Inda koshikalimo

Inda koshikongitho oshitiyali

Inda koshikalimo

Oonzapo dhaJehova

Oshindonga

Hedha popepi naJehova

 ONTOPOLWA 2

Mbela oto vulu ngaa shili ‘okuhedha popepi naKalunga’?

Mbela oto vulu ngaa shili ‘okuhedha popepi naKalunga’?

1, 2. (a) Oshike aantu oyendji tashi vulika ya kale ye wete itaashi wapa, ihe Ombiimbeli otayi tu shilipalekele shike? (b) Abraham okwa li e na ekwatathano lyopothingo nalye, nomolwashike?

OTO ka kala wu uvite ngiini uuna Omushiti gwegulu te ku lombwele kutya ngoye “okuume kandje”? Oyendji otashi vulika taya dhiladhila kutya itashi wapa. Ongiini omuntu gwowala ta vulu okuninga kuume kaJehova Kalunga? Ombiimbeli otayi tu shilipaleke kutya otatu vulu lela okuhedha popepi naKalunga.

2 Tatekulululwa Abraham ngoka a li ko nale okwa li e na ekwatathano lya tya ngaaka, na Jehova okwa li e mu ithana “kuume” ke. (Jesaja 41:8) Eeno, Jehova okwa li a tala ko Abraham e li kuume ke. Okwa li e na ekwatathano lyopothingo naKalunga molwaashoka okwa li i ‘itaala muYe.’ (Jakob 2:23) Kunena Jehova oha “gama” kwaamboka taye mu longele molwaashoka ye mu hole. (Deuteronomium 10:15, OB-1954) Oohapu dhe otadhi tu ladhipike tadhi ti: “Hedheni kuKalunga, oye nota hedha kune.” (Jakob 4:8) Moohapu muka omu na ehiyo nosho wo euvaneko.

3. Jehova ote tu hiya tu ninge shike, nokwe tu uvanekela shike ngele tatu shi ningi?

3 Jehova ote tu hiya tu hedhe popepi naye. Okwi ilongekidha nokwa halelela tu ninge ookuume ke. Okwe tu uvanekela wo kutya ngele otwa katuka onkatu okuhedha popepi naye, ota ka hedha wo popepi natse. Kungeyi, otatu vulu okukala ‘ookuume kOMUWA,’ oshinima shoka shi na ondilo lela. * (Episalomi  25:14) Oshitya ‘kuume’ otashi gandja edhiladhilo lyokupopya iiholekwa nakuume kopothingo.

4. Hokolola kutya kuume kopothingo omuntu a tya ngiini, nongiini Jehova e li kuume kaamboka taya hedha popepi naye?

4 Mbela owu na kuume kopothingo ngoka wi inekela? Kuume ngoka oku na okukala e na ko nasha nangoye. Owe mu inekela, molwaashoka oku shi okwiinekelwa. Oho kala wa nyanyukwa noonkondo ngele to mu lombwele oshiholekwa shoye. Oho kala wa hekelekwa molwaashoka ohe ku pulakene nolukeno. Nokuli nonando otashi monika yamwe ya fa kaayu uvite ko uudhigu woye, ye oha kala e wu uvite ko. Sha faathana, ngele owa hedha popepi naKalunga, ota ningi Kuume koye kopothingo ngoka e ku simaneka, e na ko nasha nangoye lela nohu uvu ko omaudhigu goye agehe. (Episalomi 103:14; 1 Petrus 5:7) Oto kala we mu inekela nomutima gwoye aguhe, molwaashoka owu shi kutya omwiinekelwa kwaamboka ye mu inekela. (Episalomi 18:25) Ihe uuthembahenda mbuka wokukala nekwatathano lyopothingo naKalunga otawu monika owala molwaashoka e shi ninga tashi wapa.

