Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 9

Oshizemo shiilonga yokuuvitha — “Omapya oga thika okuteywa”

Oshizemo shiilonga yokuuvitha — “Omapya oga thika okuteywa”

EHUKU LYONTOPOLWA

Jehova ta menitha e ta kokitha ombuto yoshili yUukwaniilwa

1, 2. (a) Omolwashike aalongwa ya kumwa? (b) Eteyo lini Jesus a popi?

AALONGWA oya li ya kumwa sho Jesus e ya lombwele a ti: “Yelutheni omeho geni, mu tale kutya omapya oga thika okuteywa.” Sho ya tala kombinga hoka Jesus tu ulike, oya mono ko owala iilya mbyoka ye eta ooniho. Otashi vulika ya li yi ipula kutya ano ‘otatu teya shike? Ko oku na natango oomwedhi dhontumba okuteya ku thike.’ —  Joh. 4:35.

2 Ihe Jesus ka li ta popi kombinga yeteyo lyo lyenelyene. Pehala lyaashono, okwa li ta longo aalongwa ye iinima iyali ya simana kombinga yeteyo lyopambepo, ano okugongela aantu. Iinima mbyono iyali oyini? Opo tu mone kutya oyini, natu konakoneni ehokololo ndika muule.

Te ya tsu omukumo e te ya uvanekele enyanyu

3. (a) Oshike tashi vulika sha popitha Jesus kutya “omapya oga thika okuteywa”? (b) Jesus okwa yelitha ngiini oohapu dhe?

3 Jesus okwa popi naalongwa ye pehulilo lyo 30 E.N., popepi noshilando Sikar shomuSamaria. Manga aalongwa ye ya yi koshilando, Jesus okwa kala pomuthima mpoka a ka kundathana iinima yopambepo nomukiintu ngoka u uvu ko nziya kutya shoka Jesus te mu longo osha simana. Sho aalongwa ye ya galuka, omukiintu okwa shuna nziya koshilando a ka lombwele aantu iinima iikumithi mbyoka i ilongo. Oyendji oya li ya hokwa shoka yu uvu komukiintu noya zi mo moshilando ye ye kuJesus. Sho Jesus a tala handiyaka yomapya e ta mono ongundu yAasamaria yu uka kuye, otashi vulika pethimbo mpoka opo a lombwele aalongwa ye a ti: “Yelutheni omeho geni, mu tale kutya omapya oga thika okuteywa.” Opo e ya yelithile kutya ita popi eteyo lyo lyene, ihe olyopambepo, okwa gwedha ko a ti: ‘Omuteyi ota gongele iilya e te yi pungulile momwenyo gwaaluhe.’ —  Joh. 4:5-30, 36.

4. (a) Iinima iyali yini Jesus a longo aalongwa ye kombinga yeteyo? (b) Omapulo geni tatu ka kundathana?

4 Iinima iyali yini ya simana Jesus a longo aalongwa ye kombinga yeteyo lyopambepo? Shotango osho kutya iilonga oye endelela. Jesus okwa li a hala okuladhipika aalanduli ye sho a popi kutya ‘omapya oga thika okuteywa.’ Opo a kwathele aalongwa ye ya mone kutya eteyo olye endelela, okwa gwedha ko a ti: “Ngashingeyi nokuli omuteyi ota taamba ondjambi ye.”  Eteyo olya adhika lya tameka nale, nokapwa li ethimbo lyokukakadhala! Oshitiyali osho kutya aalongi oya nyanyukwa. Jesus okwa ti kutya aakuni naateyi otaya ka ‘nyanyukwa pamwe.’ (Joh. 4:35b, 36) Ngaashi naanaa Jesus a li a nyanyukwa sho ‘oyendji yomAasamaria ye mu itaale,’ aalongwa ye nayo otaya ka kala ya nyanyukwa noonkondo sho taya longo iilonga yeteyo nomutima aguhe. (Joh. 4:39-42) Ehokololo ndika lyomethelemumvo lyotango olya simana kutse kunena, oshoka otali ulike shoka tashi ningwa kunena pethimbo lyeteyo enenenene lyopambepo. Eteyo lyokunena olya tamekele uunake? Oolye taya kutha ombinga mulyo? Noshizemo oshini?

