Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 7

Omikalo dhokuuvitha — Taya longitha omukalo kehe yu uvithile aantu

Omikalo dhokuuvitha — Taya longitha omukalo kehe yu uvithile aantu

EHUKU LYONTOPOLWA

Omikalo dhi ili nodhi ili ndhoka oshigwana shaKalunga sha kala tashi longitha shu uvithile aantu oyendji ngaashi tashi vulika

1, 2. (a) Omukalo guni Jesus a longitha a vule okupopya nongundu onene? (b) Jesus aalongwa ye oya li ye mu holele ngiini, nomolwashike?

ONGUNDU yaantu oya li ya gongalela Jesus pooha dhefuta. Okwa yi mowato e ta kuutumba muyo, momeya. Omolwashike? Okwe shi ningi opo ongundu yaantu yi uve ko nawa etumwalaka lye, shaashi omeya ohaga falafala ewi. —  Lesha Markus 4:1, 2.

2 Manga Uukwaniilwa inaawu dhikwa po, aalongwa yaJesus nayo oya kala haya longitha omikalo omipe dhokuuvithila oongundu dhaantu onkundana ombwanawa yUukwaniilwa. Omukwaniilwa okwe ya wilike ya lundulule omikalo dhawo sho oonkalo tadhi lunduluka naasho uuteknolohi tawu humu komeho. Otwa hala okuuvithila aantu oyendji ngaashi tashi vulika, manga ehulilo inaali ya. (Mat. 24:14) Natu taleni komikalo dhimwe ndhoka twa kala tatu longitha okuuvithila aantu kehe mpoka ye li. Dhiladhila wo kunkene to vulu okuholela eitaalo lyaamboka ya kala taya taandelitha onkundana ombwanawa okuza nale.

Taya uvithile aantu oyendji

3. Omolwashike aatondi yoshili ya li ya yemata sho tatu longitha iifokundaneki?

3 Iifokundaneki. Tate Russell naayakuli ye oya nyanyangidha Oshungolangelo okuza mo 1879, taya tseyithile aantu oyendji etumwalaka lyUukwaniilwa. Ihe omimvo omilongo dha tetekele omumvo 1914, Kristus okwa kala te enditha iinima, opo onkundana ombwanawa yi vule okuthika kaantu oyendji. Okuza mo 1903 iiningwanima oyindji oya tameke okuningwa. Momumvo ngoka Dr. E. L. Eaton, omupopikalelipo gwaasita Aaprotestande moPennsylvania, okwa tsitha tate Charles Taze Russell oompata kombinga yelongo lyOmbiimbeli. Eaton okwa nyolele Russell a ti: “Onda hala tu tse oompata montaneho yaantu kombinga yomapulo gamwe ngoka ngoye nangame itaatu tsu kumwe . . . notaga ka hokiwa kaantu.” Molwashoka Russell naayakuli ye oya li ye wete kutya aantu otaya ka kala ye ga hokwa, oya longekidha opo ga nyanyangidhwe moshifokundaneki shedhina The Pittsburgh  Gazette. Molwashoka iileshwa mbyoka ya nyanyangidhwa moshifo moka noshili yOmbiimbeli ndjoka Russell a yelitha nawa oya li yihokitha noonkondo, oshifokundaneki osha pitike iipopiwa yaRussell yi kale hayi nyanyangidhwa musho oshiwike kehe. Oshinima shoka kasha li tuu sha yemateke aatondi yoshili!

Mo 1914, iipopiwa yaRussell oya li hayi nyanyangidhwa miifokundaneki yi vulithe po 2 000

4, 5. Uukwatya wuni Russell a li e na, nongiini aakuluntugongalo taya vulu oku mu holela?

