Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 6

“Jehova ofule” oku na oonkondo okuhanagula

“Jehova ofule” oku na oonkondo okuhanagula

1-3. (a) Etangakwiita lyAaegipiti olya li tali kambadhala okuningila shike Aaisraeli? (b) Ongiini Jehova a li a kondjele oshigwana she?

AAISRAELI oya li ya thitikininwa pokati kiikulundundu nefuta. Etangakwiita lyAaegipiti ndyoka hali dhipaga aantu nokwaanohenda olya li lye ya landula nelalakano lyoku ya hanagula po. * Moses okwa li a ladhipike oshigwana shaKalunga kaashi teke omukumo. Okwa li e shi lombwele a ti: “OMUWA ote mú kondjele.”—Eksodus 14:14.

2 Ihe nonando ongaaka, Moses okwa pula ekwatho kuJehova Kalunga ngoka e mu yamukula a ti: “Omolwashike to kugile ndje ekwatho? . . . Yelutha ondhimbo yoye kefuta. Omeya otaga ka topoka pokati, nAaisraeli otaa ka enda mefuta puukukutu.” (Eksodus 14:15, 16) Kala ando wa fa wu wete oshinima shoka tashi ningwa. Jehova okwa li a lombwele nziya omuyengeli gwe kutya oshikogo nashi lundulukile konima yAaisraeli, nosha li she ya shigi sha fa ekuma opo Aaegipiti kaaye ya ponokele. (Eksodus 14:19, 20; Episalomi 105:39) Moses okwa yelutha oshikaha she nombepo ondhigu oya topola efuta pokati. Omeya oga topoka pokati e taga thikama ga fa omakuma gaali kombinga nombinga nopokati opwa ningi ondjila onene moka oshigwana ashihe sha li she ende.—Eksodus 14:21; 15:8.

3 Farao mokumona oshikumithalonga shoka, okwa li ando e na okulombwela etangakwiita lye li ye ontuku, ihe omolwuuntsa we okwe li lombwele li ponokele Aaisraeli. (Eksodus 14:23) Aaegipiti oya li ya matukile mefuta neendelelo,  ihe oya li ya hulile muunyengwi molwaashoka omagulu gomatembakwiita gawo oga tameke okugwa ko. Sho Aaisraeli ya thiki kombinga onkwawo, Jehova okwa lombwele Moses a ti: “Yelutha okwooko kwoye kombanda yefuta, nomeya otaga siikile Aaegipiti nomatembakwiita gawo naahingi.” Omeya oga shuna kumwe, Farao netangakwiita lye oya sile mo.—Eksodus 14:24-28; Episalomi 136:15.

Jehova oku ulike kutya ye “Ofule” pEfuta Etiligane”

4. (a) Jehova oku ulike kutya oye lye pEfuta Etiligane? (b) Yamwe otashi vulika yi inyenge ngiini komukalo moka Jehova ha longitha oonkondo dhe?

4 Okuhupithwa kwoshigwana shaIsraeli pEfuta Etiligane oku li oshiningwanima sha simanenena mondjokonona kombinga yankene Kalunga hu ungaunga naantu. Mpoka Jehova okwa li i iyulike kutya ye “Ofule.” (Eksodus 15:3, OB-1954) Mbela oto ki inyenga ngiini komukalo moka ha longitha oonkondo dhe? Odhoshili kutya iita ohayi etele aantu uuwehame noluhodhi olunene. Mbela okutseya kutya Kalunga oku na oonkondo dhokuhanagula otashi ku ningitha wu kale kokule naye?

Iita yaKalunga inayi fa iita yopantu

5, 6. (a) Omolwashike shu uka okwiithana Kalunga, ‘Jehova gwomatanga gaakwiita?’ (b) Iita yaKalunga oya yooloka ko ngiini kwaambyoka yopantu?

5 Kalunga okwa pewa edhinasimaneko ‘Jehova gwomatanga gaakwiita’ lwiikando 300 lwaampono mOmanyolo gOshihebeli niikando iyali mOmanyolo gopaKriste gOshigreka. (1 Samuel 1:11, KB) Jehova Omupangeliawike oha wilike etangakwiita enenenene lyaayengeli. (Josua 5:13-15; 1 Aakwaniilwa 22:19) Etangakwiita ndyoka ohali hanagula momukalo omukumithi. (Jesaja 37:36) Aantu ohaya dhipaga ooyakwawo momukalo omwiinayi noonkondo. Ihe otu na okukala tu shi kutya iita yaKalunga inayi fa yaantu. Aakwiita naawiliki yopapolotika otashi vulika ya tompathane kutya  inashi puka okuponokela yalwe. Ihe iita yopantu ohayi hwahwamekwa kolwiho nokokwiihola mwene.

