Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Uukwaniilwa waKalunga otawu pangele!

 ONTOPOLWA 19

Okutunga hoka haku simanekitha Jehova

Okutunga hoka haku simanekitha Jehova

EHUKU LYONTOPOLWA

Nkene okutunga muuyuni awuhe taku humitha komeho Uukwaniilwa

1, 2. (a) Aapiya yaJehova oya kala nokunyanyukilwa shike? (b) Oshike Jehova a lenga?

OKUZA nale oshigwana shaJehova osha kala hashi tungu omatungo ngoka taga simanekitha edhina lye. Pashiholelwa, Aaisraeli oya li ya tungu noya gandja nenyanyu iinima mbyoka ya pumbiwa mokutunga etsalihangano. —  Eks. 35:30-35; 36:1, 4-7.

2 Shoka hashi simanekitha Jehova kashi shi iitungithi, yo ishewe Jehova hayo a lenga. (Mat. 23:16, 17) Shoka Jehova a lenga, shoka hashi mu etele esimano kwaa na we, elongelokalunga lyaapiya ye, ombepo yawo yeiyambo niilonga yawo yuulaadhi. (Eks. 35:21; Mark. 12:41-44; 1 Tim. 6:17-19). Omolwashike oohapu ndhoka dhoshili? Omolwaashoka omatungo ihaga kalelele. Pashiholelwa, etsalihangano notempeli kayi po we. Ihe nando etsalihangano notempeli kayi po we, Jehova ina dhimbwa shoka aapiya ye ya ningile, ano sho ya gandja noya kutha ombinga moku yi tunga. —  Lesha 1 Aakorinto 15:58; Aahebeli 6:10.

3. Oshike tatu ka kundathana montopolwa ndjika?

3 Aapiya yaJehova nena nayo ohaya longo nuudhiginini okutunga omahala gokulongelela mo Kalunga. Naashoka twa pondola po sho tatu wilikwa komukwaniilwa Jesus Kristus oshikumithi lela! Osha yela kutya Jehova okwa yambeka oonkambadhala dhetu. (Eps. 127:1) Montopolwa ndjika, otatu ka tala yimwe yomiilonga mbyoka ya longwa po nonkene ya simanekitha Jehova. Otatu ku uva wo kombinga yayamwe mboka ya kuthile ombinga miilonga mbyoka.

Okutunga Iinyanga yUukwaniilwa

4. (a) Omolwashike twa pumbwa natango omahala gokulongelela mo Jehova? (b) Omolwashike iitayimbelewa yimwe ya hengumukila mumwe? (Tala oshimpungu “ Taya tungu iitayimbelewa opo ya kandule po ompumbwe.”)

4 Ngaashi sha kundathanwa mOntopolwa 16, Jehova okwa tegelela tu kale hatu gongala pamwe. (Heb. 10:25) Ihatu gongala owala opo tu tunge eitaalo lyetu, ihe otu kwathelwe tu kale twa hwama mokuuvitha. Sho tu uka pehulilo lyomasiku gahugunina, Jehova ote endeleleke iilonga mbyoka. Nomolwaashono omvula kehe aantu omayuvi otaya mbombolokele kehangano lye. (Jes. 60:22) Molwaashoka omwaalu gwaalelwa yUukwaniilwa otagu indjipala, opu na ompumbwe onene yomahala gokunyanyangidhila iileshomwa yopaMbiimbeli. Otwa pumbwa wo omahala ogendji gokulongelela mo Jehova.

5. Omolwashike edhina Oshinyanga shUukwaniilwa tali opalele? (Tala wo okampungu “ Ongeleka yUuyelele Uupe.”)

 5 Okuza petameko lyondjokonona yoshigwana shaJehova, Aakonakoni yOmbiimbeli oya mono kutya oya pumbwa omahala gawo yene gokugongalela. Ehala lyotango olya tungilwe mo 1890 moWest Virginia moAmerika. Sho twa ka thika mo 1930 nasha, oshigwana shaJehova osha adhika sha tunga nale nokwoopalekulula iinyanga yontumba, ihe iinyanga mbyoka kaya li natango ya lukwa omadhina. Ihe mo 1935, omumwatate Rutherford okwa ka talela po koHawaii hoka kwa li taku tungwa oshitayimbelewa oshipe nosho wo oshinyanga. Sho a pulwa kutya oshinyanga nashi lukwe edhina lini, omumwatate Rutherford okwa yamukula a ti: “Ongiini ngele otwe shi luku ‘Oshinyanga shUukwaniilwa,’ molwaashoka Uukwaniilwa owo hatu uvitha?” (Mat. 24:14) Okuza mpoka omahala ogendji muuyuni awuhe moka oshigwana shaJehova hashi gongalele oga tameke okwiithanwa edhina ndyoka.