4 Mathimbo hamale, iifokundaneki oyindji oya kala ya hala wo okunyanyangidha iipopiwa yaRussell. Mo 1908 Oshungolangelo oya kundaneke kutya iipopiwa yaRussell ohayi nyanyangidhwa “miifokundaneki omulongo nashimwe.” Ihe nonando ongaaka, ooitaali mboka ye na owino miifokundaneki oya lombwele Russell kutya ngele okwa tembudha mo oombelewa dhEhangano moPittsburgh dhi ye koshilando sha tseyika nawa, iileshwa ya kankamena kOmbiimbeli otayi ka nyanyangidhwa miifokundaneki oyindji. Konima sho Russell a dhiladhila nawa komayele ngoka, mo 1909 okwa tembudhile oombelewa koBrooklyn moNew York. Oshizemo? Konima owala yoomwedhi okuza sho dha tembuka, iipopiwa ye oya nyanyangidhwa miifokundaneki 400 lwaampo, nomwaalu gwayo ogwe ende tagu indjipala. Sho Uukwaniilwa wa dhikwa po mo 1914, iifokundaneki yi vulithe po 2 000 momalaka gane oya li hayi nyanyangidha iipopiwa yaRussell niinyolwa ye.

5 Oshike sha simana tatu ilongo mwaashoka sha ningwa po? Mboka ye na oshinakugwanithwa mehangano lyaKalunga kunena, oshi li nawa ngele taya holele eifupipiko lyaRussell. Ngiini? Uuna taya ningi omatokolo ga simana, naya kale haya dhiladhila komayele gayalwe. —  Lesha Omayeletumbulo 15:22.

6. Ongiini oshili ndjoka ya nyanyangidhwa miifokundaneki ya kwathele omuntu gumwe?

6 Oshili kombinga yUukwaniilwa ndjoka ya nyanyangidhwa miifo moka oya lundulula oomwenyo dhaantu. (Heb. 4:12) Pashiholelwa, Ora Hetzel, a ninginithwa mo 1917, okwa li gumwe gwomwaamboka yi ilongo oshili miileshwa mbyoka. Ora okwa ti: “Konima sho nda hokanwa, onda ka talela po meme moRochester moMinnesota. Sho nda thiki kuye, onda adha ta kondo mo iipopiwa yaRussell moshifokundaneki. Meme okwa yelithile ndje iinima mbyoka i ilonga muyo.” Ora okwa taamba ko oshili ndjoka i ilongo nokwa kala omuuvithi omulaadhi gwUukwaniilwa waKalunga uule woomvula omilongo hamano.

7. Omolwashike mboka taya kwatele komeho ya talulula omukalo gwokuuvitha miifokundaneki?

7 Mo 1916 mboka taya kwatele komeho oyi inyengithwa kiinima iyali ya talulule omukalo gwokutaandelitha onkundana ombwanawa miifokundaneki. Oshinima shotango, oya mono kutya omolwIita yoTango yUuyuni iikwaniipangitho yokunyanyangidha oya li tayi nyangwanyangwa. Mo 1916 olopota ya zi koshikondo shetu shiifokundaneki moBritania  oya ti: “Ngashingeyi iipopiwa otayi nyanyangidhwa owala miifo yi vulithe po 30. Notu wete kutya omwaalu nguka otagu ka gwa pevi noonkondo, oshoka oombapila odha ninga ondilo nayi.” Oshitiyali, eso lyaRussell mo 31 Kotoba 1916. Oshungolangelo yo 15 Desemba 1916, oya tseyitha ya ti: “Omolweso lyatate Russell, iipopiwa itayi nyanyangidhwa we [miifokundaneki].” Nando omukalo nguka gwokuuvitha inagu tsikila we, omikalo dhilwe ngaashi okuulika oshinyandwa “Photo-Drama of Creation,” ogwa kala hagu pondola.

