Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 24

Kapu na shoka tashi vulu “oku tu topola ko kohole yaKalunga”

Kapu na shoka tashi vulu “oku tu topola ko kohole yaKalunga”

1. Aantu yamwe mwa kwatelwa Aakriste yamwe yashili ohaya kala ye na omadhiladhilo ga puka geni?

MBELA Kalunga oku ku hole pauhandimwe? Yamwe otaye shi zimine kutya oku hole aantu ayehe, ngaashi Johannes 3:16 ta ti. Ihe ohaya kala yu uvite kutya ‘Kalunga ita vulu nando okukala e ya hole pauhandimwe.’ Odhoshili kutya nAakriste otashi vulika ya kale ye na omalimbililo moshinima shoka. Omulumentu gumwe ngoka a li a teka omukumo okwa ti: “Oshidhigu noonkondo kungame okwiitaala kutya Kalunga oku na ko nasha nangame.” Mbela nangoye osho ho kala wu uvite ngaaka omathimbo gamwe?

2, 3. Olye a hala tu kale twi itaala kutya katu na oshilonga shasha momeho gaJehova, nongiini tu na okukondjitha oshinima shoka?

2 Satana okwa halelela tu kale tu uvite kutya Jehova Kalunga ke tu hole ye ke na natse. Olundji Satana oha hongolola shili aantu ya kale ya hokwa iinima yowala noya kale ye na uuntsa. (2 Aakorinto 11:3) Oha ningitha wo mboka ye li poondondo dhopevi ya kale ye wete kutya kaye na oshilonga. (Johannes 7:47-49; 8:13, 44) Shika osho shi li ngaaka unene tuu ‘pomasiku ngaka gahugunina.’ Aantu oyendji kunena oya putukila momaukwanegumbo moka kaamu “na olukeno nohenda.” Yalwe oye li aluhe mokati kaamboka aapwidhi, yi ihole yo yene naamboka ihaa yawala. (2 Timoteus 3:1-5, yelekanitha OB-1954.) Otashi vulika ya kale ya tompwa kutya kaye na oshilonga nenge kaye holike molwaashoka oya kala taya ningwa onyanya nenge ontondo uule womimvo odhindji.

3 Ino teka omukumo ngele oho kala wu uvite ngaaka. Oyendji yomutse ohatu kala twi isa uunye omathimbo gamwe. Ihe dhimbulukwa kutya Oohapu dhaKalunga odhi li po “oku ulukila omuntu ondjila yu uka,” nosho wo ‘okuhanagula po omapopilongulu omanene.’ (2 Timoteus 3:16; 2 Aakorinto 10:4) Ombiimbeli  otayi ti: “Otatu kala tu uvite omukumo okukala koshipala shaKalunga. Oshoka eiyuvo lyetu ngele otali tu pe uusama, nena otu shi shi kutya Kalunga oye omunene e vule eiyuvo lyetu nokwa tseya iinima ayihe.” (1 Johannes 3:19, 20) Natu tale kiinima ine moka Omanyolo tage tu kwathele tu kale tu “uvite omukumo” mohole yaJehova.

Owu na ongushu momeho gaJehova

4, 5. Ethaneko lyaJesus li na ko nasha nenza otali ulike ngiini kutya otu na ongushu momeho gaJehova?

4 Shotango, Ombiimbeli otayi popi shu ukilila kutya Kalunga okwa simaneka aapiya ye. Pashiholelwa, Jesus okwa ti: “Omanza gaali itaga landithwa po nani nando okapeni kamwe akeke? Nokuli kapu na nando olimwe lyomugo tali gwile [pevi], Ho ngele ina hala. Nomafufu geni agehe gokomutse oga yalulwa. Ano inamu tila: one mu vule omanza ogendji.” (Mateus 10: 29-31) Natu tale kutya oohapu ndhoka odha li tadhi ti shike kaapulakeni yaJesus yomethelemumvo lyotango.

