Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Longa aamwoye

 OSHILESHWA 6

David ka li ha tila

David ka li ha tila

Oho ningi ngiini uuna wa tila?—  Otashi vulika ho yi kumeme nenge kutate. Ihe opu na ishewe gumwe ngoka ta vulu oku ku kwathela. Oku na oonkondo e vule omuntu kehe. Mbela owu shi kutya olye?—  Eeno, oJehova Kalunga. Natu popye kombinga yomulumentu gumwe omugundjuka gwomOmbiimbeli gwedhina David. David okwa li aluhe e shi kutya Jehova ote ke mu kwathela, onkene ka li ha tila.

Okuza manga David a li okanona, aavali ye oya li ye mu longo okukala e hole Jehova. Shika osha li she mu kwathele kaa kale a tila nokuli nuuna pu na sha tashi mu tilitha. Okwa li e shi shi kutya Jehova Okuume ke nonokutya Ote ke mu kwathela. Oshikando shimwe manga David a li ta litha oonzi, opwe ya onime onene noya ndjindji po onzi. Mbela owu shi kutya David okwa ningi po shike? Okwe yi tidha e te yi dhipaga, tashi vulika nokuli niikaha yowala. Nopo nduno sho emwanka lya li lya ponokele oonzi, David okwa li e li dhipaga wo. Mbela oto dhiladhila kutya olye a li a kwathele David?—  Eeno, oJehova.

Opwa li wo ethimbo limwe David a li u ulike uupenda momukalo gwi ikalekelwa. Aaisraeli oya li taya kondjitha Aafilisti. Gumwe gwomAafilisti okwa li omulumentu omuleeleka, omutongolume. Edhina lye oGoliat. Omutongolume nguka okwa li ta sheke aakwiita Aaisraeli nosho wo Jehova. Goliat okwa li a shongo aakwiita Aaisraeli ye ye ya kondje naye. Ihe Aaisraeli ayehe oya li ya tila oku mu kondjitha. Sho David e shi uvu, okwa lombwele Goliat a ti: ‘Otandi ka kondja nangoye. Jehova ota ka kwatha ndje ndi ku sinde.’ Mbela oto dhiladhila kutya David okwa li ependa?—  Eeno, okwa li. Mbela owa hala okutseya kutya oshike sha ka ningwa po ishewe?

David okwa kutha oshuumbitho she nomamanya gatano gothethengele e ta yi a ka kondjithe omutongolume. Sho Goliat a mono kutya David okamatyona kowala, okwe mu sheke. Ihe David okwe mu lombwele a ti: ‘Oto ya wu kondjithe ndje wu na egongamwele, ihe ngame otandi ku kondjitha medhina lyaJehova.’ Opo nduno  okwa tula emanya moshidhaadhigitho she, e ta matuka u uka kuGoliat nokwe li mu dhaadhiga. Emanya olya dhenge Goliat mombamba yoshipala. Omutongolume okwi ihata po e ta si. Aafilisti oya tila e taya fadhuka po. Mbela ongiini okamati okagundjuka, David, ka vulu okusinda omutongolume?—  Jehova oye a li e mu kwathele, na Jehova okwa li e na oonkondo e vule omutongolume.

David ka li a tila, oshoka okwa li e shi shi kutya Jehova ote ke mu kwathela

Mbela oshike to ilongo mehokololo lyaDavid?—  Jehova oku na oonkondo e vule kehe gumwe. Noku li Kuume koye. Ano ngele wu uvite wa tila, dhimbulukwa kutya Jehova ota vulu oku ku kwathela wu kale wa pendapala.

LESHA MOMBIIMBELI YOYE

  • Episalomi 56:3, 4

  • 1 Samuel 17:20-54