Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 16

‘Longa shoka shu uka’ sho to ende pamwe naKalunga

‘Longa shoka shu uka’ sho to ende pamwe naKalunga

1-3. (a) Otu na ongunga yashike kuJehova? (b) Omuhupithi gwetu omunahole ota pula shike kutse?

NATU tye nduno owu li mosikepa yi li pokuningina. Omanga owala to dhiladhila kutya kapu na we etegameno lya sha, opwe ya omuhupithi e te ku kwathele. Ito ka kala tuu wu uvite nawa ngele omuhupithi ngoka e ku kutha moshiponga ta ti: “Ngashingeyi owa gamenwa.” Mbela ito ka kala wu uvite wu na ongunga yoku mu pandula? Otaku vulu okutiwa owu na ongunga ye molwaashoka a hupitha omwenyo gwoye.

2 Shika osha faathana naashoka Jehova e tu ningila. Otu na ongunga yoku mu pandula. Okwe tu pa ekuliloyambo, opo tu vule okuhupithwa muupika wuulunde neso. Otu uvite twa gamenwa okutseya kutya shampa owala tu na eitaalo tali longo mekuliloyambo, otatu ka dhiminwa po, nonakuyiwa yetu yaaluhe otayi ka kala ya gamenwa. (1 Johannes 1:7; 4:9) Ngaashi twe shi mona mOntopolwa 14, ekuliloyambo oli li euliko dhingi lyohole nuuyuuki waJehova. Shika oshi na oku tu inyengitha tu ninge shike?

3 Oshi li nawa okukonakona shoka Omuhupithi gwetu omunahole a hala tu ninge. Jehova okwe shi popya okupitila momupolofeti Mika a ti: “OMUWA okwe tu lombwele shoka shu uka. Shoka te tu pula, osho okulonga shoka shu uka, oku mu ulukila ohole yashili nokukala muukumwe nomeifupipiko naKalunga ketu.” (Mika 6:8) Ndhindhilika kutya shimwe shomiinima mbyoka ta pula kutse osho “okulonga shoka shu uka.” Ongiini tatu vulu oku shi ninga?

Lalakanena “uuyuuki”

4. Otu shi shi ngiini kutya Jehova okwa hala tu kale metsokumwe nomithikampango dhe dhuuyuuki?

4 Jehova okwa hala tu kale metsokumwe nomithikampango  dhe dhaashoka shi li mondjila naashoka sha puka. Molwaashoka omithikampango dhe odhi li pauyuuki, otu na okulalakanena uuyuuki mokuvulika kudho. Jesaja 1:17 ota ti: “Ne mu ilonge okulonga uuwanawa. Seni oshimpwiyu shuuyuuki.” Oohapu dhaKalunga otadhi tu ladhipike tadhi ti: “Longeni shoka shu uka.” (Sefanja 2:3) Otadhi tu ladhipike wo tu ‘zale omuntu omupe ngoka a shitwa a fa Kalunga mokukalamwenyo ku uka nokwa yapuka.’ (Aaefeso 4:24) Mboka haya longo shoka shu uka ohaya henuka uukakombwiilitha, onyata yoludhi kehe noluhondelo molwaashoka otayi nyateke shoka oshiyapuki.—Episalomi 11:5; Aaefeso 5:3-5.

5, 6. (a) Omolwashike okukala metsokumwe nomithakampango dhaJehova kaaku shi okudhigu? (b) Ombiimbeli oyu ulika ngiini kutya okukonga uuyuuki oshinima tashi tsikile?

5 Mbela oshi li oshidhigu kutse okuvulika komithikampango dhaJehova dhuuyuuki? Aawe. Omuntu ngoka e na ekwatathano lyopothingo naJehova ita ka mona iitegelelwa ye iidhigu. Molwaashoka otu mu hole nosho wo omaukwatya ge, otwa hala oku mu nyanyudha monkalamwenyo yetu. (1 Johannes 5:3) Dhimbulukwa kutya Jehova ‘oku hole iilonga iiwanawa.’ (Episalomi 11:7) Ngele otatu holele shili uuyuuki wopakalunga, otu na okukala tu hole shoka Jehova e hole nokutonda shoka e tonde.—Episalomi 97:10.

