Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 15

Jesus ota ka “taandelitha uuyuuki kombanda yevi”

Jesus ota ka “taandelitha uuyuuki kombanda yevi”

1, 2. Opompito yini Jesus a li a geya, nomolwashike?

POMPITO yimwe Jesus okwa li a geya, ihe onetompelo ewanawa. Otashi vulika wu dhiladhile kutya ita vulu okugeya, molwaashoka omunambili. (Mateus 21:5) Okwa li ha pangele ongeyo ye nomolwaashono okugeya kwe okwa li pauyuuki. * Ihe oshike sha li sha geyitha omulumentu ngoka e hole ombili? Osha li okwaahenuuyuuki kukenyaneka hoka kwa li taku ningwa.

2 Jesus okwa li e hole noonkondo otempeli yomuJerusalem. Oyo owala ya li ehala eyapuki muuyuni auhe lyokugalikanena He gwomegulu. Aajuda okuza miilongo oyindji oya li haye ende iinano iile ya ka galikane hoka. Mboka haya tila Kalunga kaaye shi Aajuda oya li ye na mo ehala lyawo moka haya galikanene. Petameko lyuukalele we, Jesus okwa yile motempeli nokwa li a kumwa kwaashoka a mono mo. Aantu oya li ye yi ninga ya fa omatala gokulandithila, pehala lyokukala ehala lyokugalikanena. Omwa li mu udha aahalithi naapingakanithi yiimaliwa. Omolwashike taku tiwa kutya shoka ya li taya ningi kashi li pauyuuki? Aantu mboka oya li ya ningi otempeli yaKalunga ehala lyokunyokomena yalwe noku ya yuga. Ngiini mbela?—Johannes 2:14.

3, 4. Aahalithi aanalwiho oya li taya ningile shike motempeli yaJehova, noshike Jesus a li a ningi po?

3 Aawiliki yelongelokalunga oya li ya tula po ompango kutya iimaliwa ingapi yi na okufutwa iifendela yotempeli. Aatalelipo  oya li ye na okupingakanitha iimaliwa yawo opo ya mone iimaliwa mbyoka yi na okufutwa. Aapingakanithi yiimaliwa oya li ya tula iitaafula yawo motempeli mo mwene, noya li taya futitha kehe ngoka ta pingakanitha iimaliwa. Mboka ya li taya landitha iinamwenyo oya li wo ya mono ontanitho oyindji. Aatalelipo mboka ya hala okugandja omafikiloyambo oya li taya vulu okulanda iinamwenyo kehe pamwe moshilando, ihe aayakuli yomotempeli otashi vulika ye yi tinde. Ngele oshinamwenyo osha landwa motempeli osha li hashi taambwa ko nuupu. Omathimbo gamwe aahalithi mboka oya li ya pula ondando yi li pombanda molwaashoka kaya li ye na ohenda. * Aahalithi mboka oya li taya nyokoma aantu noya li ya mono ontanitho oyindji.

‘Kuthii mo iinima mbika ayihe!’

4 Jesus ka li ta vulu okwiidhidhimikila okwaahenuuyuuki hoka, molwaashoka otempeli oya li ongulu yaHe. Okwa tungu ongola yepando nokwa tidha mo oongombe noonzi motempeli. Okwa tilehi iimaliwa niitaafula yawo okwe yi indulile pevi. Dhiladhila owala kiimaliwa ayihe mbyoka ya li ya halakana pevi! Okwa popi nomagandambadhi ta lombwele aalandithi yoonguti ta ti: “Kuthii mo iinima mbika ayihe!” (Johannes 2:15, 16) Osha yela kutya kapwa li gumwe e na uulaadhi okupataneka omulumentu nguka.

Jesus okwa fa He

5-7. (a) Jesus manga inee ya kombanda yevi, onkalamwenyo ye oya li ya nwetha mo ngiini etaloko lye lyuuyuuki, notatu ilongo shike moshiholelwa she? (b) Kristus okwa li a kondjitha ngiini okwaahenuuyuuki hoka kwa kwatela mo uuthemba waJehova wokupangela nedhina lye?

