li hwepo, okuyahwa molwashoka wa hala okuvulika kOmuwa gwOmbili nokukala omudhiginini kuye, nenge okuyahwa to longele aakwaniilwa mbaka yokombanda yevi, omanga itoo vulika komalongo gOmukwaniilwa gwetu gwomegulu? Ihe tse otwa hala okusa aadhiginini kOmukwaniilwa gwetu gwomegulu.” Nonando oshifo osho sha ti ngawo, osha hulitha sha ti: “Tse itatu thiminikile omuntu a ninge ngaaka, ihe ngaka omaetopo owala.”

6. Oshiholelwa shomumwatate Herbert Senior oshe ku longo shike?

6 Aamwatate yamwe oya mono kutya osha puka okuya muukwiita noya li yi ilongekidha okutaalela iilanduliko. Herbert Senior ngoka a popiwa metetekelo okwa ti: “Kungame kapwa li eyooloko pokati kokutula iikuti kondjembo noku yi helula mosikepa [shoka sha talika ko kutya kashi shi iilonga yuukwiita].” (Luk. 16:10) Nomolwaashono omumwatate Senior a tulwa mondholongo, oshoka okwa tindi okuya kiita omolweiyuvo lye ndyoka itaali mu pitike e shi ninge. Ye pamwe naamwatate 4 oya li ya tulwa mondholongo yaRichmond moBritania pamwe nayalwe 11 yomomalongelokalunga galwe mboka ya tindi okuya kiita omolweiyuvo lyawo. Oshikando shimwe Herbert nayalwe oya falwa koFulaanisa monanguwi, kehala hoka taku kondjelwa. Oya li ya tokolelwa okudhipagwa nondjembo. Oya tulwa momukweyo komeho gaakwiita ye ya ganeka oondjembo, ihe inaya dhipagwa. Pehala lyaashoka, oya tokolelwa oomvula omulongo mondholongo.

“Ondu uvu ko kutya oshigwana shaKalunga oshi na okukala shi na ombili naantu ayehe nopethimbo lyiita.” —  Simon Kraker (Tala okatendo 7)

7. Oshigwana shaKalunga oshu uvu ko shike petameko lyIita Iitiyali yUuyuni?

 7 Sho Iita Iitiyali yUuyuni ya tameke, oshigwana shaJehova ashihe osha adhika sha yelelwa kutya okwaakutha ombinga miita otaku ti shike, noshike sha li shi na okuninga ngele osha hala okulandula oshiholelwa shaJesus. (Mat. 26:51-53; Joh. 17:14-16; 1 Pet. 2:21) Pashiholelwa, Oshungolangelo ye 1 Novomba 1939 oya li yi na oshileshwa sha simana shi na oshipalanyolo “Okwaakutha ombinga mopolotika,” shoka sha ti: “Oshigwana shaJehova kashi na nando okugama kombinga yoshilongo shontumba miita.” Simon Kraker ngoka konima a ka longa koombelewa oonene moBrooklyn moNew York okwa popi ngeyi kombinga yoshileshwa shoka: “Ondu uvu ko kutya oshigwana shaKalunga oshi na okukala shi na ombili naantu ayehe nopethimbo lyiita.” Iikulya mbyoka yopambepo oyi ile pethimbo noya li ya kwathele oshigwana shaKalunga shi kale shi ilongekidhila omashongo ngoka taga ka holola, ngele osha dhama ngaa shili kUukwaniilwa.

Ya taalela omahepeko ogendji ga fa ‘omulonga’

8, 9. Ongiini ehunganeko lyomuyapostoli Johannes lya gwanithwa?

8 Omuyapostoli Johannes okwa hunganeke kutya ngele Uukwaniilwa wa dhikwa po mo 1914, oshikoko shoka hashi ithanwa Satana nOndiyapoli, otashi ka kambadhala okuhanagula  po mboka taya ambidhidha Uukwaniilwa waKalunga mokukunga mokana kasho omulonga gwopathaneko. * (Lesha Ehololo 12:9, 15.) Ehunganeko olya gwanithwa ngiini? Okuza mo 1920 nasha, aantu yaKalunga oya patanekwa. Omumwatate Kraker okwa tulwa mondholongo omolwuudhiginini we kUukwaniilwa waKalunga, ngaashi aamwatate yalwe oyendji mboka ya kala muAmerika lyokUumbangalantu pethimbo lyiita iitiyali yuuyuni. Nokuli muyatatu yomaanandholongo moAmerika pethimbo lyiita, yaali oya li Oonzapo dhaJehova ndhoka dha tindi okuya kiita.