6, 7. Omukalo gwokutunga Iinyanga yUukwaniilwa meendelelo ohagu gandja shike?

6 Okuza mo 1970 nasha, opwa li pu na ompumbwe onene yIinyanga yUukwaniilwa. Opo ya kandule po ompumbwe  ndjoka, aamwatate moAmerika oya nduluka po omukalo hagu endelele gwokutunga omatungo omawanawa notaga opalele muule owala womasiku omashona. Mo 1983, opwa adhika nale pwa tungwa Iinyanga yUukwaniilwa 200 moAmerika nomoKanada. Opo ya gwanithe po oshilonga shoka, aamwatate oya toto po ookomitiye dhokutunga miitopolwa. Ookomitiye odha li hadhi pondola oshindji, nomolwaashono mo 1986 Olutuwiliki lwa tameke oku dhi longitha pambelewa. Nomo 1987, moAmerika omwa adhika nale mu na Ookomitiye dhOkutunga dhOmoshitopolwa (RBC) 60. * Mo 1992 moArgentina, moAustralia, moFulaanisa, moNdowishi, moJapani, moMeksiko, moSouth Africa nomoSpania omwa adhika nale mu na ookomitiye ndhoka. Osha yela kutya otu na okwaambidhidha aamwatate naamwameme mboka haya tungu Iinyanga yUukwaniilwa nIinyanga yIigongi, oshoka oshilonga shoka taya longo oshiyapuki.

7 Omukalo nguka gwokutunga Iinyanga yUukwaniilwa meendelelo ohagu gandja uunzapo kaantu miitopolwa moka tayi tungwa. Pashiholelwa, oshifokundaneki shimwe moSpania osha li noshileshwa shi na oshipalanyolo “Eitaalo tali tumbu po oondundu.” Oshifo osha popi kombinga yOshinyanga shUukwaniilwa shoka sha li tashi tungwa moMartos e tashi pula sha ti: “Otashi wapa ngiini muuyuni mbuka wokwiihola mwene aantu yi iyambe noya ze kiitopolwa yi i ili noyi ili [yaSpania] ya ye koMartos, opo ya ka tunge etungo ndyoka ewanawa, lya tungwa meendelelo nomelandulathano?” Oshileshwa osha yamukula epulo ndyoka tashi totha oohapu dhOnzapo yimwe  tashi ti: “Shika otashi wapa owala, oshoka ohatu longwa kuJehova.”

Okutunga miilongo mbyoka ya hepa

8. Mo 1999, Olutuwiliki olwa gandja epitikilo lyashike, nomolwashike?

8 Lwopehulilo lyomimvo dhe 1900, aantu oyendji ya za miilongo mbyoka ya hepa oya mbombolokele mehangano lyaJehova. Omagongalo miilongo moka oga kambadhala okutunga omahala gokugongalela. Ihe miilongo yimwe, aamwatate oya li haya shekwa nokuningwa okatongo, oshoka Iinyanga yUukwaniilwa kaya li naanaa iiwanawa ya fa omatungo goongeleka dhilwe. Ihe okuza mo 1999, Olutuwiliki olwa gandja epitikilo opo Iinyanga yUukwaniilwa yi tungwe meendelelo miilongo mbyoka opo tayi putuka. Iilongo iiyamba oya gandja oshimaliwa kiilongo mbyoka opo tayi putuka, opo ayehe ya kale ye na “shi thike pamwe.” (Lesha 2 Aakorinto 8:13-15.) Aamwatate naamwameme ya za kiilongo yilwe oya li yi iyamba ya ka kwathele okutunga.

9. Oshilonga shini sha li tashi monika sha fa oshidhigu, ihe osha gwanithwa po ngiini?

9 Petameko oshilonga shoka aamwatate oya li ye wete sha fa oshidhigu. Olopota yomo 2001 oya ti kutya miilongo 88 mbyoka opo tayi putuka omwa li mwa pumbiwa Iinyanga yUukwaniilwa 18 300. Ihe kekwatho lyombepo yaKalunga nokekwatho lyomukwaniilwa gwetu Jesus Kristus kapu na oshilonga tashi nyengana. (Mat. 19:26) Muule woomvula 15, okuza mo 1999 sigo 2013, oshigwana shaKalunga osha tunga Iinyanga yUukwaniilwa 26 849 momukalo ngoka. * Jehova onkee ngaa ta yambeke okuuvitha kwetu, nomolwaashono mo 2013 miilongo  mbyoka mwa li mwa pumbiwa natango Iinyanga yUukwaniilwa 6 500 lwaampo. Sigo onena, Iinyanga omathele onkee ngaa ya pumbiwa omumvo kehe.

Okutunga Iinyanga yUukwaniilwa miilongo mbyoka ya hepa oku na omashongo gi ikalekelwa

10-12. Iinyanga yUukwaniilwa ohayi simanekitha ngiini edhina lyaJehova sho tayi tungwa?

