Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 23

“Okwa kala e tu hole tango”

“Okwa kala e tu hole tango”

1-3. Oshike sha ningitha eso lyaJesus li kale lyi ikalekelwa mondjokonona?

OMIMVO 2 000 dha piti, omulumentu gumwe kee na ondjo okwa li a pangulwa e ta lundilwa kutya okwa longa omuyonena nokonima yaashoka okwa li a dhipagelwa koshiti. Shika osha li sha ningwa pethimbo lyokwenye lwaampono. Shoka hasho owala oshiningwanima shinyanyalitha noshaahe li pauyuuki sha ningwa mondjokonona yaantu. Ihe eso lyomulumentu ngoka olya li lyi ikalekelwa.

2 Sho omulumentu ngoka a hepekwa nokuuvithwa omwenyo omutoye, kegulu okwa li kwa ningwa oshinima oshindhindhilikwedhi tashi ulike kutya eso lye olya simanenena. Nonando osha li sha ningwa moshanga shomutenya, opwa holoka omilema ombaadhilila. Omunandjokonona gumwe okwe shi popya kutya “etango inali minikila.” (Lukas 23:44, 45) Omanga omulumentu ngoka inaa fudha mo omufudho gwe gwahugunina, okwa popi oohapu kaadhi shi okudhimbiwa a ti: “Ayihe ya gwanithwa!” Okugandja omwenyo gwe osha li oshinima sha simana noonkondo nosha li euliko lyohole mondjokonona ayihe yaantu.—Johannes 15:13; 19:30.

3 Osha yela kutya omulumentu ngoka oJesus Kristus. Osha tseyika nawa kutya okwa hepekwa nokwa si mo 14 Nisan 33 E.N. Ihe olundji aantu kaye na ko nasha noshinima shoka sha simana. Nonando Jesus okwa li a hepekwa noonkondo opwa li natango pu na gumwe ngoka she mu ehameka noonkondo. Omuntu ngoka oye nokuli a li a ningi eiyambo enenenene mesiku ndyoka, naashoka osha li euliko enenenene lyohole meshito. Omolwashike taku tiwa ngawo? Eyamukulo otali tu kwathele tu uve ko oshikundathanwa sha simanenena: Ohole yaJehova.

 Oshilonga oshinene shohole

4. Omukwiita Omuroma okwa li a mono ngiini kutya Jesus omuntu i ikalekelwa, nokwa li a thiki pehulithodhiladhilo lini?

4 Omukuluntu gwaakwiita Omuroma ngoka a li ta tonatele mboka taya alele Jesus okwa li a kuminwa omilema ndhoka dha tetekele eso lye nosho wo ekakamo lyevi enene ndyoka lya landula ko. Okwa ti: “Nguka okwa li Omuna gwaKalunga.” (Mateus 27:54) Osha yela kutya Jesus omuntu i ikalekelwa. Omukwiita ngoka okwa li a kwathele opo Omwana awike gwOmukombandambanda a dhipagwe. He oku hole Omwana shi thike peni?

5. Jehova nOmwana oya kala pamwe uule wethimbo li thike peni megulu?

5 Ombiimbeli otayi ithana Jesus “omutango gwiishitwa ayihe.” (Aakolossa 1:15) Dhiladhila owala kutya Omwana gwaJehova okwa kala ko nale manga eshito inaali shitwa. Mbela oya kala ethimbo li thike peni naHe? Aanongononi yamwe oya tengeneka kutya ewangandjo olya kala po omimvo omabiliyona 13. Omimvo ndhoka odhindji noonkondo. Kutya nee ewangandjo oli na shili omimvo ndhoka nenge hasho, shoka sha yela osho kutya Omwana gwaKalunga okwa kala ko ethimbo ele e vulithe ewangandjo. Ethimbo alihe ndyoka okwa kala ta ningi shike?

6. (a) Omwana gwaJehova okwa li ha longo shike omanga inee ya kombanda yevi e li omuntu? (b) Jehova nOmwana oye na ekwatathano lya tya ngiini?

