Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Longa aamwoye

 OSHILESHWA 11

Oya nyola kombinga yaJesus

Oya nyola kombinga yaJesus

Aalumentu mboka ye li methano owu ya wete?—  Oyo Mateus, Markus, Lukas, Johannes, Petrus, Jakob, Judas naPaulus. Aalumentu ayehe mbaka oya li ko pethimbo limwe naJesus noya li ya nyola kombinga yaJesus. Natu ilonge oshindji kombinga yawo.

Oshike wu shi kombinga yaalumentu mbaka?

Yatatu yomuyo oya li aayapostoli mboka ya li haya uvitha pamwe naJesus. Owu shi kutya oolye?—  OMateus, Johannes naPetrus. Mateus naJohannes oya li ye shi Jesus nawanawa, noya li ya nyola kombinga ye. Omuyapostoli Johannes  okwa li wo a nyola embo lyEhololo noontumwafo ndatu hadhi ithanwa, Johannes gwotango, Johannes omutiyali naJohannes omutitatu. Omuyapostoli Petrus okwa li a nyola oontumwafo mbali ndhoka dhi li mOmbiimbeli. Ohadhi ithanwa, Petrus gwotango naPetrus omutiyali. Montumwafo ye ontiyali, Petrus okwa li a nyola kombinga yesiku ndyoka Jehova a li a popi kombinga yaJesus okuza megulu ta ti: ‘Nguka oye Omumwandje. Ondi mu hole nonde mu hokwa.’

Aalumentu yalwe mboka ye li methano nayo otaye tu longo sha kombinga yaJesus okupitila momambo ngoka ya nyola. Gumwe gwomuyo oMarkus. Otashi vulika opo a li sho Jesus ta kwatwa po, nokwa li a mono ashihe shoka sha ningwa po. Omukwawo oLukas. Okwa li ondohotola yopaunamiti notashi vulika a li a ningi Omukriste konima yeso lyaJesus.

Aanyoli yaali yalwe mboka wu wete methano aamwayina yaJesus. Owu shi omadhina gawo?—  Oyo Jakob naJudas. Petameko kaya li yi itaala muJesus. Oya li taya dhiladhila nokuli kutya ota yi oonkwengu. Ihe konima oye ki itaala muJesus e taya ningi Aakriste.

Omunyoli gulwe gwOmbiimbeli ngoka wu wete methano oPaulus. Manga inaa ninga Omukriste, edhina lye olya li Saulus. Okwa li e tonde Aakriste nokwa li he ya ningi onyanya. Ihe mbela owu shi kutya oshike sha ningitha Paulus a ninge Omukriste?—  Esiku limwe Paulus okwa li te ende mondjila, ohaluka oku uvu ewi tali popi naye okuza megulu. OJesus a li ta popi naye. Okwa pula Paulus a ti: ‘Omolwashike to ningi mboka yi itaala ndje onyanya?’ Okuza mpoka, Paulus okwa lunduluka e ta ningi Omukriste. Okwa ka nyola omambo gOmbiimbeli 14, okuza mAaroma sigo okAahebeli.

Esiku kehe ohatu lesha Ombiimbeli, hasho mbela?— Sho tatu lesha Ombiimbeli ohatu ilongo oshindji kombinga yaJesus. Mbela owa hala okwiilonga oshindji kombinga yaJesus?— 

LESHA MOMBIIMBELI YOYE

  • 2 Petrus 1:16-18

  • Markus 3:21; 14:51

  • Judas 1

  • Iilonga 9:1-18