5 Aahalithi oya li ya galukile ishewe motempeli. Konima yomimvo ndatu, Jesus okwa li ishewe u ungaunga nokwaahe na  uuyuuki oko tuu hoka, noshikando shika okwa li a totha moohapu dhaJehova mwene ndhoka tadhi pangula okuninga egumbo Lye “ombogo yaayugi.” (Mateus 21:13; Jeremia 7:11) Eeno, sho Jesus a mono aahalithi aanalwiho taya nyokoma aantu notaya nyateke otempeli yaKalunga, okwa li u uvite naanaa ngaashi He. Shoka itashi kumitha, molwaashoka Jesus okwa kala nokulongwa kuHe gwomegulu oomvula omamiliyona itaaga vulu okuyalulwa. Oshe mu kwathele opo a kale e hole uuyuuki ngaashi He. Jesus okwa li naanaa a fa He thiluthilu. Ngele otwa hala okumona nawa uukwatya waJehova wuuyuuki, oshi li nawa okutedhatedha koshiholelwa shaJesus Kristus.—Johannes 14:9, 10.

6 Omwana gwaKalunga epona opo a li sho Satana ta lundile He nokutula momalimbililo uuthemba we wokupangela. Elundilo ndika kali nyanyalitha tuu! Omwana okwa li wo u uvu sho Satana ta popi kutya kapu na omuntu ta vulu okulongela Jehova molwaashoka e mu hole shili. Omalundilo ngoka oga li ge ehameke shili Omwana ngoka e hole uuyuuki. Ka li tuu a nyanyukwa okutseya kutya ota ka dhana onkandangala ya simana mokuyamukula omalundilo gaSatana! (2 Aakorinto 1:20) Ote ke shi ninga ngiini?

7 Ngaashi twi ilonga mOntopolwa 14, Jesus Kristus okwa li a gandja eyamukulo lya yela thiluthilu kelundilo lyaSatana li na ko nasha nuudhiginini wiishitwa yaJehova. Jesus okwa dhika po ekankameno lyokuyukipalitha uuthemba waJehova wokupangela nokuyapulitha edhina lye. E li Omuwiliki nOmuhupithi Omunene gwaJehova, Jesus ota ka yukipalitha iinima meshito alihe. (Iilonga 5:31) Okwa kala wo nokuulika uuyuuki wa fa waKalunga monkalamwenyo ye yokombanda yevi. Jehova okwa popi kombinga ye a ti: “Ngame otandi mu tula Ombepo yandje, oye notu uvithile aantu ayehe [uuyuuki, OB-1954].” (Mateus 12:18) Oohapu ndhoka Jesus okwa li e dhi gwanitha ngiini?

 Jesus oku uvithile aantu kutya “uuyuuki” oshike

8-10. (a) Ongiini oompango dhaawiliki yelongelokalunga lyOshijuda dha li inaadhi yalula mboka kaaye shi Aajuda naakiintu? (b) Omomikalo dhini oompango dhopantu dha li dha dhigupaleke Esabati lyaJehova?

8 Jesus okwa li e hole Ompango yaJehova noku yi landula. Ihe aawiliki yomalongelokalunga mboka ya li ko pethimbo lye oya li ye yi pengitha noku yi fatulula pombambo. Okwe ya lombwele a ti: “Yayee, one aalongimpango naafarisayi! . . . Ohamu etha iinenenima yomompango; uuyuuki, esilohenda nokwiinekelwa.” (Mateus 23:23) Aalongimpango mboka kaya li ye shi kutya “uuyuuki” oshike. Oya li haya holeke uuyuuki. Ngiini mbela? Tala kiiholelwa yimwe.