6 Omwana okwa kala ta longo pamwe naHe e li “engomba.” (Omayeletumbulo 8:30) Ombiimbeli otayi ti: ‘Kaku na nando oshinima shimwe shomeshito inaashi shitwa Omwana kee po.’ (Johannes 1:3) Jehova okwa kala ta longo pamwe nOmwana okushita iinima ayihe. Kaya li tuu haya nyanyukilwa pamwe! Oyendji otaye shi zimine kutya ohole pokati komuvali nomwana ohayi kala ya kola noonkondo. Ohole oyo “epaya tali vulu okumangela iinima ayihe kumwe.” (Aakolossa 3:14) Mbela olye ta vulu okuuva ko lela kutya ekwatathano ndyoka li li pokati kaKalunga nOmwana olya kola shi thike peni mokutala  kethimbo ele ndyoka ya kala pamwe? Osha yela kutya oye na ekwatathano lya kola kaaku na we.

7. Jehova okwa li u uvite ngiini sho Jesus a ninginithwa?

7 Jehova okwa tumu Omwana kombanda yevi a valwe e li omuntu gwopanyama. Kungawo, ka li ta vulu okweendathana nOmwana omuholike megulu uule womimvo omilongo dhontumba. Omolwohole ye onene, okwa kala ha tala okuza megulu sho Omwana ta koko e li omuntu a gwanenena. Jesus okwa li a ninginithwa sho e na oomvula 30 lwaampono. Jehova okwa li a nyanyukilwa oshinima shoka noonkondo. Okwa popi okuza megulu a ti: “Nguka oye Omumwandje omuholike nde mu hokwa.” (Mateus 3:17) Jehova ka li tuu a nyanyukwa sho a tala Jesus ta gwanitha po omahunganeko agehe nuudhigini nokulonga ehalo Lye!—Johannes 5:36; 17:4.

8, 9. (a) Jesus okwa li a ningilwa shike mo 14 Nisan 33 E.N., naashika osha li sha gumu He gwomegulu ngiini? (b) Omolwashike Jehova a li e etha Omwana a monithwe iihuna noku dhipagwe?

8 Jehova okwa li u uvite ngiini mo 14 Nisan 33 E.N.? Okwa li u uvite ngiini shoJesus a kengelelwa nokukwatwa po kongundu yaantu uusiku mboka? Sho ookuume ke ye mu thigi po naasho Jesus ta pangulwa kaashi li pauyuuki? Sho ta shekwa, ta hiyilwa omayele naasho ta dhengwa noongonyo? Okwa li uvite ngiini sho Omwana ta dhengwa noongola? Sho oompadhi niikaha ye tayi mbambangelwa oomboha koshiti nokuthigwa ko e endjelela omanga aantu taye mu sheke? Okwa li u uvite ngiini sho Omwana a lili mokule kuuwehame mboka tawu uvitha omwenyo omutoye? Okwa li u uvite ngiini sho Omwana a fudha mo omufudho gwe gwahugunina e ta si?—Mateus 26:14-16, 46, 47, 56, 59, 67; 27:38-44, 46; Johannes 19:1.

‘Kalunga okwa gandja Omwana awike’

9 Itatu vulu naanaa okupopya nkene Jehova a li u uvite. Molwaashoka oku na omaiyuvo, uuwehame mboka a li e uvite omolweso lyOmwana itatu vulu okuwu popya. Omolwashike e etha shoka shi ningwe? Jehova okwe tu hololele oshinima oshikumithi muJohannes 3:16, ovelise yOmbiimbeli ya  simanenena ndjoka tayi ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” Okwe shi ningi omolwohole ye. Osha li oshilonga oshinene shohole yaJehova sho a tumu Omwana a monithwe iihuna noku tu sile.