9 Ondiyapoli naayambidhidhi yayo oya li ya hala okuteya po uudhiginini waalelwa yUukwaniilwa, kutya nduno oye li peni. MuAfrika alihe, muEuropa nomuAmerika, oya falwa koompangu nokoshipala shaamboka haya tokola kutya ethimbo lyawo lyokukala mondholongo nali shonopekwe. Molwaashoka oya li ya tokola kaaya kuthe ombinga miita, oya tulwa moondjedhililo, ya dhengwa noye ehamekwa shinyanyalitha. Oshigwana shaKalunga moNdowishi osha li tashi thiminikwa nayi, molwaashoka sha tindi okusalutila Hitler nenge okuya kiita. Pethimbo lyaNazi, aantu 6 000 lwaampono oye edhililwa mookamba dhoonkwatwa, aamwatate naamwameme naamboka kaaye shi Aandowishi ye vulithe 1 600 oya dhipagwa. Ihe nando ongaaka, Ondiyapoli inayi vula okuhepeka oshigwana shaKalunga sigo aluhe. —  Mark. 8:34, 35.

“Evi” tali nina po “omeya”

10. “Evi” otali thaneke shike, nongiini lya gamene oshigwana shaKalunga?

10 Ehunganeko ndyoka lya nyolwa komuyapostoli Johannes olya ti kutya “evi,” ano aantu noompangu ndhoka dhi na ondjele, otali ka nina po omahepeko ngoka ga fa “omeya,” nokungawo evi otali ka gamena oshigwana shaKalunga. Ehunganeko ndika olya gwanithwa ngiini? Moomvula dha landula Iita Iitiyali yUuyuni, “evi” olya kala olundji nokugamena mboka taya ambidhidha nuudhiginini Uukwaniilwa wopaMesiasa. (Lesha Ehololo 12:16.) Pashiholelwa, oompangu odhindji odha gamene uuthemba wOonzapo dhaJehova wokutinda okuya kiita nenge wokwaakutha ombinga miituthi yopashigwana. Tango, natu taleni kugamwe gomomasindano ga simana ngoka Jehova a pe oshigwana she shi na ko nasha nokulonga iilonga yuukwiita. —  Eps. 68:20.

11, 12. Aamwatate Sicurella naThlimmenos oya ningilwa shike, noshizemo oshini?

11 Amerika. Anthony Sicurella okwa li okanona kOonzapo dhaJehova. Okwa ninginithwa sho e na oomvula 15. Sho a ningi oomvula 21, okwi inyolitha kOlaata yokukuta aakwiita kutya ye omuuvithi gwevaangeli. Konima yoomvula mbali, mo 1950, okwa ningi eindilo opo edhina lye li tulwe momadhina gaamboka taya tindi okuya kiita omolweiyuvo lyawo. Nonando ehangano lyedhina Federal Bureau of Investigation kalya li li na uupyakadhi nasho, Oshikondo shIikwaveta osha  tindi. Konima sho a kala nokuholoka mompangu lwiikando, Ompangu Onene yaAmerika oya pulakene oshipotha shomumwatate Sicurella e tayi ti kutya omumwatate ke na ondjo ngaashi ompangu yopevi ya tokolele. Oshinima shika osha tulile po aakwashigwana yalwe yomuAmerika mboka haya tindi okuya kiita omolweiyuvo lyawo oshiholelwa.

12 Greka. Mo 1983, Iakovos Thlimmenos okwa monika ondjo sho a tindi okuzala iikutu yuukwiita nokwa tulwa mondholongo. Sho a zi mondholongo, okwa ningi eindilo lyokuninga omudhigininimambo, ihe eindilo olya tindwa, oshoka okwa monikile ondjo kompangu. Okwa tula mo oshipotha, ihe sho inaa mona ekwatho moompangu dhomoGreka, okwa ningi etalululoindilo kOmpangu yUuthemba wOmuntu yaEuropa (ECHR). Mo 2000, Omutumba gwoPombanda ngoka gwa thikama po maapanguli 17 inagu mu mona ondjo, nokungeyi ogwa tulile po aapanguli ooyakwawo oshiholelwa oshiwanawa shokukondjitha okatongotongo. Manga etokolo ndyoka inaali ningwa, aamwatate muGreka ye vulithe 3 500 oya tulilwe mondholongo, sho ya tindi okuya muukwiita. Opo ihe konima yetokolo ndyoka, epangelo lyaGreka olya tula po ompango kutya iipotha mbyoka ya patululilwa aamwatate nayi ekelwehi thiluthilu. Oshikwawo, ompango tayi pe aakwashigwana ayehe yaGreka uuthemba wokulonga iilonga yilwe peha lyokuya kiita, ndjoka opo ya totelwe, oya tulwa miilonga sho Ekotampango lyaGreka lya talululwa.