6 Oshidhigu kaantu inaaya gwanenena okulalakanena uuyuuki. Otu na okwiihula omuntu omukulu niilonga ye yuulunde nokuzala omuntu omupe. Ombiimbeli otayi ti kutya omuntu omupe okwa ‘shitululwa’ okupitila montseyo yashili. (Aakolossa 3:9, 10) Oshitya ‘okushitululwa’ otashi ulike kutya okuzala omuntu omupe oshinima tashi tsikile notashi pula oonkambadhala dha mana mo. Omathimbo gamwe ohatu kambadhala ngaashi tatu vulu okulonga shoka shu uka, ihe ohatu puka olundji mokudhiladhila, moohapu nomiilonga omolwokwaahagwanenena.—Aaroma 7:14-20; Jakob 3:2.

7. Otu na okutala ko ngiini iinima mbyoka tayi tu imbi tu ninge oonkambadhala dhokulalakanena uuyuuki?

7 Otu na okutala ko ngiini iinima mbyoka tayi tu imbi tu  ninge oonkambadhala dhokulalakanena uuyuuki? Odhoshili kutya inatu hala okutala ko uulunde wu li oshinima inaashi kwata miiti. Ihe katu na okusholola nokukala tu uvite kutya inatu gwana okulongela Jehova omolwomapuko ngoka twa ninga. Okwa ninga po elongekidho opo a dhimine po mboka tayi iyele ombedhi shili. Tala oohapu dhomuyapostoli Johannes ndhoka tadhi tu shilipaleke tadhi ti: “Otandi mú nyolele oohapu ndhika, opo mwaa yone.” Okwa gwedha ko ishiwe a ti: “Ihe ngele ku na ngoka a yono, [omolwokwaahagwanenena] nena otu na Omupopili Kristus, omuyuuki ngoka te tu galikanene puTate.” (1 Johannes 2:1) Eeno, Jehova okwa gandja Omwana e li ekuliloyambo opo tu vule oku Mu longela nonando otu li aalunde. Mbela shoka itashi tu inyengitha tu ninge ngaashi tatu vulu tu mu nyanyudhe?

Onkundana ombwanawa nuuyuuki wopakalunga

8, 9. Euvitho lyonkundana ombwanawa otali ulike ngiini uuyuuki waJehova?

8 Otatu vulu okulonga uuyuuki wopakalunga, mokukutha ombinga yu udha mokuuvithila yalwe onkundana ombwanawa yUukwaniilwa waKalunga. Ekwatathano lini li li pokati kuuyuuki waJehova nonkundana ombwanawa?

9 Jehova ita ka hulitha po onkalelo ndjika yuukolokoshi nopwaahe na okulondodha aantu tango. Jesus okwa popi omahunganeko gaashoka tashi ka ningwa pethimbo lyehulilo a ti: “Ihe tangotango elaka etoye oli na okuuvithilwa aantu ayehe.” (Markus 13:10; Mateus 24:3) Oshitya “tangotango” otashi ulike kutya otaku ka landula iiningwanima yilwe keuvitho lyonkundana ombwanawa muuyuni auhe. Iiningwanima mbyoka oya kwatela mo uudhigu uunene mboka wa hunganekwa, shoka tashi ka tya ehanagulo lyaakolokoshi nokonima yaashoka otaku landula uuyuni uupe wuuyuuki. (Mateus 24:14, 21, 22) Onkee ano, kapu na ngoka ta ka pa Jehova uusama omolwehanagulo lyaakolokoshi. Okupitila melondodho ndyoka okwa gandja ompito kaantu ya lundulule oondjila dhawo opo kaaya ka hanagulwe po.—Jona 3:1-10.