6 Jehova hasho e li ngaaka. Deuteronomium 32:4 ota ti: “Oye emanya; iilonga ye oyolela, noondjila dhe adhihe odhu uka. Kalunga omudhiginini kee na uugoyoki, omuyuuki nomunashili.” Oohapu dhe otadhi pangula ondjahi ihaayi pangelwa, onyanya nelongithonkondo. (Genesis 49:7; Episalomi 11:5) Jehova iha katuka nopwaahe na etompelo lyasha. Oha longitha oonkondo dhe dhokuhanagula opo a hupithe noku kandule po uupyakadhi. Ohe dhi longitha ngaashi sha popiwa komupolofeti Hesekiel a ti: “‘Ondi nyanyukilwe ando eso lyomukeenakalunga?’ Osho OMUWA Omupangeliawike ta pula. ‘Aawe, ihe onda hala, i itedhulule, opo a kale e na omwenyo.’”—Hesekiel 18:23.

7, 8. (a) Job okwa thiki pehulithodhiladhilo lini lya puka sho a li ta mono iihuna? (b) Ongiini Elihu a li a pukulula Job? (c) Oshike otatu ilongo moshimoniwa shaJob?

7 Omolwashike Jehova ha longitha oonkondo dhokuhanagula? Manga inaatu yamukula epulo ndyoka, otashi vulika tatu dhimbulukwa shi na ko nasha nomulumentu omuyuuki Job. Sho Satana a makele uudhiginini waJob, muushili wo wene okwa li a makele uudhiginini waantu ayehe. Jehova okwa li a yamukula eshongo lyaSatana moku mu pa ompito a makele uudhigini waJob. Oshizemo, Job okwa kanitha eliko lye, oyana oya dhipagwa nokwa li a hepekwa komukithi. (Job 1:1–2:8) Job okwa li ta dhiladhila kutya Kalunga oye te mu hepeke molwaashoka ka li e shi kutya olye te mu monitha iihuna. Okwa pula Kalunga kutya omolwashike e mu ningi “omushekwa” ‘nomutondi.’—Job 7:20; 13:24.

8 Omulumentu omugundjuka Elihu okwa aneke pomutenya okudhiladhila kwa puka kwaJob a ti: “Inashi opala u tye, ku na oondjo koshipala shaKalunga.” (Job 35:1, 2) Kashi li pandunge tu dhiladhile kutya otu na ontseyo tu vule Kalunga nenge tu dhiladhile kutya ke li pauyuuki. Elihu okwa popi a ti: “Itashi vulika Kalunga a longe uugoyoki.  Omunankondoawike ita vulu okulonga uuwinayi.” Konima yethimbo okwa ti: “Omunankondoawike otatu nyengwa oku mu adha; oye omuyuuki nomunashili mokukalathana kwe naantu.” (Job 34:10; 36:22, 23; 37:23) Natu kale tu shi kutya uuna Kalunga ta kondjo, oku na etompelo lyokuninga ngaaka. Tu na uushili mboka momadhiladhilo natu tale kutya omolwashike omathimbo gamwe Kalunga kombili ha kutha ombinga miita.—1 Aakorinto 14:33.

Shoka hashi ningitha Kalunga kombili a kondje

9. Omolwashike Kalunga kombili ha kondjo?

9 Konima yokuhambelela Kalunga e li “Ofule,” Moses okwa ti: “OMUWA, olye ngoka e ku fa mokati kookalunga? Olye e ku fa meadhimo nomuuyapuki?” (Eksodus 15:11) Omupolofeti Habakuk okwa nyola wo a ti: “Omeho goye omayapuki unene okutala uuwinayi, noito vulu nando okwiidhidhimikila okutala aantu taa eta eyonuko.” (Habakuk 1:13) Nonando Jehova oKalunga omunahole, omuyapuki wo nomuyuuki. Omaukwatya ngoka ogo hage mu ningitha ethimbo limwe a longithe oonkondo dhe dhokuhanagula. (Jesaja 59:15-19; Lukas 18:7) Onkee ano, Kalunga ngele ta kondjo itashi ti kutya ke shi we omuyapuki, ihe ota kondjo molwaashoka omuyuuki.—Eksodus 39:30.