Jehova okwa pala ondjila

5. Oshike Jehova a ninga po opo tu vule okuhedha popepi naye?

5 Ngele katu na ekwatathano naJehova, itatu vulu nando okuhedha popepi naye molwaashoka otu li aalunde. (Episalomi 5:4) Omuyapostoli Paulus okwa nyola mAaroma 5:8 a ti: “Kalunga okwe tu hololele kutya oku tu hole, Kristus sho a si peha lyetu, manga twa li aalunde.” Eeno, Jehova okwa ninga po elongekidho opo Jesus a ‘gandje omwenyo gwe, a hupithe oyendji.’ (Mateus 20:28) Eitaalo lyetu mekuliloyambo ndyoka olye shi ninga tashi wapa opo tu hedhe popepi naKalunga. Okwa dhika po ekankameno lya kola tu pange uukuume naye, molwaashoka “okwa kala e tu hole tango.”—1 Johannes 4:19.

6, 7. (a) Otu shi shi ngiini kutya Jehova omuntu ngoka ta vulu okutseyika? (b) Jehova okwe tu ihololele momikalo dhini?

6 Jehova okwa katuka onkatu yilwe sho e tu ihololele. Uukuume kehe owa kankamena kokutseya omuntu nawa,  okukala wa lenga omaukwatya ge nomikalo dhe. Onkee ano, ando Jehova okwa li Kalunga ihaa monika, kee shiwike, ando itatu vulu nando okuhedha popepi naye. Ihe pehala lyokwiiholeka, okwa hala tu mu tseye. (Jesaja 45:19) Natango, okwe tu ihololele atuhe, mwa kwatelwa nokuli naamboka ya dhinika pataloko lyuuyuni.—Mateus 11:25.

Jehova okwi iholola okupitila miinima mbyoka a shita nosho wo mOohapu dhe

7 Jehova okwe tu ihololele ngiini? Iinima mbyoka a shita otayi holola uukwatya we, ngaashi oonkondo dhe oonenenene, uunongo we wa dhenga mbanda nohole ye onenenene. (Aaroma 1:20) Kakele kiinima mbyoka a shita, opu na natango iinima oyindji mbyoka tayi tu hololele oshindji kombinga ye. Jehova oye omugandji gwuunongo a dhenga mbanda nokwe tu ihololela mOohapu dhe, Ombiimbeli.

Tala ‘esilohenda lyOMUWA’

8. Omolwashike taku vulu okutiwa Ombiimbeli otayi gandja uunzapo kutya Jehova oku tu hole?

8 Ombiimbeli otayi gandja uunzapo kutya Jehova oku tu hole. Okwi iholola mOohapu dhe momautumbulilo ngoka taga vulu okuuviwa ko, inu ulika owala kutya oku tu hole, ihe okwa holola kutya okwa hala wo tu mu tseye notu kale tu mu hole. Shoka tatu lesha membo ndyoka lya simanenena otashi tu kwathele tu mone ‘esilohenda lyOMUWA’ notashi tu inyengitha tu hedhe popepi naye. (Episalomi 90:17) Natu kundathaneni omikalo dhimwe tadhi nyanyudha omutima moka Jehova e tu ihololela mOohapu dhe.

9. Omautumbulilo gamwe geni mOmbiimbeli taga popi omaukwatya gaKalunga?

9 MOmanyolo omu na omautumbulilo ogendji taga popi omaukwatya gaKalunga. Tala iiholelwa yimwe. “OMUWA oku hole shoka shu uka.” (Episalomi 37:28) Kalunga oku na ‘oonkondo oonene.’ (Job 37:23, OB-1954) Jehova okwa ti kutya ngame “omudhiginini.” (Deuteronomium 7:9) “Oye omunandunge.” (Job 9:4) Oye ‘Kalunga omunamutimahenda, omunalukeno nomutalanteni, iha geye mbala noku udha esilohenda nuudhiginini.’ (Eksodus 34:6) “OMUWA, ongoye  omunalukeno noho tu dhimine po.” (Episalomi 86:5) Ngaashi sha tumbulwa montopolwa ya tetekele, “ohole” oyo uukwatya we wumwe dhingi. (1 Johannes 4:8) Ngele to tedhatedha komaukwatya ge ngoka omawanawa, mbela itashi ku ningitha wu hedhe popepi naKalunga ngoka itaa vulu okuyelekwa nasha?