Omukwaniilwa gwetu ta wilike eteyo enenenene

5. Olye ta wilike eteyo muuyuni awuhe, nemoniko lyaJohannes otali ulike ngiini kutya iilonga oye endelela?

5 Memoniko ndyoka lya monika komuyapostoli Johannes, Jehova okwa holola kutya okwa langeka po Jesus a kwatele komeho iilonga yeteyo muuyuni awuhe. (Lesha Ehololo 14:14-16.) Memoniko muka Jesus okwa hokololwa e na oshishani noshimwitho. ‘Oshishani shoshingoli komutse gwaJesus’ otashi ulike kutya oku li Omukwaniilwa ta pangele. “Noshimwitho sha tsa moshikaha she” otashi koleke kutya oye Omuteyi. Jehova okwa popi okupitila momuyengeli kutya iilonga oye endelela sho a ti kutya “evi olya tiliganena eteyo.” Odhoshili kutya ‘ethimbo lyokuteya olya thikana,’ nokatu na okukakadhala! Jesus okwa longitha oshimwitho she ngaashi a lombwelwa kuKalunga e shi ‘longithe,’ neteyo olya ningwa, sha hala okutya, aantu yokombanda yevi oya gongelwa. Emoniko ndika lituntula otali tu dhimbulukitha ishewe kutya “omapya oga thika okuteywa.” Mbela otali tu kwathele ngaa tu mone kutya iilonga yeteyo oya tamekele uunake? Eeno!

6. (a) ‘Esiku lyeteyo’ olya tamekele uunake? (b) ‘Eteyo’ lyo lyenelyene olya tamekele uunake? Shi yelitha.

6 Molwashoka emoniko lyaJohannes lyomEhololo ontopolwa 14 otali popi Jesus ngoka Omuteyi a zala oshishani (ovelise 14), osha yela kutya Jesus okwa adhika a ningwa nale Omukwaniilwa mo 1914. (Dan. 7:13, 14) Konima sho Jesus a langekwa po, okwa lombwelwa a tameke okuteya (ovelise 15). Elandulathano lyiiningwanima mbyoka otali monika wo meyele lyaJesus kombinga yeteyo lyiilya, moka a ti: “Eteyo olyo ehulilo lyuuyuni” nenge omasiku gahugunina. Ano esiku lyeteyo nomasiku gahugunina oya tamekele oshita mo 1914. Neteyo lyo lyenelyene olya ka tameka konima yethimbo ‘mesiku lyeteyo.’ (Mat. 13:30, 39) Otu wete kutya eteyo lyo lyenelyene olya tameke konima yoomvula dhontumba sho omukwaniilwa Jesus a tameke okupangela. Tango, Jesus okwa yogola aalanduli ye aagwayekwa okuza mo 1914 sigo opetameko lyo 1919. (Mal. 3:1-3; 1 Pet. 4:17) Nopo nduno mo 1919, ‘eteyo’ olya tameke. Pwaahe na okukakadhala, Jesus okwa longitha omupiya omudhiginini ngoka opo e mu langeke po a kwathele  ooitaali ooyakwawo ya mone kutya iilonga yeuvitho oye endelela. Natu taleni shoka sha ningwa po.

7. (a) Ekonakono lini lya kwathele aamwatate ya mone kutya iilonga yokuuvitha oye endelela? (b) Aamwatate oya ladhipikwa ya ninge shike?

7 MuJuli 1920, Oshungolangelo oya tile: “Sho twa konakona Omanyolo otwa mono kutya ongeleka oya pewa uuthembahenda uunene okuuvitha etumwalaka lyuukwaniilwa.” Pashiholelwa, ehunganeko lyaJesaja olya kwathele aamwatate ya mone kutya onkundana yUukwaniilwa oyi na okuuvithwa muuyuni awuhe. (Jes. 49:6; 52:7; 61:1-3) Aamwatate kaya li ye shi kutya otaye ke shi ninga ngiini, ihe oya li yi inekela kutya Jehova ote ke ya ulukila. (Lesha Jesaja 59:1.) Molwashoka iilonga yokuuvitha oye endelela, aamwatate oya ladhipikwa yu uvithe ya mana mo. Oyi inyenge ngiini?