Shoka ohole yopakalunga tayi ti

10. Aantu oye na ompumbwe yashike, noshike sha ningwa po naashoka oshitya “ohole” tashi ti?

10 Oshitya “ohole” otashi ti shike? Ohole oyo shinima shoka aantu oyendji ya pumbwa okuulikilwa. Aantu ohaya kala yu uvite uugumbo ngele tayu ulukilwa ohole okuza pevalo sigo omuukuluntu. Ohashi vulika ya polimane nenge ya se omutima ngele itaye yi ulukilwa. Ihe oshi li oshidhigu okufatulula kutya ohole oshike? Aantu ohaye yi popi olundji. Opu na omambo, omaimbilo nuutewo owundji wundji kombinga yayo. Ihe olundji aantu ihaye yi fatulula kutya oyo oshike. Ohaya longitha olundji oshitya shoka, ihe kaye shi kutya otashi ti shike.

11, 12. (a) Openi tatu vulu okwiilonga oshindji kombinga yohole, nomolwashike tatu tile ngawo? (b) MOshigreka shonale omwa popiwa omaludhi gohole geni, noshitya shini tashi popi “ohole” sha longithwa olundji mOmanyolo gopaKriste gOshigreka? (Tala wo enyolo lyopevi.) (c) Agape oshike?

11 Ihe Ombiimbeli otayi fatulula nawa kutya ohole oshike. Embo Expository Dictionary of New Testament Words, lya nyolwa kuVine olya ti: “Ohole ohayi ndhindhilikwa owala okupitila miilonga mbyoka tayi longwa komuntu omunahole.” Ombiimbeli otayi tu longo uukwatya wohole yaJehova mboka hu ulukile iishitwa ye ayihe. Pashiholelwa, oshike sha li tashi vulu okuulika kutya ohole ye onene yi thike peni, kaashi shi okugandja Omwana? Moontopolwa tadhi landula otatu ka tala kiiholelwa yilwe oyindji yi na ko nasha nankene Jehova u ulika ohole ye pailonga. Natango, otatu ki ilonga oshindji shi na ko nasha nankene iitya yopetameko mbyoka ya tolokwa “ohole” ya longithwa mOmbiimbeli. MOshigreka shonale,  omwa li iitya ine tayi popi “ohole.” * Shimwe shomuyo o-agape shoka sha longithwa olundji mOmanyolo gopaKriste gOshigreka. Embwiitya lyOmbiimbeli limwe otali ti kutya “ohole osho oshitya tashi gandja unene eityo lya simanenenena.” Omolwashike mbela?

12 Oshitya agape otashi ulike kohole ndjoka hayi wilikwa komakotampango. Kashi shi owala eiyuvo ndyoka aantu haya kala ye uvitile ooyakwawo. Oshitya shoka oshi na eityo lya mbwalangandja nosha kwatela mo okukatuka oonkatu dha dhiladhilwa nawa. Kakele kaashono, agape oludhi lwohole ndjoka inaayi kwatela mo nando iikala yokwiihola mwene. Pashiholelwa, dhiladhila ishewe kombinga yaJohannes 3:16. “Uuyuni” mboka Kalunga a kala e hole sho a gandja Omwana awike oshike? Owo aantu mboka ya kulilwa. Muyo omwa kwatelwa aantu oyendji mboka haya longo uulunde mokukalamwenyo kwawo. Mbela Jehova oku hole kehe gumwe ngaashi a li e hole kuume ke omudhiginini Abraham? (Jakob 2:23) Aawe, ihe oha ningile aantu ayehe uuwanawa omolwohole ye, nokuli nonando otashi pula a ninge omaiyambo omanene. Okwa hala ayehe yi itedhulule noye ethe ondjila dhawo dhuulunde. (2 Petrus 3:9) Oyendji mboka ye shi ninga ohe ya taamba ko nenyanyu ye li ookuume ke.

13, 14. Oshike tashi ulike kutya olundji agape oya kwatela mo ohamu?

