Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Longa aamwoye

 OSHILESHWA 10

Jesus okwa li aluhe ha vulika

Jesus okwa li aluhe ha vulika

Mbela oshipu aluhe okuvulika kaavali yoye?—  Omathimbo gamwe oshidhigu. Mbela owu shi ngaa kutya Jesus okwa li ha vulika kuJehova nokaavali ye?—  Oshiholelwa she otashi vulu oku ku kwathela wu kale ho vulika kaavali yoye nokuli nuuna kaashi shi oshipu. Natu ilonge oshindji kombinga yaashika.

Manga Jesus inee ya kombanda yevi, okwa li puHe, Jehova, megulu. Ihe okwa li wo e na aavali huka kombanda yevi. Oyo ooJosef naMaria. Mbela owu shi kutya oshe ende ngiini opo ya kale aavali ye?— 

Jehova okwa li a kutha omwenyo gwaJesus megulu e te gu tula mepunda lyaMaria, opo Jesus a vule okuvalelwa kombanda yevi. Shika osha li sha ningwa pashikumithalonga. Jesus okwa li a kokele mela lyaMaria ngaashi naanaa uuhanona wulwe hawu kokele momala gooyina. Konima yoomwedhi omugoyi lwaampono, Jesus okwa valwa. Ano osho she ende ngawo, opo Maria nomusamane gwe, Josef, ya ninge aavali yaJesus yokombanda yevi.

Sho Jesus a li e na oomvula 12, okwa li a ningi oshinima shoka sha li shu ulike kutya oku hole He, Jehova, shi thike peni. Shika osha li sha ningwa manga ya li molweendo olule okuya kuJerusalem koshituthi shOpaasa. Sho taya galuka, Josef naMaria kaya li ye wete Jesus mpoka e li. Owu shi kutya okwa li e li peni?— 

Omolwashike Jesus a li potempeli?

Josef naMaria oya shuna kuJerusalem nziyanziya e taya tameke okukonga Jesus kehe pamwe. Oya li ya tila oshoka kaya li ye mu wete. Ihe konima yomasiku gatatu oye mu adha motempeli. Mbela owu shi kutya omolwashike Jesus a li motempeli?—  Omolwaashoka omo a li ta vulu okwiilonga kombinga yaHe, Jehova. Okwa li e hole Jehova nokwa li a hala okwiilonga nkene ta vulu oku Mu nyanyudha. Jesus okwa li aluhe ha vulika kuJehova, nokuli naasho a ningi omukuluntu. Okwa li a vulika nonando osha li oshidhigu nokwa li e na okumonithwa iihuna. Mbela Jesus okwa li ngaa ha vulika kuJosef naMaria?—  Eeno, Ombiimbeli osho tayi ti.

Oshike to ilongo moshiholelwa shaJesus?— Owu na okuvulika kaavali yoye, nonando oshi kale oshidhigu. Mbela osho to ka ninga?— 

LESHA MOMBIIMBELI YOYE

  • Lukas 1:30-35; 2:45-52

  • Aaefeso 6:1

  • Aahebeli 5:8