8. Mo 1921, aamwatate oyu uvu ko iinima iyali yini kombinga yiilonga yokuuvitha?

8 MuDesemba 1921, Oshungolangelo oya ti: “Omumvo nguka ogwa li omumvo omwaanawa komimvo adhihe; naantu oyendji omo yu uvu etumwalaka lyoshili shi vulithe omimvo dha tetekele.” Oshifo osha gwedha ko sha ti: “Iilonga oyindji natango. . . . Natu yi longeni nenyanyu.” Ndhindhilika kutya aamwatate oya li yu uvu ko iinima iyali ya simana kombinga yiilonga yokuuvitha mbyoka Jesus a lombwelele aayapostoli ye kutya oye endelela nonokutya aalongi oya nyanyukwa.

9. (a) Mo 1954, Oshungolangelo oya ti shike kombinga yiilonga yokuteya, nomolwashike? (b) Muule woomvula 50 dha piti, omwaalu gwaauvithi ayehe muuyuni ogwi indjipala ngiini? (Tala oshimpungu “ Omwaalu gwaauvithi muuyuni awuhe.”)

9 Mo 1930 nasha, konima sho aamwatate yu uvu ko kutya engathithi enene nenge ongundu onene yoonzi dhilwe otaya ka taamba ko etumwalaka lyUukwaniilwa, iilonga yokuuvitha oya tsuwa omuthindo. (Jes. 55:5; Joh. 10:16; Eh. 7:9) Oshizemo? Omwaalu gwaauvithi yetumwalaka lyUukwaniilwa ogwi indjipala okuza po 41 000 mo 1934 sigo 500 000 mo 1953! Oshungolangelo ye 1 Desemba 1954, oya ti: “Iilonga mbika iinene yeteyo muuyuni awuhe oya longwa kekwatho lyombepo yaJehova nokoonkondo dhOohapu dhe.” *Sak. 4:6.

OMWAALU GWAAUVITHI MUUYUNI AWUHE

 Oshilongo

1962

1987

2013

Australia

15 927

46 170

66 023

Brasilia

26 390

216 216

756 455

Fuulanisa

18 452

96 954

124 029

Italia

6 929

149 870

247 251

Japani

2 491

120 722

217 154

Meksiko

27 054

222 168

772 628

Nigeria

33 956

133 899

344 342

Filipine

36 829

101 735

181 236

Amerika

289 135

780 676

1 203 642

Zambia

30 129

67 144

162 370

OMWAALU GWAAKONAKONIMBIIMBELI

 1950

234 952

1960

646 108

1970

1 146 378

1980

1 371 584

1990

3 624 091

2000

4 766 631

2010

8 058 359

Iizemo yeteyo oya hunganekwa

10, 11. Iinima yini yi na ko nasha nokukoka kwombuto ya tsuwa omuthindo meyele lyomuma yosinapi?

10 Jesus momayele ge kombinga yUukwaniilwa, okwa popi oshizemo shiilonga yokuteya. Natu taleni keyele lyomuma  yosinapi naandyoka lyefulika. Otatu ka tala unene nkene omayele ngaka ga gwanithwa momasiku ngaka gahugunina.

11 Eyele lyomuma yosinapi. Omulumentu okwa kunu omuma yosinapi. Oya koko e tayi ningi omuti, noondhila odha tungile ko iihandhila. (Lesha Mateus 13:31, 32.) Iinima yini yi na ko nasha nokukoka kwombuto ya tsuwa omuthindo meyele muka? (1) Omukalo moka ombuto ya koko omukumithi. ‘Okamuma haka okashuushuuka ke vulike koomuma adhihe,’ oka ningi omuti gu na “iitayi iinene.” (Mark. 4:31, 32) (2) Ombuto oyi na okukoka. Ngele “[ombuto] ya kunwa, otayi mene e tayi koko.” Jesus ina tya kutya “otayi vulu okukoka.” Ihe okwa ti: “Otayi mene e tayi koko.” Kapu na ngoka ta vulu oku yi keelela yi koke. (3) ‘Oondhila dhokegulu odha tungile iihandhila miitayi’ yomuti ngoka. Iinima mbika itatu otayi faathanithwa ngiini neteyo lyopambepo lyokunena?