9 Jehova okwa li a lombwele oshigwana she shi iyoolole ko kiigwana yaapagani mbyoka ye shi kundukidha. (1 Aakwaniilwa 11:1, 2) Ihe nonando ongaaka, aawiliki yamwe yomalongelokalunga aakwanyanya oya li ya ladhipike aantu ya kale ya dhina ayehe mboka kaaye shi Aajuda. Mompango yawo omwa li oshipango tashi ti: “Oongombe kadhi na okuthigwa miigunda yaapagani molwaashoka ohaya fekelwa kutya ohaya lala niimuna.” Okuninga ayehe mboka kaaye shi Aajuda okayoya kasha li pauyuuki notashi kondjithathana lela nOmpango yaMoses. (Levitikus 19:34) Oya tota po wo oompango nkene aakiintu ye na okuungaungwa nayo. Ompango yawo oya ti kutya omukulukadhi ke na okweenda a tegama nomusamane gwe, ihe oku na okukala konima. Omulumentu ka li a pitikwa okupopya nomukiintu montaneho, nonando onakale omukulukadhi gwe. Aakiintu oya li ya fa aapika nokaya li ya pitikwa yi ipopile mompangu. Opwa li nokuli egalikano limwe moka aalumentu haya pandula Kalunga molwaashoka kaaye shi aakiintu.

10 Aafarisayi oya li ya hekula Ompango yaKalunga omolwomithigululwakalo niipango mbyoka ya totwa kaantu. Pashiholelwa, ompango yeSabati oya li yi indika okulonga mesiku lyEsabati, molwaashoka olya li owala lya nuninwa okulongela Kalunga, okutungathana pambepo nokuvululukwa. Ihe Aafarisayi oya li ya dhigupaleke ompango ndjoka. Oya li ya tokola kuyo yene kutya “iilonga” yini kaayi na okulongwa. Oya totha mo iinima  39 yi ili noyi ili oyo owala yi li iilonga ngaashi okuteya nenge okuya kuukongo. Iinima mbyoka oye etitha po omapulo ogendji, ngaashi: Ngele omuntu okwa dhipaga okalipi mEsabati, mbela okwa li a ya kuukongo? Ngele okwa polola omaha e ende ta li, mbela okwa li ta teya? Ngele okwa aludha ngoka te ehama, mbela okwa li ta longo? Oompango ndhoka ya li ya tula po odha li oondhigu unene.

11, 12. Jesus okwa li u ulike ngiini kutya oku li ompinge nomithigululwakalo dhaahe li pamanyolo dhAafarisayi?

11 Jesus okwa li a kwathele aantu ngiini yu uve ko kutya uuyuuki oshike? Omalongo ge nonkalamwenyo ye oya li ya aneke pomutenya iikala yaawiliki yelongelokalunga mboka. Tango natu tale kombinga yelongo lye. Okwe ya lombwele ye ethe po oompango dhawo odhindjidhindji ndhoka ya tota po a ti: “Otamu kutha oohapu dhaKalunga oonkondo nokudhiginina omithigululwakalo dheni.”—Markus 7:13.

12 Jesus okwe shi popi kutya ompango yEsabati ndjoka ya tulwa po kAafarisayi oya li ya puka noye yi uva ko pombambo. Okwe ya yelithile kutya ye mwene oye “omuwa gwEsabati,” onkee ano, oku na uuthemba okwaaludha aantu mEsabati. (Mateus 12:8) Opo e shi ulike Jesus okwa li a aludha mEsabati. (Lukas 6:7-10) Okwaaludha hoka okwa li owala ethano lyaashoka ta ka ninga pethimbo lyEpangelo lye lyOomvula Eyuvi. Eyuvimumvo ndyoka otali ka kala esiku lyEsabati moka aantu aadhiginini taya ka vululukwa kiilonga mbyoka ya kala taya longo uule womathelemimvo sho taya pangelwa kuulunde neso.

13. Kristus pethimbo lyuukalele we kombanda yevi, okwa li a toto po Ompango yini, noya yooloka ko ngiini kwaandjoka yaMoses?