‘One omu vule omanza ogendji’

5 Otashi vulika twi ipule kutya omolwashike omuntu e na okulanda enza. Pethimbo lyaJesus enza olyo lya li oshikulya shi na ombiliha. Ngele owu na okapeni kamwe oto vulu okulanda omanza gaali. Ihe Jesus okwa popi wo kutya ngele omuntu oku na uupeni uyali oha pewa omanza gatano, pehala lyokupewa gane. Enza limwe olya li hali gwedhwa po molwaashoka kali na ongushu yasha. Otashi vulika aantu ya li ya tala ko uudhila mboka kaawu na oshilonga, ihe Omushiti okwe wu tala ko ngiini? Jesus okwa ti: “Kapu na nando olimwe [naandyoka lya gwedhwa po] lya dhimbiwa kuKalunga.” (Lukas 12:6, 7) Ngashingeyi otu wete kutya Jesus okwa li a hala okutya shike. Ngele enza limwe oli na ongushu momeho gaJehova, ongiini shi na ko nasha naantu? Ngaashi Jesus e shi popya, Jehova oku shi ashihe kombinga yetu. Oshi li mondjila sho taku tiwa kutya omafufu getu gokomutse oga yalulwa.

6. Omolwashike tu na uushili kutya Jesus okwa li mondjila sho a ti kutya omafufu getu gokomutse oga yalulwa?

6 Mbela omafufu getu gokomutse oga yalulwa? Yamwe otashi vulika ya tye kutya Jesus ka li ta popi oshili. Ihe dhiladhila owala  ketegameno lyeyumuko. Mbela Jehova ota ka vula ngaa oku tu yumudha ngele ke tu shi nawa? Otu na ongushu momeho ge nokwa tseya nawa okanima kehe hoka ke li kutse, mwa kwatelwa uuthigululwakwatya wetu niimoniwa ayihe mbyoka twa pita muyo, niinima mbyoka ote ke yi dhimbulukwa. * Onkee ano, oshipu kuye okutseya omafufu getu gokomutse ngoka ge li 100- 000 lwaampono.

Jehova okwa hokwa shike mutse?

7, 8. (a) Omaukwatya gamwe geni Jehova a nyanyukwa okumona sho ta konakona momitima dhaantu? (b) Iilonga yimwe yini hatu longo Jehova a hokwa?

7 Oshitiyali, Ombiimbeli otayi tu longo shoka Jehova a hokwa maapiya ye. Oha kala a nyanyukilwa uukwatya uuwanawa mboka tu na noonkambadhala dhetu ndhoka hatu ningi. Omukwaniilwa David okwa li a lombwele omwanamati Salomo a ti: ‘Omadhiladhilo getu agehe noondjuulukwe dhetu adhihe Kalunga oku dhi shi.’ (1 Ondjalulo 28:9) Ngaashi Kalunga ha konakona momitima dhaantu omabiliyona muuyuni mbuka wu udha elongitho lyoonkondo nuutondwe, oha kala a nyanyukwa uuna ta konakona omitima dhaamboka ye hole ombili, oshili nuuyuuki. Jehova oha ningi po shike ngele okwa mono omuntu ngoka e mu hole, nokwa hala okwiilonga kombinga ye nokulombwela yalwe ontseyo ndjoka? Oha ndhindhilike mboka haya lombwele yalwe kombinga ye. Oku na nokuli ‘embo lyokudhimbulukwa’ ayehe ‘mboka haye mu tila nohaya simaneke edhina lye.’ (Maleaki 3:16, KB) Okwa lenga aantu mboka ye na omaukwatya ngoka.

8 Iilonga yimwe iiwanawa mbyoka Jehova a lenga oyini? Oyo oonkambadhala dhetu okuholela Omwana, Jesus Kristus. (1 Petrus 2:21) Oshilonga shimwe sha simanenena shoka Kalunga a lenga  osho okuuvitha onkundana ombwanawa yUukwaniilwa we. Aaroma 10:15 (OB-1954) otaya ti: “Oompadhi odho opala ngiini dhaamboka haa uvitha oonkundana oombwanawa!” Otashi vulika ihaatu mono oompadhi dhetu dho “opala.” Ihe odhi lile po oonkambadhala ndhoka hadhi ningwa kaapiya yaJehova okuuvitha onkundana ombwanawa. Oonkambadhala adhihe ndhoka oombwanawa nodhi na ongushu momeho ge.—Mateus 24:14; 28:19, 20.