8. Oshinyandwa “Photo-Drama of Creation” osha ndulukwa ngiini?

8 Omathano nofilima. Russell naayakuli ye oya longo oomvula ndatu taya longekidha oshinyandwa “Photo-Drama of Creation” shoka sha piti mo 1914. (Omayel. 21:5) Oshinyandwa shika osha ningilwe nomathano golwaala nofilima yi na omawi. Oshinyandwa shika shomahokololo gOmbiimbeli  osha li molupe lwofilima moka mwa li mu na aadhani omathele niinamwenyo nokuli. Olopota yomo 1913 oya ti: “Otwa longitha oshikunino shiinamwenyo tu dhane oshinyandwa shehokololo lyaNoowa.” Omathano omathele ngoka ga longithwa moshinyandwa shika oga mbapekwa kaangongi moLondon, New York, Paris nomoPhiladelphia.

9. Omolwashike pwa longithwa oshimaliwa oshindji nethimbo olindji pu ndulukwe oshinyandwa “Photo-Drama”?

9 Omolwashike pwa longithwa oshimaliwa oshindji nethimbo olindji pu ndulukwe oshinyandwa “Photo-Drama”? Piigongi yomo 1913 yi ili noyi ili opwa leshelwe okatokolitho taka ti: “Iifokundaneki yaAmerika ohayi longitha ookartuuna nenge omathano yi nwethe mo aantu. Natse tu li aauvithi otwa mono kutya ngele otwa longitha omathano hagi inyenge naangoka haga endele pamwe nomawi otatu ka pondola miilonga yokuuvitha.”

Pombanda: Okandunda keshina lyokuulika oshinyandwa “Photo-Drama”; pevi: Omathano goshinyandwa “Photo-Drama”

10. Oshinyandwa “Photo-Drama” oshu ulikilwe momahala geni?

10 Mo 1914, oshinyandwa “Photo-Drama” oshu ulikilwe miilando 80 esiku kehe. Osha talelwe kaantu konyala omamiliyona gahetatu moAmerika nomoKanada. Momumvo ogo tuu ngoka, osha li shu ulikwa moAustralia, Britania, Denmark, Ndowishi, New Zealand, Suomi, Norway, Sweden nomoSwitzerland. Oshinyandwa shika osha kuthwa omathano ngoka haga inyenge shi vule okuulikwa miilando iishona. Oshinyandwa shika oshifupi sha li sha lukwa “Eureka Drama,” osha li shi na ombiliha okunduluka nokufelefula. Mo 1916 oshinyandwa “Photo-Drama” nenge “Eureka Drama” osha tolokwa mOshiarmenia, Oshidenmark shomoNorway, Oshifulaanisa, Oshindowishi, Oshigreka, Oshiitalia, Oshipolanda, Oshispania nomOshiswedeni.

Mo 1914, oshinyandwa “Photo-Drama” oshu ulikililwe aantu oyendji

11, 12. Omugundjuka gumwe okwa li i inyengithwa ngiini koshinyandwa “Photo-Drama” mOshifulaanisa, notatu ilongo ko shike kuye?

11 Charles Rohner, ngoka a li e na omimvo 18, okwi inyengithwa koshinyandwa shoka mOshifulaanisa. Ota ti: “Oshu ulikilwe mondoolopa yetu Colmar moAlsace moFulaanisa. Okuza owala petameko, onda li nda kuminwa omukalo omwaanawa ngoka gwa longithwa okulonga oshili yOmbiimbeli.”