10. (a) Uunake Kalunga a tameke okukondja oshikando shotango nosha li she ende ngiini? (b) Uutondwe mboka wa popiwa muGenesis 3:15 otawu ka kandulwa po owala ngiini, nuuwanawa washike tashi ke etela aayuuki?

10 Natu tale shoka sha li sha holoka po sho aaihokani yotango, Adam naEva ya tukululile Kalunga oshipotha. (Genesis 3:1-6) Ando Jehova okwi idhidhimikilile okwaahenuuyuuki kwawo, andola otashi ulike kutya okwa dhina ondondo ye e li Omupangeli gweshito alihe. Ihe okwa li e ya tokolele eso omolwuuyuuki we. (Aaroma 6:23) Mehunganeko lyotango mOmbiimbeli, okwa popi kutya otapu ka kala etondathano pokati kaapiya ye naalanduli ‘yeyoka,’ sha hala okutya, Satana. (Ehololo 12:9; Genesis 3:15) Etondathano ndika  otali ka hula po owala uuna Satana a nyanyagulwa po. (Aaroma 16:20) Ihe oshinima shoka otashi ke etela aayuuki omayambeko ogendji, molwaashoka enwethomo lyaSatana otali ka hulithwa po nevi alihe otali ka ningwa oparadisa. (Mateus 19:28) Manga enwethomo lyaSatana inaali hula po, mboka ye li kombinga ye otaya ka tsikila nokutula moshiponga onkalonawa yopalutu nuupambepo waapiya yaKalunga. Omathimbo gamwe, Jehova oha katuka onkatu opo a gamene aapiya ye.

Kalunga okwa hanagulile po aakolokoshi

11. Omolwashike Kalunga a li e wete a pumbwa okweeta eyelu kombanda yevi?

11 PEyelu lyaNoowa Kalunga okwa hanagulile po aakolokoshi. Genesis 6:11, 12 ota ti: “Ihe aantu ayehe oya li aawinayi koshipala shaKalunga, niikolokosha oya li ya taandela shaa mpoka. Kalunga okwa tala uuyuni nokwa mono kutya owo uuwinayi, oshoka aantu mboka ya kala mo, oya kala muuwinayi.” Mbela ota ka pitika aantu ayehe kombanda yevi ya nwethwe mo kaakolokoshi? Aawe. Jehova okwa li e wete e na oshinakugwanithwa shokuhulitha po uukolokoshi noluhondelo kombanda yevi pethimbo lyeyelu.

12. (a) Jehova okwa hunganeka shike shi na ko nasha ‘noluvalo’ lwaAbraham? (b) Omolwashike Aayamori ya li ya hanagulwa po?

12 Kalunga okwa li a ningi sha faathana naKaanana. Okwa li a popi kutya muAbraham omo tamu ka za “oluvalo” moka tamu ka yambekelwa omazimo agehe gokombanda yevi. Opo Kalunga a gwanithe po elalakano ndyoka, okwa popi kutya oluvalo lwaAbraham otalu ka pewa evi lyAakaanana, moka hamu kala Aayamori. Mbela osha li shu uka kuKalunga okutidha mo aantu mboka mevi lyawo? Jehova okwa li a hunganeke kutya otapu ka pita omimvo 400 lwaampono manga Aayamori inaaya tidhwa mo moshilongo moka sigo ‘ya yono nokuyonenena.’ * (Genesis 12:1-3; 13:14, 15; 15: 13, 16; 22:18) Pethimbo mpoka omikalo dhAayamori odha li dha shunduka thiluthilu. Aakaanana oya li taya longele iikalunga nokutilahi ombinzi noya li wo ye hole oluhondelo. (Eksodus 23:24; 34:12, 13; Numeri 33:52) Oya li wo ya dhipaga oyana noku ya yamba po omafikiloyambo. Mbela Kalunga omuyapuki ote ke etha oshigwana she shi kale mokati kaantu mboka? Aawe. Okwa ti: “Iilonga yawo oya nyateke oshilongo. Nomolwaashoka OMUWA ta geele oshilongo notu umbitha mo aantu mboka ya kala mo.” (Levitikus 18:21-25) Ihe Jehova ka li a dhipaga kehe gumwe. Aakaanana mboka ye na iikala iiwanawa ngaashi Rahab nAagibeon oya li ya hupithwa.—Josua 6:25; 9:3-27.

