Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 7

“Kalunga oye epopilongulu” nomugameni gwetu

“Kalunga oye epopilongulu” nomugameni gwetu

1, 2. Aaisraeli oya li moshiponga shashike mo 1513 K.E.N. sho yu uka mombuga Sinai, na Jehova okwa li e ya shilipalekele shike?

AAISRAELI oya li moshiponga petameko lyo 1513 K.E.N. sho yu uka mombuga Sinai. * Oya li ye na okuya molweendo olule nolutilithi taya piti ‘mombuga ontilithi nonenenene yi na omayoka guuzigo noondje.’ (Deuteronomium 8:15) Oya li wo taya vulu okuponokelwa kiilongo mbyoka yi ya tonde. Jehova okwe etha oshigwana she shi kale monkalo ya tya ngaaka. Mbela okwa li ta vulu oku shi gamena e li Kalunga kasho?

2 Jehova okwe shi shilipaleke a ti: “Omwa mono shoka ngame, OMUWA, nda ningile Aaegipiti, nonkene nde mú humbata, ngaashi ekodhi tali humbata uunimona komawawa galyo, nonde mú eta huka.” (Eksodus 19:4) Okwa li a dhimbulukitha oshigwana she kutya oye e shi mangulula muupika waEgipiti, a fa ekodhi tali humbata nokugamena uudhilona walyo. Ihe opu na omatompelo galwe kutya omolwashike ‘omawawa gekodhi’ tago opalele okuthaneka egameno lyopakalunga.

3. Omolwashike ‘omawawa gekodhi’ tago opalele okuthaneka egameno lyopakalunga?

3 Ekodhi oli na omawawa omanene noge na oonkondo ngoka hali longitha ngele tali tengele mombanda, nokuninga iinima yilwe. Uuna ku na omutenya ekodhi ekiintu ohali yalaleke omawawa galyo ngoka ge na uule woometa 2 lwaampono koshihandhila shalyo opo li gamene uudhilona walyo komutenya. Omathimbo gamwe ohali siikile uudhilona walyo nomawawa opo li wu gamene kuutalala. Ngaashi owala ekodhi hali gamene uudhilona walyo naJehova okwa li a shigi  nokugamena oshigwana she oshipe, shaIsraeli. Sho sha li mombuga osha li tashi vulu okumona egameno momawawa ge omanankondo, shampa owala tashi kala oshidhiginini kuye. (Deuteronomium 32:9-11; Episalomi 36:7) Mbela nokunena Kalunga oha gamene oshigwana she?

Kalunga oku uvaneka kutya ote ke tu gamena

4, 5. Omolwashike tu na okwi inekela thiluthilu meuvaneko lyaKalunga kutya ote ke tu gamena?

4 Jehova oha vulu lela okugamena aapiya ye. Oye “Kalunga Omunankondoawike” edhinasimaneko ndyoka tali ulike kutya oonkondo dhe inadhi ngambekwa. (Genesis 17:1) Ngaashi owala kaapu na ngoka ha vulu okukeelela omakuthikuthi gomeya, kapu na ngoka ta vulu okuya moshipala oonkondo dhe. Molwaashoka ota vulu okuninga kehe shimwe shoka a hala, otashi vulika tu pule kutya ‘mbela oshi li ehalo lye okulongitha oonkondo dhe opo a gamene oshigwana she?’

5 Eeno, Jehova oku uvaneka kutya ota ka gamena oshigwana she. Episalomi 46:1 otali ti: “Kalunga oye epopilongulu noonkondo dhetu. Okwi ilongekidha aluhe okukwatha momathimbo guudhigu.” Molwaashoka Kalunga ‘iha fundju,’ otatu vulu okwi inekela thiluthilu meuvaneko lye kutya ote ke tu gamena. (Titus 1:2) Natu tale omathaneko gamwe ngoka tagu ulike nkene he tu gamene.

6, 7. (a) Aasita yopethimbo lyOmbiimbeli oya li haya gamene ngiini oonzi dhawo? (b) Ombiimbeli otayi thaneke ngiini kutya Jehova okwa halelela okushiga nokugamena oonzi dhe?

