Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Onkundana ombwanawa ya za kuKalunga

 Oshileshwa 12

Oshike tashi vulu oku ku kwathela wu hedhe popepi naKalunga?

Oshike tashi vulu oku ku kwathela wu hedhe popepi naKalunga?

1. Mbela Kalunga oha pulakene kukehe ngoka ta galikana?

Kalunga ota hiya aantu yomiigwana ayihe ya hedhe popepi naye okupitila megalikano. (Episalomi 65:2) Ihe nonando ongawo iha pulakene komuntu kehe ngoka ta galikana. Pashiholelwa, otashi vulika a kale inaa pulakena komagalikano gomusamane ngoka ha ningi nayi omukulukadhi gwe. (1 Petrus 3:7) Oshikwawo, sho Aaisraeli ya li inaaya hala okweetha po okulonga uuwinayi, Kalunga ka li a pulakene komagalikano gawo. Osha yela kutya otu na okukala twa lenga uuthembahenda mboka tu na wokugalikana. Kakele kaashono, Kalunga oha pulakene nokuli nokomagalikano gaamboka ya yona sha kwata miiti ngele oye etha po iilonga mbyoka iiwinayi. — Lesha Jesaja 1:15; 55:7.

2. Otu na okugalikana ngiini?

Egalikano oli li oshitopolwa shelongelokalunga lyetu, nomolwaashono tu na okugalikana owala kOmushiti gwetu, Jehova. (Mateus 4:10; 6:9) Oshikwawo, molwaashoka inatu gwanenena otu na okugalikana okupitila muJesus molwaashoka okwa li a si omolwoondjo dhetu. (Johannes 14:6) Jehova ina hala tu kale tu shi omagalikano momutse noku ga endulula nenge tu kale twe ga nyola. Okwa hala tu kale hatu galikana tashi zi komutima. — Lesha Mateus 6:7; Aafilippi 4:6, 7.

Omushiti gwetu oha vulu nokuli noku tu uva ngele tatu galikana momutima. (1 Samuel 1:12, 13) Okwa hala tu kale hatu galikana aluhe, ngaashi ngele tatu penduka nenge tatu ka lala, ngele tatu li, nongele tu na uupyakadhi. — Lesha Episalomi 55:22; Mateus 15:36.

3. Omolwashike Aakriste haya gongala pamwe?

Okuhedha popepi naKalunga kaku shi oshinima oshipu okuninga molwaashoka otu li mokati kaantu mboka inaayi itaala muKalunga nosho wo mboka haya sheke shoka Kalunga u uvaneka kombinga yombili ndjoka tayi ka kala kombanda yevi. (2 Timoteus 3: 1, 4; 2 Petrus 3:3, 13) Onkee ano, otwa pumbwa okukala hatu endathana nooitaali ooyakwetu opo tu ladhipikathane. — Lesha Aahebeli 10:24, 25.

Okweendathana naamboka ye hole Kalunga ohaku tu kwathele tu hedhe popepi naye. Oto vulu okutsuwa omukumo kuyalwe omolweitaalo lyawo ngele owa kala ho kala pokugongala kwOonzapo dhaJehova. — Lesha Aaroma 1:11, 12.

4. Oshike tashi vulu oku ku kwathela wu hedhe popepi naKalunga?

Ngele owa kala ho tedhatedha kwaashoka wi ilonga mOohapu dhaJehova Kalunga oto ka vula okuhedha popepi naye. Dhiladhila kwaashoka to vulu okwiilonga kiilonga yomake ge, komayele ge nosho wo komauvaneko ge. Okutedhatedha pamwe negalikano otaku tu ningitha tu kale tu na olupandu omolwohole yaKalunga nomolwuunongo we. — Lesha Josua 1:8; Episalomi 1:1-3.

Oto vulu owala okuhedha popepi naKalunga ngele owa kala we mu inekela nowu na eitaalo muye. Ihe eitaalo olya fa oshinima shi na omwenyo shoka sha pumbwa okukala tashi pewa iikulya. Owu na okukala aluhe ho palutha eitaalo lyoye mokukonakona ekankameno lyiinima mbyoka wi itaala. — Lesha Mateus 4:4; Aahebeli 11:1, 6.

5. Uuwanawa washike to ka mona ngele owa hedha popepi naKalunga?

Jehova oku na ko nasha naamboka ye mu hole. Ota vulu oku ya gamena kukehe shimwe shoka tashi vulu okutula eitaalo lyawo moshiponga nosho wo etegameno lyawo lyomwenyo gwaaluhe. (Episalomi 91:1, 2, 7-10) Ohe tu londodha tu kotokele iinima monkalamwenyo mbyoka tayi vulu okutula moshiponga uukolele wetu notayi vulu oku tu ningitha tu kanithe enyanyu lyetu. Jehova ohe tu longo nkene tu na okukala nonkalamwenyo ya dhenga mbanda. — Lesha Episalomi 73:27, 28; Jakob 4:4, 8.