Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Longa aamwoye

 OSHILESHWA 2

Rebekka okwa li a hala okunyanyudha Jehova

Rebekka okwa li a hala okunyanyudha Jehova

Rebekka okwa li omukiintu e hole Jehova. Omusamane gwe okwa li Isak. Naye okwa li e hole Jehova. Rebekka okwa li a tseyathana ngiini naIsak? Okwa li u ulike ngiini kutya okwa hala okunyanyudha Jehova? Ngashingeyi natu ilonge kombinga ye.

Isak okwa li omwana gwaAbraham naSara. Oya li ya kala mevi lyaKaanana, moka aantu ya li ihaaya longele Jehova. Ihe Abraham okwa li a hala omwanamati a hokane omukiintu ngoka ha longele Jehova. Opo nduno, otashi vulika a tumu Elieser, omupiya gwe, a ka kongele Isak omukulukadhi kehala lyedhina Haran hoka kwa kala aanezimo yamwe yaAbraham.

Rebekka okwa li a nyanyukwa okulonga nuudhiginini opo a hugile oongamelo

Elieser okwa yi pamwe naapiya yaAbraham yalwe. Olwa li olweendo olule noonkondo. Oya li ye na oongamelo omulongo dha humbata iikulya nomagano. Elieser okwa li ta ka tseya ngiini kutya omukiintu guni ta ka hogololela Isak? Sho Elieser naapiya yalwe ya thiki puHaran, oya tula pomuthima, oshoka Elieser okwa li e shi shi kutya aantu otaye ke ya nziya okuteka. Okwa galikana kuJehova ta ti: ‘Ngele onda pula omukadhona a pe ndje omeya e ta pe ndje nosho wo oongamelo dhandje, otandi ka tseya kutya omukiintu nguka oye wa hogolola.’

Opo nduno, okwa zi Rebekka, omukadhona omugundjuka, te ya okuteka. Ombiimbeli otayi ti kutya okwa li omukadhona omwaanawa noonkondo. Elieser okwe mu  pula a nwe mo; Rebekka okwa ti: ‘Eewa. Otandi ku pe wu nwe mo notandi pe wo oongamelo dhoye.’ Dhiladhila owala kutya oongamelo dha sa enota ohadhi nu omeya ge thike peni? Onkee ano Rebekka okwa li e na okushuna ko komuthima iikando oyindji. Mbela owu mu wete methano sho ta longo nuudhiginini?—  Elieser okwa li a kuminwa omukalo moka Jehova a li a yamukula egalikano lye.

Elieser okwa li a pe Rebekka omagano ogendji omawanawa. Rebekka okwi ithana Elieser naapiya ooyakwawo kaandjawo. Elieser okwa hokolola kutya Abraham okwe mu tumine shike nankene Jehova a yamukula egalikano lye. Aakwanezimo yaRebekka oya li ya nyanyukwa oku mu gandja a hokanwe kuIsak.

Rebekka okwa yi pamwe naElieser kuKaanana e ta hokanwa kuIsak

Sho to tala, Rebekka okwa li ngaa a hala a hokanwe kuIsak?—  Rebekka okwa li e shi shi kutya Elieser okwa li a tumwa kuJehova. Sho yaandjawo ye mu pula ngele okwa hala okuya kuKaanana a ka hokanwe kuIsak, Rebekka okwa ti: ‘Eeno, otandi yi.’ Pethimbo opo tuu mpoka oya yi pamwe naElieser. Sho a thiki muKaanana, oya hokana naIsak.

Molwaashoka Rebekka okwa li a ningi shoka Jehova a li a hala a ninge, Jehova okwe mu yambeke. Konima yoomvula odhindji, Jesus okwa ka za mezimo lye. Ngele owa holele Rebekka nokunyanyudha Jehova, nangoye ote ke ku yambeka..

LESHA MOMBIIMBELI YOYE

  • Genesis 12:4, 5; 24:1-58, 67