Ombiimbeli otayi tu kwathele tu hedhe popepi naJehova

10, 11. (a) Jehova okwa popya shike mOohapu dhe opo e tu kwathele tu tseye nawa omaukwatya ge? (b) Oshiholelwa shOmbiimbeli shini tashi tu kwathele tu kale twa fa tu wete oonkondo dhaKalunga?

10 Kakele koku tu lombwela omaukwatya ge, Jehova okwa gandja nohole iiholelwa yokondandalunde mOohapu dhe nkene a li u ulukile yamwe omaukwatya ngoka. Iiholelwa mbyoka otayi gandja ethano lya tsa ndyoka tali tu kwathele tu uve ko nawa oombinga dhi ili nodhi ili dhomaukwatya ge, naashika otashi ke tu hedhitha popepi naye. Natu taleni koshiholelwa shimwe.

11 MOmbiimbeli otatu lesha mo kutya Kalunga “oonkondo dhe oonenenene.” (Jesaja 40:26) Otatu lesha mo wo nkene Kalunga a li a hupitha Aaisraeli e te ya pititha mEfuta Etiligane noku ya sila oshimpwiyu mombuga uule woomvula 40. Kala wa fa wu wete omeya ogendji taga topoka pokati. Kala ando wa fa wu wete Aaisraeli 3 000 000 taye ende puukukutu, omanga omeya gefuta ga thikama ga fa omakuma koombinga noombinga. (Eksodus 14:21; 15:8) Oto vulu okumona nkene Kalunga a li a sile oshimpwiyu oshigwana she mombuga. Okwe shi pe omeya okuza memanya. Okwa li wo e shi pe iikulya ya fa oombuto oontokele. (Eksodus 16:31; Numeri 20:11) Jehova inu ulika owala oonkondo dhe, ihe okwa li e dhi longitha okukwathela oshigwana she. Itashi tu hekeleke  tuu okutseya kutya omagalikano getu ohaga yi kuKalunga omunankondo ngoka e li “epopilongulu noonkondo dhetu! Okwi ilongekidha aluhe okukwatha momathimbo guudhigu.”—Episalomi 46:1.

12. Jehova okwe tu kwathele ngiini tu “mone” nkene a tya mokulongitha omautumbulilo ngoka tatu vulu okuuva ko?

12 Nonando Jehova oku na olutu lwopambepo, okwa ninga po oshindji tu mu tseye. Aantu ohatu mono owala iinima mbyoka hayi vulu okumonika nomeho gopantu, ihe ihatu vulu okumona mehala moka hamu kala iishitwa yopambepo. Ando Kalunga okwe tu lombwelele kombinga ye ta longitha omautumbulilo gopambepo, otashi ka kala owala sha fa omuntu to kambadhala okuyelithila gumwe ngoka a valwa omuposi eholokopo lyoye, ngaashi olwaala lwomeho goye nenge iitotono kolutu lwoye. Pehala lyaashono, okwa longitha omautumbulilo ngoka tatu vulu okuuva ko opo e tu kwathele tu “mone” nkene a tya. Omathimbo gamwe, oha longitha omifethelamo nomafaathanitho, ti ifaathanitha niinima mbyoka tu shi. Okwi ipopya nokuli e na iilyo yolutu ya fa yaantu. *

13. Jesaja 40:11 ote tu kwathele tu kale twa fa tu wete shike, naashoka otashi tu gumu ngiini?

13 Tala nkene Jehova ta popiwa muJesaja 40:11 taku ti: “Ongomusita ta litha oshigunda she; oonzigona ote dhi gongele pamwe noku dhi humbata momaako ge.” Mpaka Jehova ota yelekanithwa nomusita gwoonzi ngoka ha humbata uunzigona “momaako ge.” Shika otashi ulike kutya ota vulu okugamena nokuyambidhidha oshigwana she, nokuli naamboka ya nkundipala. Ite ke tu ekelehi nando note ke tu gamena noshikaha she shi na oonkondo, ngele otwa kala aadhiginini muye. (Aaroma 8:38, 39) Jehova oye Omusita Omunene  gwoonzi noha humbata uunzigona “momaako ge,” nohe wu humbata monguwo ye, ngaashi owala omusita gwoonzi ha humbata okanzigona hoka opo ka valwa. Kungeyi, otu na uushili kutya oku tu hole nohe tu sile oshimpwiyu. Oshi li paunshitwe okukala twa hala okuhedha popepi naye.

