Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 17

Aauvithi yUukwaniilwa taya dheulwa

Aauvithi yUukwaniilwa taya dheulwa

EHUKU LYONTOPOLWA

Nkene aauvithi yUukwaniilwa ya dheulwa moosikola dhOmbiimbeli ya vule okulonga oshilonga shawo

1-3. Jesus okwa ningi po shike opo okuuvitha ku tsikile, naashika osha pendutha omapulo geni?

UULE woomvula mbali Jesus okwa li hu uvithile muGalilea. (Lesha Mateus 9:35-38.) Okwa talelele po iilando nomikunda odhindji, tu uvithile aantu moosinagoga kombinga yonkundana ombwanawa yUukwaniilwa. Aantu oya li haya mbombolokele kuye kehe mpoka tu uvithile. Okwa ti “iilya oyi li po oyindji,” nomolwaashono pwa li pwa pumbiwa aateyi oyendji.

2 Jesus okwa ningi po sha, opo okuuvitha ku tsikile. Okwa ningi po shike? Okwa tumu aayapostoli ye 12 ye ku ‘uvithe Oshilongo shaKalunga’ nenge Uukwaniilwa waKalunga. (Luk. 9:1, 2) Otapeya aayapostoli ya li tayi ipula kutya shika otaye ke shi ninga ngiini. Ihe manga inee ya etha ya ye, Jesus okwe ya dheula ngaashi He gwomegulu e mu dheulile.

3 Ihe opu na omapulo: Jesus okwa dheulilwe ngiini kuHe? Jesus okwa dheula ngiini aayapostoli ye? Mbela Omukwaniilwa gwopaMesiasa okwa dheula ngaa aalanduli ye kunena, opo ya longe oshilonga shokuuvitha? Ngele osho, okwe shi ningi ngiini?

“Otandi popi ashike shoka Tate a longa ndje”

4. Jesus okwa longelelwe peni kuHe nuunake?

4 Jesus okwa ziminine kutya okwa li a longwa kuHe. Sho Jesus tu uvitha, okwa tile: “Otandi popi ashike shoka Tate a longa ndje.” (Joh. 8:28) Jesus okwa longelwe uunake nopeni? Osha yela kutya Omwana gwaKalunga nguka omutango, okwa tameke okudheulwa konima owala sho a shitwa. (Kol. 1:15) Omwana okwa kala pamwe naHe, ‘Omulongi Omunenenene,’ megulu uule woomvula odhindjidhindji ta pulakene kuye note mu tala sho ta longo. (Jes. 30:20, NW) Oshizemo, Omwana okwa li a longwa a longekeka kombinga yuukwatya waHe uuwanawa, yelalakano lye noyiilonga ye.

5. Elombwelo lini Jehova a pe Omwana kombinga yiilonga yokuuvitha mbyoka a li ta ka longa kombanda yevi?

5 Mokweendela ko kwethimbo, Jehova okwa longo Omwana kombinga yuukalele mboka a li ta ka longa kombanda yevi. Natu taleni kehunganeko ndyoka tali hokolola ekwatathano ndyoka li li pokati kOmulongi Omunenenene nOmwana omutango. (Lesha Jesaja 50:4, 5.) Ehunganeko otali ti Jehova ota pendutha Omwana “ongula kehe.” Oohapu ndhoka otadhi gandja edhiladhilo lyomulongi ngoka ha pendutha omulongwa gwe ongula onene, opo e mu longe. Embo limwe ndyoka lya popya kombinga yOmbiimbeli olya ti: “Jehova . . . okwa fa e mu kutha ngaashi omulongwa e te mu fala kosikola, hoka e ke mu longa nkene e na okuuvitha naashoka e na okuuvitha.” Jehova okwa longo Omwana “mosikola” ndjoka yomegulu ‘shoka e na oku shi tya noku shi popya.’ (Joh. 12:49) He okwe mu pe wo omalombwelo gankene e na okulonga aantu. * Sho Jesus a li kombanda yevi, ina longitha owala edheulo ndyoka muukalele we, ihe okwa dheula wo aalanduli ye nayo ya longe muukalele.

6, 7. (a)  Edheulo lini Jesus a pe aayapostoli ye, nolye ya kwathele ya ninge shike? (b) Edheulo lini Jesus a pe aalanduli ye yonena?