9, 10. (a) Omolwashike tu na uushili kutya Jehova oha pandula ngele tatu idhidhimikile omaudhigu? (b) Oshike shoka Jehova ihaa ningi ngele ta konenene aapiya ye aadhiginini?

9 Jehova okwa lenga wo eidhidhimiko lyetu. (Mateus 24:13) Dhimbulukwa kutya Satana okwa hala wu pilamene Jehova. Esiku kehe to kala omudhiginini kuJehova oto ulike kutya Satana omufundja. (Omayeletumbulo 27:11) Ethimbo limwe ihashi kala oshipu okwiidhidhimika. Ohatu tsakaneke omashongo ngaashi okwaahenuukolele, okuhupa shokadhila nokukala twa gwililwa po kiimpwiyu nokiinima iikwawo mbyoka hayi dhigupaleke onkalamwenyo. Okutegelela ethimbo ele ohaku gombokitha omwenyo. (Omayeletumbulo 13:12) Okwiidhidhimikila omashongo ngoka okwa simana kuJehova. Shoka osho  molwaashoka omukwaniilwa David a pula Jehova a ‘pungule’ omahodhi ge nokwa popi wo nomukumo a ti: “Inaga nyolelwa nani membo lyoye?” (Episalomi 56:8) Eeno, Jehova ohe tu pandula noha dhimbulukwa omahodhi getu omolwokumona iihuna hoka hatu idhidhimikile manga twa kakatela uudhiginini wetu kuye. Iinima mbyoka nayo okwe yi lenga.

Jehova ohe shi pandula ngele tatu idhidhimikile omaudhigu

10 Ihe otashi vulika iikala yokwiisa uunye yi kale tayi tu ningitha tu tinde uushili wa yela kutya Kalunga okwe tu tala ko tu na ongushu. Otashi vulika yi tu ningithe tu kale tatu ipopile momitima tatu ti: ‘Opu na aantu oyendji ye li iiholelwa iiwanawa ye vule ndje. Jehova iha kala tuu a yemata ngele tatu iyelekanitha nayalwe!’ Ye iha yelekanitha aantu molwaashoka oku na ondjele. (Aagalati 6:4) Oha konenene neitulomo omitima dhetu noha ndhindhilike omaukwatya getu omawanawa, nokuli nonando kagi iwetikile naanaa.

Oha gandja eitulomo komaukwatya omawanawa

11. Momukalo moka Jehova u ungaunga noshinima shaAbija otatu ilongo mo shike?

11 Oshititatu, ngele Jehova te tu konakona oha gandja unene eitulomo komaukwatya getu omawanawa. Pashiholelwa, sho a tokola aashunimonima ayehe yomezimo lyomukwaniilwa Jerobeam ya dhipagwe, okwa popi kutya Abija, gumwe gwomoyanamati yomukwaniilwa na lilwe osa nokufumvikwa nesimaneko. Omolwashike mbela? Omolwaashoka “oye awike OMUWA, Kalunga kaIsraeli, e mu hokwa.” (1 Aakwaniilwa 14:1,10-13) Okwa li a tala momutima gwomulumentu ngoka omugundjuka nokwa mono mo sha e shi “hokwa.” Kashi na nduno mbudhi kutya uukwatya mboka owa li owundji shi thike peni, Jehova okwa li e wete we eleka okupopiwa mOohapu dhe. Oku ulike wo olupandu sho a shilipaleke kutya oshilyo shimwe muukwanegumbo mboka uushunimonima osha fumvikwa nesimaneko.

12, 13. (a) Ongiini oshinima shomukwaniilwa Josafat tashi ulike kutya Jehova oha mono uuwanawa mboka wu li mutse nonando otwa yona? (b) Ngele tashi ya kiilonga yetu nomaukwatya getu omawanawa, Jehova ohu ulike ngiini kutya oku li Omuvali omunahole?