10 Iinyanga yUukwaniilwa mbyoka ya tungwa oya simanekitha ngiini edhina lyaJehova? Olopota ndjoka ya ziilile koshitayimbelewa shaZimbabwe oya ti: “Olundji momukokomoko gwomwedhi moka oshinyanga sha tungwa, omwaalu gwaakalipo ohagu ndambula.” Miilongo oyindji, aantu oya fa haya kala inaaya hala okugongala pamwe natse, ngele katu na oshinyanga oshiwanawa. Ihe konima owala ngele Oshinyanga shUukwaniilwa sha pu, ohashi udha nziya e tapu kala pwa pumbiwa ishewe oshikwawo. Aantu ihaya nanenwa owala kuJehova kuuwanawa wOshinyanga shUukwaniilwa. Ihe ohole yopaKriste ndjoka hayi ulikwa kwaamboka haya tungu iinyanga nayo ohayi ningitha aantu ya kale ya hokwa ehangano lye. Natu taleni kiiholelwa yimwepo.

11 Indonesia. Omulumentu gumwe sho a mono kutya aantu ayehe mboka taya tungu Oshinyanga shUukwaniilwa aaiyambi owala, okwa ti: “Ne aantu aakumithi shili! Onda mona nkene amuhe hamu longo neitulomo nonenyanyu, nokuli nando ihamu futwa. Ondi wete kutya kapu na elongelokalunga lilwe lya fa lyeni!”

12 Ukraine. Omukiintu gumwe ngoka a li ha piti esiku kehe pOshinyanga shUukwaniilwa sho tashi tungwa, okwe ya pehulithodhiladhilo kutya aantu mboka taya tungu Oonzapo dhaJehova, netungo oli na okukala Oshinyanga shUukwaniilwa. Okwa ti: “Omumwamemekadhona ngoka a ninga Onzapo okwa lombwelele ndje kombinga yOonzapo dhaJehova. Sho nda mono sho tamu tungu, onda tokola kutya nangame onda hala okuninga gumwe gwomaantu mbaka ye holathane. Onda mono kutya oye holathane.” Omukiintu nguka okwa tameke okukonakona Ombiimbeli e ta ninginithwa mo 2010.

13, 14. (a) Owi ilonga shike kwaashoka aanandjokana mboka ya li taya tala sho Oshinyanga shUukwaniilwa tashi tungwa ya ti? (b) Oshike to vulu okuninga, opo Oshinyanga sheni shi simanekithe edhina lyaJehova?

13 Argentina. Aaihokani yamwe oya popile nomumwatate ngoka ta tonatele iilonga yokutunga Oshinyanga shUukwaniilwa. Omusamane okwa ti: “Otwa kala twe mu tala sho tamu tungu Oshinyanga shUukwaniilwa, . . . notwa tokola kutya otwa hala okwiilonga kombinga yaKalunga mehala ndika.” Nopo nduno okwa pula a ti: “Otu na okuninga shike opo tu vule okukala hatu gongala mpaka?” Aanandjokana mbaka oya zimine okukonakona Ombiimbeli, ihe ongele owala Oonzapo tadhi konakona naantu ayehe megumbo. Aamwatate oye shi zimine nenyanyu.

14 Otashi vulika inoo kutha ombinga mokutunga Oshinyanga shUukwaniilwa moka hamu gongalele, ihe oto vulu okuninga po sha, opo Oshinyanga sheni shi kale hashi simanekitha edhina lyaJehova. Pashiholelwa, oto vulu okuhiya mboka ho konakona nayo Ombiimbeli kokugongala naamboka ho  talele po owala nenge omuntu kehe to tsakaneke. Oto vulu wo okwoopaleka Oshinyanga sheni noku shi kaleka monkalo ombwanawa. Nongele owa pungula okamaliwa, oto ka vula oku ka gandja po omayambidhidho, opo oofuto dhOshinyanga sheni dhi futwe nenge wu ka tule moshiketha shOkutunga Iinyanga yUukwaniilwa momahala galwe muuyuni. (Lesha 1 Aakorinto 16:2.) Iilonga ayihe mbika ohayi simanekitha edhina lyaJehova.

Aalongi mboka “hayi igandja nehalo ewanawa”

15-17. (a) Oolye unene haya tungu? (b) Owi ilongo shike kwaashoka sha popiwa kaaihokani mboka haya longo mooproyeka dhokutunga muuyuni awuhe?

15 Aamwatate naamwameme yomoshilongo moka tamu tungwa Iinyanga yUukwaniilwa noyIigongi nenge oshitayimbelewa oyo unene haya kutha ombinga moku yi tunga. Ihe olundji ohaya ambidhidhwa kaamwatate naamwameme ya za kondje yiilongo mboka ye na ontseyo mokutunga. Yamwe yomaaiyambi mboka ohaya unganeke nawa oonkalamwenyo dhawo, opo ya vule okulonga uule wiiwike mooproyeka ndhoka. Nayalwe ohaye shi ningi uule woomvula odhindji, sho taya mana yimwe yo oyu uka konkwawo.