12. Eyele lyomuma yosinapi otali faathanithwa ngiini kunena neteyo? (Tala wo oshimpungu “ Omwaalu gwaakonakonimbiimbeli.”)

12 (1) Omukalo moka ombuto ya koko: Eyele otali tsu omuthindo nkene etumwalaka lyUukwaniilwa lya taandele nankene egongalo lyopaKriste lya koko. Okuza mo 1919, aateyi aalaadhi oya gongelwa megongalo lyopaKriste lya totululwa. Pethimbo ndyoka, omwaalu gwaalongi ogwa li omushona, ihe ogwi indjipala meendelelo. Nokuli okuza petameko lyo 1900 nasha sigo okunena, omwaalu ngoka ogwi indjipala inaashi monika nando onale. (Jes. 60:22) (2) Okamuma otaka koko shili: Kapu na ngoka a vulu okukeelela etamunukomo lyegongalo lyopaKriste. Kutya nduno olya kala tali patanekwa shi thike peni, olya tsikile owala okukoka. (Jes. 54:17) (3) Okutungila iihandhila kiitayi yagwo: ‘Oondhila dhokegulu’ ndhoka dha tungila iihandhila yadho komuti ngoka otadhi thaneke aantu omamiliyona mboka ye na omitima dhu uka yomiilongo 240 lwaampoka, mboka ya taamba ko etumwalaka lyUukwaniilwa sho ya ningi iilyo yegongalo lyopaKriste. (Hes. 17:23) Ohaya mono iikulya yopambepo mulyo, etalaleko negameno. — Jes. 32:1, 2; 54:13.

Eyele lyomuma yosinapi otali ulike kutya mboka ye li megongalo lyopaKriste oya nyanyukwa sho ya gamenwa (Tala okatendo 11, 12)

13. Eyele lyefulika otali tsu omuthindo iinima yini yi na ko nasha nokukoka?

13 Eyele lyefulika. Sho omukiintu e li tula mondombo, ondombo ayihe oya fulu. (Lesha Mateus 13:33.) Iinima yini yi na ko nasha nokukoka ya tsuwa omuthindo meyele ndika? Natu taleni kwiiyali. (1) Oshinima ngele tashi koko ohashi lunduluka. Efulika ohali pilulilwa muusila nenge mondombo ayihe ‘sigo ondombo ayihe ya fulu.’ (2) Oshinima ashihe ohashi koko. Efulika olya fulike ‘oontungwa adhihe ndatu’ dhondombo. Iinima mbika iyali oya pambathana ngiini neteyo lyopambepo ndyoka tali ningwa kunena?

14. Eyele lyefulika otali faathanithwa ngiini kunena neteyo?

14 (1) Elunduluko: Efulika otali thaneke etumwalaka lyUukwaniilwa, nuusila otawu thaneke aantu. Ngaashi naanaa efulika hali lundulula uusila nenge ondombo, etumwalaka  lyUukwaniilwa nalyo ohali lundulula omitima dhaantu ngele ye li taamba ko. (Rom. 12:2) (2) Oshinima ashihe ohashi koko: Okwiihanena kwefulika mondombo otaku thaneke okutaandela kwetumwalaka lyUukwaniilwa. Kashona nakashona efulika ohali ihanene mondombo ayihe. Sha faathana, etumwalaka lyUukwaniilwa olya taandela “sigo omiilongo ayihe yokombanda yevi.” (Iil. 1:8) Eyele ndika otali ulike kutya nokuli niilongo moka iilonga yetu yi indikwa, etumwalaka lyUukwaniilwa oli na okutaandela, nonando iilonga yetu yokuuvitha miitopolwa moka kayi wetike sho tayi longwa.

15. Oohapu dhaJesaja 60:5, 22 odha gwanithwa ngiini? (Tala wo iimpungu “ Jehova iha nyengwa kusha” nosho wo “ Nkene ‘aashona’ ya ningi ‘oshigwana oshinankondo.’”)