6 Jesus okwa li a dheula aayapostoli ye ngiini, ngaashi sha tumbulwa petameko? Ngaashi sha popiwa muMateus ontopolwa 10, okwe ya pe omalombwelo gokondandalunde ge na ko nasha nuukalele, ngaashi: mpoka ye na okuuvitha (ovelise 5, 6), etumwalaka ndyoka taye ku uvitha (ovelise 7), kutya oye na okwiinekela muJehova (ovelise 9, 10), nkene ye na okupopya nomunegumbo (ovelise 11-13), nkene ye na okwiinyenga uuna inaaya taambiwa ko (ovelise 14, 15) nonkene ye na okwiinyenga uuna taya hepekwa (ovelise 16-23). * Edheulo ndyoka Jesus a dheula aayapostoli ye olye ya kwathele ya humithe komeho euvitho lyonkundana ombwanawa methelemumvo lyotango E.N.

7 Ongiini kunena? Jesus, Omukwaniilwa gwUukwaniilwa waKalunga, okwa pa aalanduli ye iilonga ya simanenena yokuuvithila aantu ayehe “elaka ndika etoye lyOshilongo . . . li ningile iigwana ayihe onzapo.” (Mat. 24:14) Mbela Omukwaniilwa okwe tu dheula ngaa tu longe iilonga mbyoka ya simana? Eeno, okwe shi ninga. Okuza megulu Omukwaniilwa okwa shilipaleke kutya aalanduli ye oya longwa nawa nkene ye na okuuvitha nonkene ye na okugwanitha po iinakugwanithwa yawo momagongalo.

Ta dheula aapiya ye yu uvithe onkundana ombwanawa

8, 9. (a) Elalakano lya simanenena lyOsikola yOkudheula Aauvithi olya li lyashike? (b) Okugongala kwomokati koshiwike okwe ku kwathela ngiini wu pondole muukalele?

8 Okuza nale ehangano lyaJehova olya kala hali ningi iigongi iinene niishona nosho wo okugongala, ngaashi Okugongala kwoPailonga, opo li dheulile oshigwana shaKalunga uukalele. Ihe okutameka mo 1940 nasha, aamwatate mboka taya kwatele komeho koombelewa oonene oya tameke okudheula aantu okupitila moosikola dha yoolokathana.

9 Osikola yOkudheula Aauvithi. Ngaashi twe shi mono montopolwa ya tetekele, osikola ndjika oya tamekele mo 1943. Mbela elalakano lyayo olya li okudheula owala aantu ya kale haya gandja iipopiwa iiwanawa pokugongala? Aawe. Elalakano lya simanenena oya li okudheula oshigwana shaKalunga shi vule okulongitha omagano gasho gokupopya shi hambelele Jehova muukalele. (Eps. 150:⁠6) Osikola ndjika oya li hayi longo ayehe mboka yi inyolitha ya kale haya uvitha nomupondo. Ngashingeyi edheulo ndyoka ohali gandjwa pokugongala kwomokati koshiwike.

10, 11. Oolye ngashingeyi taya vulu okwiinyolitha mOsikola yaGilead, nelalakano lyosikola ndjoka olyashike?

10 Osikola yOmbiimbeli yoWatchtower yaGilead. Osikola ndjika oya tamekele mOmaandaha, 1 Febuluali 1943. Oya totelwe nelalakano lyokudheula aakokolindjila naakalele yalwe yethimbo lyu udha ya ka ninge aatumwa miilongo yi ili noyi ili muuyuni. Ihe okuza muKotoba 2011, oomboka owala ye li nale miilonga yi ikalekelwa yethimbo lyu udha taya vulu okwiinyolitha, ngaashi aakokolindjila yi ikalekelwa, aatonateli aayendi naakulukadhi yawo nenge Aabetel naatumwa mboka inaaya hita natango osikola ndjoka.

11 Elalakano lyOsikola yaGilead olya shike? Omulongi gumwe omukulukulu posikola ndjoka ota ti: “Okukoleka eitaalo lyaanasikola okupitila mekonakono lyOohapu dhaKalunga noku ya kwathela ya kokeke uukwatya wopambepo mboka ya pumbwa, opo ya vule okugwanitha po oshilonga shawo, nonando opu na omashongo. Oshikwawo, elalakano lya simanenena okukwathela aanasikola ya kale ya halelela okuuvitha.” — Ef. 4:11.

12, 13. Okuuvitha okwe ende ngiini okuza sho Osikola yaGilead ya tamekwa? Gandja oshiholelwa.

12 Iilonga yokuuvitha oya li ye ende ngiini okuza sho Osikola yaGilead ya tamekwa? Okuza 1943, osikola ndjika oya dheula aatumwa ye vulithe 8 500, * naatumwa mbaka oya longo miilongo yi vulithe 170 muuyuni awuhe. Aatumwa mboka oya longitha nawa edheulo ndyoka ya mona, sho ya tulile po yalwe oshiholelwa shokukala nuulaadhi momapya naasho ya dheula yakwawo. Momahala ogendji moka mu na aauvithi yUukwaniilwa aashona nenge kaamu nando ogumwe, aatumwa mbaka oyo ya li haya kwatele komeho iilonga mbika.