‘Omwana okwa hala oku mu holola’

14. Omolwashike tatu vulu okutya Jehova okwi iholola momukalo gwa dhenga mbanda okupitila muJesus?

14 Jehova okwa holola uukwatya we mOohapu dhe momukalo gwa dhenga mbanda okupitila mOmwana omuholike Jesus. Kapu na ngoka ta vulu okudhiladhila ngaashi Kalunga nokukala nomaiyuvo ga fa ge thiluthilu nenge a yelithe nawa kombinga Ye ngaashi Jesus. Omwana omutango okwa kala nale naHe omanga iishitwa yopambepo naambyoka yokevi inaayi shitwa. (Aakolossa 1:15) Jesus okwa kala e na ekwatathano lyopothingo naJehova. Onkee ano, okwa li a vulu okupopya ta ti: “Kaku na ngoka a tseya kutya Omwana oye lye, Tate oye awike. Osho wo kaku na ngoka a tseya kutya Tate olye, Omwana oye awike, naangoka  Omwana a hala oku mu [holola].” (Lukas 10:22) Sho Jesus a li a kombanda yevi okwa holola He momikalo mbali dha simana.

15, 16. Omomikalo mbali dhini Jesus a holola omaukwatya gaHe?

15 Omukalo gwotango, omalongo gaJesus otage tu kwathele tu tseye He. Jesus okwa popya kombinga yaJehova nomautumbulilo ngoka taga gumu omutima. Pashiholelwa, Jesus okwa faathanitha Jehova nahe omuvali ngoka a li a matuka nokupapatela omwanamati ngoka a li a kana, noku mu thipa komilungu sho a galukile kegumbo opo a yelithile aantu olukeno ndoka Kalunga ha kala e nine aalunde mboka tayi itedhulula. (Lukas 15:11-24) Jesus okwe shi ulike wo kutya Jehova oku li Kalunga ngoka ha ‘hilile’ aantu yomitima dhu uka kuye molwaashoka oku ya hole pauhandimwe. (Johannes 6:44, OB-1954) Oha kala e shi shi uuna enza tali gwile pevi. Jesus okwa yelitha a ti: “Inamu tila: one mu vule omanza ogendji.” (Mateus 10:29, 31) Shika otashi tu ningitha tu hedhe kuKalunga ngoka e na ko nasha natse shili.

16 Omukalo omutiyali, oshiholelwa shaJesus otashi tu ulukile kutya Jehova okwa tya ngiini. Jesus okwa li a holele He thiluthilu nomolwaashoka okwa popi a ti: “Kehe ngoka a mono ndje, okwa mona wo Tate.” (Johannes 14:9) Sho tatu lesha mOmavaangeli kombinga yaJesus, nkene a li u uvitile aantu nosho wo nkene a li u ungaunga nayo, otatu ki ilonga okupitila muye kutya He omuntu a tya ngiini. Ngoka ogwo omukalo dhingi moka Jehova e tu hololela omaukwatya ge. Omolwashike tatu tile ngawo?

17. Yelitha to longitha ethaneko nkene Jehova e tu kwathela tu uve ko kutya okwa tya ngiini.

17 Oku shi thaneka: Natu tye andola oto kambadhala okuyelithila gumwe kutya olukeno oshike. Otashi vulika wu lu fatulule niitya yontumba. Ihe ngele owe mu ulukile oshiholelwa shagumwe ngoka ta longo iilonga yolukeno e to ti: “Shoka osho oshiholelwa sholukeno,” nena oshitya “olukeno” otashi ka kala shi na eityo lyolela notashi ku uviwa ko nuupu. Jehova okwa ninga oshinima sha faathana opo e tu kwathele tu  uve ko kutya okwa tya ngiini. Ini ipopya owala ta longitha iitya, ihe okwe tu pa wo oshiholelwa shOmwana. Omaukwatya gaKalunga otaga monika okupitila muJesus. Omavaangeli otaga hokolola kutya Jesus oku li ngaashi Jehova. MOmavaangeli moka Jehova okwa fa ta popi ta ti: “Ngame osho ndi li ngaaka.” Omanyolo ga nwethwa mo otaga hokolola ngiini Jesus sho a li kombanda yevi?