“Manga inaandi ya mompangu, onda galikana nda mana mo kuJehova nonda mono nkene a ngungumaneke ndje.” —  Ivailo Stefanov (Tala okatendo 13)

13, 14. Sho to dhiladhila, oshike tatu ilongo moshipotha shaIvailo Stefanov naVahan Bayatyan?

13 Bulgaria. Mo 1994, Ivailo Stefanov okwa li e na omimvo 19 sho i ithanwa kuukwiita. Okwa tindi okuya kuukwiita nenge okulonga iilonga yilwe mbyoka ya pambathana nuukwiita. Okwa tokolelwa oomwedhi 18 mondholongo, ihe okwa pula etokolo ndyoka li talululwe, shi ikolelela kuuthemba wokutinda okuya kiita omolweiyuvo lye. Lwahugunina, oshipotha she osha tuminwa ko-ECHR. Mo 2001, manga oshipotha inaashi pulakenwa, epangelo olya ningi euvathanotsokumwe nomumwatate Stefanov. Epangelo lyaBulgaria inali ekelahi owala oshipotha shomumwatate Stefanov, ihe olya gandja wo epitikilo kwaamboka ya li ya hala okulonga iilonga inaayi pamba uukwiita ye shi ninge. *

14 Armenia. Mo 2001, Vahan Bayatyan okwa thiki mepipi lyokuya muukwiita. * Okwa tindi e ta fala oshipotha she koompangu dhomoshilongo shawo, ihe odhe shi ekelehi. MuSeptemba 2002, okwa tameke okulongela egeelo lye lyoomvula mbali netata, ihe okwa mangululwa konima yoomwedhi omulongo netata. Pethimbo ndyono, okwa li a ningi etalululoindilo ko-ECHR, hoka oshipotha she sha pulakenwa. Ihe mo 27 Kotoba 2009, Ompangu ndjoka nayo oye mu mono ondjo. Aamwatate moArmenia mboka ya li ya gumwa koshinima  shika oya li ya fa ya sindika. Ihe Omutumba gwoPombanda gwo-ECHR ogwa tokola okutalulula etokolo ndyoka. Me 7 Juli 2011, Ompangu oya tokola kutya omumwatate Vahan Bayatyan ke na ondjo. Osha li oshikando shotango o-ECHR tayi mono kutya ngoka a tindi okuya kiita omolweitaalo lye, oku na okugamenwa shi ikolelela kuuthemba womuntu wokupopya omadhiladhilo ge, wokuwilikwa keiyuvo lye nowokulongela Kalunga a manguluka. Etokolo ndyoka inali gamena owala uuthemba wOonzapo dhaJehova, ihe owaantu ayehe miilongo mbyoka yi li mOkomitiye yUuthemba wOmuntu moEuropa. *

Aamwatate moArmenia oya mangululwa mondholongo, sho Ompangu yUuthemba wOmuntu yaEuropa (ECHR) inaayi ya mona ondjo

Iinima yi na ko nasha niituthi yopashigwana

15. Omolwashike oshigwana shaJehova hashi tindi okukutha ombinga miituthi yopashigwana?

15 Opo shi kale oshidhiginini kUukwaniilwa wopaMesiasa, oshigwana shaJehova ihashi tindi owala okuya kiita, ihe okukutha wo ombinga miituthi yopashigwana. Okuza pIita Iitiyali yUuyuni, uukwashigwana owa taandele muuyuni  awuhe. Miilongo oyindji, aakwashigwana oya li haya pulwa ya gane kutya otaya ka popila oshilongo shawo noyi imbe eimbilo lyopashigwana nenge ya salute sho epandela lyoshilongo tali tsilikwa. Ihe tse ohatu longele owala Jehova. (Eks. 20:4, 5) Nomolwashoka hatu hepekwa. Nonando ongawo, Jehova okwa longitha ishewe “evi” lyi nine po omahepeko ngoka. Natu taleni kiipotha yimwe mbyoka Jehova e tu kwathele tu sindane okupitila muKristus. —  Eps. 3:8.