13 Natu taleni kwaashoka sha ningilwe moJapani moka iilonga yokuuvitha ya li ya hulithwa po pethimbo lyIita Iitiyali yUuyuni. MuAuguste 1949, Aajapani mboka ya ninga aauvithi kaya li ya adha nokuli nokomulongo. Ihe sho omvula ya ka teka, aatumwa 13 oya li taya uvithile moshilongo shoka. Naatumwa mboka, oya ka landulwa kuyalwe oyendji. Petameko aatumwa oya li haya longele unene miilando iinene; ihe konima oya ka longa nokiilando yilwe. Aatumwa oya ladhipike aakonakoni yawo nayalwe ya ninge aakokolindjila. Oonkambadhala ndhika dhaatumwa odha li dhe eta iizemo iiwanawa. Nena moJapani omu na aauvithi yUukwaniilwa 216 000, noopelesenda konyala 40 dhaauvithi otadhi kokola ondjila. *

14. osikola dhOmbiimbeli otadhi gandja uumbangi washike? (Tala wo oshimpungu “ Oosikola ndhoka hadhi dheula aauvithi yUukwaniilwa.”)

14 Oosikola dhilwe dhOmbiimbeli. Osikola yOkudheula Aakokolindjila, Osikola yOmbiimbeli yOkudheula Aaihokani Aakriste nOsikola yOmbiimbeli yOkudheula Aamwatate Inaaya Hokana odha kwathela mboka ya hita mo ya koke pambepo noyu uvithe nuulaadhi. * Oosikola adhihe ndhika otadhi gandja uumbangi kutya Omukwaniilwa gwetu okwa longa aalanduli ye ya gwanithe po oshilonga shawo shokuuvitha. — 2 Tim. 4:5.

Aamwatate taya dheulilwa oshilonga sha simana

15. Aalumentu mboka ye na iinakugwanithwa oye na okuholela Jesus momukalo guni?

15 Dhimbulukwa kutya ehunganeko lyaJesaja olya popi kutya Jesus okwa longwa kuKalunga. Omwana okwa longwa “mosikola” yomegulu ‘shoka e na okutya, opo a koleke mboka ya gundila po.’ (Jes. 50:4) Jesus okwa tula elongo ndyoka miilonga; naasho a li kombanda yevi okwa talaleke mboka ya ‘vulwa noya humbatekwa uudhigu.’ (Mat. 11:28-30) Ngaashi Jesus, aalumentu mboka ye na iinakugwanithwa nayo oye na okukala haya talaleke aamwatate naamwameme. Opo ya vule oku shi ninga, opwa totwa oosikola dha yooloka okukwathela aamwatate mboka, opo ya vule okuyakula ooitaali ooyakwawo nawa.

16, 17. Elalakano lyOsikola yUukalele wUukwaniilwa olya shike? (Tala wo enyolo lyopevi.)

16 Osikola yUukalele wUukwaniilwa. Osikola ndjika oya ningilwe oshikando shotango mo 9 Maalitsa 1959 moSouth Lansing moNew York. Aatonateli aayendi naapiya yegongalo oya li ya hiywa kosikola ndjika hayi kutha omwedhi gumwe. Konima, uuyelele wokersesa ndjika owa tolokwa momalaka galwe, nomokweendela ko kwethimbo osikola ndjika oya tameke okudheula aamwatate muuyuni awuhe. *

Omumwatate Lloyd Barry ta longo Osikola yUukalele yUukwaniilwa moJapani mo 1970

17 Embo 1962 Yearbook of Jehovah’s Witnesses olya ti ngeyi kombinga yelalakano lyosikola ndjoka: “Muuyuni mbuka wu na omaipyakidhilo ogendji, omutonateli megongalo lyOonzapo dhaJehova oku na okukala omulumentu ngoka ta vulu okuunganeka onkalamwenyo ye nawa, opo a kwathele nawa iilyo ayihe megongalo. Ye ina kala itaa sile aanegumbo lye oshimpwiyu molwegongalo, ihe na kale nondjele. Kashi shi tuu ompito ombwanawa kaapiya yegongalo muuyuni awuhe sho haya hiti Osikola yUukalele wUukwaniilwa, opo ya dheulwe ya vule okugwanitha po oshilonga shomutonateli ngaashi sha popiwa mOmbiimbeli!” — 1 Tim. 3:1-7; Tit. 1:5-9.

