Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Omayamukulo gomapulo omulongo ngoka aagundjuka haya pula

 EPULO 2

Omolwashike handi ipula unene neholokopo lyandje?

Omolwashike handi ipula unene neholokopo lyandje?

OMOLWASHIKE SHA SIMANA OKWIIPULA NGAWO?

Opu na iinima yimwe ya simana yi vule eholokopo lyoye.

OTO KA NINGA PO SHIKE?

Dhiladhila konkalo ndjika: Uuna Julia ti itala moshisipili oha kala owala e wete o ondoka noonkondo. Nonando aavali ye nosho wo ookuume ke oye mu lombwele kutya okwa nanga noonkondo, ohi ipopile ta ti: “Onda pumbwa okunanga.”

Julia okwa kala nokuli ti ipula a katuke oonkatu dha kwata miiti, opo a kuthe ko ookilograma 2 lwaampono koshiviha she. Shoka a pumbwa okuninga okukala owala itaa li sha uule womasiku gontumba . . .

Ngele oho kala wu uvite ngaashi Julia, oshike wu na okuninga po?

MWENA PO E TO DHILADHILA

Omukalo moka ho kala wi itala ko otagu vulu okukala gwa fa to itala moshisipili sha pilama

Inashi puka okukala to ipula kombinga yeholokopo lyoye. Ombiimbeli oya popya nokuli kombinga yaalumentu naakiintu oyendji mboka ya li ye na eholokopo ewanawa, ngaashi Sara, Rakel, Abigajil, Josef naDavid. Oya popya wo kutya omukiintu gwedhina Abishag okwa li “a shitika” noonkondo. — 1 Aakwaniilwa 1:4.

Nonando ongawo, aagundjuka oyendji ohaya kala tayi ipula sha pitilila kombinga yankene taya monika. Shoka ohashi ke eta omaupyakadhi ogendji. Tala kwaashoka sha monika po momakonakono taga landula:

  • Ekonakono limwe olya ti kutya oopelesenda 58 dhaakadhona odha ti kutya odho ondoka, ihe paushili wo wene, oopelesenda owala 17 dhomuyo dha li dho ondoka shili.

  • Ekonakono limwe olya ti kutya aakiintu ye thike poopelesenda 45 mboka ya li ya nanga noonkondo, oya li taya dhiladhila kutya oyo ondoka unene.

  • Aagundjuka oyendji mboka ya kambadhala okuninga aashona molutu, oya ka kwatwa komukithi hagu ithanwa anorexia, ngoka hagu ningitha omuntu a kale kee na ehalo lyokulya nandonando.

 Ngele owu na omandhindhiliko gomukithi gwo-anorexia nenge gulwe ngoka gwa faathana nago, ka konge ekwatho. Oto vulu oku shi lombwela omuvali gwoye nenge omukuluntu gulwe ngoka wi inekela. Ombiimbeli otayi ti: “Kuume oku na ohole aluhe, nomumwayina okwa valwa, opo a kwathe moluhepo.” — Omayeletumbulo 17:17.

UUKWATYA WOMENI OWO WA SIMANA

Uukwatya womeni owo hawu ningitha omuntu a kale omwaanawa nenge omwiinayi. Natu tale koshiholelwa shaAbsalom, omwanamati gwomukwaniilwa David. Ombiimbeli otayi ti:

“MuIsrael kamwa li nando omuntu a simana a shitika ngaashi Absalom; ka li e na oshipwe.” — 2 Samuel 14:25.

Nonando Absalom okwa li a shitika, okwa li e na uuntsa, i iholele pombanda noku na iihelele. Ombiimbeli itayi mu popile nando muuwanawa. Otayi popi kutya ka li omudhiginini, ye okwa li ha dhipaga aantu omolwuutondwe.

Ombiimbeli otayi tu pe omayele ngaka taga ti:

‘Zaleni omuntu omupe.’ — Aakolossa 3:10.

‘Inashi pumbiwa okwiiyopaleka nomaulenga gokombanda, ihe eopalo lyeni nali kale ndyoka lyomeni.’ — 1 Petrus 3:3, 4.

Nonando inashi puka okukala wa hala okukala to monika nawa, omaukwatya goye ogo ga simana ge vulithe eholokopo lyoye. Momukokomoko gwethimbo, omaukwatya goye omawanawa ogo tage ke ku ningitha wu kale omuntu omwaanawa kuyalwe. Shoka oshi vulithe okukala wu na olutu lwa pama nenge oluwanawa. Omukadhona gwedhina Phylicia okwa ti: “Uuwanawa womoshipala ohawu fuula omuntu nziya, ihe uuntu woye womeni nomaukwatya goye omawanawa ogo aantu taya kala haya dhimbulukwa aluhe.”

OKUTALA KUNKENE HO MONIKA

Mbela oho kala wu uvitile nayi eholokopo lyoye?

Mbela opu na esiku wa li to dhiladhila wu mone etando lyokuninga olutu lwoye lu kale talu monika nawa, nenge wu kale owala ando ho li iikulya yontumba, opo wu nange?

Ando owa li to vulu okulundulula eholokopo lyoye, ando oto lundulula shike? (Hogolola iinima mbyoka wa hala okulundulula.)

  • OMUTHIKA

  • OSHIVIHA

  • EFUFU

  • OLUTU

  • OSHIPALA

  • OLWAALA LWOYE

Ngele eyamukulo lyoye komapulo gaali gotango oeeno nowa hogolola iinima itatu nenge yi vulithe po pepulo etitatu, dhiladhila kwaashika: Otashi vulika aantu ihaaya kala ye wete wu na eholokopo ewinayi ngaashi ngoye we li tala ko. Osha yela kutya oshipu okukala ho ipula sha pitilila kombinga yeholokopo lyoye. — 1 Samuel 16:7.