12 Natu tale koshiholelwa oshiwanawa shomukwaniilwa Josafat ngoka a li nomaukwatya omawanawa. Sho omukwaniilwa a  li inaa katuka pandunge, omupolofeti gwaJehova okwe mu lombwele a ti: “Shoka wa longo, oshe ku tukulile ondjahi yOMUWA.” Oohapu ndhoka kadha li tuu dha kwata miiti! Ihe etumwalaka lyaJehova inali hulila owala mpoka. Omupolofeti okwa gwedha ko a ti: “Ihe nando ongeyi, mungoye omu na ngaa uuwanawa washa.” (2 Ondjalulo 19:1-3) Ondjahi yaJehova yi li pauyuuki kaya li ye mu imbi a mone uukwatya uuwanawa waJosafat. Mepingathano naashoka, tu li aantu inaaya gwanenena ihatu dhimbulukwa omaukwatya omawanawa gayalwe ngele twe ya geela. Ngele otwa yona, eyeme, ohoni nokwiipa uusama mbyoka hatu kala tu na, otashi vulika yi tu imbe okumona uuwanawa mboka hatu longo. Dhimbulukwa kutya ngele otwi iyele ombedhi nokukambadhala okwaaha longa we uulunde, Jehova ote ke tu dhimina po.

13 Ngele Jehova te tu konakona, ohe ekelehi kokule oondjo dhetu, oku shi popya pathaneko, ngaashi owala aakongi yoshingoli haye ekelehi evi ndyoka kaali na oshilonga konima ngele ya kutha mo oshingoli. Ongiini shi na ko nasha nomaukwatya getu omawanawa niilonga yetu? Jehova okwa lenga omaukwatya getu omawanawa niilonga yetu iiwanawa ngaashi owala aakongi yoshingoli haya kala ye shi lenga noku shi dhiginina. Mbela owe shi ndhindhilika ngaa kutya aavali yamwe oye hole omathano ngoka  oyana ya thaneka noonyala nenge iinima yontumba mbyoka ya ninga kosikola, nohaye yi pungula uule womimvo notashi vulika oyana ye yi dhimbwa nale nokuli? Jehova oku li Omuvali dhingi. Ngele otwa kala aadhiginini ita ka dhimbwa nandonando iilonga yetu nomaukwatya getu omawanawa. Otu shi kutya ite ke yi dhimbwa molwaashoka ke shi omukeenuuyuuki nandonando. (Aahebeli 6:10) Opu na natango omukalo gulwe guhokitha moka Jehova he tu tala ko.

14, 15. (a) Omolwashike Jehova ha mono uuwanawa mutse, nonando inatu gwanenena? Shi thaneka. (b) Jehova ota ka ninga shike nuuwanawa mboka e wete mutse, noha tala ko ngiini aapiya ye aadhiginini?

14 Jehova oku shi kutya inatu gwanenena noku shi shoka tatu vulu okulonga. Dhiladhila kwaashika: Aantu mboka haya thaneke omathano noonyala nenge haya hongo iinima yilwe ohaya longo nuudhiginini opo ye yi opaleke nawa ngele ya kulupa nenge ngele ya yonuka. Pashiholelwa, ethano limwe lya thanekwa noonyala komuthaneki omunekeka, Leonardo da Vinci, lyongushu yoodola dhAmerika omamiliyona 30, ndyoka lya kala lya pungulwa mehala lyomaulikilo muLondon, shaEngland, olya li lya yahwa komuntu gwontumba. Ihe kapwa li nando gumwe a dhiladhila li ekelwehi. Mbalambala opwa ningwa omalongekidho opo ethano ndyoka li na oomvula 500 lwaampoka li opalekululwe. Omolwashike mbela? Omolwaashoka olya li li na ongushu kaantu mboka ye hole iinima ya hongwa nomake. Mbela tseni aantu katu na ongushu tu vule omathano ga tya ngaaka? Otu na ongushu momeho gaJehova Kalunga, kutya nduno otwa yonagulwa shi thike peni kokwaahagwanenena. (Episalomi 72:12-14) E li Omushiti gwetu omunekeka, ota ka ninga kehe shoka a pumbwa okuninga opo a galulile aantu ayehe mboka haya taamba ko omasiloshimpwiyu ge gopahole megwaneneno.—Iilonga 3:21; Aaroma 8:20-22.

15 Jehova oha mono uuwanawa mutse mboka tashi vulika ihaatu mono. Sho tatu mu longele otatu ka ninga ehumokomeho ewanawa ngolongo twa thiki megwaneneno. Okwa hokwa aapiya ye aadhiginini nokwe ya tala ko ye li eliko li na ondilo kutya nduno uuyuni waSatana owu ungaunge nayo ngiini.—Haggai 2:7.