6 Jehova oye Omusita gwetu ‘tse oye noonzi dhuusita we.’ (Episalomi 23:1; 100:3) Oonzi odho iinamwenyo yimwe yopaantu mbyoka ihaayi vulu okwiigamena. Omusita gwoonzi pethimbo lyOmbiimbeli okwa li e na okugamena oonzi dhe koonime, komambungu, komamwanka nokaafuthi.  (1 Samuel 17:34, 35; Johannes 10:12, 13) Ihe opu na omathimbo gamwe omusita e na okuungaunga noonzi nolukeno. Uuna onzi ya valele miihwa, omusita oku na oku yi gamena nokuhumbata po okanzigona hoka ihaaka vulu okwiigamena e te ka fala koshigunda.

‘Ote dhi humbata momaako ge’

7 Jehova oti ifaathanitha nomusita gwoonzi, ote tu shilipaleke kutya okwa halelela oku tu gamena. (Hesekiel 34:11-16) Dhimbulukwa oohapu dhe ndhoka dhi li muJesaja 40:11 dha popiwa mOntopolwa 2 yembo ndika tadhi ti: “Ongomusita ta litha oshigunda she; oonzigona ote dhi gongele pamwe noku dhi humbata momaako ge; oonyali ote dhi sisidha nawa.” Ohashi ende ngiini opo okanzigona ka kale “momaako” gomusita nenge monguwo ye yokombanda? Okanzi otashi vulika ke ye komusita, notaka vulu oku mu iwegenyena kokugulu. Ihe omusita oye e na okupetama e te ka humbata po noku ka tula pontulo ye mpoka taka kala ke li megameno. Shika itashi thaneke tuu nawa nkene Omusita gwetu Omunene e na ehalo oku tu shiga noku tu gamena!

8. (a) Kalunga oku uvaneka okugamena oolye, naashika otashi ulikwa ngiini mOmayeletumbulo 18:10? (b) Okukonga egameno medhina lyaKalunga osha kwatela mo shike?

8 Kalunga oku uvaneka kutya ote ke tu gamena, ihe ote ke shi ningila owala mboka taya hedha popepi naye. Omayeletumbulo 18:10 otaga ti: “Edhina lyOMUWA olyo oshungo ya kola; omuyuuki ota matukile mo e ta gamenwa.” Pethimbo lyOmbiimbeli, omathimbo gamwe ooshungo odha li hadhi tungwa miihwa opo aantu ya vule okugamenwa. Ihe ngoka e li moshiponga oku na okumatukila kuyo opo a gamenwe. Osha faathana nokukonga egameno medhina lyaKalunga. Oku li konga otashi ti oshindji kaashi shi owala oku li popya to li endulula. Pehala lyaashono, otu na okutseya nokwiinekela mwene gwalyo nokukala metsokumwe nomithikampango dhe dhuuyuuki. Jehova ke shi tuu omunahenda sho e tu shilipaleka kutya ngele otwa kala twe mu itaala ota kala a fa oshungo yoku tu gamena!

 ‘Kalunga okwa gwana oku tu hupitha’

9. Ongiini Jehova a ninga oshindji kaashi shi owala okuuvaneka kutya ote ke tu gamena?

9 Jehova okwa ninga oshindji kaashi shi owala oku tu uvanekela kutya ote ke tu gamena. Pethimbo lyOmbiimbeli, okwe shi ulika pashikumithalonga kutya ota vulu okugamena oshigwana she. Pethimbo lyaIsraeli “oshikaha” she oshinankondo olundji osha li hashi gamene oshigwana she kaatondi yasho aanankondo. (Eksodus 7:4, OB-1954) Ihe Jehova oha longitha wo oonkondo dhe okugamena oohandimwe.

10, 11. Iiholelwa yOmbiimbeli yini tayi ulike nkene Jehova ha longitha oonkondo dhe okugamena oohandimwe?

10 Sho aagundjuka yatatu Aahebeli, Shadrak, Meshak, Abednego ya tindi okwiinyongamena oshiyelekela shoshingoli shomukwaniilwa Nebukadnezzar, okwa geye nokwe ya tilitha kutya ote ke yu umbila meziko lya hanya. Omukwaniilwa ngoka a li omunankondo kombanda yevi, okwe ya sheke a ti: “Otamu dhiladhila kutya oku na kalunga ta vulu oku mú hupitha?” (Daniel 3:15) Aagundjuka yatatu oya li yi inekela thiluthilu kutya Kalunga kawo oku na oonkondo oku ya hupitha, ihe inaya kala taye shi itadhele. (Daniel 3:17, 18) Odhoshili kutya Kalunga kawo omunankondoadhihe okwa li e ya hupitha, nonando eziko olya li lya hanyekwa lwiikando iheyali shi vulithe shito. Okwe ya gamena, nomukwaniilwa okwa li e shi zimine a ti: “Kaku na kalunga kalwe ta vulu okuhupitha, ngaashi twe shi mono nena.”—Daniel 3:29.