12 Oshizemo? Charles okwa ninginithwa, nomo 1922 okwa yi miilonga yethimbo lyu udha. Oshinakugwanithwa she shotango osha li okuulukila aantu oshinyandwa shika moFulaanisa. Charles okwa popi kombinga yiilonga mbyoka a ti: “Onda li ndi na iinakugwanithwa oyindji: okudhana okahumba, okuungaunga niimaliwa noniileshomwa. Onda li wo ndi na okungungumaneka aapulakeni manga oshinyandwa inaashi tameka, nopokafudho otwa li hatu gandja iileshomwa. Omwiitaali kehe okwa li ha pewa ombinga yimwe yoshinyanga. Otwa li hatu yi komuntu kehe niileshomwa twe yi papata. Posheelo opwa li wo iitaafula yu udha iileshomwa.” Mo 1925, Charles okwi ithanwa kObetel koBrooklyn moNew York. KObetel okwa ningi omuwiliki gwongundu  yaahiki yiihikomwa koradio yo-WBBR ndjoka opo ya totelwe po. Oshiholelwa shomumwatate Rohner nashi tu dhiladhilithe kepulo ndika: ‘Mbela ohandi taamba ko ngaa oshinakugwanithwa kehe tandi pewa, opo etumwalaka lyUukwaniilwa li taandelithwe?’ —  Lesha Jesaja 6:8.

13, 14. Oradio oya longithwa ngiini okutaandelitha onkundana ombwanawa? (Tala wo iimpungu “ Oopolohalama ko-WBBR” nosho wo “ Oshigongi sha dhenga mbanda.”)

13 Oradio. Mo 1920 nasha, omukalo ngoka gwokuulika oshinyandwa “Photo-Drama” kagwa li we tagu longo naanaa. Ihe opwa holoka omukalo omukwawo gwokuuvitha onkundana ombwanawa yUukwaniilwa okupitila moradio. Mo 16 Apilili 1922, tate Rutherford okwa popi lwotango mombepo okuza moMetropolitan Opera House moPhiladelphia moPennsylvania. Aantu 50 000 lwaampono, oya li ya pulakene koshipopiwa “Aantu omamiliyona mboka ye na omwenyo ngashingeyi itaya ka sa we.” Nomo 1923 opolohalama yoshigongi oya tumwa mombepo oshikando shotango. Kakele kokulongitha oositaasi dhomahangano galwe, mboka ya li taya kwatele komeho oya tokola okutota po ositaasi yawo yene yedhina WBBR ndjoka ya tungwa moStaten Island moNew York. Oya tumu omawi mombepo oshikando shotango mo 24 Febuluali 1924.

Mo 1922, aantu 50 000 lwaampono, oya li ya pulakene koshipopiwa “Aantu omamiliyona mboka ye na omwenyo ngashingeyi itaya ka sa we”

14 Oshungolangelo ye 1 Desemba 1924 oya yelitha elalakano lyo-WBBR, ya ti: “Otu uvite kutya omukalo gwokulongitha oradio okutaandelitha etumwalaka lyoshili, omukalo hagu pondola noihagu pula oshimaliwa oshindji.” Oya gwedha ko ya ti: “Ngele Omuwa oku wete sha pumbiwa okutunga oositaasi dhilwe opo oshili yi taandelithwe, nena ote ke tu pa oshimaliwa shoku shi ninga.” (Eps. 127:1) Sho twa ka thika mo 1926, oshigwana shaJehova osha li shi na oositaasi hamano. Mbali odha li moAmerika: o-WBBR moNew York nonkwawo o-WORD popepi noChicago. Dho ne omoKanada: moAlberta, moBritish Columbia, moOntario nomoSaskatchewan.

15, 16. (a) Aasita moKanada oyi inyenge ngiini sho twa tameke okulongitha oradio mokuuvitha? (b) Iipopiwa koradio nokuuvitha egumbo negumbo oya li haye endele ngiini pamwe?

15 Aasita yoongeleka dhiifundja dhopaKriste kaya li ya nyanyukwa sho tatu taandelitha oshili yOmbiimbeli momukalo nguka. Albert Hoffman, ngoka a li e shi nawa iilonga mbyoka hayi longwa kositaasi moSaskatchewan moKanada, okwa ti: “Aantu oyendji oya li ya tseya Aakonakoni yOmbiimbeli. Otwa li twa gandja nawa uunzapo momukalo nguka sigo omo 1928, sho aasita ya thiminike aanambelewa moKanada ya kuthe Aakonakoni yOmbiimbeli uuthemba wawo wokutuma omawi mombepo.”

