Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Onkundana ombwanawa ya za kuKalunga

 Oshileshwa 2

Kalunga olye naanaa?

Kalunga olye naanaa?

1. Omolwashike tu na okukala hatu longele Kalunga?

Kalunga kashili oye Omushiti gwiinima ayihe. Ke na etameko ye ke na nando esiku a ka hule ko. (Episalomi 90:2) Oye Onzo yonkundana ombwanawa ndjoka yi li mOmbiimbeli. (1 Timoteus 1:11) Molwaashoka Kalunga oye e tu shita, oye awike tu na okulongela. — Lesha Ehololo 4:11.

2. Kalunga okwa tya ngiini naanaa?

Kapu na nando omuntu a mona Kalunga molwaashoka ye Ombepo, sha hala okutya okwa yooloka ko kokule kiishitwa yopanyama mbyoka yi li kombanda yevi. (Johannes 1:18; 4:24) Kakele kaashono, ngele tatu tala keshito lye otatu vulu okutseya kutya oha dhiladhila ngiini nankene ha kala u uvitile iinima yontumba. Pashiholelwa, iiyimati yomaludhi noongala dhomaludhi ogendji otadhi tu lombwele oshindji kombinga yohole ye nosho wo yuunongo we. Uunene wewangandjo otawu tu ulukile kutya oonkondo dhe odhi thike peni. — Lesha Aaroma 1:20.

Uuna tatu lesha Ombiimbeli otatu vulu okwiilonga oshindji shi vulithe pwaashoka tatu ilongo meshito kombinga yankene Kalunga ha dhiladhila nokombinga yankene ha kala u uvitile iinima yontumba. Pashiholelwa, otayi tu lombwele kutya Kalunga oku hole shike naashoka kee hole, nkene ha ungaunga naantu nosho wo nkene ha katuka moonkalo dhi ili nodhi ili. — Lesha Episalomi 103:7-10.

3. Mbela Kalunga oku na edhina?

Jesus okwa ti: ‘Tate yetu, ngu u li megulu: Edhina lyoye nali yapulwe.’ (Mateus 6:9) Nonando Kalunga oku na omadhinasimaneko ogendji, oku na owala edhina limwe. Kehe melaka ohali tumbulwa momukalo gwi ili. MOshindonga ohatu ti “Jehova.” MuEksodus 15:3, Ombimbeli Ondjapuki yomo-1954 otayi ti kutya ‘edhina lye oJehova.’

Edhina lyaKalunga olya kuthwa mo mOombiimbeli odhindji nolya pingenwa po nomadhinasimaneko ngaashi Omuwa nenge Kalunga. Ihe sho Ombiimbeli ya nyolwa petameko, edhina lyaKalunga  olya li mo lwiikando ya thika lwopo 7 000. Jesus okwa li a tseyitha edhina lyaKalunga sho a li ta longo aantu kombinga yaKalunga. — Lesha Johannes 17:26.

Ngaashi he nguka omunahole, ngele Kalunga ta katuka onkatu ohe shi ningi opo tu mone mo uuwanawa tawu kalelele

4. Mbela Jehova oku na ko nasha natse?

Mbela sho tatu mono iihuna kunena osha hala okutya Kalunga ke na ko nasha natse? Aantu yamwe ohaya ti kutya ohe tu makele niiponga nonomaupyakadhi, ihe shika kashi shi shoshili. — Lesha Jakob 1:13.

Kalunga oku ulika kutya okwe tu simaneka sho e tu shita tu na emanguluko lyokuninga omatokolo. Mbela katu na olupandu sho tu na emanguluko lyokuhogolola ngele otwa hala okulongela Kalunga nenge hasho? (Josua 24:15) Ihe aantu yamwe ohaya longitha emanguluko lyawo ya ningile ooyakwawo iinima iiwinayi, naashoka osha ningitha uukolokoshi wu indjipale. Jehova oha kala u uvite nayi ngele aantu taya ningilwa okwaanuuyuuki kwa tya ngaaka. — Lesha Genesis 6:5, 6.

Jehova oKalunga ngoka e na ko nasha natse. Okwa hala tu nyanyukilwe onkalamwenyo. Masiku ite ke etha we aantu ya mone iihuna nota ka hanagula po mboka haya etitha uupyakadhi. Ngashingeyi oku na etompelo ewanawa lyokweetha okumona iihuna ku kale po uule wokathimbo okafupi. MOshileshwa 8 otatu ki ilonga kutya etompelo ndyoka olini. — Lesha 2 Petrus 2:9; 3:7, 13.

5. Ongiini tatu vulu okuhedha lela popepi naKalunga?

Jehova ote tu hiya tu kale hatu popi naye megalikano opo tu vule okuhedha popepi naye. Oku na ko nasha nakehe gumwe gwomutse pauhandimwe. (Episalomi 65:2; 145:18) Okwi ilongekidha oku tu dhimina po. Oha kala e tu wete sho tatu ningi oonkambadhala tu vulike kuye, nonando omathimbo gamwe ohatu nyengwa. Onkee ano, nonando inatu gwanenena otatu vulu okukala tu na ekwatathano lyopothingo naKalunga. — Lesha Episalomi 103:12-14; Jakob 4:8.

Molwaashoka Jehova oye e tu pa omwenyo, oye tu na okukala tu hole unene shi vulithe omuntu kehe. (Markus 12:30) Sho to ulike ohole yoye yokuhola Kalunga okupitila mokwiilonga oshindji kombinga ye nomokulonga shoka ta pula, oto ka hedha popepyeelela naye. — Lesha 1 Timoteus 2:4; 1 Johannes 5:3.