11 Jehova okwa li wo u ulike kutya oku na oonkondo sho a lundululile Omwana epona moshivalelo shomukadhona Omujuda, Maria. Omuyengeli okwa lombwele Maria kutya “oto ka ninga omusimba e to vala okanona okamati.” Omuyengeli okwa yelitha a ti: “Ombepo Ondjapuki otayi ku lambele, noonkondo dhaKalunga gwokombandambanda otadhi ku siikile.” (Lukas 1:31, 35) Omwenyo gwOmwana gwaKalunga ogwa li tagu monika gwa fa gu li moshiponga. Mbela okwa li ta vulu okuthigulula uulunde  nokwaahagwanenena kuyina? Mbela Satana okwa li ta vulu okweehameka nenge a dhipage Omwana gwaKalunga omanga inaa valwa? Aawe. Jehova okwa li a gamene Maria opo pwaaha kale nando osha tashi vulu okweehameka okanona hoka taka koko moshivalelo she, ngaashi okwaahagwanenena, okweehamekwa kusha, okudhipagwa komuntu gwontumba nenge kompwidhuli. Jehova okwa tsikile nokugamena Jesus muugundjuka we. (Mateus 2:1-15) Kapu na sha shoka sha li tashi vulu okuhanagula po Omwana gwaKalunga omuholike, sigo euthwathimbo lyaKalunga lya thiki.

12. Omolwashike Jehova a li a gamene oohandimwe pashikumithalonga pethimbo lyOmbiimbeli?

12 Omolwashike Kalunga a li a gamene oohandimwe pashikumithalonga? Olundji okwa li e shi ningi opo a gamene okugwanithwa kwelalakano lye ndyoka li li oshinima sha simanenena noonkondo. Pashiholelwa, osha li sha pumbiwa okahanona Jesus ka hupithwe opo ka gwanithe po elalakano lyaKalunga, ndyoka lya li tali ke etela aantu ayehe uuwanawa. Omahokololo ogendji ogu ulika kutya oonkondo dhokugamena odhi li oshitopolwa shOmanyolo ga nwethwa mo ngoka ga ‘nyolwa opo ge tu longe tu kale netegameno tali zi mokwiidhidhimika notu mone omukumo ngele tatu lesha oohapu dhaKalunga.’ (Aaroma 15: 4) Iiholelwa mbika otayi koleke eitaalo lyetu muKalunga Omunankondoadhihe. Ihe kunena ohe tu gamene ngiini?

Egameno lyopakalunga otali ti shike?

13. Mbela Jehova oku na okulonga iikumithalonga omolwetu? Shi yelitha.

13 Egameno ndyoka Kalunga e tu uvanekela itali ti kutya oku na okulonga iikumithalonga omolwetu. Kalunga ine tu uvanekela onkalamwenyo yaa na omaupyakadhi muuyuni mbuka. Aapiya yaJehova oyendji aadhiginini otaya hepekwa koluhepo, kiita, komikithi nokeso. Jesus okwa li a lombwele aalongwa ye kutya otashi vulika yamwe yomuyo ya ka dhipagwe omolweitaalo lyawo. Okwe ya ladhipike yi idhidhimike  sigo ehulilo. (Mateus 24:9, 13) Ando Jehova okwa li he tu gamene ethimbo alihe pashikumithalonga, ando Satana ote ke mu sheka noku mu pataneka kutya ihatu mu longele molwaashoka tu mu hole shili.—Job 1:9, 10.

14. Iiholelwa yini tayi ulike kutya Kalunga iha gamene aluhe aapiya ye momukalo gwa faathana?

14 Pethimbo lyOmbiimbeli, Jehova ka li a longitha oonkondo dhe a gamene aapiya ye keso lyombaadhilila. Pashiholelwa, omuyapostoli Jakob okwa dhipagithwa kuHerodes mo 44 E.N. lwaampono, ihe konima yokathimbo Petrus okwa li a hupithwa “miikaha yaHerodes.” (Iilonga 12:1-11) Johannes nomumwayina Jakob oya kala nomwenyo ethimbo ele ye vule Petrus naJakob. Osha yela kutya inatu tegelela Kalunga a gamene aapiya ye momukalo gwa faathana. Kakele kaashoka, “ethimbo neuthilo” otali adha ayehe. (Omuuvithi 9:11) Jehova ohe tu gamene ngiini kunena?

