Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 17

‘Uuwindji wuunongo waKalunga owu thike peni!’

‘Uuwindji wuunongo waKalunga owu thike peni!’

1, 2. Elalakano lyaKalunga li na ko nasha nesiku etiheyali olya li lini, nuunongo we owa li wa makelwa ngiini petameko lyesiku ndyoka?

KONIMA sho Jehova a shiti iinima ayihe, okwa ti: ‘Oyo opala lela.’ (Genesis 1:31) Ihe aantu, iishitwa ya dhenga mbanda, mbyoka a shiti mesiku etihamano oya yi monkalo yinikitha oluhodhi. Petameko lyesiku etiheyali, Adam naEva oya li ya landula uunashipotha waSatana. Shoka ya ningi oshe etele aantu uulunde, okwaahagwanenena neso. Iihuna oyi thike peni!

2 Otashi monika sha fa elalakano lyaJehova li na ko nasha nesiku etiheyali lya ponya. Ngaashi omasiku omakwawo geshito gahamano ngoka ga tetekela, esiku etiheyali nalyo olya li tali ka kwata uule womimvo omayovi. Jehova okwa li e li yapula, nolwahugunina sho esiku ndyoka tali ka hula, evi alihe otali ka ninga oparadisa mu na aantu ya gwanenena. (Genesis 1:28; 2:3) Ihe okwa li te ke shi enda ngiini konima sho pwa holoka uunashipotha mboka we etitha iilanduliko yinyanyalitha? Kalunga okwa li ta ka ninga po shike? Onkalo ndjoka ya holoka po oya li ya makele uunongo we, shoka osha li emakelo enene.

3, 4. (a) Omolwashike onkatu ndjoka Jehova a katuka konima sho pwa holoka uunashipotha muEden tayi ulike kutya oku na uunongo uukumithi? (b) Eifupipiko otali ke tu kwathela tu tseye oshili yini sho tatu konakona uunongo waJehova?

3 Jehova okwa katuka onkatu nziya mokugeela aanashipotha mboka, nopethimbo tuu mpoka okwa popi nkene te ke shi enda okuhulitha po omaupyakadhi ngoka ye etitha. (Genesis 3:15) Okuza puunashipotha moshikunino shaEden sigo okunena Jehova otu unganeke iinima opo elalakano lye li gwanithwe nota ka tsikila wo oku shi ninga momukokomoko gwomimvo omayovi. Elalakano lye olya yela, ihe olya kwatela mo oshindji shoka tashi pula opo omuleshi gwOmbiimbeli e shi konakone noku shi tedhatedhe monkalamwenyo ye ayihe. Natango,  elalakano lye otali ka gwanithwa thiluthilu. Otali ka hulitha po uukolokoshi auhe, uulunde neso. Aantu aadhiginini otaya ka kala ya gwanenena. Ayihe mbika otayi ka ningwa omanga esiku etiheyali inaali hula. Kashi na nduno mbudhi kutya oshike she ende po lwopokati mpono, elalakano lyaJehova li na ko nasha nevi nosho wo naantu otali ka gwanithwa peuthwathimbo lye.

4 Uunongo mboka itawu kumitha tuu! Omuyapostoli Paulus okwa nyola a ti: ‘Uuwindji wuunongo waKalunga owu thike peni!’ (Aaroma 11:33) Sho tatu konakona omaukwatya gaKalunga gi ili nogi ili natu kale tu shi kutya katu na siku limwe tu ku uve ko thiluthilu uunongo we mpoka wu thike. Shoka otatu shi tseya owala ngele otwi ifupipika. (Job 26:14) Tango natu yelithe kutya uukwatya mbuka uukumithi otawu ti shike lela.

Uunongo wopakalunga oshike?

5, 6. Pokati kontseyo nuunongo opu na ekwatathano lini, nontseyo yaJehova oyi thike peni?

5 Uunongo inawu fa ontseyo. Ookompiuta ohadhi vulu okupungula ontseyo oyindji, ihe itatu vulu okutya omashina ngoka oge na uunongo. Kakele kaashono, ontseyo nuunongo oya pambathana. (Omayeletumbulo 10:14) Pashiholelwa, ngele owa pumbwa omayele nkene wu na okuungaunga nomukithi gwa kwata miiti, mbela oto ka pula gumwe ngoka kee na naanaa ontseyo yuunamiti nenge ngoka kee yi na nandonando? Oshidhigu okuninga ngaaka. Onkee ano, ontseyo yashili oya simanenena opo tu kale nuunongo washili.