16, 17. Lillian naWilliam Gobitas oya li ye na eshongo lini, nowi ilonga mo shike moshipotha shawo?

16 Amerika. Mo 1940, maapanguli ayehe 9 mOmpangu Onene yaAmerika, gumwe owala a popile Oonzapo dhaJehova moshipotha pokati kaMinersville School District naGobitis. Lillian Gobitas, * gwomimvo 12 nomumwayina William gwomimvo 10, oya tindi okusalutila epandela nenge okugana, oshoka oya li ya hala okukala aadhiginini kuJehova. Nomolwoshinima shoka, oya tidhwa mo mosikola. Oshipotha shawo osha ka pulakenwa kOmpangu Onene ndjoka ya tokola kutya shoka osikola ya ningi otashi tsu kumwe nekotampango lyoshilongo, oshoka otashi gamene “uukumwe woshilongo.” Aamwatate oya hepekwa nayi konima yetokolo ndyoka. Aanona oyendji yOonzapo oya tidhwa moosikola, Oonzapo dhilwe odha kanitha iilonga nodhindji odha dhengwa nayi. Embo The Lustre of Our Country olya ti kutya “omahepeko ngoka ga ningilwa Oonzapo okuza mo 1941 sigo 1943 ogu ulike kutya Aayamerika yomethelemumvo 20 ihayi idhidhimikile omalongelokalunga gayalwe.”

17 Esindano ndika lyaatondi yaKalunga inali kalelela. Mo 1943, Ompangu Onene oya pulakene ishewe koshipotha pokati ka-West Virginia State Board of Education naBarnette shoka sha faathana noshaGobitis. Oshikando shika, Ompangu Onene oya gama kOonzapo dhaJehova. Shika osha li oshikando shotango Ompangu Onene yaAmerika tayi ningi etokolo lya yooloka ko kwaandyoka ya ningile moshipotha shilwe muule owala wokathimbo okahupi. Okuza mpoka omahepeko ngoka ga li taga ningilwa Oonzapo dhaJehova moAmerika oga kodha. Nuuthemba waakalimo ayehe moAmerika owa simanekwa.

18, 19. Pablo Barros okwa ti oshike she mu kwathele i idhidhimike, nongiini aapiya yalwe yaJehova taya vulu oku mu holela?

18 Argentina. Pablo Barros e na oomvula 8 naHugo Barros e na oomvula 7 oya tidhilwe mo mosikola mo 1976, sho inaaya hala okusalutila epandela. Oshikando shimwe omukuluntusikola gwomukulukadhi oku undula Pablo e te mu kapula momutse. Konima sho osikola ya piti mo, okwe ya kalitha po uule wowili, ta kambadhala oku ya thiminika ya kuthe ombinga miituthi yopapolotika. Pablo ota dhimbulukwa natango oshinima shoka. Ota ti: “Ngele ando Jehova ka li a kwathele ndje, ando inandi vula okwiidhidhimikila omathiminiko ngoka.”

 19 Sho oshipotha sha falwa kompangu, omupanguli okwa koleke etokolo lyosikola kutya Pablo naHugo naya tidhwe mo mosikola. Ihe oshipotha shawo osha falwa kOmpangu Onene yaArgentina. Mo 1979, Ompangu ndjoka oye ekelehi etokolo lyompangu yopevi noya ti: “Okutidha aanona mosikola otaku yono po uuthemba womuntu wokwiilonga (okatendo 14) noshi li oshinakugwanithwa shepangelo okugandja elongo lyopetameko (okatendo 5) kukehe okanona.” Etokolo ndika olya kwathele aanona yOonzapo 1 000 lwaampo. Yamwe inaya tidhwa mo we moosikola dhepangelo, nayalwe, ngaashi Pablo naHugo, oya galulilwa mo.

Aagundjuka oyendji Oonzapo oya li yi idhidhimikile omamakelo ogendji

20, 21. Oshipotha shaRoel naEmily Embralinag osha koleke ngiini eitaalo lyoye?