Ohatu ulike uuyuuki wopakalunga ngele tatu uvithile yalwe onkundana ombwanawa nopwaahe na ontondo

10, 11. Ongiini okuuvitha onkundana ombwanawa taku ulike kutya otatu longo uuyuuki wopakalunga?

 10 Ongiini okuuvitha kwetu onkundana ombwanawa taku ulike kutya otatu lalakanene uuyuuki wopakalunga? Shotango, oko owala omukalo okukwathela yalwe ya ka hupithwe. Dhiladhila natango kethaneko kombinga yokuhupithwa mosikepa yi li pokuningina. Ngele owu li mowato yokuhupitha, oto ka kala wa hala okukwathela yakweni mboka taya hala okusa omeya. Sha faathana, otu na oshinakugwanithwa okuuvithila mboka taya kondjo momeya gopathaneko muuyuni mbuka wa yonana. Oyendji kaye na ko nasha netumwalaka lyetu. Ihe ngele Jehova ota tsikile okwiidhidhimika otu na oshinakugwanithwa shoku ya kwathela ye “ethe uulunde wawo,” naashoka otashi ka tya ehupitho kuyo.—2 Petrus 3:9.

11 Ngele tatu uvithile ayehe mboka tatu tsakaneke onkundana ombwanawa, otatu ulike uuyuuki momukalo gwa simana kutya katu na okatongo. Dhimbulukwa kutya “Kalunga aantu ayehe ohe ya tala ye thike pamwe. Ngoka he mu tila noha longo shoka shu uka, Kalunga ote mu taamba, na kale ogwomoshigwana sha tya ngiini.” (Iilonga 10:34, 35) Ngele otwa hala okukala aayuuki ngaashi ye, katu na okukala nokatongo. Pehala lyaashono, otu na okuuvithila yalwe nopwaahe na okutala komuhoko, uulipamwe nenge kiiniwe yawo. Kungawo, otatu ka kwathela ayehe mboka taya pulakene yu uve onkundana ombwanawa noye yi taambe ko.—Aaroma 10:11-13.

Nkene tu na okuungaunga nayalwe

12, 13. (a) Omolwashike kaatu na okukala tu hole okupangula yalwe? (b) Jesus okwa li a hala okutya ngiini sho a ti kutya “inamu pangula” nosho wo “inamu tokola”? (Tala wo enyolo lyopevi.)

12 Otu na wo okuulika uuyuuki mokuungaunga nayalwe, ngaashi Jehova hu ungaunga natse. Oshipu lela okupangula yalwe, okukonenena omapuko gawo nokukala twa limbililwa komainyengotompelo gawo. Olye gwomutse a hala Jehova a konenene omainyengotompelo getu nosho wo okwaahagwanenena kwetu kee na ohenda? Jehova hasho hu ungaunga natse ngaaka. Omupisalomi okwa ti: “OMUWA, ngele to kala  nokudhimbulukwa oondjo, olye ta vulu okukala po?” (Episalomi 130:3) Mbela katu uvite nawa sho Kalunga ketu omuyuuki nomunamutimahenda ihaa konenene omayono getu? (Episalomi 103:8-10) Otu na okuungaunga ngiini nayalwe?

13 Ngele otwa pandula uuyuuki waKalunga, itatu ka pangula yalwe miinima mbyoka inaayi tu pamba nenge kaayi na oshilonga. MEuvitho lye lyokOndundu, Jesus okwa londodha a ti: “Inamu pangula yakweni, opo Kalunga kee mú pangule.” (Mateus 7:1) Pahokololo lyaLukas, Jesus okwa gwedha ko a ti: “Inamu tokola, opo Kalunga kee mú tokole.” * (Lukas 6:37) Jesus okwa li e shi ulike kutya aantu inaaya gwanenena oye hole unene okupangulathana. Kehe gumwe gwomaapulakeni ye ngoka e hole oku shi ninga okwa li e na oku shi etha po.