6 Jehova oku na ontseyo yaahe shi okuyelekwa. E li “omukwaniilwa gwaaluhe” oye awike a kala ko nale nota kala ko sigo aluhe. (1 Timoteus 1:17) Okwa kala nokumona iinima ayihe omimvo kaadhi shi okuyalulwa. Ombiimbeli otayi ti: “Kaku na nando oshinima shimwe sha holekwa Kalunga. Kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twe yi ninga.” (Aahebeli 4:13; Omayeletumbulo 15:3) E li Omushiti okwa tseya nawa iinima ayihe mbyoka a shita, nokwa kala nokukonakona iilonga yaantu okuza petameko. Oha konakona nawa omitima dhaantu  noku shi okanima kehe hoka ke li mo. (1 Ondjalulo 28:9) Molwaashoka okwe tu shita nemanguluko lyokuninga omatokolo oha kala a nyanyukwa oku tu mona tatu ningi omatokolo gopandunge monkalamwenyo yetu. E li ‘omuuvi gwomagalikano’ oha pulakene omagalikano ogendji poshikando. (Episalomi 65:2) Jehova oha vulu okudhimbulukwa okanima kehe.

7, 8. Jehova ohu ulike ngiini euvoko, oondunge dhokuyoolola nuunongo we?

7 Jehova ke na owala ontseyo. Oku shi wo nkene iinima yontumba hayi kala ya pambathana nonkene hayi longele kumwe. Oha yelekanitha iinima nokupangula pandunge. Oha yoolola pokati kaashoka oshiwanawa noshiwinayi nopokati kaashoka sha simana naashoka kaashi na oshilonga. Kakele kaashono, oha vulu okumona shoka shi li momitima dhaantu. (1 Samuel 16:7) Jehova oku na wo omaukwatya ngoka ga tongomana ge vule ontseyo, ngaashi euvoko noondunge dhokuyoolola. Ihe uunongo owu vule kokule omaukwatya agehe ngoka.

8 Uunongo ohawu ningitha omuntu a longithe ontseyo, oondunge dhokuyoolola nosho wo euvoko opo a pondole. Oombiimbeli dhimwe dhomomalaka gopetameko odha toloka “uunongo” tadhi ti “okulonga nuukeka” nenge “uunongo tawu longo.” Onkee ano, uunongo waJehova kawu shi owala uukwatya wu li muye, ihe ohe wu tula miilonga. Oha longitha aluhe ontseyo ye oyindji neuvoko lye lyomuule opo a ninge omatokolo dhingi noku katuke pandunge. Mboka kawu shi tuu uunongo washili! Jehova oku ulike uushili woohapu dhaJesus ndhoka tadhi ti: “Uunongo waKalunga owa hololwa kiilonga ye.” (Mateus 11:19) Iilonga ye ayihe meshito otayi ulike kutya omunongo kaaku na we.

 Uunzapo kutya Kalunga omunongo

9, 10. (a) Jehova oku na uunongo wa tya ngiini, nokwa kala noku wu ulika ngiini? (b) Osele otayi ulike ngiini kutya Jehova omunongo?

9 Mbela opu na siku limwe wa li wa kuminwa oshinima shontumba molwaashoka sha ningikika? Shoka otashi ti kutya omuntu ngoka e shi longa oku na uunongo uukumithi. (Eksodus 31:1-3) Jehova oye onzo yuunongo mboka kaawu shi okuyelekwa. Omukwaniilwa David okwe mu popi a ti: “Otandi ku hambelele e tandi ku simaneke, oshoka onda shitwa nuunkulungu. Iilonga yoye iikumithi; shika ondi shi shi nawa.” (Episalomi 139:14) Shi thike ngaa mpoka tatu ilongo kombinga yolutu lwomuntu, opo ngaa pu thike tatu kumithwa kuunongo waJehova.

10 Dhiladhila owala nkene okanona haka tameke taka koko ke li osele yimwe mela lyayina pethimbo lyesimbapalo. Mbalambala osele ohayi tameke tayi itopola moosele odhindji. Omuntu omukuluntu okwa thikama po moosele omabiliona ogendjigendji. Osele oshuushuka unene. Oosele 10 000 otadhi gwana komutse gwokanetse. Ihe kehe yimwe oya shitwa momukalo gwa kitakana noonkondo. Kapu na eshina lya longwa komuntu tali vulu okulonga iilonga yi thike pwaambyoka hayi longwa koosele. Aanongononi otaya faathanitha oosele noshilando shi na enkolokuma nosho wo omiyelo dhokuya mo nokuza mo, iiyenditho, ekwatathono lyopangodhi, omashina golusheno, oofabulika, ominino dhomeya gonyata, omashina gokulongulula iinima mbyoka ya pumbiwa okulongithwa natango, oshikondo shegameno nepangelo ndyoka li li ondingandinga yokuwilika iinima ayihe. Shimwe ishewe, osele ohayi vulu okweeta po osele onkwawo ndjoka ye yi fa thiluthilu muule owala woowili oonshona.