Jehova ohe tu gamene palutu

15, 16. (a) Oshike tashi ulike kutya Jehova oha gamene aalongeli ye palutu ye li ongundu? (b) Omolwashike tu na okukala neinekelo kutya Jehova ota ka gamena aapiya ye ngashingeyi nopethimbo “lyuudhigu uunene”?

15 Tango natu tale shi na ko nasha negameno lyopalutu. Jehova oha gamene aalongeli ye, ye li ongundu. Ngele hasho, otaya ka ninga iihakanwa yaSatana nuupu. Natu kale tu shi kutya Satana “omupangeli guuyuni mbuka,” okwa halelela okuhulitha po elongelokalunga lyashili. (Johannes 12:31; Ehololo 12:17) Omapangelo gamwe omanankondo muuyuni oga li gi indike iilonga yetu yokuuvitha noga kambadhala oku tu dhima po thiluthilu. Ihe aapiya yaJehova aadhiginini oya tsikile nokuuvitha nopwaahe na ezimbuko. Omolwashike iigwana iinankondo ya nyengwa okuhulitha po iilonga yetu yopaKriste, nonando otu li aashona notwa fa kaatu na omugameni? Omolwaashoka Jehova ohe tu gamene nomawawa ge gopathaneko.—Episalomi 17:7, 8.

16 Ongiini kombinga yegameno lyopalutu pethimbo  “lyuudhigu uunene” mboka tawu ya? Inatu pumbwa okutila esiku lyaKalunga lyepangulo, molwaashoka “oku shi shi, nkene e na okuhupitha aantu ye momamakelo ngoka tage ya adha. Ihe oye ota geele aakolokoshi sigo omesiku lyepangulo.” (Ehololo 7:14; 2 Petrus 2:9) Otatu vulu aluhe okukala nuushili wiinima iyali tayi landula. Shotango, Jehova ite ke etha nando aapiya ye aadhiginini ya dhimwe po thiluthilu kombanda yevi. Oshitiyali, ota ka pa aapiya ye aadhiginini omwenyo gwaaluhe muuyuni uupe wuuyuuki. Mboka ya sa ya kakatela uudhiginini ote ke ya yumudha. Kapu na oshinima shilwe oshiwanawa koonakusa, kaashi shi okudhimbulukiwa kuKalunga, sha hala okutya, oku ka yumudhwa.—Johannes 5:28, 29.

17. Jehova ohe tu gamenene ngiini okupitila mOohapu dhe?

17 Kunena Jehova ohe tu gamene okupitila ‘moohapu’ dhe ndhoka dhi na omwenyo noonkondo okulundulula omitima dhaantu nonkalamwenyo yawo. (Aahebeli 4:12) Otatu vulu okugamenwa palutu ngele otwa tula miilonga omakotampango gadho. Jesaja 48:18 ota ti: “Ongame OMUWA Kalunga koye, ngoka tii ku longele shoka she ku opalela.” Osha yela kutya otatu ka kala nuukolele nomwenyo omule ngele ohatu kala metsokumwe nOohapu dhaKalunga. Pashiholelwa, molwaashoka ohatu tula miilonga omayele gOmbiimbeli okuyanda oluhondelo nokwiitheta edhilo kehe, kungawo otatu henuka omikalo dha nyata nodha nika oshiponga ndhoka tadhi yono po onkalamwenyo yaakaanakalunga oyendji. (Iilonga 15:29; 2 Aakorinto 7:1) Inatu pandula tuu sho twa gamenwa kOohapu dhaKalunga!

Jehova ohe tu gamene pambepo

18. Jehova ohe tu gamene ngiini pambepo?

18 Shoka sha simanenena osho kutya Jehova Kalunga ketu omunahole ohe tu gamene kiiponga yopambepo. Ohe tu homateke iikondjitho yopambepo mbyoka twa pumbwa opo tu idhidhimikile omamakelo notu kaleke po ekwatathano lyetu naye. Ohe tu gamene tu kale nomwenyo, ina hala owala  tu kale nomwenyo ethimbo efupi, ihe osigo aluhe. Natu tale omalongekidho ngoka a tula po oku tu gamena pambepo.