13 Jesus okwa li wo a yelitha kutya uuyuuki oshike mokutota po ompango ompe, “ompango yaKristus” ndjoka ya tameke okutulwa miilonga sho a mana uukalele we kombanda yevi. (Aagalati 6:2) Ompango ndjoka ompe inayi fa Ompango yaMoses ndjoka ya li ya nyolwa miipelende, ihe oya thikama po momakotampango. Oya kwatela mo iipango yimwe yokondandalunde. Shimwe shomuyo Jesus okwe shi ithana “oshipango oshipe.” Okwa longo aalanduli ye ayehe ya kale ye  holathane ngaashi e ya hole. (Johannes 13:34, 35) Eeno, ohole yokwiiyamba oyo hayi ndhindhilikitha mo ayehe mboka ye li metsokumwe ‘nompango yaKristus.’

Jesus oye oshiholelwa dhingi shuuyuuki

14, 15. Jesus oku ulike ngiini kutya oonkondopangelo dhe odha ngambekwa, nomolwashike tashi hekeleke?

14 Jesus ina longa owala aantu kombinga yohole, ihe okwa kala metsokumwe ‘nompango ye.’ Onkalamwenyo ye ayihe oya li wo ya nwethwa mo kompango ndjoka. Tala omikalo ndatu moka Jesus u ulike kutya uuyuuki oshike.

15 Gwotango, Jesus okwa li a yanda thiluthilu okulonga shoka kaashi li pauyuuki. Otashi vulika we shi mona kutya okwaahenuuyuuki kwaantu inaaya gwanenena ohaku etithwa kuuntsa nokokulongitha nayi oonkondopangelo ndhoka ye na. Jesus hasho a li ngaaka. Oshikando shimwe, omulumentu gwontumba okwi ile kuJesus nokwe mu lombwele a ti: “Muhongi, lombwela mumwameme omukuluntu, tu topolelathane uuthiga weliko lyatate.” Jesus okwe mu yamukula a ti: “Mulumentu, olye u utha ndje, ndi ninge omutokoli nomutopoli guuthiga weni?” (Lukas 12:13, 14) Mbela shoka kashi shi oshindhindhilikwedhi? Ontseyo yaJesus, oondunge dhe dhokuyoolola noonkondopangelo ndhoka a pewa kuKalunga odhi vule dhakehe gumwe kombanda yevi, okwa li a tindi okukutha ombinga moshinima shoka molwaashoka ka li a pewa oonkondo oku shi ninga. Jesus okwa kala omwiifupipiki uule womayuvimimvo manga inee ya kombanda yevi. (Judas 9) Shoka otashi ulike kutya okwa li i inekela thiluthilu kutya Jehova oye owala ta vulu okuutha shoka shu uka.

16, 17. (a) Jesus okwa li u ulike ngiini uuyuuki mokuuvitha onkundana ombwanawa yUukwaniilwa waKalunga? (b) Jesus okwa li u ulike ngiini kutya uuyuuki we owa kwatela mo ohenda?

16 Omutiyali, Jesus okwa li u ulike uuyuuki momukalo moka u uvitha onkundana ombwanawa yUukwaniilwa waKalunga. Ka li e na okatongo. Okwa li a kambadhala okuvithila aantu ayehe, kutya nduno aayamba nenge oohepele. Mepingathano naashoka, Aafarisayi oya li ya dhina oohepele naantu yowala noku yi  ithana amhaarets shoka tashi ti “aadhinwa.” Jesus okwa li a katuka onkatu meendelelo okuukitha shoka kaashi li pauyuuki. Sho u uvithile aantu onkundana ombwanawa nokulya pamwe nayo, e ya palutha, e ya aludha nokwe ya yumudha, okwa li u ulike uuyuuki waKalunga ngoka a hala “aantu ayehe” ya hupithwe. *1 Timoteus 2:4.

17 Omutitatu, uuyuuki waJesus owa li wa kwatela mo ohenda ye onene. Okwa li a kwathele aalunde. (Mateus 9:11-13) Okwa kwathele aantu mboka ya li itaaya vulu okwiikwathela yo yene. Pashiholelwa, Jesus ina ambidhidha aawiliki yelongelokalunga mboka ya li inaayi inekela mboka kaaye shi Aajuda. Okwa li a kwathele nokulonga aantu mboka, nonando okwa li e endela unene Aajuda. Okwa lombwele omukuluntu gwaakwiita Omuroma ngoka a aludha pashikumithalonga a ti: “MAaisraeli inandi mona mo nando gumwe e na eitaalo li thike pundika.”—Mateus 8:5-13.