18. Jesus okwa li u ulike ngiini oonkondo, uuyuuki nuunongo?

18 Omaukwatya gane gaKalunga ga simana ogi iwetikile nawa muJesus. Oku na oonkondo okuhulitha po omikithi, ondjala neso nokuli. Jesus ina longitha oonkondo ndhoka papuko nenge e dhi longithe e ehameke yalwe, ngaashi aantu yamwe haya ningi. (Mateus 4:2-4) Oku hole uuyuuki. Uuyuuki owo wa li we mu ningitha opo a geele aahalithi mboka ya li taya nyokoma aantu motempeli. (Mateus 21:12, 13) Okwa li u ungaunga nawa noohepele nosho wo naamboka ya thiminikwa nopwaahe na okayoya nokwa li e ya kwathela ya ‘vululukithe’ oomwenyo dhawo. (Mateus 11:4, 5, 28-30) Jesus ngoka e “vule Salomo,” momalongo ge omu na uunongo mboka kaawu shi okuyelekwa nasha. (Mateus 12:42) Ihe Jesus ka li hi iyulike nando omolwuukwatya we mboka. Oohapu dhe odha li dha gumu oomwenyo dhaantu, molwaashoka omalongo ge oga li ga yela, gu uvitiwe ko noge na oshilonga.

19, 20. (a) Ongiini Jesus u ulike kutya ye oshiholelwa dhingi shohole? (b) Sho tatu lesha nokutedhatedha oshiholelwa shaJesus, oshike tu na okukaleka momadhiladhilo?

19 Jesus oye oshiholelwa dhingi shohole. Okwa li u ulike ohole muukalele we momikalo dha yoolokathana mwa kwatelwa uukwawo wanankali nokukenukila aantu. Okwa li ha kala u uvitile ohenda mboka taya mono iihuna. Okwa kwathele aantu iikando niikando molwaashoka oku na ko nasha nayo. (Mateus 14:14) Nonando Jesus okwa li a aludha aavu nokupalutha aasindjala, okwa li u ulike olukeno momukalo gwa dhenga mbanda. Okwa kwathele yalwe ya tseye, ya taambe ko nokukala ye hole oshili yUukwaniilwa waKalunga mboka tawu ke etela aantu omauwanawa taga kalelele. (Markus 6:34;  Lukas 4:43) Ihe omolwohole ye, Jesus okwa gandja omwenyo gwe nehalo ewanawa omolwetu.—Johannes 15:13.

20 Itashi kumitha sho aantu yomapipi agehe nomaputuko gi ili nogi ili ya li yu uvite ya manguluka okuya kuJesus ngoka e na olukeno nomaiyuvo gomuule. (Markus 10:13-16) Ihe sho tatu lesha nokutedhatedha oshiholelwa shaJesus, natu kaleke aluhe momadhiladhilo uushili mboka kutya Omwana oku na uukwatya wa fa waHe thiluthilu.—Aahebeli 1:3.

Oshikwathithi shokukonakona Ombiimbeli

21, 22. Okukonga Jehova okwa kwatela mo shike, nomembo ndika omu na shike shoka tashi vulu oku tu kwathela tu shi ninge?

21 Kapu na omalimbililo kutya Jehova okwa hala tu hedhe popepi naye sho e tu ihololele sha yela mOohapu dhe. Nonando ongaaka, ihe tu kondjitha tu kale tu na ekwatathano lyopothingo naye. Otu na oshinakugwanithwa okukonga Jehova “manga ta monika.” (Jesaja 55:6) Oku mu konga osha kwatela mo okutseya omaukwatya ge nomikalo dhe ngaashi dha popiwa mOmbiimbeli. Embo ndika olya nuninwa oku ku kwathela moshinima shoka.