11, 12. (a) Oshike hashi ningitha oosele dhengwili dhi iyoolole koonkwawo, nongiini shika tashi tsu kumwe nEpisalomi 139:16? (b) Omomikalo dhini uuluyi waantu tawu ulike kutya otwa “shitwa nuunkulungu?”

11 Oosele odha yoolokathana. Sho oosele dhengwili tadhi ende tadhi itopola, ohadhi iyoolola moonkwawo dhi ikolelela kwaashoka tadhi ka ninga. Dhimwe otadhi ka ninga oosele dhomadhiladhilo, dhomasipa, dhoontumba, dhombinzi nadhimwe odhomeho. Oosele adhihe ndhoka dhi ili nodhi ili ohadhi wilikwa kuutopolwa uushona mboka hatu valwa nawo. Shihokitha, David okwa li a nwethwa mo kuJehova a tye: “Owa mono ndje, manga inaandi valwa. Omasiku nde ga uthilwa, agehe oga nyolelwa membo lyoye.”—Episalomi 139:16.

 12 Iitopolwa yimwe yolutu oya kitakana noonkondo. Pashiholelwa, natu tale kuuluyi womuntu. Yamwe otaya ti kutya owu li oshinima sha kitakana noonkondo meshito alihe. Owu na oosele dhomaiyuvo omabiliyona 100, konyala dhi thike lwopoonyothi ndhoka dhi li momulalawili. Osele kehe oyi na uutayi omayovi ogendji wa kwatathana noosele oonkwawo. Aanongononi otaya ti kutya uuluyi womuntu otawu vulu okupungula uuyelele auhe mboka wu li moongulumambo muuyuni auhe, oshinima shoka oshikumithi noonkondo. Nonando aanongononi oya kala nokukonakona omathelemimvo ogendji eshito ndyoka lya “shitwa nuunkulungu,” oye shi zimina kutya nayo itaya vulu oku li uva ko thiluthilu.

13, 14. (a) Oondhindhi niishitwa yimwe ohayi ulike ngiini kutya oyi na “owino oyindjiyindji,” naashoka otashi tu longo shike kombinga yOmushiti? (b) Omolwashike tatu vulu okutya ongodhi yewiliwili oya shitwa “noondunge”?

13 Aantu hayo owala iishitwa mbyoka tayi ulike kutya Kalunga omunongo. Episalomi 104:24 otali ti: “OMUWA, owa shiti iinima oyindji! Tala, nkene wa shiti ayihe noondunge! Evi olyu udha iishitwa yoye.” Uunongo waJehova owi iwetikile miinima ayihe mbyoka a shita ye tu dhingoloka. Pashiholelwa, oondhindhi odhi na “owino oyindjiyindji.” (Omayeletumbulo 30:24) Oondhindhi nuuhwa ohawu longo nawa palandulathano. Oondhindhi dhimwe iilonga yadho okutonatela nokulitha owala oludhi lwuupuka hawu ithanwa oshikagadhi opo dhi vule okukutha mo omagadhi ngoka hadhi li. Dhimwe ohadhi tsike owoya noku wu sila oshimpwiyu. Uupuka wumwe oundji ohawu ningi iinima momikalo omikumithi. Ondhi ohayi vulu okutanauka mombepo shimwe to nyengwa yi vulithe iitukimbepo ayihe mbyoka ya longwa kaantu. Uudhila wumwe mboka hawu tuka tawu taakana iilongo ohawu wilikwa koonyothi nenge koonkondo dhomangeneta gevi nenge kuualita mboka wu li muuluyi wawo. Aanongononi oya kala taya konakona uule womimvo omukalo omukumithi moka iinamwenyo mbyoka hayi ningi iinima paunshitwe. Omushiti gwayo ke shi tuu omunongo!

