Ester okwa li omukadhona Omujuda, ha kala moshilando Susa, muPersia. Ye naantu yaandjawo, oya li ya kala uule womimvo odhindji muJerusalem, ihe omukwaniilwa Nebukadnezzar okwe ya fala kuPersia. Okwa putudhwa komumwayinagona Mordekai, ngoka a li omupiya gwomukwaniilwa gwaPersia, Kserkses.

Omukwaniilwa Kserkses okwa li a hala omunyekadhi omupe. Aapiya ye oye mu etele aakadhona mboka aawanawa lela moshilongo she ashihe, mwa kwatelwa Ester. Mokati kaakadhona ayehe mboka e etelwa, okwa hogolola mo Ester a ninge omunyekadhi. Omumwayinagona Mordekai okwe mu lombwele ki ipopye kutya ye Omujuda.

Omulumentu e na uuntsa gwedhina Haman, oye a li elenga ekuluntu lyomalenga agehe. Okwa li a hala aantu ayehe ye mu inyongamene, ihe Mordekai okwa tindi oku shi ninga. Haman okwa geye noonkondo e ta kala a hala oku mu dhipaga. Sho Haman u uvu kutya Mordekai ogwomoshigwana shAajuda, okwa kongo po ondunge Aajuda ayehe ya dhipagwe. Okwa lombwele omukwaniilwa a ti: ‘Aajuda oya nika oshiponga. Owa pumbwa oku ya dhipaga po.’ Omukwaniilwa Kserkses okwa ti: ‘Ninga ngaashi wa hala.’ Okwe mu pitike wo a tule po ompango. Haman okwa nyola ompango tayi lombwele aantu ya dhipage Aajuda ayehe mesiku etimulongo netitatu lyomwedhi Adar. Jehova iinima ayihe mbyoka okwa li e yi wete.

Ester ka li e shi ompango ndjoka. Onkee ano, Mordekai okwe mu tumine ombapila yenyolululo lyayo nokwe mu lombwele a ti: ‘Inda wu ka popye nomukwaniilwa.’ Ester okwa ti: ‘Shaa ngoka ta yi komukwaniilwa ini ithanwa ko, oku na okusa. Opwa pita omwedhi ini ithana ndje kuye. Ihe oko tandi yi. Ngele okwa ganeke ndje ondhimbo ye yuukwaniilwa, ote kala nomwenyo. Ngele ine shi ninga, ote si.’

Ester okwa yi kehale lyuuwa. Sho omukwaniilwa e mu mono, okwe mu ganeke nondhimbo ye. Ester okwa yi kuye, nomukwaniilwa okwe mu pula a ti: ‘Ester, owa hala ndi ku kwathele shike?’ Ester okwa yamukula a ti: ‘Onda hala ne naHaman mu ye  komatelekela.’ Sho ye ya komatelekela, Ester okwe ya hiya ishewe komatelekela omatiyali. Komatelekela hoka, omukwaniilwa okwe mu pula ishewe a ti: ‘Owa hala ndi ku ningile shike?’ Ester okwa ti: ‘Opu na omuntu a hala okudhipaga ndje pamwe noshigwana shetu. Tu kwathela wu tu hupithe.’ Omukwaniilwa okwe mu pula a ti: ‘Olye a hala oku mu dhipaga?’ Ester okwa ti: ‘Omutondi gwetu, Haman.’ Omukwaniilwa okwa geye noonkondo, e ta dhipagitha Haman meendelelo.

Nonando Haman okwa dhipagwa, kapwa li ngoka ta vulu okulundulula ompango ye, mwa kwatelwa nomukwaniilwa. Onkee ano, omukwaniilwa okwa ningi Mordekai elenga ekuluntu muuwa, e te mu pe epitikilo a nyole ompango ompe. Mordekai okwa nyola ompango ndjoka ya pitike Aajuda yi igamene, uuna ya ponokelwa. Aajuda oya sindi aatondi yawo, mesiku etimulongo netitatu lyomwedhi Adar. Okuza kesiku ndyoka, oya kala haya dhana oshituthi shesindano ndyoka omumvo kehe.

“Otamu ka falwa kiipala yomalenga noyaakwaniilwa omolwandje, shi ninge ompito yokuhokolola elaka etoye kuyo nokaapagani.” — Mateus 10:18