18. Oshigwana shaKalunga ashihe osha mona uuwanawa wuni omolwOsikola yUukalele wUukwaniilwa?

18 Oshigwana shaKalunga ashihe osha mona uuwanawa omolwOsikola yUukalele wUukwaniilwa. Ngiini mbela? Ngele aakuluntugongalo naayakuligongalo oya tula miilonga shoka yi ilonga kosikola ndjoka, ohaya talaleke ooitaali ooyakwawo, ngaashi naanaa Jesus a li ha ningi. Mbela iho kala wu uvite nawa, uuna wa talelwa po komukuluntugongalo nenge komuyakuligongalo nenge ta pulakene nawa kungoye nenge te ku tsu omukumo? (1 Tes. 5:11) Aalumentu mboka oye li shili eyambeko enene komagongalo!

19. Okomitiye yOkulonga ohayi tonatele oosikola dhilwe dhini, noosikola ndhoka odha totwa po nelalakano lyashike?

19 Oosikola dhilwe dhOmbiimbeli. Olutuwiliki okupitila mOkomitiye yOkulonga ohayi tonatele oosikola dhilwe ndhoka hadhi dheula aamwatate mboka taya kwatele komeho mehangano. Oosikola ndhoka odha nuninwa okukwathela aakuluntugongalo, aatonateli aayendi nosho wo iilyo yOkomitiye yOshitayimbelewa, opo ya gwanithe po iilonga yawo oyindji. Okersesa ndjika ya kankamena kOmbiimbeli ohayi ladhipike aamwatate mboka ya kale ya kola pambepo noya tule miilonga omithikampango dhOmbiimbeli, sho taya litha oonzi ndhoka Jehova a tula metonatelo lyawo. — 1 Pet. 5:1-3.

Ongundu yotango yOsikola yOkudheula mUukalele moMalawi mo 2007

20. Omolwashike Jesus a ti kutya atuhe otwa “longwa kuKalunga,” nowa tokola okuninga shike?

20 Osha yela kutya Omukwaniilwa gwopaMesiasa okwa shilipaleka kutya aalanduli ye oya dheulwa nawa. Edheulo ndika olya zi kuJehova ngoka a dheula Omwana, nOmwana okwa dheula aalanduli ye. Nomolwashono Jesus a vulu okutya atuhe otwa “longwa kuKalunga.” (Joh. 6:​45; Jes. 54:​13) Natu kale twa tokola okulongitha edheulo ndyoka hatu pewa kOmukwaniilwa gwetu. Natu kaleke momadhiladhilo kutya elalakano lyelongo ndika oku tu kwathela tu kale twa kola pambepo, opo tu gwanithe po oshilonga shetu shokuuvitha onkundana ombwanawa.

^ okat. 5 Otu shi ngiini kutya Jehova okwa longo Omwana nkene e na okulonga aantu? Dhiladhila kwaashika: Sho Jesus a longitha omayele ogendji sho a li ta longo aantu, okwa gwanitha po ehunganeko ndyoka lya nyolelwe oomvula omathele manga inaa valwa. (Eps. 78:2; Mat. 13:34, 35) Osha yela kutya Jehova ngoka a nyolitha ehunganeko ndyoka okwa li a tokola nale kutya Omwana ota ka longitha omayele sho ta longo aantu. — 2 Tim. 3:16, 17.

^ okat. 6 Konima yoomwedhi dhontumba, Jesus ‘okwa hogolola aalongwa yalwe omilongo heyali nayaali nokwe ya tetekelitha ooyaali nooyaali’ ye ku uvithe. Okwe ya dheula wo. — Luk. 10:1-16, yelekanitha OB-1954.

^ okat. 12 Yamwe yomaanasikola oya hita osikola yaGilead lwiikando yi vulithe pushimwe.

^ okat. 13 Ngele owa hala okumona uuyelele owundji kombinga yankene aatumwa ya humitha komeho iilonga yokuuvitha muuyuni awuhe, lesha ontopolwa 23 membo Jehovah’s Witnesses​—Proclaimers of God’s Kingdom.

^ okat. 14 Osikola yOmbiimbeli yOkudheula Aaihokani Aakriste nOsikola yOmbiimbeli yOkudheula Aamwatate Inaaya Hokana odha tulwa mumwe nongashingeyi ohadhi ithanwa Osikola yAauvithi yUukwaniilwa.

^ okat. 16 Ngashingeyi aakuluntugongalo ohaya kwathelwa kOsikola yUukalele wUukwaniilwa ndjoka hayi ningwa uule wethimbo lyontumba nohayi ningwa konima yoomvula oonshona. Okuza 1984 aayakuligongalo nayo oya dheulwa mosikola ndjika.