20 Filipine. Mo 1990, Roel Embralinag, * gwomimvo 9 nomumwayina Emily gwomimvo 10 pamwe naanasikola yOonzapo 66 oya tidhwa mosikola, sho inaaya hala okusalutila epandela. Leonardo, he yaRoel naEmily, okwa kambadhala okupopya nomukuluntusikola, ihe inashi kwatha sha. Sho onkalo ya ka pimbila, Leonardo okwa ningi eindilo kOmpangu  Onene. Leonardo ka li e na oshimaliwa nenge ahende ngoka te mu kalele po. Ye noyaandjawo oya galikana kuJehova ya mana mo e ya wilike. Ihe ethimbo alihe ndyoka, uunona owa li natango tawu shekwa. Leonardo okwa li e wete kutya ita ka vula okusindana moshipotha shoka, oshoka ke shi iikwaveta.

21 Ashike yaandjaEmbralinag oya ka kalelwa po kuFelino Ganal, ahende ngoka a li ha longele mombelewa yimwe yomoombelewa dhooahende kamana moshilongo. Pethimbo oshipotha tashi ungaungwa nasho, omumwatate Ganal okwa adhika opo a thigi po iilonga ye nokuninga Onzapo yaJehova. Sho Ompangu Onene ya pulakene kusho, oya gama kOonzapo e tayi ekelehi oompango dhokutidha aanona mosikola. Eeno, mboka ya kambadhala okuteya po uudhiginini woshigwana shaKalunga oya ndopa ishewe!

Okwaakutha ombinga mopolotika ohaku eta uukumwe

22, 23. (a) Omolwashike twa sindana miipotha oyindji? (b) Otashi holola shike sho tu na ombili yuumwayinathana muuyuni awuhe?

22 Omolwashike oshigwana shaJehova sha sindana miipotha oyindji? Nonando ihatu kutha ombinga mopolotika, miilongo oyindji nomoompangu odhindji omwa kala aapanguli aayuuki mboka ye tu gamene kaapataneki aanankondo, nopethimbo opo tuu mpoka, omatokolo gawo ohaga longithwa ongiiholelwa moompangu. Shika otashi ulike kutya Kristus oye e tu kwatha tu sindane. (Lesha Ehololo 6:2.) Ohatu yile shike kompangu? Elalakano lyetu hakulundulula oveta, ihe okushilipaleka kutya otatu vulu okulongela omukwaniilwa gwetu Jesus Kristus twa manguluka. —  Iil. 4:29.

23 Nando oye li muuyuni mbuka wa topoka nowu udha uutondwe, omolwomahilathano gopapolotika, Jesus Kristus okwa kwathela aalanduli ye muuyuni awuhe kaaya kuthe ombinga mopolotika. Satana okwa ndopa oku tu topola noku tu sinda. Uukwaniilwa owa hanganitha aantu omamiliyona mboka inaaya hala ‘okwiilongekidhila we olugodhi.’ Otashi kumitha shili sho tu na ombili yuumwayinathana muuyuni awuhe, naashika otashi ulike kutya Uukwaniilwa waKalunga otawu pangele shili! —  Jes. 2:4.

^ okat. 4 Embo ndika ohali ithanwa wo The New Creation. Konima omambo Millennial Dawn oge ki ithanwa Studies in the Scriptures.

^ okat. 8 Opo wu mone uuyelele kombinga yehunganeko ndika, tala embo Revelation — Its Grand Climax At Hand!, ontopolwa 27, epandja 184-186.

^ okat. 13 Meuvathano ndyoka epangelo lyaBulgaria olya li li na okumonena ayehe mboka taya tindi okuya kiita molweiyuvo lyawo iilonga mbyoka inaayi kwatela mo iinima ya nika uukwiita.

^ okat. 14 Opo wu uve ehokololo alihe, lesha Oshungolangelo yOshiingilisa ye 1 Novomba 2012, epandja 29-31.

^ okat. 14 Epangelo lyaArmenia olye edhilile aagundjuka Oonzapo ye vulithe 450, muule woomvula dhi vulithe 20. MuNovomba 2013, aalumentu aagundjuka mboka ya huguninine mondholongo oya piithwa mo.

^ okat. 16 Ofani ye oya nyolwa epuko momambo gompangu.

^ okat. 20 Momambo gompangu omwa nyolwa ofani Ebralinag, ndjoka ya puka.