 14 Aanongononi oyi ilonga oshindji keshito lyaJehova ndyoka lya shitwa nuunongo. Opu na ooindjiniya dhimwe ndhoka hadhi longo iinima tadhi holele iinima yomeshito. Pashiholelwa, otashi vulika wu kale wa kumwa ngele to tongolola ongodhi yewiliwili. Ihe ooindjiniya ohadhi kala dha kuminwa noonkondo omutungilo gwayo. Ongodhi ndjoka ohayi monika ya fa inaayi kola, ihe oya kola yi vule oshiyela nosho wo uumbindja wokukeelela ooholo. Mbela oya kola shi thike peni? Dhiladhila owala ongodhi yewiliwili ya nenepekwa sigo ya thiki puunene wonete yokukwata oohi. Ongodhi ya tya ngaaka otayi ka kala ya kola noonkondo notayi vulu okukankameka ondhila yokuhumbata aantu tayi tuka. Eeno, Jehova okwa shita iinima ayihe mbyoka “noondunge.”

Olye a shita iishitwa yokombanda yevi yi na ‘owino oyindjiyindji’?

Iinima yilwe mbyoka tayi ulike uunongo waKalunga

15, 16. (a) Oonyothi dhokegulu otadhi ulike ngiini kutya Jehova omunongo? (b) Okukala kwaJehova e li Omuwiliki Omunene gwaayengeli omamiliyona otaku ulike ngiini kutya oku li Omuunganeki omunongo?

15 Uunongo waJehova owi iwetikile meshito lye alihe. Oonyothi ndhoka dhi li kegulu, ndhoka twa kundathana mOntopolwa 5, kadhi li ko mehalakano. Otu na okupandula uunongo waJehova sho a tula po “oompango dhomewangandjo” opo omilalawili dhi kale dhu unganekwa nawa moongundu dhadho, dho oongundu ndhoka odhi li momahwata. (Job 38:33) Itashi kumitha sho Jehova ti ithana omaminikilo gokegulu “etangakwiita.” (Jesaja 40:26) Opu na natango etangakwiita limwe tali ulike thiluthilu kutya ye omunongo.

16 Ngaashi twe shi mona mOntopolwa 4, Kalunga okwa pewa edhinasimaneko “Jehova gwomatanga gaakwiita” omolwondondo ye e li Omugandjimalombwelo omunene gwetangakwiita enenenene lyiishitwa yopambepo omamiliyona ogendji. Shika oshi li euliko kutya oku na oonkondo. Mbela uunongo we owa  kwatelwa mo ngiini moshinima shika? Kala wu shi shi kutya Jehova naJesus ihaya li onyalo. (Johannes 5:17) Oshi li pandunge okuthika pehulithodhiladhilo kutya aayengeli mboka ye li aakalele yOmukombandambanda ohaya kala yi ipyakidhila aluhe. Dhimbulukwa kutya oye vule aantu kokule, noye na oondunge noonkondo dha shiga ko. (Aahebeli 1:7; 2:7) Jehova okwa kaleka aayengeli ayehe mboka yi ipyakidhila noya nyanyukwa mokugwanitha po iilonga yawo ‘yokufala omalombwelo ge’ nosho wo ‘yokugwanitha ehalo lye’ uule woomvula omabiliyona. (Episalomi 103:20, 21) Jehova ke shi tuu omuunganeki ngoka e na uunongo uukumithi!

Jehova oye “omunandunge awike”

17, 18. Omolwashike Ombiimbeli tayi ti kutya Jehova oye “omunandunge awike,” nomolwashike uunongo we tawu tu kumitha noonkondo?

17 Okutala kuuyelele auhe mboka twa kundathana metetekelo, itashi kumitha sho Ombiimbeli tayi ulike kutya Jehova oku na uunongo kaawu shi kuyelekwa. Pashiholelwa, otayi ti kutya Jehova “omunandunge awike.” (Aaroma 16:27) Oye awike e na uunongo wa dhenga mbanda. Oye onzo yuunongo auhe washili. (Omayeletumbulo 2:6) Nonando Jesus oye oshishitwa shaJehova oshinandunge lela ina kala i inekela muunongo we mwene, ihe okwa popi shoka He e mu lombwela.—Johannes 12:48-50.

18 Tala nkene omuyapostoli Paulus a popi uunongo waJehova wi ikalekelwa a ti: “Ano [uuwindji] wuuyamba waKalunga ou thike peni! Uunongo noondunge dhe odha hulila peni! Olye ta vulu okufatulula omatokolo ge? Olye ta vulu okuuva ko oondjila dhe?” (Aaroma 11:33) Palaka lyopetameko, ovelise ndjoka oya tameka noshityankumwe “O!” shoka tashi ulike kutya Paulus okwa li a kumwa noonkondo. Oshitya shOshigreka shoka sha tolokwa ‘uuwindji,’ osha pambathana noshitya shoka sha tolokwa “olumbogo” mOmbiimbeli. Onkee ano, iitya mbyoka Paulus a longitha otayi tu pe ethano lya tsa momadhiladhilo. Ngele tatu dhiladhila kuunongo waJehova, otwa fa omuntu ta tala molumbogo olule, kaalu na ehulilo. Olumbogo  ndoka italu vulu okumetwa, nomuntu ito vulu lela okupopya kutya omwa tya ngiini mulwo. (Episalomi 92:5) Mbela shoka itashi tu inyengitha tu kale aaifupipiki?