15 Oomvula 800 lwaampono manga Jesus inaa popya omayele ngoka, Jehova okwa popi okupitila muJesaja kombinga yeteyo lyopambepo nankene tali ke etela aateyi enyanyu. * Jehova okwa popi kombinga yaantu “taa zi kokule” taya mbombolokele kehangano lye. Okwa popi kombinga ‘yomukiintu’ (NW) ngoka kunena e lilwe po kaagwayekwa mboka ye li kombanda yevi, a ti: “Omwenyo gwoye otagu nyanyukwa  nokushambukwa. Uuyamba wokomafuta otau etwa kungoye, aayamba yomiigwana otaa ya kungoye.” (Jes. 60:1, 4, 5, 9) Oohapu ndhoka kadhi shi tuu dhoshili! Kunena aapiya yaJehova mboka ya kala mehangano lye omimvo odhindji oya nyanyukwa sho ye wete omwaalu gwaauvithi yUukwaniilwa tagu indjipala miilongo yawo.

Aapiya yaJehova oye na etompelo lyokunyanyukwa

16, 17. Omolwashike ‘omuteyi nomukuni ya nyanyukwa pamwe’? (Tala wo oshimpungu “ Nkene uufo uyali wa gumu aantu yaali yomuAmazon.”)

16 Dhimbulukwa kutya Jesus okwa lombwelele aayapostoli ye a ti: ‘Omuteyi ota gongele iilya e te yi pungulile momwenyo gwaaluhe, opo omukuni a nyanyukwe pamwe nomuteyi.’ (Joh. 4:36) Ongiini tatu ‘nyanyukwa pamwe’ meteyo ndyoka tali ningwa muuyuni awuhe? Omomikalo odhindji. Natu kundathaneni ndatu.

17 Omukalo gwotango, otwa nyanyukwa okumona nkene Jehova ta dhana onkandangala miilonga mbika. Sho tatu uvitha etumwalaka lyUukwaniilwa, otatu kunu oombuto. (Mat. 13:18, 19) Uuna twa kwathele omuntu a ninge omulongwa gwaKristus, otatu teya. Naatuheni ohatu nyanyukwa sho tu wete nkene Jehova ta ‘menitha nota kokeke’ oombuto dhUukwaniilwa. (Mark. 4:27, 28) Oombuto dhimwe ndhoka twa kuna lwanima ohadhi mene e tadhi teywa kuyalwe. Otashi vulika nangoye wa ningilwa oshinima sha fa shaJoan, omumwameme gwOmubritania ngoka a ninginithilwe oomvula 60 dha piti. Okwa ti: “Onda tsakaneka aantu mboka ya lombwele ndje kutya onda kuna ombuto momitima dhawo sho nde yu uvithilile oomvula dhontumba dha piti. Nokonima yethimbo Oonzapo dhilwe odha konakona nayo Ombiimbeli e tadhi ya kwathele ya ninge aapiya yaJehova. Onda nyanyukwa sho oombuto ndhoka nda kuna dha koko e tadhi teywa.” — Lesha 1 Aakorinto 3:6, 7.

18. Aakorinto yotango 3:8 otaya ti omolwashike twa nyanyukwa?

18 Omukalo omutiyali, Paulus okwa ti: ‘Kalunga ota ka futa kehe gumwe shi thike piilonga ye.’ Oohapu ndhika ohadhi tu nyanyudha shili. (1 Kor. 3:8) Ondjambi ohayi gandjwa shi ikolelela kiilonga, ihe hakoshizemo shiilonga mbyoka. Shika ihashi nyanyudha tuu lela mboka hayu uvithile miitopolwa moka aantu ihaaya pulakene naanaa! Pataloko lyaKalunga, omuuvithi kehe ta kunu nomutima aguhe ota imike “iiyimati oyindji,” nomolwaashono e na etompelo lyokukala a nyanyukwa. —  Joh. 15:8; Mat. 13:23.

19. (a) Ehunganeko lyaJesus ndyoka tali adhika muMateus 24:14 ohali tu etele ngiini enyanyu? (b) Oshike tu na okudhimbulukwa nonando inatu pondola mokuninga omuntu omulongwa?