18, 19. (a) Ongiini Jesus a li u ulike kutya okwa simaneka aakiintu? (b) Oshiholelwa shaJesus otashi tu kwathele ngiini tu mone ekwatathano pokati kuulaadhi nuuyuuki?

18 Jesus ka li a dhina aakiintu ngaashi yamwe ya li ye ya dhina. Pehala lyaashono, okwa li hu ungaunga nayo pauyuuki. Aakiintu Aasamaria oya li ya talika ko inaaya yogoka ngaashi mboka kaaye shi Aajuda. Ihe Jesus ka li a kakadhala okuuvithila omukiintu Omusamaria pomuthima puSikar. Okwa li a lombwele omukiintu ngoka oshikando shotango kutya oye Mesiasa omuuvanekwa. (Johannes 4:6, 25, 26) Aafarisayi oya li ya ti kutya aakiintu kaye na okulongwa Ompango yaKalunga, ihe Jesus okwa li a longitha ethimbo olindji noonkondo dhe, okulonga aakiintu. (Lukas 10:38-42) Pamuthigululwakalo gwopethimbo ndyoka, aakiintu kaya li haya pewa uuthembahenda wokukala oonzapo dhasha, ihe Jesus okwa li a tumbalekitha aakiintu  yamwe sho e yi ihololele oshikando shotango sho a yumuka. Okwa lombwele aakiintu mboka ya ka lombwele aalongwa ye aalumentu kutya okwa yumuka.—Mateus 28:1-10.

19 Eeno, Jesus okwa li a yelithile iigwana kutya uuyuuki oshike. Iikando oyindji okwe shi ningi, nonando omwenyo gwe ogwa li moshiponga. Oshiholelwa she otashi tu kwathele tu mone kutya opo tu kale hatu ambidhidhidha uuyuuki washili, otwa pumbwa okukala aalaadhi. Oshe eleka sho ti ithanwa “onime yomezimo lyaJuda.” (Ehololo 5:5) Dhimbulukwa kutya onime otayi thaneke uuyuuki. Monakuyiwa yi li popepi, Jesus ota ka longa uuyuuki pakuudha. Masiku ota ka taandelitha “uuyuuki kombanda yevi.”—Jesaja 42:4.

Uukwaniilwa wopaMesiasa otawu ka “taandelitha uuyuuki kombanda yevi”

20, 21. Pethimbo lyetu, Omukwaniilwa gwUukwaniilwa wopaMesiasa okwa humitha ngiini komeho uuyuuki kombanda yevi nomegongalo lyopaKriste?

20 Sho Jesus a ningi Omukwaniilwa gwUukwaniilwa wopaMesiasa mo 1914, okwa humitha komeho uuyuuki kombanda yevi. Ngiini mbela? Okwa gwanitha ehunganeko ndyoka li li muMateus 24:14. Aalanduli ye kombanda yevi oya longo aantu yomiigwana ayihe oshili kombinga yUukwaniilwa waJehova. Ngaashi Jesus, oyu uvitha nopwaahe na okatongo nomomukalo gu uka noya kwathele aantu ayehe, aagundjuka, aakulupe, aayamba, oohepele, aakiintu naalumentu ya tseye Jehova Kalunga kuuyuuki.

21 Jesus okwa humitha wo komeho uuyuuki megongalo lyopaKriste ndyoka oye Omutse gwalyo. Ngaashi sha hunganekwa, okwa gandja ‘aantu ye li omagano,’ sha hala okutya, aakuluntugongalo Aakriste aadhiginini mboka taya kwatele komeho momagongalo. (Aaefeso 4:8-12) Ohaya landula oshiholelwa shaJesus Kristus shuuyuuki sho taya tonatele oshigunda shaKalunga. Ohaya kaleke momadhiladhilo kutya Jesus okwa hala oonzi dhe dhi ungaungwe nadho pauyuuki, nopwaahena okutala ondondo, esimano nenge iiniwe yadho.