Jehova oha kondjo omolwedhina lye

13, 14. (a) Omolwashike Jehova a li e na okuyapulitha edhina lye? (b) Jehova okwa yogola ngiini edhina lye?

13 Molwaashoka Jehova omuyapuki, nedhina lye eyapuki. (Levitikus 22:32) Jesus okwa longo aalongwa ye okugalikana a ti: “Edhina lyoye nali yapulwe.” (Mateus 6:9) Oshipotha shoka sha ningwa muEden osha li sha nyateke edhina lyaKalunga nosha tulitha momalimbililo omukalo gwe gwokupangela. Jehova ka li nando i ipwililikile omalundilo nuunashipotha mboka. Okwa li e na okuyogola edhina lye.—Jesaja 48:11.

14 Dhiladhila ishewe kAaisraeli. Ando oya kalele muupika muEgipiti, ando euvaneko lyaKalunga kutya iigwana ayihe yokombanda yevi otayi ka lalekwa nuuyamba okupitila mOluvalo lwaAbraham, ando inali gwanithwa. Ihe sho e ya mangulula mo nokwe ya ningi oshigwana, okwa li a yogola edhina lye. Omupolofeti Daniel okwa galikana a ti: “Omuwa, Kalunga ketu, wa tembudha aantu yoye muEgipiti okoshikaha shoye oshinankondo nowi isimanekithile edhina.”—Daniel 9:15, OB-1954.

15. Omolwashike Jehova a li a mangulula Aajuda muupika waBabilon?

15 Shihokitha, Daniel okwa li a galikana sho Aajuda ya  li ya pumbwa Jehova a katuke ishewe onkatu omolwedhina lye. Aajuda oya li ya falwa muupongekwa kuBabilon omolwokwaahavulika kwawo. Oshilandopangelo shawo, Jerusalem osha li omakulukuma. Daniel okwa li a tseya kutya ngele Aajuda oya shuna koshilongo shawo otashi ka simanekitha edhina lyaJehova. Daniel okwa galikana a ti: “OMUWA, tu dhimina po. OMUWA, tu pulakena, u shi ninge. Ino shelelelwa, opo shaa ngoka e shi tseye kutya ongoye Kalunga. Oshilando shika naantu mbaka oyoye.”—Daniel 9:18, 19.

Jehova oha kondjo omolwoshigwana she

16. Yelitha kutya omolwashike sho Jehova ha popile edhina lye itaashi ti kutya ke na ko nasha nokwi ihole.

16 Mbela sho Jehova ha popile edhina lye, otashi ti kutya ke na ko nasha nokwi ihole? Hasho, molwaashoka oha gamene oshigwana she mokukatuka metsokumwe nuuyapuki we nomokuhola uuyuuki. MuGenesis ontopolwa 14, otatu lesha mo ehokololo kombinga yaakwaniilwa yane mboka ya li ya ka homona nokukwata po omwanagona gwaAbraham, Lot, pamwe nuukwanegumbo we. Kekwatho lyaKalunga, Abraham okwa li a sindi aapangeli aanankondo. Osha yela kutya ehokololo ndika lyesindano olyo lyotango okunyolwa “mEmbo lyehingo lyiita yOMUWA,” membo moka omwa nyolwa wo omalugodhi gamwe ngoka inaaga nyolwa mOmbiimbeli. (Numeri 21:14) Omasindano ogendji oga li taga ka landula ko natango.

17. Oshike tashi ulike kutya Jehova okwa li a kondjele Aaisraeli konima sho ya yi muKaanana? Gandja oshiholelwa.

17 Konima yokathimbo manga Aaisraeli inaaya thika muKaanana, Moses okwa li e ya shilipaleke a ti: ‘OMUWA Kalunga keni ote mú enditha, noye te mú kondjele, naanaa ngaashi mwe shi mono muEgipiti.’ (Deuteronomium 1:30; 20:1) Okuza kwaangoka a li a landula Moses, Josua, sigo opethimbo lyAatokolihapu nosho wo lyokupangela kwaakwaniilwa aadhiginini yaJuda, Jehova okwa li a kondjele oshigwana she nokwa li e shi pe omasindano ogendji noonkondo okusinda  aatondi yasho.—Josua 10:1-14; Aatokolihapu 4:12-17; 2 Samuel 5:17-21.