13 Aantu yamwe oyu uva ko oshitya agape papuka. Ohaya dhiladhila kutya oludhi lwohole ndoka inalu kwatela mo omaiyuvo, ihe omadhiladhilo owala. Oshili oyo kutya olundji ohole ndjoka oya kwatela mo omaiyuvo gohamu. Sho Johannes a nyola kutya “He oku hole Omwana,” okwa longitha oshitya  agape. Mbela ohole ndjoka inayi kwatela mo omaiyuvo gohamu? Ndhindhilika kutya Jesus okwa li a longitha oshitya phileo a ti: “He oku hole Omwana.” (Johannes 3:35; 5:20) Olundji ohole yaJehova oya kwatela mo omaiyuvo gohamu. Ihe ohole ye ihayi pangelwa komaiyuvo. Ohayi wilikwa aluhe komakotampango ge gopandunge noge li pauyuuki.

14 Ngaashi twe shi mona nale, omaukwatya agehe gaJehova omakumithi, oga gwanenena notaga hokitha. Ihe ohole oyo dhingi yi vule agehe. Oyo unene hayi tu hilile kuye molwaashoka oyo uukwatya we wa tongomana. Otu shi shi ngiini?

“Kalunga oye ohole”

15. Ombiimbeli otayi popi shike kombinga yohole yaJehova, nomomukalo guni oohapu ndhoka dhi ikalekelwa? (Tala wo enyolo lyopevi.)

15 Ombiimbeli oya popya kombinga yohole yaJehova momukalo omundhindhilikwedhi, ihe omukalo ngoka inagu longithwa nando shi na ko nasha nomaukwatya ge galwe ga tongomana. Omanyolo inaga tya kutya Kalunga oye oonkondo, uuyuuki nenge uunongo. Oku na omaukwatya ngoka, oye onzo onenenene yomaukwatya ngoka gatatu, nokapu na ngoka ta yelekanithwa naye ngele tashi ya pugo. Ihe uukwatya we uutine, owa popiwa momukalo gwi ikalekelwa taku ti: “Kalunga oye ohole.” * (1 Johannes 4:8) Shoka osha hala okutya ngiini?

16-18. (a) Omolwashike Ombiimbeli tayi ti kutya “Kalunga oye ohole”? (b) Omolwashike she eleka sho omuntu oye ta thaneke ohole yaJehova miishitwa ayihe yokombanda yevi?

16 Uutumbulilo “Kalunga oye ohole” itawu ti kutya “Kalunga ota yelekanithwa nohole.” Itatu vulu okulundulula uutumbulilo mboka tu tye “ohole oyo Kalunga.” Jehova ita vulu okuyelekwa nuukwatya wiinima ihaayi monika. Ye omuntu e na omaiyuvo  nosho wo uukwatya wohole. Ihe ohole oyo uukwatya we wa shiga ko wu vule agehe. Embo limwe lyomauyelele olya fatulula ovelise ndjika tali ti: “Ohole oyo uukwatya waKalunga.” Olundji ohashi vulika tu dhiladhile ngeyi: Oonkondo dhaJehova odho hadhi mu ningitha a katuke oonkatu. Uuyuuki we nuunongo we owo hawu wilike omukalo moka ha katuka. Ihe ohole oyo hayi mu inyengitha a katuke oonkatu. Ohole oyo aluhe hayi dhana onkandangala momukalo moka ha longitha omaukwatya ge galwe.

17 Olundji ohaku tiwa kutya Jehova oye hu ulike ohole momukalo gwa dhenga mbanda. Onkee ano, ngele otwa hala okwiilonga kombinga yohole ndjoka hayi wilikwa komakotampango, otu na okwiilonga kombinga yaJehova. Odhoshili kutya uukwatya mboka uuwanawa ohatu wu mono wo maantu. Ihe omolwashike ye wu na? Pethimbo lyeshito, Jehova okwa lombwele Omwana oohapu ndhika a ti: “Natu shiteni aantu ye tu fe, oshifetha shetu.” (Genesis 1:26) Mokati kiishitwa ayihe aalumentu naakiintu oyo owala taya vulu okuhogolola okuulika ohole mokuholela He yawo yomegulu. Dhimbulukwa kutya Jehova okwa longitha iinamwenyo yi ili noyi ili okuulika omaukwatya ge ga simanenena. Ihe okwa hogolola omuntu ngoka e li oshishitwa she shokombanda yevi sha tongomana a thaneke uukwatya we dhingi wohole.—Hesekiel 1:10.