22. Jehova oku uvitile ngiini okwaahenuuyuuki hoka ku li muuyuni kunena, nokwa langeka po Omwana a ka ninge shike?

 22 Masiku Jesus ota ka gwanitha po uuyuuki kombanda yevi momukalo gwa dhenga mbanda. Okwaahenuuyuuki oku li apuhe muuyuni mbuka wa yonuka. Okanona kehe taka si kondjala, oke li oshihakanwa shokwaahenuuyuuki kunyanyalitha, molwaashoka iimaliwa oyindji nethimbo ohayi longithwa mokulonga iikondjitho yiita nomomainyanyudho, pehala lyokulanda iikulya. Jehova oha geyithwa komaso gaantu omamiliyona mboka taya si iipundjamenye omolwomikalo dhokwaahenuuyuuki. Okwa langeka po Omwana a ka kondje iita yi li pauyuuki opo a hulithe po sigo aluhe uuyuni mbuka tu li muwo waahenuuyuuki.—Ehololo 16:14, 16; 19:11-15.

23. Konima yaAmargedon, Kristus ota ka humitha ngiini uuyuuki komeho sigo aluhe?

23 Uuyuuki waJehova owa kwatela mo oshindji kaashi shi owala ehanagulo lyaakolokoshi. Okwa langeka po wo Omwana a pangele e li “OMUWA gwombili.” Konima yiita yaArmagedon, Jesus ote ke eta ombili kombanda yevi alihe nepangelo lye otali ka kala lya “kankamekelwa keutho nokuuyuuki.” (Jesaja 9:6, 7) Jesus ota ka kala a nyanyukwa okuhulitha po okwaahenuuyuuki akuhe hoka kwe etitha oluhodhi nokumona iihuna muuyuni. Ota ka gwanitha po lela uuyuuki waJehova wa gwanenena sigo aluhe. Osha simanenena tu holele uuyuuki waJehova ngashingeyi. Natu tale nkene tatu vulu oku shi ninga.

^ okat. 1 Jesus okwa li ha geye pauyuuki, ngaashi Jehova ngoka ha “geele” aakolokoshi ayehe. (Nahum 1:2) Pashiholelwa, konima sho Jehova a lombwele oshigwana she oshitangalali kutya osha ninga egumbo lye “oshiholameno shaayugi,” okwa ti: “Otandi ka poolela ondjahi yandje ya hwama kotempeli ndjika.”—Jeremia 7:11, 20.

^ okat. 3 Embo Mishna olya ti kutya konima yoomvula dhontumba aantu oya li ya tukula oshipotha omolwoondando dha londa dhoonguti ndhoka hadhi landithwa motempeli. Oondando odha li dha shunwa pevi noopelesenda 99. Oolye ya li ya mono uuwanawa melongekidho ndika? Aanandjokonona yamwe oya ti kutya Omusaaseri omukuluntu Annas oye a li omuwiliki gwaahalithi mboka yomotempeli, onkee ano, ye nuukwanegumbo we oya li ya likola mo oshindji.—Johannes 18:13.

^ okat. 16 Aafarisayi oya li ye wete kutya oohepele, aantu mboka kaaye shi Ompango, oye li “kohi yethingo.” (Johannes 7:49) Oya ti kutya kapu na ngoka e na okulonga aantu mboka, a ninge ongeshefa nayo, a lye pamwe nayo nenge a galikane pamwe nayo. Okweetha omumwoye a hokanwe kuyo osha li iihuna yowala shi vulithe oku mu gandja po kiilikama. Oya ti kutya oohepele itadhi ka yumudhwa.

Tseya oshindji

OSHUNGOLANGELO (YOKUKONAKONWA)

Sho Uukwaniilwa wa kala nokupangela oomvula 100, mbela oshe ku guma ngiini?

Ongiini tatu vulu okumona uuwanawa melelo lyUukwaniilwa? Konakona nkene Omukwaniilwa gwopaMesiasa ha yelitha, ha longo, nokuunganeka aapangelwa ye.