Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Onkundana ombwanawa ya za kuKalunga

 Oshileshwa 4

Jesus Kristus oye lye naanaa?

Jesus Kristus oye lye naanaa?

Omaukwatya gaJesus geni ga li ga ningitha aantu ya popye naye nuupu?MATEUS 11:29; MARKUS 10:13-16.

1. Onkalamwenyo yaJesus oya li ya tameke ngiini?

Mepingathano naantu ooyakwawo, Jesus okwa kala megulu e li omuntu gwopambepo manga inaa valwa e li omuntu gwopanyama kombanda yevi. (Johannes 8:23) Jesus oye oshishitwa shotango shaKalunga nokwa li a kwathele Kalunga sho ta shiti iinima yilwe ayihe. Oye awike a shitwa kuJehova ye mwene nomolwaashoka ti ithanwa ‘omuvalwa awike’ gwaJehova. (Johannes 1:14) Jesus okwa li Omupopikalelipo gwaKalunga nomolwaashoka ti ithanwa “Ohapu.” — Lesha Omayeletumbulo 8:22, 23, 30; Aakolossa 1:15, 16.

2. Omolwashike Jesus a li e ya kombanda yevi?

Kalunga okwa tumu Omwana kombanda yevi okuza megulu mokulundululila omwenyo gwe moshivalelo shomukadhona Omujuda, Maria. Onkee ano, Jesus ka li e na he gwopanyama. (Lukas 1:30-35) Jesus okwa li e ya kombanda yevi (1) okulonga aantu oshili kombinga yaKalunga, (2) okutula po oshiholelwa mokulonga ehalo lyaKalunga nosho wo (3) okugandja omwenyo gwe gwa gwanenena gu ninge “iikulila.” — Lesha Mateus 20:28, yelekanitha NW.

3. Omolwashike twa pumbwa ekulilo?

Ekulilo olyo ofuto ndjoka hayi futwa opo omuntu ngoka a li e li pokudhipagwa kaa dhipagwe we. (Eksodus 21:29, 30) Eso nosho wo uukulupe kaya li elalakano lyaKalunga lyopetameko li na ko nasha naantu. Otu shi shi ngiini? Kalunga okwa li a lombwele omulumentu gwotango, Adam, kutya ngele okwa ningi shoka Ombiimbeli tayi shi ithana kutya “uulunde,” okwa li ta ka sa. Ando Adam okwa li inaa yona, ando sigo onena ina sa. (Genesis 2:16, 17; 5:5) Ombiimbeli oya ti kutya, eso olye “etwa” maantu kuAdam. Kungawo, Adam okwa taambekidha uulunde koluvalo lwe aluhe nosho wo ondjambi yuulunde, ano eso. Otwa pumbwa ekulilo opo tu kulilwe mo meso ndyoka twa thigulula kuAdam. — Lesha Aaroma 5:12; 6:23.

 Olye a li ta ka futa iikulila opo e tu mangulule mo meso? Ngele twa si, ohatu futile po owala uulunde wetu yene. Kapu na omuntu inaa gwanenena ta vulu okufutila po oondjo dhayalwe. — Lesha Episalomi 49:7-9.

4. Jesus okwa sile shike?

Jesus ine tu fa molwaashoka okwa li a gwanenena. Onkee ano ka li a gwana okusa omolwoondjo dhe mwene, molwaashoka ka li a longa uulunde washa. Pehala lyaashono, Jesus okwa li a si omolwoondjo dhayalwe. Kalunga okwa li u ulukile aantu ohole ye onene sho a tumu Omwana opo e ye a se pehala lyetu. Jesus okwa li wo u ulike kutya oku tu hole sho a vulika kuHe e ta gandja po omwenyo gwe omolwoondjo dhetu. — Lesha Johannes 3:16; Aaroma 5:18, 19.

5. Jesus ota ningi shike ngashingeyi?

Sho a li kombanda yevi, Jesus okwa li a aludha aavu, a yumudha aasi, nokwa li a hupitha aantu mboka ya li moonkalo dha nika oshiponga. Kungawo okwa li u ulike shoka ta ka ningila aantu aavuliki monakuyiwa. (Mateus 15:30, 31; Johannes 5:28) Konima sho Jesus a si, Kalunga okwe mu yumudha e li omuntu gwopambepo. (1 Petrus 3:18) Opo nduno Jesus okwa kala a tegelela kolulyo lwaJehova Kalunga sigo te mu pe oonkondo dhokupangela ombanda yevi ayihe e li Omukwaniilwa. (Aahebeli 10:12, 13) Ngashingeyi Jesus ota pangele e li Omukwaniilwa megulu naalanduli ye kombanda yevi otaya tseyitha onkundana ombwanawa muuyuni auhe. — Lesha Daniel 7:13, 14; Mateus 24:14.

Masiku Jesus ota ka longitha oonkondo dhe e li Omukwaniilwa a hulithe po omaupyakadhi agehe nosho wo mboka haye ga etitha. Aantu omamiliyona mboka ye na eitaalo muJesus nohaya vulika kuye otaya ka nyanyukilwa onkalamwenyo moparadisa kombanda yevi. — Lesha Episalomi 37:9-11.

 

 

Tseya oshindji

Omalongo gashili gOmbiimbeli ogeni naanaa?

Ekulilo olyo omagano ge li dhingi ga za kuKalunga

Ekulilo oshike? Ongiini to vulu okumona mo uuwanawa mulyo?