19. Ombepo yaJehova ohayi tu kwathele ngiini tu idhidhimikile emakelo kehe twa taalela?

19 Jehova ohu “uvu omagalikano.” (Episalomi 65:2) Uuna twa gwililwa po kiimpwiyu yonkalamwenyo, otatu ka pepelelwa owala ngele twe mu mbumbulile omitima dhetu. (Aafilippi 4:6, 7) Nonando Jehova iha kutha po omamakelo getu pashikumithalonga, oha yamukula omagalikano getu taga zi komutima nota vulu oku tu pa uunongo tu ungaunge nago. (Jakob 1:5, 6) Oha gandja ishewe ombepo ye ondjapuki kwaamboka taye yi mu indile. (Lukas 11:13) Ombepo ndjoka ohayi tu kwathele tu idhidhimikile emakelo kehe nenge uupyakadhi mboka we tu taalela. Otayi vulu oku tu pa ‘oonkondo ndhoka kaatu na’ tu idhidhimike sigo Jehova a hulitha po omaupyakadhi agehe gayemateka.—2 Aakorinto 4:7.

20. Jehova ohu ulike ngiini oonkondo dhe dhoku tu gamena okupitila maalongelikalunga ooyakwetu?

20 Ethimbo limwe Jehova otashi vulika u ulike oonkondo dhe dhoku tu gamena okupitila maalongelikalunga ooyakwetu. Okwa hanganitha oshigwana she muuyuni auhe ‘mohole yuumwayinathana.’ (1 Petrus 2:17, KB; Johannes 6:44)  Ohole ndjoka yi li mokati kaamwatate oyi li euliko kutya ombepo ondjapuki yaKalunga oyi na oonkondo okunwetha mo aantu ya kale ye na omaukwatya omawanawa. Ombepo ndjoka ohayi tu kwathele tu imike iiyimati ngaashi ohole, uukuume nuuwanawa, omaukwatya ngoka omawanawa noga dhenga mbanda. (Aagalati 5:22, 23) Onkee ano, ngele tu li moothina e tatu pewa omayele tage tu kwathele komwiitaali omukwetu nenge eladhipiko ndyoka twa pumbwa, natu pandule Jehova omolwesiloshimpwiyu lya tya ngaka.

21. (a) Iikulya yopambepo yini Jehova he tu pe pethimbo okupitila ‘momupiya omudhiginini nomunandunge?’ (b) Omauwanawa geni wa mona momasiloshimpwiyu gaJehova goku tu gamena pambepo?

21 Jehova ohe tu pe wo iikulya yopambepo pethimbo opo e tu gamene. Okwa tula po “omupiya omudhiginini nomunandunge,” (KB) e tu pe iikulya yopambepo yi tu kwathele tu mone oonkondo okuza mOohapu dhe. Ongundu yomupiya ndjoka ohayi longitha iileshomwa ngaashi Oshungolangelo no-Awake! nosho wo okugongala, iigongi yoshikandjo noyoshitopolwa moku tu pa “iikulya pethimbo” uuna twe yi pumbwa. (Mateus 24:45) Mbela owu uva nale sha pokugongala kwopaKriste, metyokosha, moshipopiwa nomegalikano shoka tashi ku tsu omukumo noku ku ladhipika? Mbela opu na oshitopolwa shontumba miileshomwa yetu sha guma onkalamwenyo yoye? Dhimbulukwa kutya Jehova oye ha gandja omasiloshimpwiyu agehe ngoka opo e tu gamene pambepo.

22. Jehova oha longitha aluhe oonkondo dhe ngiini, nomolwashike oku shi ninga taku tu etele uuwanawa?

22 Jehova oye oshikandekitho “kumboka taa kongo egameno.” (Episalomi 18:30) Otu shi kutya iha longitha oonkondo dhe e tu gamene kiiponga ayihe ngashingeyi. Ihe ohe dhi longitha aluhe opo elalakano lye li gwanithwe. Ohe shi ningi omolwuuwanawa woshigwana she. Ngele tatu hedha kuye nokwiikaleka mohole ye ote ke tu pa omwenyo gwaaluhe gwa gwanenena. Uuna tatu kaleke etegameno ndyoka momadhiladhilo, otatu ka tala ko okumona iihuna kehe monkalelo ndjika ku li ‘kwopakathimbo.’—2 Aakorinto 4:17.

[Enyolo lyopevi]

^ okat. 1 K.E.N. otashi ti “Komeho yEyalulo lyoomvula dhoNgashingeyi.”