22 Oto ka mona kutya olya topolwa miitopolwa mbyoka tayi popi omaukwatya gane gaKalunga ga tongomana: oonkondo, uuyuuki, uunongo nohole. Petameko lyoshitopolwa kehe uukwatya mboka owa kundathanwa paufupi. Oontopolwa dhontumba  tadhi landula otadhi kundathana nkene Jehova hu ulike omaukwatya ngoka momikalo dhi ili nodhi ili. Oshitopolwa kehe oshi na ontopolwa ndjoka tayi ulike nkene Jesus u ulika uukwatya mboka nosho wo ontopolwa ndjoka tayi kundathana nkene tatu vulu oku wu ulika monkalamwenyo yetu.

23, 24. (a) Yelitha elalakano lyokampungu “Omapulo gokutedhatedha.” (b) Okutedhatedha ohaku tu kwathele ngiini tu hedhe lela popepi naKalunga?

23 Okuza pontopolwa ndjika wu uka komeho, opu na okampungu ke na oshipalanyolo: “Omapulo gokutedhatedha.” Pashiholelwa, tala okampungu hoka ke li pepandja 24. Omanyolo nomapulo ngoka ge li mo kage shi eendululo lyontopolwa. Pehala lyaashono, otage ku kwathele wu tedhatedhe iitsa ya simana mbyoka ya kundathanwa. Ongiini to vulu oku yi longitha nawa? Tala enyolo kehe ndyoka li li mo noku li lesha. Opo nduno tala kepulo ndyoka li li penyolo kehe e to tedhatedha kombinga yalyo. Oto vulu okukonga uuyelele wa gwedhwa po. Ipula omapulo ga gwedhwa po ngaashi: ‘Uuyelele mbuka otawu lombwele ndje shike kombinga yaJehova? Owa guma onkalamwenyo yandje ngiini? Ongiini tandi vulu oku wu longitha ndi kwathele yalwe?’

24 Okutedhatedha hoka otaku ke ku kwathela wu hedhe lela popepi naJehova. Omolwashike mbela? Omolwaashoka Ombiimbeli oya kwatakanitha okutedhatedha nomutima. (Episalomi 19:15, OB-1954) Uuna tatu tedhatedha nolupandu shoka tatu ilongo kombinga yaKalunga, otashi ka ningina momitima dhetu dhopathaneko nokunwetha mo omadhiladhilo nosho wo omaiyuvo getu nolwahugunina otashi ke tu inyengitha tu katuke onkatu. Otashi ka kokeka ohole yetu yokuhola Kalunga, nohole ndjoka otayi ke tu inyengitha tu kale twa hala oku mu nyanyudha e li Kuume ketu kopothingo. (1 Johannes 5:3) Opo tu kale ookuume ke, otu na okutseya omaukwatya ge noondjila dhe. Ihe tango, natu kundathaneni uuyapuki we uukwatya mboka tawu tu kwathele tu hedhe popi naye.

^ okat. 3 Oshitya shOshihebeli shoka sha tolokwa ‘kuume’ sha longithwa muAmos 3:7, otashi ti kutya OMUWA Omupangeliawike oha hololele aapiya ye ‘shoka ta ka ninga’ oku ya tseyithila komeho yethimbo omalalakano ge ngoka a hala okuninga.

^ okat. 12 Pashiholelwa, Ombiimbeli otayi popi oshipala shaKalunga, omeho, omakutsi, eyulu, omaako noompadhi dhe. (Episalomi 18:15; 27:8; 44:3; Jesaja 60:13; Mateus 4:4; 1 Petrus 3:12) Ihe shoka inashi hala okutya Jehova oku na iilyo yolutu mbyoka ngaashi aantu yopanyama. Ngoka omupopyofano owala ngaashi ha popiwa taku ti ye “emanya” nenge ‘egameno.’—Deuteronomium 32:4; Episalomi 84:11.