14. Omolwomatompelo geni kaatu na “okupangula” yalwe?

14 Omolwashike kaatu na “okupangula” yalwe? Etompelo limwe olyo kutya oonkondopangelo dhetu odha ngambekwa. Omulongwa Jakob ote tu dhimbulukitha ta ti kutya Jehova “oye omugandjimpango nomupanguli.” Jakob okwa pula a ti: “Ongoye lye ano, u vule okupangula mukweni?” (Jakob 4:12; Aaroma 14:1-4) Natango, omolwokwaahagwanenena kwetu oshipu kutse okupangula kaashi li pauyuuki. Aantu otu na unene iikala nomainyengotompelo gokukala nokatongo, uuntsa wa pitilila, ondumbo nokukala twi ishi uuyuuki mbyoka tayi vulu oku tu ningitha tu tale ko yalwe nayi. Otu na ishewe omangambeko galwe, nongele tatu dhiladhila kugo otashi ke tu kwathela tu yande okukala hatu gandja unene eitulomo komapuko gayalwe. Ihatu vulu okumona shoka shi li momitima dhayalwe noihatu vulu okutseya oonkalo dhawo adhihe dhopaumwene. Mbela otse oolye opo tu kale tatu fekelele ooitaali ooyakwetu omainyengotompelo ga puka nenge tu simonone  oonkambadhala ndhoka taya ningi mokulongela Kalunga? Kashi li tuu nawa okuholela Jehova mokukala hatu gandja eitulomo komaukwatya omawanawa gaamwatate naamwameme, pehala lyokugandja eitulomo komapuko gawo.

15. Aalongelikalunga oye na okuyanda okupopya oohapu dhini nokuungaunga naantu ngiini, nomolwashike?

15 Otu na okuungaunga ngiini niilyo yomaukwanegumbo getu? Shinikitha oluhodhi, kunena momagumbo moka ando mu na okukala ombili, omo unene aantu taya pangulathana nonyanya. Osha ha okuuva aasamane, aakulukadhi nenge aavali taya hepeke iilyo yomaukwanegumbo gawo nonyanya moku yi ula omalaka omakukutu nenge oku yi ehameka palutu. Aalongelikalunga yashili kaye na okupopya oohapu dha honga, dha lula nokuningathana nayi. (Aaefeso 4:29, 31; 5:33; 6:4) Omayele gaJesus “inamu pangula” ne “inamu tokola” otaga longo wo nomuukwanegumbo. Dhimbulukwa kutya  okulonga uuyuuki okwa kwatela mo okuungaunga nayalwe ngaashi Jehova hu ungaunga natse. Ihu ungaunga nando natse nonyanya. Pehala lyaashoka, “omunesilohenda” kwaamboka ye mu hole. (Jakob 5:11) Kashi shi tuu oshiholelwa dhingi shoka tu na okuholela!

Aakuluntugongalo taya longo “nuuyuuki”

16, 17. (a) Jehova okwa tegelela aakuluntugongalo ya ninge shike? (b) Oshike shi na okuningwa uuna omuyoni ini iyela ombedhi lela, nomolwashike?

16 Atuheni otu na oshinakugwanithwa shokulonga uuyuuki, ihe aakuluntugongalo megongalo lyopaKriste oyo unene tuu ye na oku shi ninga. Ndhindhilika oohapu dhaJesaja dhopahunganeko ndhoka tadhi popi ‘omalenga’ nenge aakuluntugongalo tadhi ti: “Talii ko, omukwaniilwa ota ka lela nuuyuuki, nomalenga otaga ka pangula nawalela.” (Jesaja 32:1) Eeno, Jehova okwa hala aakuluntugongalo ya longe pauyuuki. Ongiini taya vulu oku shi ninga?