18. (a) Omolwashike twa pandula sho Jehova inaa lunduluka? (b) Oshike tashi ka ningwa po ngele uutondwe mboka wa popiwa muGenesis 3:15 wa hulithwa po?

18 Jehova ina lunduluka, nelalakano lye lyokuninga evi ndika oparadisa yombili inali lunduluka. (Genesis 1:27, 28) Oku tonde natango uukolokoshi. Oku hole natango oshigwana she nota ka katuka masiku onkatu molwasho. (Episalomi 11:7) Uutondwe mboka wa popiwa muGenesis 3:15 otawu ka hulithwa po monakuyiwa yi li popepi. Opo a yapulithe edhina lye nokugamena oshigwana she, Jehova ota ka kala natango “Ofule.”—Sakaria 14:3; Ehololo 16:14, 16.

19. (a) Gandja ethaneko kutya omolwashike oonkondo dhaKalunga dhokuhanagula tadhi tu hedhitha popepi naye. (b) Sho Kalunga ha kondjo nehalo ewanawa omolwetu, oshi na oku tu guma ngiini?

19 Dhiladhila kethaneko ndika: Natu tye ando uukwanegumbo womusamane gumwe owa ponokelwa koshilikama oshihahu nopo nduno omusamane ngoka ota tameke oku shi kondjitha noku shi dhipaga. Mbela oyana nomukulukadhi gwe otaya ka kala ye mu geela? Hasho nando, otaye ki inyengithwa kohole ye yokwaaihola mwene. Sha faathana,  natse katu na okugeela Kalunga omolwoonkondo dhe dhokuhanagula. Ihe oshi na okukokeka ohole yetu yoku mu hola sho e na ehalo ewanawa oku tu kondjela opo e tu gamene. Otu na oku mu simaneka lela omolwoonkondo dhe oonenenene. Kungeyi, otatu vulu ‘okulongela Kalunga pamukalo ngoka gwe mu opalela, tu na esimaneko netilo.’—Aahebeli 12:28.

Hedha popepi ‘nOfule’

20. Otu na okwiinyenga ngiini ngele tatu lesha mOmbiimbeli kombinga yiita yopakalunga mbyoka kaatu uvite ko nawa, nomolwashike?

20 Ombiimbeli inayi yelitha uuyelele auhe moshinima kehe shi na ko nasha nomatokolo gaJehova kombinga yiita ye. Ihe otu na okukala aluhe nuushili kutya iha longitha nando oonkondo dhokuhanagula momukalo gwaahe li pauyuuki nogwonyanya. Ngele tatu konakona oshikalimo shOmbiimbeli nenge omauyelele gamwe otashi tu kwathele tu kale netaloko ewanawa. (Omayeletumbulo 18:13) Nonando katu na uuyelele wi ihwa po, okwiilonga nokutedhatedha kuukwatya we wa dhenga mbanda otashi ke tu kwathela kaatu kale momalimbililo ngoka tashi vulika ge tu adhe. Ngele tatu shi ningi otatu ka mona kutya otu na omatompelo ogendji okukala twi inekela Jehova Kalunga.—Job 34:12.

21. Nonando Jehova “Ofule,” oku na omaukwatya geni?

21 Nonando Jehova “Ofule” shika itashi ti kutya oku hole olugodhi. Memoniko lyaHesekiel lyetemba lyomegulu, Jehova ota faathanithwa nomuntu ti ilongekidhile oku ka kondjitha aatondi ye. Opo nee Hesekiel okwa mono Kalunga a dhingolokwa kuutamvula mboka wu li endhindhiliko lyombili. (Genesis 9:13; Hesekiel 1:28; Ehololo 4:3) Osha yela kutya okwa ngungumana nomunambili. Omuyapostoli Johannes okwa nyola a ti: “Kalunga oye ohole.” (1 Johannes 4:8) Omaukwatya ge agehe oga gwanenena noge li pandjele. Katu na tuu uuthembahenda wokuhedha popepi naKalunga omunankondo nomunahole!

^ okat. 1 Omunandjokonona Omujuda, Josephus okwa ti kutya Aahebeli oya li ya “landulwa komatemba giita 600 pamwe naalondinkambe 50 000 naakwiita yokolupadhi 200 000 ya homata nokomayego.”—Jewish Antiquities, II, 324 [embo 15, epandja 3].

^ okat. 12 Osha yela kutya oshitya “Aayamori” osha kwatela mo aantu yomuKaanana.—Deuteronomium 1:6-8, 19-21, 27; Josua 24:15, 18.