16 Nonando oositaasi dhetu moKanada odha patwa, iipopiwa yetu oya tsikile okutumwa mombepo koositaasi dhomahangano galwe. (Mat. 10:23) Opo iipopiwa yi pulakenwe kaantu oyendji, Oshungolangelo no-The Golden Age (Awake!) oya li hayi kala nomadhina goositaasi ndhoka hadhi dhana  iipopiwa mbika, opo sho aauvithi taya longo egumbo negumbo ya vule okuladhipika aantu ye yi pulakene. Oshizemo? MuJanuali 1931 okafo Bulletin oka ti: “Oradio otayi kwathele lela mboka taya longo egumbo negumbo. Otwa tuminwa oolopota odhindji kutya aantu oyendji oya kutha omambo getu okuza sho ya pulakene kiipopiwa yatate Rutherford.” Okafo Bulletin oka popi kutya oradio nokuuvitha egumbo negumbo “omikalo mbali dha dhenga mbanda ndhoka ehangano lyOmuwa tali longitha.”

17, 18. Nonando oonkalo odha lunduluka, oradio oya tsikile ngiini okudhana onkandangala?

17 Momimvo dho 1930 nasha, otwa mono omapataneko sho hatu longitha oositaasi dhomahangano galwe. Onkee ano lwopehulilo lyo 1937, oshigwana shaJehova osha lundulula omukalo gwasho gwokuuvitha. Oye etha po okulongitha oradio e taya gandja eitulomo kokuuvitha egumbo negumbo. * Ihe oradio onkee ngaa ya kala tayi dhana onkandangala onene mokutaandelitha etumwalaka lyUukwaniilwa kiitopolwa yokuushayi nenge mbyoka yi na omakuyunguto. Pashiholelwa, mo 1951 sigo 1991 ositaasi yimwe moWest Berlin moNdowishi oya kala hayi dhana iipopiwa yopaMbiimbeli, opo mboka ye li mwaashoka sha li nale East Germany ya pulakene wo ketumwalaka lyUukwaniilwa. Uule woomvula dhi vulithe po 30 okuza mo 1961, ositaasi yimwe moSuriname moSouth America, oya kala hayi dhana opolohalama yominute 15 oshiwike kehe yi longe aantu oshili yOmbiimbeli. Okuza mo 1969 sigo omo 1977, ehangano olya longekidha opolohalama yedhina “Enyolo kehe oli na oshilonga” moka mwa kundathanwa iipalanyolo yopaMbiimbeli yi vulithe po 350. Miitopolwa 48 yaAmerika ooradio 291 odha li hadhi kala nopolohalama ndjika. Mo 1996 ositaasi moApia, oshilandopangelo shaSamoa, oya kala nopolohalama yedhina “Omapulo goye gOmbiimbeli taga yamukulwa” oshiwike kehe.

18 Lwopehulilo lyomimvo dho 1990 nasha, oradio kaya li we tayi dhana onkandangala mokutaandelitha onkundana ombwanawa. Ihe opwa holoka omukalo omupe gwokutaandelitha oshili momukalo inaagu monika mo nando onale.

19, 20. Omolwashike oshigwana shaJehova sha toto po o-jw.org, notayi kwathele aantu shi thike peni? (Tala wo oshimpungu “ JW.ORG.”)

19 Ointaneta. Mo 2013 konyala oopelesenda 40 dhaantu muuyuni awuhe, ano aantu ye vulithe pomabiliyona 2.7, oya li haya longitha ointaneta. Otaku tengenekwa kutya konyala aantu omabiliyona gaali ohaya longitha ointaneta okupitila moongodhi dhopeke dhi ili nodhi ili. Omwaalu ngoka onkee ngaa tagu tana muuyuni awuhe, ihe unene tuu muAfrika moka aantu ye vulithe pomamiliyona 90 haya longitha ointaneta koongodhi dhawo dhopeke. Shika osha lundulula noonkondo omukalo moka aantu haya kongo uuyelele kunena.