18 Ngele tatu ulike ohole yokwaaihola mwene ndjoka tayi wilikwa komakotampango, otatu ulike uukwatya waJehova wa dhenga mbanda. Otatu ningi naanaa ngaashi omuyapostoli Johannes ngoka a nyola a ti: “Otse otu hole, oshoka Kalunga okwa kala e tu hole tango.” (1 Johannes 4:19) Ihe omomikalo dhini Jehova a kala e tu hole tango?

Jehova oye u ulika tango ohole

19. Omolwashike taku vulu okutiwa kutya ohole otayi dhana onkandangala onene miilonga yaJehova yokushita?

19 Kalunga oye u ulukila tango iishitwa ye ohole. Kakele kaashono, oshike she mu inyengitha a tameke okushita iinima? Ine shi ninga molwaashoka ando a li a sa ezaza. Okwi igwanena  noina pumbwa ekwatho lyasha. Ihe ohole ye ndjoka yi li uukwatya tawu longo oyo ye mu inyengitha a pe iishitwa ye iinandunge omagano gomwenyo, opo yi vule wo okushambukilwa onkalamwenyo. Omwana awike oye “ekota lyiishitwa ayihe yaKalunga.” (Ehololo 3:14) Jehova oye a longitha e li Engomba okushita iinima yilwe, ngaashi aayengeli. (Job 38:4, 7; Aakolossa 1:16) Iishitwa mbyoka yopambepo iinandunge oya shitwa yi na emanguluko lyokuninga omatokolo gopandunge nogopamaiyuvo, naashoka oshe shi ninga tashi wapa opo yi vule okukala yi na ekwatathano lyopahole niishitwa iikwawo yopambepo nosho wo naJehova Kalunga. (2 Aakorinto 3:17) Onkee ano, oyi mu hole molwaashoka oye a kala tango e yi hole.

20, 21. Adam naEva oya li ye na uunzapo wuni mboka tawu ulike kutya Jehova oku ya hole, noya li yi inyenge ngiini kwaashoka?

20 Kalunga okwa li wo u ulukile aantu yokombanda yevi ohole. Okwa kala ta sile Adam naEva oshimpwiyu okuza sho e ya shiti. Sho ya li mOparadisa muEden, oya li ye wete kutya kehe shimwe shi li mo otashi ulike kutya He oku ya hole. Tala shoka Ombiimbeli tayi ti: “OMUWA Kalunga okwa toto eyana muEden, kuuzilo, nokwa langeke mo omuntu ngoka e mu shiti.” (Genesis 2:8) Mbela owe enda nale moshikunino oshiwanawa noonkondo nenge moparka? Oshike sha li shihokitha unene kungoye? Mbela uuyelele wetango mboka ho kala wu wetele pokati komafo? Omalwaala goongala dha yoolokathana? Epopomo lyuumulonga mboka wa taakana mo nenge okulila kwuudhila nokwuupuka? Ezimba lyiimeno nolyiiyimati noonsheno? Kashi na nduno mbudhi kutya oshike sha li shituntula unene kungoye, oshikunino nenge oparka ndjoka itayi vulu okuyelekanithwa noshikunino shaEden. Omolwashike tatu tile ngawo?

