Sho Opaasa ya pu, Jesus naalongwa ye oya piti muSamaria, sho taya shuna kuGalilea. Jesus okwa thikama pomuthima nenge poluthithiya lwaJakob, popepi noshilando Sikar. Manga ta fudha po, aalongwa ye oya yi moshilando ya ka lande iikulya.

Omukiintu okwe ya okuteka komuthima ngoka. Jesus okwa ti kuye: “Pe ndje wo, ndi nwe mo.” Omukiintu okwa yamukula a ti: ‘Omolwashike to popi nangame? Ngame omukiintu Omusamaria. Aajuda ihaya popi nAasamaria.’ Jesus okwe mu yamukula a ti: ‘Ando owa li wa tseya kutya ongame lye, ando owi indile ndje omeya e tandi ku pe omeya omanamwenyo.’ Omukiintu okwe mu pula a ti: ‘Omeya oto ga pe ndje ngiini, ngele ku na nando eyemele?’ Jesus okwa ti: ‘Kehe ngoka ta nu omeya ngoka tandi ge mu pe, ita ka sa we enota.’ Omukiintu okwa ti: “Omuwa, pe ndje wo omeya ngoka.”

Jesus okwe mu lombwele a ti: ‘Ka tale omulumentu gwoye, e ye huka komuthima.’ Omukiintu okwa ti: ‘Kandi na omulumentu.’ Jesus okwa ti kuye: ‘Owa popi oshili. Owa hokanwa iikando itano, nokuli nomulumentu ngoka wu na ngashingeyi ine ku hokana.’ Omukiintu okwa ti: ‘Ondi wete kutya ngoye omuhunganeki. Aasamaria oyi itaala kutya otaya vulu okulongela Kalunga kondundu ndjika, ihe Aajuda ohaya ti kutya otatu vulu owala oku mu longela muJerusalem. Ondi itaala kutya ngele Mesiasa e ya, ote ke tu longa nkene tu na okulongela Kalunga.’ Opo nduno Jesus okwe mu lombwele oshinima shoka inaa lombwela nando omuntu. Okwa ti: ‘Ongame Mesiasa.’

Omukiintu okwa yi nziya koshilando nokwa lombwele  Aasamaria ooyakwawo a ti: ‘Ondi wete kutya onda mona Mesiasa. Okwa tseya iinima ayihe mbyoka nda ninga. Ileni mu ke mu tale.’ Aantu oya yi pamwe naye komuthima noya pulakene kwaashoka Jesus e ya longo.

Aasamaria oyi indile Jesus a kale moshilando shawo. Jesus okwa kala mo uule womasiku gaali te ya longo, naantu oyendji oye mu itaale. Aantu oya lombwele omukiintu Omusamaria ya ti: ‘Otwi itaala kutya omulumentu nguka oye lela omuhupithi gwuuyuni, omolwoohapu ndhoka tu uvu kuye.’

“Kehe ngoka a sa enota, ne ye; naangoka a hala, na taambe omeya.” — Ehololo 22:17