19 Omukalo omutitatu, otwa nyanyukwa sho iilonga yetu tayi gwanitha po shoka sha hunganekwa. Natu tale nkene Jesus a yamukula aayapostoli ye sho ye mu pula ya ti: “Tu lombwela, uunake ano tashi ka ningwa, nendhindhiliko olini tali holola, uuna to ya nehulilo lyuuyuni?” Okwe ya lombwele kutya endhindhiliko limwe olyo okuuvitha onkundana  ombwanawa muuyuni awuhe. Mbela okwa li ta popi iilonga yokuninga aantu aalongwa? Aawe. Okwa ti: ‘Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo.’ (Mat. 24:3, 14) Onkee ano okuuvitha Uukwaniilwa, ano okukuna oombuto, oko endhindhiliko. Onkee ano, sho tatu uvitha onkundana ombwanawa yUukwaniilwa, natu dhimbulukwe kutya nonando inatu pondola mokuninga omuntu omulongwa, otwa gandja ‘uunzapo.’ * Kutya nduno aantu otayi inyenge ngiini, otatu gwanitha po ehunganeko lyaJesus noshi li uuthembahenda kutse sho tu li “aalongi pamwe naKalunga.” (1 Kor. 3:9) Shika ihashi tu nyanyudha tuu!

“Okuza kuuzilo sigo okuuninginino”

20, 21. (a) Oohapu dhaMaleaki 1:11 otadhi gwanithwa ngiini? (b) Shi na ko nasha niilonga yokuteya, owa tokola okuninga po shike, nomolwashike?

20 Methelemumvo lyotango, Jesus okwa kwathelele aayapostoli ye ya mone kutya iilonga yokuteya oye endelela. Okuza mo 1919, Jesus okwa kala ta kwathele aalongwa ye yokunena nayo yu uve ko wo kutya oye endelela. Okuza mpono oshigwana shaKalunga osha longo sha mana mo. Kape na nokuli shoka sha vulu okuya iilonga yeteyo moshipala. Ngaashi sha hunganekwa komupolofeti Maleaki, iilonga yokuuvitha otayi longwa nokunena “okuza kuuzilo sigo okuuninginino.” (Mal. 1:11) Okuza kepito lyetango sigo okeningino lyalyo; okuza kuuzilo sigo okuuninginino, aakuni naateyi otaya longo pamwe ya nyanyukwa kutya nduno oye li peni kombanda yevi. Nokuza kepito lyetango sigo okeningino lyalyo; okuza ongula sigo ongulohi nenge esiku alihe, otatu longo neendelelo.

21 Uuna tatu tala koomvula dhi vulithe pe 100 lwaampono dha piti, omitima dhetu ohadhi kala dha “nyanyukwa nokushambukwa” shili, sho oshigwana shaKalunga shoka sha li okangundu okashona sha koko e ta shi ningi “oshigwana oshinankondo.” (Jes. 60:5, 22) Enyanyu lyetu nohole yetu yokuhola Jehova, “Omuwa gweteyo,” nayi tu inyengithe tu kale nokulonga ethimbo kehe iilonga mbika yeteyo enenenene! —  Luk. 10:2.

^ okat. 9 Opo wu ilonge oshindji kombinga yoomvula ndhoka nosho wo yoomvula omilongo ndhoka dha ka landula ko, otatu ku ladhipike wu leshe embo Jehovah’s Witnesses — Proclaimers of God’s Kingdom, epandja 425-520, mpoka tapu popiwa shoka iilonga yokuteya ya tompola okuza mo 1919 sigo 1992.

^ okat. 15 Opo wu mone uuyelele owundji kombinga yehunganeko ndika, tala embo Isaiah’s Prophecy — Light for All Mankind II, epandja 303-320.

^ okat. 19 Oshili ndjika ya simanenena oya kala yu uviwa ko nale kAakonakoni yOmbiimbeli. Oshungolangelo yo 15 Novomba 1895, oya tile: “Nonando iilya owala iishona tayi ka gongelwa, uunzapo owundji otawu vulu natango okugandjwa kombinga yoshili. . . . Ayehe otaya vulu okuuvitha evaangeli.”