17 Aalumentu mboka ya pyokoka pambepo oye shi kutya uuyuuki owa pumbiwa megongalo opo li kale lya yela. Ethimbo limwe aakuluntugongalo ohayu ungaunga nomayono ga kwata miiti. Uuna taye shi ningi, oye na okukaleka uuyuuki wopakalunga momadhiladhilo mpoka tashi vulika. Oye na okukwathela ngoka a yona i iyele ombedhi. Ihe ongiini ngele omuyoni ina hala okwiiyela ombedhi lela nonando oya kambadhale oku mu kwathela? Omolwuuyuuki waJehova wa gwanenena oye na okulandula oohapu dhe ndhoka tadhi ti: “Umbii mo omuyoni mokati keni.” Shika otashi ti oku na okukondwa mo megongalo. (1 Aakorinto 5:11-13; 2 Johannes 9-11) Ohashi yemateke aakuluntugongalo okukatuka onkatu ndjoka, ihe oye shi kutya osha pumbiwa opo ya gamene egongalo li kale lya yela pambepo nopamikalo. Ihe nonando ongaaka, oye na einekelo kutya omuyoni ngoka ota ka dhimbulukwa okukala kwe e ta galukile kegongalo.—Lukas 15:17, 18.

18. Aakuluntugongalo oye na okudhimbulukwa shike uuna taya gandja kuyalwe omayele ga kankamena kOmbiimbeli?

18 Okulonga pauyuuki osha kwatela mo wo okugandja omayele  ga kankamena kOmbiimbeli uuna sha pumbiwa. Odhoshili kutya aakuluntugongalo ihaya gandja eitulomo komapuko gayalwe noihaya kambadhala okugandja omapukululo ethimbo kehe. Ihe omwiitaali omukwetu ota vulu ‘okugwila meyono lyontumba.’ Aakuluntugongalo oye na okudhimbulukwa kutya uuyuuki wopakalunga owa kwatela mo okukenukila yalwe nokukala ye na ko nasha nayo, onkee ano, oye na ‘oku mu pukulula nonge.’ (Aagalati 6:1) Ihaya nyenyetele omuyoni nenge ye mu ule nayi. Pehala lyaashoka, ohaya gandja omayele pahole okuladhipika ngoka te ga pewa. Uuna taya geele ngoka a yona, taya popi shu ukilila iilanduliko yoonkatu dhe dhaahe li pandunge, oye na okudhimbulukwa kutya omuyoni ngoka onzi yomoshigunda shaJehova. * (Lukas 15:7) Ngele omuyoni okwa geelwa nenge a pewa omayele pahole, otashi vulika i iyele ombedhi.

19. Aakuluntugongalo oye na okuninga omatokolo geni noye na oku ga ninga ya kankamena kushike?

19 Olundji aakuluntugongalo ohaya ningi omatokolo ga guma ooitaali ooyakwawo. Pashiholelwa, omathimbo nomathimbo ohaya kundathana ngele aamwatate yalwe megongalo oya gwana okulangekwa po ye li aakuluntugongalo nenge aayakuligongalo. Oye shi kutya kaye na okukala ye na ontondo ngele taye shi ningi. Ohaya wilikwa kiitegelelwa yopakalunga mokuninga omatokolo gokulangeka po yalwe, ihe ihayi ikolelele komaiyuvo gawo yene. Kaye na okukala ‘nontondo nenge nondhipi mwaayihe mbyoka taya ningi.’—1 Timoteus 5:21.

20, 21. (a) Aakuluntugongalo ohaya kambadhala okukala ngiini, nomolwashike? (b) Oshike aakuluntugongalo taya vulu okuninga ya kwathele mboka “ya polimana”?