Timo naLina Lappalainen (Tala okatendo 16)

16 Mboka haya tungu miilongo yi ili noyi ili ohaya taalelwa komashongo gi ikalekelwa, ihe ohaya mono wo uuwanawa. Pashiholelwa, Timo naLina oya kwathela okutunga Iinyanga yUukwaniilwa noyIigongi nosho wo iitayimbelewa miilongo yaAsia, yaEuropa noyaAmerika lyokOlukadhi. Timo ota ti: “Momukokomoko gwoomvula 30 dha piti, konyala konima yoomvula mbali kehe onda li handi pewa oshinakugwanithwa oshipe.” Lina ngoka a kala a hokana naTimo uule woomvula 25 ota ti: “Ngame naTimo otwa longa pamwe miilongo omulongo. Ohashi kutha ethimbo noonkondo odhindji okwiigilila iikulya iipe,  onkalo yombepo ompe, elaka epe noshitopolwa shokuuvitha oshipe nosho wo okupanga uukuume.” * Mbela oshe ya etela ngaa uuwanawa washa? Lina ota ti: “Omashongo oge tu etela omayambeko ogendji. Aamwatate naamwameme oye tu yakula nawa nohole yopaKriste notwa mona nkene Jehova te tu sile oshimpwiyu. Otwa mona wo nkene Jehova ta gwanitha po euvaneko ndyoka Jesus u uvanekele aalongwa ye ndyoka li li muMarkus 10:29, 30. Otwa mona lwethele aamwatate naamwameme noomeme yopambepo.” Timo ota ti: “Ohashi tu nyanyudha noonkondo okulongitha uunkulungu wetu miilonga mbika ya simanenena yokwiindjipaleka omaliko gOmukwaniilwa.”

17 Darren naSarah mboka ya kala taya kwathele mokutunga miilongo yaAfrika, yaAsia, iilongo yopokati kaAmerika lyokOlukadhi naAmerika lyokUumbangalantu, yaEuropa, yaAmerika lyokOlukadhi nokuuntuntu mboka wu li popepi naAustralia oyu uvite kutya oya pewa oshindji shi vulithe shoka ya gandja. Nonando oya tsakaneka omashongo, Darren ota ti: “Osha li uuthembahenda uunene okulonga pamwe naamwatate naamwameme ya za kiilongo yi ili noyi ili. Onda mona kutya oshigwana shaJehova osha hangana omolwohole yasho yokuhola Jehova.” Sarah ota ti: “Aamwatate naamwameme yomomaputuko gi ili nogi li oya longa ndje oshindji noonkondo. Okumona nkene taya iyambele Jehova osha tsa ndje omukumo shili ndi tsikile okulonga nda mana mo.”

18. Episalomi 110:1-3 otali gwanithwa ngiini?

18 Omukwaniilwa David okwa hunganekele kutya nando aalelwa yUukwaniilwa otaye ki iyadha muudhigu, “otaye ki igandja nehalo ewanawa” (NW), opo ya humithe komeho Uukwaniilwa. (Lesha Episalomi 110:1-3.) Ayehe mboka taya ambidhidha Uukwaniilwa momukalo nguka, otaya kutha ombinga megwanithopo lyehunganeko ndyoka. (1 Kor. 3:9) Iitayimbelewa oyindji, Iinyanga yIigongi omathele nosho wo Iinyanga yUukwaniilwa omayovi nomayovi otayi ulike kutya Uukwaniilwa waKalunga epangelo lyolela ndyoka tali pangele ngashingeyi. Katu na tuu uuthembahenda uunene sho tatu longele omukwaniilwa Jesus Kristus miilonga mbika tayi simanekitha Jehova ngoka a gwana okusimanekwa!

^ okat. 6 Mo 2013, aaiyambi ye vulithe 230 000 moAmerika oya li ya pitikwa okulonga nOokomitiye dhOkutunga 132. Moshilongo shika, ookomitiye ndhika odha tunga Iinyanga yUukwaniilwa 75 nodho opalekulula iinyanga 900 lwaampono omumvo kehe.

^ okat. 9 Omwaalu nguka inagu kwatela mo Iinyanga yUukwaniilwa mbyoka ya tungilwe miilongo yilwe mbyoka inaayi kwatelwa mo mopolohalama ndjika.

^ okat. 16 Aapiya yopaigwana naaiyambi ohaya longitha ethimbo lyawo olindji mokutunga, ashike ohaya uvitha wo kongulohi nenge momahuliloshiwike pamwe nomagongalo gomoshitopolwa.