 20 Okuza mo 1997, oshigwana shaJehova osha tameke okulongitha omukalo nguka. Mo 2013, o-jw.org oya li momalaka 300 lwaampo, nuuyelele kombinga yOmbiimbeli owa li tawu vulu okutapwa ko momalaka ge vulithe 520. Esiku kehe aantu ye vulithe 750 000 ohaya talele po ehala lyetu lyokointaneta. Kakele kaashoka, omwedhi kehe aantu ohaya tapa ko omambo ge vulithe pomamiliyona 3, iifo omamiliyona 4 niikwamawi omamiliyona 22.

21. Owi ilongo mo shike mehokololo lyaSina?

21 Ehala lyetu lyokointaneta olya kwathela okutaandelitha onkundana ombwanawa yUukwaniilwa waKalunga, nokuli nomiilongo moka iilonga yetu yi indikwa. Pashiholelwa mo 2013, omulumentu gumwe gwedhina Sina okwi itsu o-jw.org e ta dhengele koombelewa dhetu oonene koAmerika a hala uuyelele wa gwedhwa po kombinga yOmbiimbeli. Omolwashike oshinima shika shi ikalekelwa? Sina okwa putuka Omumoslema noha kala kehala lyokuushayi moshilongo moka Oonzapo dhaJehova dhi indikwa. Konima sho a dhenge, opwa ningwa omalongekidho opo Onzapo yimwe moAmerika yi konakone naye Ombiimbeli lwaali moshiwike okupitila mointaneta.

Okulonga aantu oshipala noshipala

22, 23. (a) Mbela omikalo dhokuuvithila aantu oyendji poshikando odha pingene po okuuvitha egumbo negumbo? (b) Omukwaniilwa okwa yambeke ngiini oonkambadhala dhetu?

22 Omikalo adhihe ndhoka twa kala hatu longitha ngaashi iifokundaneki, oshinyandwa “Photo-Drama,” oradio nehala lyetu lyokointaneta inayi nuninwa okupingena po okuuvitha egumbo negumbo. Omolwashike mbela? Omolwashoka oshigwana shaJehova ohashi holele Jesus. Jesus ka li owala ha  popi noongundu dhaantu, ihe okwa li wo ha popi noohandimwe. (Luk. 19:1-5) Okwa dheula wo aalongwa ye ya ninge sha faathana e te ya pe wo etumwalaka ndyoka ye na okuuvitha. (Lesha Lukas 10:1, 8-11.) Ngaashi sha kundathanwa mOntopolwa 6, mboka taya kwatele komeho oya kala aluhe haya ladhipike aapiya yaJehova ya popye naantu oshipala noshipala. —  Iil. 5:42; 20:20.

23 Opwa pita ngashingeyi oomvula 100 konima sho Uukwaniilwa wa dhikwa po, naauvithi ye vulithe pomamiliyona 7.9, ohaya longo yalwe kombinga yomalalakano gaKalunga. Osha yela kutya Omukwaniilwa okwa yambeka omikalo ndhoka twa kala hatu longitha okutseyitha Uukwaniilwa. Otatu ka mona wo mOntopolwa tayi landula kutya okwe tu pa iilongitho ayihe mbyoka twa pumbwa okutaandelitha onkundana ombwanawa miigwana ayihe, momihoko adhihe nomomalaka agehe. —  Eh. 14:6.

^ okat. 17 Mo 1957 mboka taya kwatele komeho oya tokola ya pate ositaasi yetu yahugunina WBBR moNew York.

Tseya oshindji

OSHUNGOLANGELO (YOKUKONAKONWA)

Otu na “okuyamukula aantu” ngiini?

Ongiini tatu vulu okufatulula nawa omanyolo okuyamukula omapulo omadhigu? Tala komikalo ndatu moka tatu vulu okutompathana naantu.