 Jehova ohu ulike ohole ye okupitila miilonga

16. Jehova okwe shi ulika ngiini kutya oku tu hole, notu shi shi ngiini kutya omagano ngoka e tu pa otaga ti sha kutse pauhandimwe?

16 Oshitine, Jehova oha ningi oshindji tashi ulike kutya oku tu hole. Ekuliloyambo lyaKristus otali ulike sha yela kutya Satana okwa fundja sho a ti kutya katu na oshilonga kuJehova noke tu hole shili. Dhimbulukwa kutya eso lyaJesus tali uvitha omwenyo omutoye koshiti nosho wo uuwehame mboka Jehova i idhidhimikile mokutala Omwana omuholike ta dhipagwa otayi ulike shili kutya oye tu hole. Shiyemateka, aantu oyendji ohaya mono oshidhigu okwiitaala kutya omagano ngoka otaga ti sha kuyo pauhandimwe. Ohaya kala ye wete kaaye na oshilonga. Dhimbulukwa kutya Omuyapostoli Paulus okwa li omuhepeki gwaalanduli yaKristus. Ihe konima yethimbo okwa nyola a ti: ‘Omuna gwaKalunga oku hole ndje nokwa gandja omwenyo gwe molwandje.Aagalati 1:13; 2:20.

17. Jehova ohe tu hilile ngiini kuye nokOmwana?

17 Jehova okwe tu ulukila ohole ye moku tu kwathela pauhandimwe tu mone uuwanawa meyambo lyaKristus. Jesus okwa ti: “Kaku na nando omuntu ta vulu okuya kungame, okuninga Tate, nguka a tuma ndje, te mu e ta kungame.” (Johannes 6:44) Eeno, Jehova ohe tu hilile kOmwana noketegameno lyomwenyo gwaaluhe. Ngiini mbela? Okupitila miilonga yokuuvitha onkundana ombwanawa ndjoka tu uvithilwa pauhandimwe, okupitila mombepo ye ondjapuki ndjoka Jehova ha longitha tu uve ko ooshili dhopambepo noku dhi tula miilonga nonando otu na omangambeko noinatu gwanenena. Ota vulu oku tu lombwela ngaashi a li a lombwele Aaisraeli a ti: “Ondi mú hole aluhe notandi mú hilile kungame nohole yaaluhe.”—Jeremia 31:3.

18, 19. (a) Jehova okwe shi ulika ngiini kutya oku tu hole momukalo omwanawa noonkondo, noshike tashi ulike kutya ohe tu sile oshimpwiyu pauhandimwe? (b) Oohapu dhaKalunga otadhi tu shilipaleke ngiini kutya oha pulakene nohenda?

18 Uuthembahenda mboka tu na wokugalikana owu li euliko kutya Jehova oku tu hole momukalo omwanawa noonkondo. Ombiimbeli otayi lombwele kehe gumwe gwomutse a ‘galikane aluhe’ kuye. (1 Aatessalonika 5:17) Oha pulakene komagalikano  getu, nomolwaashono ti ithanwa nokuli ‘Omuuvi gwomagalikano.’ (Episalomi 65:2) Oshilonga shika ine shi pa nando omuntu gulwe nokuli nando oye Omwana. Dhiladhila owala Omushiti gweshito alihe te tu hiya tu mu galikane, tatu popi twa manguluka. Mbela ye omupulakeni a tya ngiini? Mbela oha kukuka ngaa noku na ko nasha natse? Eeno.

19 Jehova ohe tu uvile uukwawo wanankali. Uukwawo wanankali oshike? Omukuluntugongalo gumwe omudhiginini okwa ti: “Uukwawo wanankali owo okukala nuuwehame woye momutima gwandje.” Mbela Jehova oha kala ngaa e uvite shili uuwehame wetu? Oohapu dhe otadhi popi nkene a li ha kala e uvite ngele oshigwana she, Israeli tashi mono iihuna tadhi ti: “Momahepeko gawo agehe okwe ya nikile oluhodhi.” (Jesaja 63:9, KB) Kali owala e wete omaudhigu gawo, ihe okwa li e yu uvitile uukwawo wanankali. Oohapu dhe kaapiya ye odha yelitha nawa nkene ha kala e uvite tadhi ti: ‘Ngoka te mu gumu, ota gumu ondanda yeho lyandje.’ * (Sakaria 2:8, KB) Jehova ohe tu uvile shili uukwawo wanankali. Ngele tatu ehamekwa ohashi mu ehameke wo.