20 Aakuluntugongalo ohayu ulike wo uuyuuki wopakalunga  momikalo dhilwe. Konima sho Jesaja e ya lombwele kutya oye na okulonga “nuuyuuki,” okwa tsikile ko a ti: “Omulumentu kehe ota ka kala eshigo lyokushiga ombepo negameno kiikungulu. Otaa ka fa omilonga dhomeya tadhi tondoka mombuga, ya fa omuzile gwetayimanya enenenene mevi lya notelwa.” (Jesaja 32:2) Ohaya kambadhala okuhekeleka nokutalaleka ooitaali ooyakwawo.

21 Aantu oyendji kunena oya pumbwa okutsuwa omukumo molwaashoka oya taalelwa komaupyakadhi ogendji. Oshike aakuluntugongalo taya vulu okuninga ya kwathele mboka “ya polimana”? (Jesaja 61:2, KB) Oye na okupulakena kuyo nolukeno. (Jakob 1:19) Aantu mboka ya polimana ohaya kala ya hala okulombwela gumwe ngoka yi inekela “oshimpwiyu” shomomitima dhawo. (Omayeletumbulo 12:25) Naye ya shilipaleke kutya oya pumbiwa noye na oshilonga nosho wo kutya  Jehova naamwatate naamwameme oye ya hole natango. (1 Petrus 1:22; 5:6, 7) Otaya vulu wo okugalikana pamwe nayo noku ya kwatela momagalikano. Okuuva omukuluntugongalo ta galikana tashi zi komutima omolwawo otashi vulu oku ya hekeleka unene. (Jakob 5:14, 15) Oonkambadhala dhoye dhopahole okukwathela mboka ya polimana odhi wetike kuKalunga kuuyuuki.

Aakuluntugongalo ohayu ulike uuyuuki waJehova uuna taya ladhipike mboka ya teka omukumo

22. Omomikalo dhini tatu vulu okuholela uuyuuki waJehova, noshizemo otashi ka kala shini?

22 Osha yela kutya otatu ka hedha lela popepi naJehova ngele tatu holele uuyuuki we. Uuna tatu dhiginine omithikampango dhuuyuuki we, sho tatu uvithile yalwe onkundana ombwanawa ndjoka tayi hupitha oomwenyo nuuna tatu gandja eitulomo kuuwanawa mboka haya longo, pehala lyokukonenena omapuko gawo, nena otatu ulike uuyuuki wopakalunga. Ngele aakuluntugongalo taya kaleke egongalo lya yela, taya gandja omayele taga tungu gopamanyolo, taya ningi omatokolo nopwaahe na okatongo nosho wo ngele taya ladhipike mboka ya teka omukumo, otayu ulike uuyuuki wopakalunga. Ihashi nyanyudha tuu omutima gwaJehova ngoka e li megulu okutala oshigwana she tashi kambadhala “okulonga shoka shu uka” sho tashi ende pamwe naye!

^ okat. 13 Omatoloko gamwe otaga ti kutya “etheni okupangula” nosho wo “etheni okutokola.” Omatoloko ngoka oga hala okutya “ino tameka okupangula” nosho wo “ino tameka okutokola.” Ihe aanyoli yOmbiimbeli oya longitha omalombweletumbulo metindo ge li menanenathimbo. Onkee ano, oshinima tashi popiwa mpaka otashi ningwa nale, ihe oshi na okuhulithwa po.

^ okat. 18 Ombiimbeli otayi lombwele aakuluntugongalo muTimoteus omutiyali 4:2 kutya oye na ‘okupukulula, okuganda nokukumagidha.’ Oshitya shOshingreka shoka sha tolokwa “kumagidha” osho parakaleo. Oshitya shimwe shOshigreka sha pambathana nasho o-parakletos shoka tashi gandja wo edhiladhilo lyokupopila sha mompangu. Onkee ano, ngele aakuluntugongalo taya gandja egeelo lya kwata miiti, oye na okukwathela mboka ya pumbwa ekwatho lyopambepo.