Mokweendela ko kwethimbo, Aaisraeli oya pilamene Jehova noya tameke okulongela iikalunga. Omimvo adhihe heyali, Aamidiana oya kala nokuyaka po iinamwenyo yAaisraeli noya hanagula po omapya gawo. Opo Aaisraeli ya fadhuke po Aamidiana, oya holama momakololo nomomaholameno moondundu. Aaisraeli oyi indile Jehova, e ya hupithe. Onkee ano, Jehova okwa tumu omuyengeli a ye komulumentu omugundjuka gwedhina Gideon. Omuyengeli okwa ti: ‘Jehova okwe ku hogolola wu ninge omulumentu ependafule.’ Gideon okwe mu pula a ti: ‘Otandi mangulula ngiini Aaisraeli? Ngame omuntu gwowala.’

Gideon okwa li te ke shi tseya ngiini kutya Jehova okwe mu hogolola? Okwa tula omafufu gonzi polupale e ta lombwele Jehova ta ti: ‘Ngele omafufu oga kwatwa komume ongula manga evi lya kukuta, otandi ka tseya kutya owa hala ongame ndi mangulule Israel.’ Ongula ya landula ko, omafufu oga li gu udha omeya, nevi olya li lya kukuta. Ihe Gideon okwa pula opo ongula ya landula, omafufu ga kale omakukutu, omanga evi lya tosima. Sho shoka sha ningwa, Gideon opo owala a kala a shilipalekwa kutya Jehova oye e mu hogolola. Okwa longekidha aakwiita ye ya ka kondjithe Aamidiana.

 Jehova okwa lombwele Gideon a ti: ‘Otandi ka pa Aaisraeli esindano. Ihe molwaashoka owu na aakwiita oyendji unene, otashi vulika wu dhiladhile kutya owa sindana kungoye mwene. Lombwela omuntu kehe a tila a shune kegumbo.’ Aakwiita 22 000 oya shuna kegumbo, omanga 10 000 ya kala po. Opo ihe Jehova okwa lombwele Gideon a ti: ‘Owu na natango aakwiita oyendji. Ya fala kedhiya e to ya lombwele ya nwe omeya. Hogolola mo owala mboka ya kala ya kotokela aatondi yawo, manga taya nu. Aakwiita owala 300 ya kala ya tonata manga taya nu.’ Jehova oku uvaneke kutya aalumentu mbaka aashona oyo owala taya ka sinda aakwiita Aamidiana 135 000.

Uusiku mboka, Jehova okwa li a lombwele Gideon a ti: ‘Ngashingeyi olyo ethimbo lyokumatukila Aamidiana!’ Gideon okwa pe aalumentu ye oombenda niiyuma yi na oonyeka meni. Okwe ya lombwele a ti: ‘Talii ndje nawa, ne mu ninge naanaa shoka te ningi.’ Gideon okwa hiki ombenda ye, e taya tatula oshiyuma she, okwa yelutha onyeka ye nokwi igidha a ti: ‘Egonga olyaJehova nolyaGideon!’ Aalumentu ye ayehe 300 oya ningi sha faathana. Aamidiana oya li ya tila noya yi ondapo e tayi ihanene oombinga adhihe. Oya li ya ngwangwana e taya tameke okukondjithathana. Natango Jehova okwa kwathele Aaisraeli ya sinde aatondi yawo.

“Shika otashi ulike kutya oonkondo kadhi li mutse yene, ihe odhi li muKalunga.” — 2 Aakorinto 4:7