20. Omadhiladhilo ga puka geni tu na okuhenuka ngele otwa hala okuvulika komayele ngoka taga adhika mAaroma 12:3?

20 Nonando Jehova oku tu hole shili, tu li Aakriste ye na ondjele katu na okukala nuuntsa nenge twi ihole tse yene. Paulus okwa nyola a ti: “Omolwomagano gesilohenda lyaKalunga ngoka nde ga pewa, onda hala oku mú lombwela one amuhe: Inamu idhiladhilila pehala mpoka inaamu adha, ihe dhiladhileni pandjele. Kehe gumwe gwomune ni iyeleke pamuthika gweitaalo ndyoka Kalunga e li mu pa.” (Aaroma 12:3) Etoloko limwe otali ti: “Onda hala okulombwela kehe gumwe gwomune kutya ini itala ko e na ongushu onene yi vulithe pwaandjoka e na shili, ihe ni itale ko pandjele.” (A Translation in the Language of the People, kuCharles B. Williams) Nonando otwa nyanyukwa sho tu shi kutya  Tate yetu gwomegulu oku tu hole, natu dhimbulukwe kutya inatu gwana nando noinatu eleka okuulukilwa ohole kuye.—Lukas 17:10.

21. Iifundja yaSatana yini tu na okweekelahi, noshili yOmbiimbeli yini tu na okudhimbulukwa aluhe opo tu shilipaleke omitima dhetu kutya Kalunga oku tu hole?

21 Atuheni natu ningeni ngaashi tatu vulu tu ekelehi iifundja ayihe yaSatana, mwa kwatelwa iifundja kutya katu na oshilonga nokatu holike shili kuJehova. Ngele oho dhiladhila kutya Kalunga ke ku hole pauhandimwe omolwoonkalo ndhoka wa pita mudho nenge kutya iilonga yoye iiwanawa ke na nayo nenge omayono goye ogendji noku wete taga vulu okudhimwa po pakankameno lyekuliloyambo lyOmwana gwe, dhimbulukwa kutya omadhiladhilo ngoka oga puka. Ge ekelahi molwaashoka iifundja yo yeneyene! Natu tsikile okunkondopaleka omitima dhetu noohapu dhaPaulus dha nwethwa mo tadhi ti: “Oshoka ondi shi shi kutya kaku na nando oshinima shimwe tashi vulu okututopola ko kohole yaKalunga: haeso nenge omwenyo, haayengeli nenge aapangeli naanankondo yomegulu, haambyoka yongashingeyi nenge mbyoka tayi ke ya, hauyuni wokombanda nenge wokohi. Meshito kamu na sha tashi vulu oku tu topola ko kohole yaKalunga yi li muJesus Kristus, Omuwa gwetu.”—Aaroma 8:38, 39.

^ okat. 6 Ombiimbeli oya popya lwiikando kutya opu na ekwatathano pokati keyumuko nedhimbuluko lyaJehova. Omulumentu omudhiginini Job okwa lombwele Jehova a ti: ‘Ando u holeke ndje ethimbo lyu uthwa e to ka dhimbulukwa ndje ihe konale.’ (Job 14:13) Jesus okwa li ta popi eyumuko ‘lyaayehe mboka ye li moombila.’ Shika oshe eleka molwaashoka Jehova ota ka dhimbulukwa oonakusa ayehe mboka a hala oku ka yumudha.—Johannes 5:28, 29.

^ okat. 19 Omatoloko gamwe otaga ti kutya omuntu ngoka ta gumu oshigwana shaKalunga, ota gumu ondanda yeho lyoshigwana shaIsraeli, ihe hayaKalunga. Epuko ndika olya ningwa kaalongimpango yamwe mboka ya li ya tala ko oohapu ndhika kaadhi shi dhoshili, nomolwaashono ye dhi lundulula. Elundululo ndyoka ya ninga otali imbi aantu ya kale ye uvite ko nkene Jehova ha kala e yu uvitile uukwawo wanankali.