21 Oshikunino shoka osha li sha longekidhwa kuJehova mwene. Osha yela kutya osha li ehala dhingi kombanda yevi. Omiti adhihe dhamo odha li dhihokitha nomiwanawa okutala nenge hadhi imi iiyimati iitoye. Osha li hashi tekelwa nawa, sha andjuka nawa noshu udha iinamwenyo yomaludhi gi ili nogi ili yihokitha. Adam naEva oya li ye na kehe shimwe tashi ya nyanyudha monkalamwenyo, mwa kwatelwa iilonga tayi mbilipaleke noya  li taya nyanyukilwa eendathano ewanawa. Jehova oye a kala e ya hole tango noya li ye na etompelo ewanawa okukala ye mu hole. Ihe inaye shi ninga. Pehala lyokuvulika nohole kuHe gwomegulu, oye mu tukululile oshipotha omolwokwiihola.—Genesis, ontopolwa 2.

22. Jehova okwi inyenge ngiini kuunashipotha womuEden u ulike kutya ohole ye oyi na uudhiginini?

22 Shoka kasha li tuu sha yemateke Jehova omunahole! Mbela shoka osha li she mu ningitha a kale e na olungwenye? Aawe. “Esilohenda lye [nenge ohole ye yi na uudhiginini, NW] otayi kala aluhe.” (Episalomi 136:1) Onkee ano, okwa ningi po elongekidho meendelelo opo a kulile oluvalo lwaAdam naEva ndoka lu na iikala yu uka. Ngaashi twe shi mona nale, limwe lyomasiloshimpwiyu ngoka Jehova a longekidha po, olyo ekuliloyambo lyOmwana omuholike ndyoka lye mu pula oshindji.—1 Johannes 4:10.

23. Omolwashike taku tiwa kutya Jehova ‘oKalunga omunelago,’ nepulo lya simanenena lini tali ka yamukulwa montopolwa tayi landula?

23 Odhoshili kutya okuza ketameko lyeshito, Jehova okwa kala nokuululika aantu ohole. Opu na omikalo odhindji ndhoka tadhi ulike kutya okwa kala “e tu hole tango.” Ohole ohayi humitha komeho elongelokumwe nenyanyu, onkee ano, kapu na omalimbililo sho a popiwa e li ‘Kalunga omunelago.’ (1 Timoteus 1:11, OB-1954) Ihe epulo lya simana ndyoka tali vulu okuholoka po olyo: Mbela oku tu hole ngaa shili pauhandimwe? Epulo ndyoka otali ka kundathanwa montopolwa tayi landula.

^ okat. 11 Omanyolo gopaKriste gOshigreka oga longitha olundji oshityalonga phileo shoka tashi ti kutya “okukala wu hole gumwe nenge we mu hokwa (ngaashi omuntu ha kala e uvitile kuume ke kopothingo nenge omumwayina).” Oshitya storge shoka tashi ti ohole ndjoka hayi kala pokati kaapambele osha longithwa muTimoteus omutiyali 3:3 okuulika kutya ohole ndjoka otayi ka kala ya pumba momasiku gahugunina. Ohole ndjoka hayi kala pokati komulumentu nomukiintu hayi ithanwa eros mOshigreka inayi popiwa mo mOmanyolo gopaKriste gOshigreka, nonando ohole yoludhi ndoka otayi popiwa mOmbiimbeli.—Omayeletumbulo 5:15-20.

^ okat. 15 Opu na omautumbulilo galwe gopamanyolo gu ukila ko: “Kalunga oye uuyelele” nosho wo “Kalunga . . . oye omulilo hagu lungunitha.” (1 Johannes 1:5; Aahebeli 12:29) Ihe ndhindhilika kutya omautumbulilo ngoka oge li molupe lwomufethelamo, molwaashoka otaga faathanitha Kalunga niinima yomeshito. Ota faathanithwa nuuyelele, molwaashoka ye omuyapuki nomuyuuki. Muye kamu na “omilema” nokwa yogoka thiluthilu. Ota vulu wo okufaathanithwa nomulilo omolwoonkondo dhe dhokuhanagula ndhoka ha longitha.