Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Onkundana ombwanawa ya za kuKalunga

 Oshileshwa 8

Omolwashike Kalunga e etha uukolokoshi nokumona iihuna ku kale po?

Omolwashike Kalunga e etha uukolokoshi nokumona iihuna ku kale po?

Kalunga okwa pa aantu ompito ya pangele ethimbo lya gwana opo e yu ulukile kutya itaya vulu okukandula po omaupyakadhi ngoka haga adha aantu

1. Uukolokoshi owa tameke ngiini?

Uukolokoshi owa li wa tameke kombanda yevi sho Satana a popi iifundja yotango. Petameko Satana okwa li omuyengeli a gwanenena, ihe “ina dhiginina moshili.” (Johannes 8:44, NW) Okwa li a kwatwa kehalo lyokulongelwa, ihe Kalunga oye owala a gwana okulongelwa. Satana okwa li a fundju omukiintu gwotango, Eva, nokwa li e mu hongolola a vulike kuye pehala lyokuvulika kuKalunga. Ngaashi Eva a li inaa vulika kuKalunga, Adam naye ka li a vulika kuKalunga. Etokolo ndyoka Adam a li a ningi olya li lya ningitha aantu ya kale haya mono iihuna nohaya si. — Lesha Genesis 3:1-6, 19.

Sho Satana a lombwele Eva kaa vulike kuKalunga, okwa li a tsu ondumbo nuunamapangelo waKalunga nenge nondondo ndjoka Kalunga a gwana okukala e na e li Omukombandambanda. Aantu oyendji oya landula Satana noinaya hala Kalunga a kale Omupangeli gwawo. Kungawo, Satana okwa ningi “omupangeli guuyuni mbuka.” — Lesha Johannes 14:30; 1 Johannes 5:19.

2. Mbela meshito lyaKalunga omwa li mu na sha sha puka?

Iilonga yaKalunga ayihe oya gwanenena. Aantu naayengeli mboka Kalunga a shiti oya li taya vulu okuvulika thiluthilu kuKalunga. (Deuteronomium 32:4, 5) Kalunga okwe tu shita tu na emanguluko lyokuhogolola okulonga shoka oshiwanawa nenge shoka oshiwinayi. Emanguluko ndyoka otali tu pe ompito tu ulike ohole yetu yokuhola Kalunga. — Lesha Jakob 1:13-15; 1 Johannes 5:3.

3. Omolwashike Kalunga e etha aantu taya mono iihuna sigo okunena?

Jehova okwa etha mboka ya tsa ondumbo nuunamapangelo we ya tsikile nokwaavulika kwawo, ihe shika ote shi idhidhimikile owala okathimbo okahupi. Omolwashike? Opo u ulukile aantu kutya ngele otayi ipangele yo yene itaya pondola sha. (Omuuvithi 7:29; 8:9) Uumbangi kutya aantu itaya vulu okwiipangela yo yene owu iwetikile ngashingeyi  konima sho aantu ya kala nokwiipangela uule woomvula 6 000. Aapangeli yopantu oya nyengwa okuhulitha po iita, omiyonena, okwaanuuyuuki nosho wo omikithi. — Lesha Jeremia 10:23; Aaroma 9:17.

Mepingathano nomapangelo gopantu, epangelo lyaKalunga otali etele mboka ye li taamba ko uuwanawa. (Jesaja 48:17, 18) Masiku Jehova ota ka hulitha po omapangelo agehe gopantu. Aantu mboka ya hogolola okupangelwa kuKalunga oyo owala taya ka kala ko kombanda yevi. — Jesaja 11:9; Lesha Daniel 2:44.

Ehogololo kehe ndyoka tatu ningi monkalamwenyo otali ulike ngele otwa hala Kalunga a kale omupangeli gwetu nenge hasho

4. Eidhidhimiko lyaKalunga olye tu pa ompito yashike?

Satana okwa ti kutya aantu otaya longele Jehova molwokwiiholamwene, ihe hamolwaashoka ye hole Jehova. Mbela ino hala okuulika kutya oohapu ndhoka kadhi shi dhoshili? Oto vulu oku shi ninga. Omolweidhidhimiko lye, Kalunga okwa pa kehe gumwe ompito u ulike ngele okwa hala okupangelwa kuye nenge okaantu. Onkalamwenyo yetu oyo tayi ka utha kutya otwa gama kombinga yalye. — Lesha Job 1:8-12; Omayeletumbulo 27:11.

5. Ongiini tatu vulu okuhogolola Kalunga a ninge Omupangeli gwetu?

Otatu vulu okuulika kutya otwa hala Kalunga a kale Omupangeli gwetu ngele otwa kala tu li melongelokalunga lyashili nokutula miilonga shoka tatu ilongo mOohapu dhe, Ombiimbeli. (Johannes 4:23) Otatu vulu okuyanda okupangelwa kuSatana mokukala ihaatu kutha ombinga moopolotika nosho wo miita, ngaashi Jesus a li ihaa kutha ombinga muyo. — Lesha Johannes 17:14.

Satana oha longitha oonkondo dhe opo a humithe komeho oluhondelo nosho wo omikalo dhilwe dha nyata. Ngele otwe etha po iilonga ya tya ngawo, yamwe yomookuume ketu noyomaakwanezimo yetu otashi vulika ye tu sheke nenge ye tu pataneke. (1 Petrus 4:3, 4) Onkee ano, otu na okuhogolola kutya oshike tatu ka ninga po. Mbela otatu ka kala ngaa tatu endathana naantu mboka ye hole Kalunga? Mbela otatu ka vulika ngaa koompango dhe dhopandunge nodhopahole? Ngele otwa ningi ngaaka, otatu ku ulika kutya Satana okwa popya iifundja sho a popi kutya kapu na gumwe ta ka kala omudhiginini kuKalunga. — Lesha 1 Aakorinto 6:9, 10; 15:33.

Molwaashoka Kalunga oku hole aantu otashi tu pe uushili kutya ota ka hulitha po uukolokoshi nemono lyiihuna. Mboka tayu ulike kutya oyi itaala kutya shika otashi ka ningwa otaya ka nyanyukilwa onkalamwenyo kombanda yevi sigo aluhe. — Lesha Johannes 3:16.

 

 

Tseya oshindji

Omalongo gashili gOmbiimbeli ogeni naanaa?

Omolwashike Kalunga e ethele okumona iihuna ku kale po?

Aantu oyendji otaya dhiladhila kutya Kalunga oye ta pewa ombedhi omolwokumona iihuna hoka ku li muuyuni. Ngoye oto dhiladhila ngiini? Ilonga shoka Kalunga ta ti kombinga yomatompelo gokumona iihuna.