19, 20. (a) Omolwashike she eleka sho ontsa tayi longithwa okuthaneka uunongo waKalunga? (b) Jehova oku ulika ngiini kutya oha vulu okumona shoka tashi ka ningwa monakuyiwa?

19 Jehova oye “omunandunge awike” meityo lilwe: Oye owala ta vulu okumona shoka tashi ka ningwa monakuyiwa. Okwa longitha ontsa ndjoka hayi mono kokule okuulika uunongo we. Opu na oludhi lumwe lwontsa lu na oshiviha shookilograma 5, noyi na omeho omanene ge vule gaantu. Ontsa ohayi mono kokule lela notayi vulu okumona oshihakanwa shayo nonando oyi kale mombanda mokule oometa omathele. Oshikando shimwe Jehova okwa popile ontsa a ti: “Oko nkoka tayi lengalenga.” (Job 39:29) Jehova naye oha “lengalenga” kokule noha vulu okumona shoka tashi ka ningwa monakuyiwa.

20 MOmbiimbeli omu na uuyelele oundji tawu ulike kutya shoka oshoshili. Muyo omu na omahunganeko omathele ngoka ga gwanithwa. Oya hunganeka iita niilanduliko yayo, elandulathano lyomapangelo omanankondo muuyuni nosho wo nokuli omukalo moka oondjayi dhontumba dhiita dha li tadhi ka kwata ko iilongo. Iinima yimwe oya li ya hunganekwa  omimvo omathele komeho yethimbo.—Jesaja 44:25–45:4; Daniel 8:2-8, 20-22.

21, 22. (a) Omolwashike kaashi li pandunge okuthika pehulithodhiladhilo kutya Jehova okwa nuna nale omatokolo agehe ngoka tatu ka ninga monkalamwenyo? Shi thaneka. (b) Otu shi shi ngiini kutya uunongo waJehova ohawu endele pamwe nohole nosho wo nolukeno?

21 Mbela shika osha hala okutya Kalunga okwa nuna nale omatokolo ngoka to ka ninga monkalamwenyo yoye? Aantu mboka yi itaala melongo lyokununwa otashi vulika ya tye, eeno. Ihe elongo ndyoka itali tsu kumwe nuushili kutya Jehova omunongo, molwaashoka otali gandja edhiladhilo kutya iha vulu okulundulula shoka u uvaneka tashi ka ningwa monakuyiwa. Natu tye nduno owu na ewi ewanawa nokwiimba, mbela oto ka kala owala to imbi ethimbo alihe? Kaku na oshinima sha tya ngaaka! Sha faathana, nonando Jehova oha vulu okumona shoka tashi ka ningwa monakuyiwa, iha longitha uukwatya mboka ethimbo kehe. Ando okwa li a nuna onkalamwenyo yetu, ando katu na emanguluko lyokuninga omatokolo. Ihe Jehova ke na siku e tu kuthe omagano ngoka ge na ondilo.—Deuteronomium 30:19, 20.

22 Natango, elongo lyokununwa otali gandja edhiladhilo kutya Jehova ke na ohole nomaiyuvo gohenda nolukeno. Ihe otu shi shi kutya shoka kashi shi shoshili nandonando. Ombiimbeli otayi ti kutya Jehova “omunandunge.” (Job 9:4) Ihe otayi longitha uutumbulilo mboka tayi popi kombinga yuule womutima wo wene, ngoka gwa kwatela mo omainyengotompelo nomaiyuvo, ngaashi ohole.—1 Johannes 4:8.

23. Molwaashoka uunongo waJehova owu vule wetu kokule, owu na oku tu inyengitha tu ninge shike?

23 Uunongo waJehova owu shi lela okwiinekelwa. Owu vule wetu kokule nomolwaashoka Oohapu dhe otadhi tu kumagidha tadhi ti: “Inekela OMUWA nomutima gwoye aguhe noino igameka koondunge dhoye mwene. Mu tseya moondjila dhoye adhihe, nena oondjila dhoye ote dhi yelekanitha.” (Omayeletumbulo 3:5, 6) Natu tsikileni okukonakona uunongo waJehova Kalunga ketu omunandunge kaaku na we opo tu vule okuhedha popepi naye.